Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  October 2015

 LESWI BIBELE YI SWI VULAKA

Hundzuluko

Hundzuluko

Vanhu van’wana va vula leswaku vutomi byi lo tiendlekela. Van’wana va hlamusela leswaku Xikwembu xi rhange xi vumba swilo switsongo, kutani xi swi tshika swi ya emahlweni swi tiendlekela. Xana Bibele yi ri yini?

Xana Bibele ya pfumelelana ni mhaka ya leswaku matilo ni misava swi ve kona endzhaku ka ku buluka ko karhi?

Bibele yi ri: “Eku sunguleni Xikwembu xi tumbuluxe matilo ni misava.” (Genesa 1:1) A yi swi hlamuseli hi ku kongoma leswaku Xikwembu xi swi endlise ku yini sweswo. Hambiloko ku ve ni ku buluka ko karhi loku vangeke leswaku ku va ni matilo ni misava, sweswo a swi kaneti leswi Bibele yi swi vulaka. Ku ri na sweswo, Genesa 1:1 yi hi byela loyi a endleke xiendlakalo xexo.

Vativi va sayense va vula leswaku matilo ni misava swi ve kona loko ku va ni ku buluka lokukulu loku ku nga lo tiendlekela naswona hi kona ku endleke leswaku tinyeleti ni tipulanete swi va kona ni ku tihlela hi swoxe. Bibele a yi pfumelelani ni mhaka yoleyo, kambe yi vula leswaku matilo ni misava swi endliwe hi Xikwembu, ku nga khathariseki leswaku xi swi endle hi ku buluka ko karhi kumbe hi tindlela tin’wana.

“Eku sunguleni Xikwembu xi tumbuluxe matilo ni misava.Genesa 1:1.

Xana Bibele yi pfumelelana ni leswaku swilo leswi hanyaka swa cinca hi ku famba ka nkarhi?

Ina. Bibele yi hlamusela leswaku Xikwembu xi tumbuluxe swilo hinkwaswo “hi ku ya hi mixaka ya swona.” (Genesa 1:11, 12, 21, 24, 25) Xana ku va ni ku hambana eka muxaka wo karhi wa swilo leswi hanyaka? Ina. Xana ku cinca loku vaka kona eka muxaka wo karhi, ku endla leswaku ku va ni muxaka lowuntswa? E-e.

Ehleketa hi xikombiso lexi: Emalembeni ya va 1970, valavisisi va endle ndzavisiso hi swindzingiri leswi kumekaka le Swihlaleni swa Galápagos. Va xiye leswaku ku cinca ka maxelo ku endla leswaku swindzingiri leswi nga ni milomu yo leha swi kota ku hanya. Leswi swi endle leswaku van’wana va gimeta hi ku vula leswaku swilo swi lo tiendlekela. Xana sweswo a ku ri vumbhoni bya ku tiendlekela ka swilo kumbe a ku ri ku fambisana ni ku cinca ka maxelo? Endzhaku ka malembe ku ve ni nhlayo leyi tlakukeke ya swindzingiri leswi a swi ri ni milomu leyitsongo. Mhaka leyi yi endle leswaku Jeffrey H. Schwartz, profesa wa dyondzo ya ndhavuko, a gimeta hi ku vula leswaku ku cinca ka maxelo ku nga pfuna muxaka wo karhi leswaku wu kota ku hanya, kambe sweswo a swi vuli leswaku ku cinca koloko ku “vumba muxaka lowuntshwa.”

 Xana Bibele ni dyondzo ya ku tiendlekela ka swilo swa fambisana?

Bibele yi vula leswaku “[Xikwembu xi] tumbuluxe swilo hinkwaswo.” (Nhlavutelo 4:11) A xi ‘wisanga’ ku kondza loko mintirho ya xona hinkwayo yo tumbuluxa yi hela. (Genesa 2:2) Leswi swi vula leswaku Xikwembu a xi vumbanga nchumu wun’we lowutsongo kutani xi wisa, loko nchumu lowu wu ri karhi wu heta malembe yo tala, wu cinca wu va swilo swo hambanahambana swo fana ni tinhlampfi, timfenhe ni vanhu. * Sweswo swi vuriwa macroevolution, ku nga dyondzo leyi vulaka leswaku a ku na Muvumbi, kambe Bibele yi vula leswaku Xikwembu xi “endle matilo ni misava, lwandle ni hinkwaswo leswi nga eka swona”—Eksoda 20:11; Nhlavutelo 10:6.

“Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo.”Nhlavutelo 4:11.

Dyondza leswi engetelekeke: Bibele yi vula leswaku “timfanelo ta [Xikwembu] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke.” (Varhoma 1:20) Ku dyondza hi Xikwembu swi endla leswaku hi hanya vutomi lebyi nga ni xikongomelo hikuva xikongomelo xa xona xi katsa hinkwavo lava xi rhandzaka. (Eklesiasta 12:13; Vaheveru 11:6) Leswaku u kuma rungula leri engetelekeke, nghena eka www.jw.org/ts kumbe u tihlanganisa ni Timbhoni ta Yehovha. Languta eka TIDYONDZO TA BIBELE > SWIVUTISO LESWI HLAMURIWAKA HI BIBELE.

^ ndzim. 12 Bibele a yi pfumelelani ni leswi van’wana lava pfumelaka eka Muvumbi va swi vulaka va ku Xikwembu xi tumbuluxe misava hi masiku ya tsevu. Hlaya leswi engetelekeke eka broxara leyi nge Xana Swilo Leswi Hanyaka Swi Lo Tumbuluxiwa? eka matluka 24-27. Broxara leyi yi kandziyisiwe hi Timbhoni ta Yehovha nakambe u nga yi kopa mahala eka www.jw.org/ts

DYONDZA SWO TALA

TIBUKU NI TIBROXARA

Xana Swilo Leswi Hanyaka Swi Lo Tumbuluxiwa?

I swa nkoka leswi u swi pfumelaka malunghana ni masungulo ya vutomi.