Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! OCTOBER 2015

 NHLOKOMHAKA YA XIFUNENGETO

Swivutiso Swinharhu Leswi Vanhu Va Nga Tsakelaka Ku Swi Vutisa Xikwembu

Swivutiso Swinharhu Leswi Vanhu Va Nga Tsakelaka Ku Swi Vutisa Xikwembu

SUSAN u sungule ku va ni swivutiso hi Xikwembu a ri ni malembe ya nkombo loko munghana wakwe Al loyi a a ri ni malembe ya kaye a ye exibedlhele hikwalaho ka vuvabyi byo khwanyana swirho ni ku hefemula hi ku pfuniwa hi muchini. U tsale hi leswi a swi tokoteke eka phephahungu ra The New York Times ra January 6, 2013.

Endzhaku ko endzela Al exibedlhele, Susan u vutise mana wakwe a ku: “Ha yini Xikwembu xi xanisa munghana wa mina?”

Mana wakwe u hlamule a ku: “Mufundhisi u ri Xikwembu xi fanele xi ri ni swivangelo, hambileswi ndzi nga swi tiviki leswaku hi swihi.”

Endzhaku ka malembe mambirhi hi 1954, Jonas Salk u kote ku endla murhi wo horisa vuvabyi lebyi, kutani mana wa Susan u vule leswaku kumbexana wanuna loyi u pfuniwe hi Xikwembu eka ndzavisiso wa yena.

Susan u te: “Xikwembu a xi fanele xi hatle xi kongomisa madokodela leswaku Al a nga fiki eka xiyimo xa ku tirhisa muchini ku hefemula.”

Loko Susan a hlamusela hi ku komisa leswi n’wi humeleleke evuhlangini byakwe, u ri: “[Al] u file endzhaku ka malembe ya nhungu naswona hi nkarhi wolowo a ndzi nga ha tshembi leswaku Xikwembu xi kona.”

Ku fana na Susan, vo tala lava xanisekeke kumbe lava va voneke maxangu, va tsandzeka ku kuma tinhlamulo leti enerisaka hi swivutiso leswi va nga na swona mayelana ni Xikwembu. Kasi van’wana va vula leswaku Xikwembu a xi kona. Van’wana a va kaneti leswaku Xikwembu xi kona kambe va kanakana.

A swi vuli swona leswaku lava kanakanaka Xikwembu ni lava vulaka leswaku a xi kona, a va tivi nchumu hi vukhongeri. Kambe leswi va swi voneke eka vukhongeri, hi swona leswi va endlaka leswaku va tlangela ekule na byona. Va vula leswaku vukhongeri byi tsandzekile ku hlamula swivutiso swo tika mayelana ni vutomi. Hi swihi swivutiso swa kona? Lexi hlamarisaka, swivutiso leswi va nga na swona, swa fana ni leswi lava nga eka vukhongeri va tsandzekaka ku swi hlamula. A hi buleni hi swivutiso swinharhu leswi loko vanhu a vo pfumeleriwa ku swi vutisa Xikwembu, a va ta xi vutisa swona ni tinhlamulo leti humaka eBibeleni.

 1 “HA YINI U PFUMELELA KU XANISEKA?”

Ha yini hi vutisa xivutiso lexi?

Vo tala va ri: ‘Loko Xikwembu a xi ri ni rirhandzu a xi ta sivela ku xaniseka.’

LESWI U FANELEKE U SWI TIVA: Hi nga ha vona mindhavuko ni mahanyelo ya tinxaka tin’wana swi nga tolovelekanga swi tlhela swi hi hlamarisa. Swi nga endleka hi va teka hi ndlela yo biha. Hi xikombiso, eka tinxaka tin’wana loko u vulavula ni munhu u n’wi langutile swi komba leswaku u vulavula ntiyiso, kasi eka tin’wana swi komba leswaku a wu xiximi. Hambiswiritano, a ku na xivangelo xo vula leswaku ku ni lava va nga ni xihoxo. Swo lava leswaku hi va tiva ku antswa.

Xana swi nga va tano loko swi ta emhakeni ya ku twisisa Xikwembu? Vo tala va vula leswaku maxangu lama nga kona ma komba leswaku Xikwembu a xi kona. Lava se va twisisaka leswaku ha yini Xikwembu xi pfumelela ku xaniseka va pfumela leswaku xi kona.

LESWI BIBELE YI SWI VULAKA: Miehleketo ya Xikwembu yi tlakukile ku tlula ya hina. (Esaya 55:8, 9) Hikwalaho ka sweswo, swiendlo swa xona ni swivangelo leswi endlaka leswaku xi nga hatli xi teka goza, swi nga ha twala swi nga twisiseki.

Kambe Bibele a yi vuli leswaku hi amukela swin’wana ni swin’wana leswi vanhu va swi vulaka, swo fana ni leswaku “tindlela ta Xikwembu a ti twisiseki.” Ku ri na sweswo, Bibele yi khutaza leswaku hi dyondza swo tala hi Xikwembu leswaku hi ta twisisa tindlela ta xona. * Leswi swi ta hi pfuna leswaku hi tshinela ekusuhi na xona.—Yakobo 4:8.

 2 “HA YINI VUKHONGERI BYI TELE HI VUKANGANYISI?”

Ha yini hi vutisa xivutiso lexi?

Van’wana va nga ha ku: ‘Loko Xikwembu a xi tsakela leswaku vanhu va tshembeka, a ku nga ta va ni vakanganyisi vo tala lava vulaka leswaku va gandzela Xikwembu.’

LESWI U FANELEKE U SWI TIVA: Anakanya hi jaha leri siyaka muti wa tata wa rona laha ri kurisiweke kahle kutani ri ya hanya vutomi bya vusopfa. Tata wa rona a nga tsaki hi xiboho xa rona, kambe wa ri tshika ri famba. Loko swi ya ri fambela ximatsi, xana lava nga ta ri vona, va ta va va vula ntiyiso loko va ku ri kurisiwe hi tatana wo homboloka kumbe va vula leswaku a ri na tatana? A swi tano nikatsongo! Hilaha ku fanaka, vukanganyisi evukhongerini, byi kombisa leswaku Xikwembu xi pfumelela vanhu leswaku va tihlawulela ndlela ya vutomi.

LESWI BIBELE YI SWI VULAKA: Xikwembu xa byi venga vukhongeri lebyi nga ni vukanganyisi. (Yeremiya 7:29-31; 32:35) Hambiswiritano, xi pfumelela vanhu leswaku va endla leswi va swi rhandzaka. Vo tala lava va vulaka leswaku va pfumela eka Xikwembu, va tala ku landzela tidyondzo ta vanhu ni ku endla leswi va swi lavaka.—Matewu 15:7-9.

Kambe vukhongeri lebyi amukeriwaka hi Xikwembu a byi na vukanganyisi. * Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Rirhandzu leri a ri fanelanga ri va “na vukanganyisi.” (Varhoma 12:9) Vukhongeri byo tala byi tsandzekile ku hanya hi ndlela yoleyo. Hi xikombiso, hi nkarhi wa ku yayarheriwa ka rixaka hi 1994 le Rwanda, swirho swo tala swa tikereke swi dlaye vapfumerikulobye hi leswi a va ri va rixaka rimbe. Kambe, Timbhoni ta Yehovha a ti hlanganyelanga eku dlayeteriweni vanhu naswona to tala ti sirhelele vapfumerikulobye ni vanhu van’wana, hambileswi sweswo a swi ta peta vutomi bya tona ekhombyeni. Swiendlo swo tano swi komba leswaku swa koteka ku va eka vukhongeri lebyi nga riki na vukanganyisi.

 3 “HA YINI HI TUMBULUXIWILE?”

Ha yini hi vutisa xivutiso lexi?

Van’wana va nga ha tivutisa va ku: ‘Ha yini vanhu va hanya malembe ya 80 kumbe 90 kutani va fa? Ha yini vutomi byi komile?’

LESWI U FANELEKE U SWI TIVA: Vo tala lava nge Xikwembu a xi kona, va ku xiya ku saseka ka ntumbuluko ni ku hleleka ka wona. Va pfumela leswaku misava ya hina, tipulanete tin’wana ni n’weti leswi nga kona swi vekiwe eka ndhawu leyi faneleke ku endlela leswaku vutomi byi va kona emisaveni. Va vula leswaku milawu ya ntumbuluko leyi lawulaka matilo ni misava, yi endliwe hi ndlela leyinene lerova loko yo cinciwa katsongo, vutomi a byi nge he vi kona.

LESWI BIBELE YI SWI VULAKA: Hambileswi van’wana va vulaka leswaku vutomi bya hina byo koma i vumbhoni bya leswaku Xikwembu a xi kona, ntumbuluko wu swi veka erivaleni leswaku ku ni Muvumbi. (Varhoma 1:20) Loko a endla swilo hinkwaswo, a a ri ni xikongomelo naswona vukona bya hina i xin’wana xa swona. Xikwembu xi endle vanhu leswaku va hanya emisaveni hilaha ku nga heriki naswona a xi swi rivalanga sweswo.—Pisalema 37:11, 29; Esaya 55:11.

Hambileswi hi nga kotaka ku vona vukona bya Xikwembu ni timfanelo ta xona eka ntumbuluko, a xi nga lavanga leswaku hi dyondza hi swikongomelo swa xona hi ndlela yoleyo. Leswaku hi tiva swikongomelo swa Xikwembu ni leswaku ha yini hi ri kona, hi fanele hi vulavula ni Xikwembu. EBibeleni xi vulavula na hina, hi ku tirhisa marito yo olova. * Timbhoni ta Yehovha ta ku rhamba leswaku u tlhela u kambisisa tinhlamulo leti kumekaka kwalaho.

^ ndzim. 17 Leswaku u twisisa xivangelo xa leswaku ha yini Xikwembu xi pfumelela ku xaniseka, hlaya ndzima 11 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha. Ya kumeka ni le ka www.jw.org/ts

^ ndzim. 23 Leswaku u kuma rungula leri engetelekeke, hlaya ndzima 15 eka buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha. Nakambe ya kumeka eka www.jw.org/ts

^ ndzim. 29 Leswaku u kuma leswi engetelekeke, hlaya ndzima 3 eka buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha. Nakambe ya kumeka eka www.jw.org/ts

DYONDZA SWO TALA

Ha Yini Xikwembu Xi Pfumelela Vubihi Ni Ku Xaniseka?

Vubihi byi sungule njhani naswona ha yini Xikwembu xi byi pfumelele byi ya emahlweni? Xana ku xaniseka ku ta kala ku hela?

Xana Vukhongeri Bya Fana? Xana Hinkwabyo Bya Amukelaka Eka Xikwembu?

Tinhla timbirhi leti ku vulavuriwaka ha tona eBibeleni ti hi nyika nhlamulo.

Hi Xihi Xikongomelo Xa Vutomi?

Xana u tshame u tivutisa leswaku, ‘Hi xihi xikongomelo xa vutomi?’ Dyondza ndlela leyi Bibele yi hlamulaka xivutiso xexo.