Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! DECEMBER 2015

 LESWI BIBELE YI SWI VULAKA

Moya-xiviri

Moya-xiviri

Vukhongeri byi ni mavonelo yo hambanahambana mayelana ni moya-xiviri ni leswaku ku endleka yini hi wona loko hi fa. Hambiswiritano, Bibele yi hi nyika nhlamuselo leyi twisisekaka.

Xana moya-xiviri a wu fi?

LESWI VANHU VA SWI VULAKA

Vanhu vo tala va pfumela leswaku moya-xiviri a wu fi. Van’wana va tshemba leswaku wu ya wu ya hanya emirini wun’wana endzhaku ka loko miri wu file. Van’wana va pfumela leswaku wu hundzela endhawini yin’wana, tanihi ni le tilweni kumbe etiheleni.

LESWI BIBELE YI SWI VULAKA

Bibele a yi teki moya-xiviri tanihi lowu nga fiki. Hakanyingi yi vula leswaku moya-xiviri wa fa. Muprofeta Ezekiyele, loyi Xikwembu xi n’wi tirhiseke ku tsala xiphemu xo karhi xa Bibele, u vule leswaku moya-xiviri wu xupuriwa hi ku fa. Eka xiendlakalo xin’wana, Bibele yi tirhisa rito leri nge ‘moya-xiviri lowu feke’ ku hlamusela ntsumbu. (Levhitika 21:11) Swi le rivaleni leswaku Bibele a yi dyondzisi swona leswaku moya-xiviri a wu fi.

“Moya-xiviri lowu dyohaka—wona wu ta fa.”Ezekiyele 18:20.

Xana moya-xiviri wu hambanile ni miri?

LESWI VANHU VA SWI VULAKA

Moya-xiviri wa hanya loko munhu a ha hanya kambe loko a fa wa nyamalala.

LESWI BIBELE YI SWI VULAKA

Bibele yi hlamusela manana tanihi loyi a tswalaka “mimoya-xiviri,” leswi vulaka vanhu lava hanyaka, lava kotaka ku hefemula. (Genesa 46:18) Entiyisweni, rito ra Xiheveru leri tirhisiweke eBibeleni leri yimelaka “moya-xiviri” ri nga hundzuluxeriwa ri va “ku hefemula.” Minkarhi yin’wana rito leri ri tirhisiwa ni le ka swiharhi. Ku tlula kwalaho, Bibele yi hlamusela moya-xiviri tanihi lowu lavaka swakudya. (Deteronoma 12:20) Loko moya-xiviri a wu hambanile ni miri, xana a wu ta lava ku hefemula kumbe ku dya? EBibeleni rito leri nge “moya-xiviri” hakanyingi ri kombetela eka munhu loyi a hanyaka hi ku helela, ku katsa ni miri, mintlhaveko ni vumunhu byakwe.

“Hi ku famba ka nkarhi a tswalela Yakobe vana . . . mimoya-xiviri ya 16.”Genesa 46:18.

 Ku humelela yini hi moya-xiviri loko hi fa?

LESWI BIBELE YI SWI VULAKA

Ha tiyiseka leswaku loko mimiri ya hina yi fa, “a ku na ntirho hambi ku ri kungu, vutivi kumbe vutlhari eSheol.” (Eklesiasta 9:10) Matsalwa ma hi byela leswaku loko munhu un’wana a fa, u “tlhelela entshurini wa yena; hi siku rero miehleketo yakwe ya lova.” (Pisalema 146:4) Moya-xiviri lowu feke a wu koti ku tirha, hakanyingi Matsalwa ma vula leswaku va fi va “etlele,” hi ndlela yo fanekisela.—Matewu 9:24.

HA YINI SWI RI SWA NKOKA?

Loko u feriwa hi lava u va rhandzaka, u lava ku tiva tinhlamulo ta swivutiso swo fana ni leswi: Vafi va kwihi? Va le ka xiyimo xihi? Xana va le ku xanisekeni? Leswi Bibele yi hi tiyisekisaka leswaku vafi a va twi nchumu, hi nga chaveleleka ku tiva leswaku vafi a va le ku xanisekeni nikatsongo. Hi nga tlhela hi chaveleleka ku tiva leswaku Yehovha u tshembise ku pfuxa vafi, mimoya-xiviri leyi feke leswaku yi tlhela yi hanya enkarhini lowu taka.—Esaya 26:19.

“Lava feke, a va tivi nchumu nikatsongo.”Eklesiasta 9:5.

DYONDZA SWO TALA

Mavunwa Ya Leswaku Xikwembu Xi Na Tihanyi

Vo tala va kholwa leswaku Xikwembu xi xupula vadyohi hilaha ku nga heriki. Xana Xikwembu xi na tihanyi? Xana ku humelela yini loko hi fa?

I Yini Ku Pfuxiwa Ka Vafi?

Swi nga ha ku hlamarisa ku twa leswaku i vamani lava nga ta pfuxiwa enkarhini lowu taka.