Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xihondzo Xo Rindza (Nkandziyiso Wa Vandlha)  |  2006-07-15

I Yini Mfumo Wa Xikwembu?

I Yini Mfumo Wa Xikwembu?

VANHU va humeleriwe hi mhangu leyikulu swonghasi eku sunguleni ka matimu ya vona! Ntsumi yin’wana yi xandzukele vulawuri bya Loyi a yi vumbeke. Muxandzuki loyi u yenge wansati wo sungula, Evha, leswaku a dya mbhandzu lowu yirisiweke. Loko yi kombetela eka yena ni nuna wakwe Adamu, ntsumi leyi yi te: “Entiyisweni mi nga ka mi nga fi. Hikuva Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.” (Genesa 2:16, 17; 3:1-5) Ntsumi leyi leyi xandzukeke yi vitaniwe Diyavulosi na Sathana.—Nhlavutelo 12:9.

Xana Evha u ma yingisile marito ya Sathana? Bibele ya hi hlamusela: “Wansati a vona leswaku murhi a wu fanelekela ku dyiwa nileswaku a wu navetisa mahlo, ina, murhi a wu languteka wu naveleka. Hiloko a teka mbhandzu wa wona a dya. Endzhaku ka sweswo a teka wun’wana a nyika nuna wakwe loko a ri na yena, na yena a dya.” (Genesa 3:6) Ina, mpatswa wo sungula, Adamu na Evha, va hlanganyele na Sathana eku xandzukeni kakwe. Hikwalaho ka sweswo, vona ni vana va vona va lahlekeriwe hi Paradeyisi. Vana lava a va ta velekiwa va hetisekile naswona va ri ni ntshembo wo hanya hilaha ku nga heriki, se a va ta velekiwa va ri ni xidyoho naswona eku heteleleni a va ta fa.—Varhoma 5:12.

Xana Yehovha Xikwembu, Mufumi la Tlakukeke wa vuako hinkwabyo u hlamule njhani? A a tiyimisele ku endla lunghiselelo ra ku rivaleriwa ka swidyoho. (Varhoma 5:8) Yehovha Xikwembu u tlhele a simeka hulumendhe leyi a yi ta lulamisa mhangu leyi. Lunghiselelo leri ri vuriwa “mfumo wa Xikwembu.” (Luka 21:31) Mfumo lowu, lowu simekiweke tanihi mpfuno lowu engetelekeke eka vulawuri bya Xikwembu bya vuako hinkwabyo wu ni xikongomelo xo karhi.

Hi xihi xikongomelo xa Mfumo wa Xikwembu? Hi swihi swilo swin’wana leswi wu nga ta swi endla naswona swi hambana njhani ni leswi endliwaka hi mimfumo ya vanhu? Xana Mfumo lowu a wu ta sungula rini ku fuma? Swivutiso leswi swi ta tlhuvutsiwa eka xihloko lexi landzelaka.