Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  July 2015

 LESWI BIBELE YI SWI VULAKA

Ntirho

Ntirho

Bibele i buku ya khale kambe milawu ya yona a yi heleriwi hi nkarhi. Leswi yi swi vulaka hi ntirho swa ha pfuna ninamuntlha hilaha a swi ri hakona loko yi tsariwa.

Hi fanele hi wu teka njhani ntirho?

LESWI VAN’WANA VA SWI VULAKA

Leswaku swi ku fambela kahle entirhweni, u fanele u hanyela wona ntsena. Sweswo swi endle leswaku van’wana va nghena hi nhloko emintirhweni ivi va nga ha khathali hi mindyangu ni rihanyo ra vona.

LESWI BIBELE YI SWI VULAKA

Bibele yi hi khutaza leswaku hi ringanisela etimhakeni ta ntirho. Yi khutaza leswaku hi tirha hi matimba ku nga ri ku va malolo. (Swivuriso 6:6-11; 13:4) Bibele a yi hi khutazi ku va hi tidlaya hi ntirho. Kambe yi hi khutaza leswaku hi tlhela tinyika nkarhi wa ku wisa. Eklesiasta 4:6 yi ri: “Voko leri teleke ku wisa ra antswa ku ri ni mavoko mambirhi lama teleke ntirho wa matimba ni ku hlongorisa mheho.” Hikwalaho a hi fanelanga hi nghena hi nhloko entirhweni ivi hi rivala hi mindyangu kumbe rihanyo ra hina. Ku tidlaya hi ntirho a swi nge hi pfuni.

“Malunghana ni munhu a ku na nchumu xo antswa ku tlula leswaku a dya ni ku nwa, a endla leswaku moya-xiviri wakwe wu vona leswinene hikwalaho ka ku tikarhata kakwe.”Eklesiasta 2:24.

 Xana i swa nkoka leswaku u tirha ntirho wa njhani?

LESWI VAN’WANA VA SWI VULAKA

Loko ntirho wu holela kahle, u nga wu tshiki. Sweswo swi endle leswaku van’wana va nghena eka mintirho leyi nga riki enawini.

Van’wana lava vulaka leswaku, endla xin’wana ni xin’wana leswaku u kuma leswi u swi lavaka evuton’wini, va lava ntsena ntirho lowu va tsakisaka. Loko ntirho wa kona wu nga fanelani na vona kumbe wu nga va nyanyuli, va vula leswaku wa phirha. Hikwalaho, va va va nga rhandzi ntirho kambe vo hetisa nawu ntsena. Va tshika mintirho ya kahle hikuva va vona yi nga va faneli.

LESWI BIBELE YI SWI VULAKA

Bibele a yi hi khutazi ku endla mintirho leyi nga ni vuxisi kumbe leyi nga ta vavisa van’wana. (Levhitika 19:11, 13; Varhoma 13:10) Ntirho lowunene wu pfuna van’wana naswona loyi a tirhaka u va ni “ripfalo lerinene.”—1 Petro 3:16.

Bibele yi tlhela yi hi dyondzisa leswaku xikongomelo lexikulu xa ntirho i ku hi pfuna leswaku hi hlayisa mindyangu ya hina, ku nga ri ku titsakisa. A swi bihanga ku tsakela ntirho kambe hi fanele hi tsundzuka leswaku i ndlela ya ku tihanyisa, ku nga ri ku hanyela ntirho.

“Tata wa mina u tshama a khomekile. Wa tirha naswona leswi hi nga Timbhoni ta Yehovha, u tlhela a va ni mintirho yin’wana leyi a yi endlaka evandlheni. Kambe wa ringanisela entirhweni wakwe. U endla hinkwaswo leswi a lavaka ku swi endla kambe u tlhela a tinyika nkarhi wa ku va na mina, sesi na manana. Wa ringanisela eka hinkwaswo.”—Alannah.

I ntiyiso leswaku ku durha ka swilo ku nga hi endla hi vilela leswaku hi ta tihanyisa njhani kambe Bibele yi hi khutaza leswaku hi ringanisela. Yi ri: “Loko hi ri ni swakudya ni swifunengeto, hi ta eneriseka hi swilo leswi.” (1 Timotiya 6:8) Sweswo a swi vuli leswaku hi fanele hi titsona ngopfu. A hi fanelanga hi tipeta eswikweletini kambe hi fanele hi ringanisela eka leswi hi swi lavaka.—Luka 12:15.

LESWI NTIRHO WU VULAKA SWONA EKA WENA

Tirha hi ku tinyiketela. Rhandza ntirho wa wena. Hambiloko ntirho wa wena u wu vona wu nga ku faneli, tiyimisele ku wu tiva kahle. Ku tirha hi ku tinyiketela swi endla leswaku hi tsaka naswona loko hi wu endla kahle, swi endla leswaku hi wu rhandza.

Kambe u fanele u ringanisela. Tinyike nkarhi wa ku wisa ni ku beriwa hi moya. Loko hi tirhe hi matimba swi endla leswaku hi yi tsakela minkarhi ya ku wisa. Nakambe loko hi dya swa nyuku wa hina, hi ta titshemba naswona van’wana va ta hi xixima ku katsa ni mindyangu ya hina.—2 Vatesalonika 3:12.

“Mi nga tshuki mi vilela kutani mi ku, ‘Xana hi ta dya yini?’ kumbe, ‘Xana hi ta nwa yini?’ kumbe, ‘Xana hi ta ambala yini?’ . . . Tata wa n’wina wa le tilweni wa swi tiva leswaku ma swi lava swilo leswi hinkwaswo.”Matewu 6:31, 32.