Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! AUGUST 2015

 LESWI BIBELE YI SWI VULAKA

Ku Lehisa Mbilu

Ku Lehisa Mbilu

Ku rivalela ni ku lehisa mbilu swi aka vuxaka lebyinene. Kambe xana ku lehisa mbilu ku fanele ku va ni swipimelo?

I yini lexi endlaka leswaku munhu a lehisa mbilu?

LESWI ENDLEKAKA NAMUNTLHA

Vanhu vo tala emisaveni va ni ximbilwambilwana, leswi swi vangiwa hi mahanyelo yo fana ni xihlawuhlawu, ni ku va munhu a ti teka a ri wa nkoka swinene ku tlula van’wana kumbe tinxaka tin’wana, ni vanhu lava hisekelaka vukhongeri hi ndlela leyi nga riki yinene.

LESWI BIBELE YI SWI VULAKA

Loko Yesu Kreste a ha ri laha misaveni a a hanya ni vanhu lava a va hatla va hela mbilu. Vayuda ni Vasamariya a va vengana. (Yohane 4:9) Vavanuna a va tekiwa va ri va nkoka ku tlula vavasati. Varhangeri va vukhongeri bya Xiyuda a va tala ku monya vanhu lava tolovelekeke. (Yohane 7:49) Kambe Yesu Kreste a a hambane swinene na vona. Vakaneti vakwe a va ku: “Munhu loyi u amukela vadyohi a tlhela a dya na vona.” (Luka 15:2) Yesu a a ri ni musa ni ku lehisa mbilu hikuva a a nga telanga ku avanyisa vanhu kambe a a tele ku va pfuna leswaku va va ni vuxaka lebyinene ni Xikwembu. Rirhandzu a ku ri nchumu wa nkoka eka yena.—Yohane 3:17; 13:34.

Yesu loyi hi faneleke hi tekelela ku lehisa mbilu kakwe a a nga telanga ku avanyisa vanhu kambe ku va pfuna leswaku va va ni vuxaka lebyinene ni Xikwembu

Rirhandzu ri endla leswaku munhu a lehisa mbilu, a kota ku hanyisana ni van’wana ku nga khathariseki ku nga hetiseki ka vona ni mikhuva yo karhi leyi va nga vaka na yona. Vakolosa 3:13 yi ri: “Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana.”

“Ku tlula hinkwaswo, rhandzanani hi rirhandzu ro enta, hikuva rirhandzu ri funengeta swidyoho swo tala.”1 Petro 4:8.

 Ha yini ku lehisa mbilu ku fanele ku va ni swipimelo?

NTIYISO WA MHAKA

Vanhu vo tala va ringeta ku hanya hi milawu yo karhi. Hikwalaho ka sweswo, va tala ku va ni swipimelo swo karhi eka ndlela leyi vanhu va tikhomaka ha yona.

LESWI BIBELE YI SWI VULAKA

“[Rirhandzu] a ri tikhomi hi ndlela leyi nga tengangiki.” (1 Vakorinto 13:5) Hambileswi Yesu a a ri xikombiso lexinene emhakeni ya ku lehisa mbilu, a a nga ku bi hi makatla ku tikhoma ko biha, vukanganyisi ni vubihi byin’wana. Kambe mikhuva yoleyo a a yi venga. (Matewu 23:13) U te: “Loyi a hanyaka hi swilo swo biha u venga ku vonakala [ka ntiyiso].”—Yohane 3:20.

Muapostola Pawulo la nga Mukreste u tsale a ku: “Nyenyani leswi hombolokeke, mi namarhela leswi nga swinene.” (Varhoma 12:9) A a hanya hi ku pfumelelana ni marito lawa. Hi xikombiso, loko Vayuda vo karhi lava nga Vakreste va tihambanisa ni Vakreste van’wana lava nga riki Vayuda, Pawulo loyi a a ri Muyuda u endle swo karhi hi mhaka leyi. (Vagalatiya 2:11-14) A a swi tiva leswaku Xikwembu lexi nga ‘yiki hi nghohe’ a xi nge swi pfumeleli leswaku vanhu va xona va va ni xihlawuhlawu.—Mintirho 10:34.

Tanihi Vakreste, Timbhoni ta Yehovha ti hanya hi milawu leyi nga eBibeleni. (Esaya 33:22) A ti byi pfumeleli vubihi exikarhi ka tona. Vandlha ra Vukreste leri baseke a ri fanelanga ri thyakisiwa hi vanhu lava nga landzeriki milawu ya Xikwembu. Hikwalaho, Timbhoni ti landzela nawu lowu nga eBibeleni lowu nge: “Susani munhu wo homboloka exikarhi ka n’wina.”—1 Vakorinto 5:11-13.

“N’wina lava rhandzaka Yehovha, vengani leswo biha.”—Pisalema 97:10.

Xana Xikwembu xi ta pfumelela vubihi hi laha ku nga heriki?

LESWI VANHU VA SWI VULAKA

Vubihi byi ta tshama byi ri kona hikuva i nchumu wa ntumbuluko lowu nga evanhwini.

LESWI BIBELE YI SWI VULAKA

Muprofeta Habakuku u khongele eka Yehovha Xikwembu a ku: “Ha yini u tshamela ku languta ku karhateka? Ha yini ku phanga ni madzolonga swi ri emahlweni ka mina, ha yini ku ri ni ku holova, naswona ha yini ku ri ni ku lwa?” (Habakuku 1:3) Xikwembu xi tiyisekise Habakuku leswaku xi ta teka goza hi vanhu vo homboloka. Loko xi vulavula hi xitshembiso lexi xi te: “Xi ta hetiseka hakunene. A xi nge hlweli.”—Habakuku 2:3.

Sweswi i nkarhi wa leswaku lavo homboloka va hundzuka eka swiendlo swa vona. “‘Xana ndza ku tsakela nikatsongo ku fa ka munhu wo homboloka,’ ku vula Yehovha, Hosi leyi Lawulaka, ‘ku nga ri swona leswaku a tlhela etindleleni takwe, a hambeta a hanya?’” (Ezekiyele 18:23) Lava lavaka ku yingisa Yehovha va cukumeta mikhuva ya vona yo biha, va ta va ni vumundzuku lebyinene. Swivuriso 1:33 yi ri: “Loyi a ndzi yingisaka, u ta tshama a sirhelelekile naswona a nge kavanyetiwi hi ku chava khombo.”

“Hi nkarhinyana, lowo homboloka a nge he vi kona . . . Lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”Pisalema 37:10, 11.

DYONDZA SWO TALA

Xikwembu I Munhu Wa Muxaka Muni?

Xana u tiva yini hi Xikwembu? I yini leswi hi nga swi dyondzaka leswaku hi xi tiva ku antswa?

Xana Xikwembu Xi Ta Endla Yini Hi Vubihi Lebyi Nga Kona?

Xana mhaka ya ku hanya emisaveni laha vanhu vo lulama va nga ta ka va nga humeleriwi hi swo biha a yi ku tsakisi?