XANA ku va ni gome, ku hlundzuka kumbe xikhomela swi lawula vutomi bya wena? Loko swi ri tano, u nga ha tikuma u nga ri na nkarhi kumbe matimba ya ku endla swilo swa nkoka evuton’wini. Xana u nga endla yini? *

XIKOMBISO XA LE BIBELENI: DAVHIDA

Hosi Davhida u langutane ni swiyimo swo hambanahambana evuton’wini, ku katsa ni ku vilela ni nhlomulo. I yini lexi n’wi pfuneke ku swi tiyiselela? Davhida u siyele hinkwaswo emavokweni ya Xikwembu. (1 Samuwele 24:12, 15) U tsale ndlela leyi a a titwa ha yona. Leswi a a ri wanuna wa ripfumelo, a a khongela nkarhi ni nkarhi. *

LESWI GREGORY A SWI ENDLAKA

Hilaha swi vuriweke hakona eku sunguleni ka xihloko xo sungula, Gregory u karhatiwa hi vuvabyi bya ku vilela. U ri: “Ndlela leyi a ndzi vilela ha yona a yi tlula mpimo.” Kambe xana Gregory u swi kotise ku yini ku lulamisa xiphiqo lexi? U ri: “Ndzi pfuneke hi ku va ndzi amukela mpfuno wa rirhandzu lowu humaka eka nsati wa mina ni vanghana. Ndzi tlhele ndzi ya eka dokodela naswona ndzi dyondza swo tala hi vuvabyi lebyi. Endzhaku ka loko ndzi cince mahanyelo ya mina, ndzi swi xiyile leswaku se ndza swi kota ku lawula xiyimo xa mina. Hambileswi minkarhi yin’wana swi pfaka swi pfukanyana, se ndza swi tiva leswaku ndzi fanele ndzi endla yini leswaku swi antswa.”

“Mbilu leyi tsakeke i muhanyisi lonene.”—Swivuriso 17:22

LESWI U NGA SWI ENDLAKA

Loko swilo leswi hetaka matimba swi sungula, ringeta ku endla leswi landzelaka:

  • Tsala ndlela leyi u titwaka ha yona.

  • Byela xaka leri u ri tshembaka kumbe munghana hi xiyimo xa wena.

  • U nga tibyeli leswaku ndlela leyi u titwaka ha yona a yi bihanga. Hi xikombiso tivutise, xana byi kona vumbhoni bya ku tiyimelela eka ndlela yoleyo leyi u titwaka ha yona?’

  • U nga tshameli ku vilela, ku hlundzuka kumbe u va ni xikhomela. *

Yinhla Ya Nkoka: Hakanyingi swilo leswi hetaka matimba a swi vangiwi hi swiyimo swa hina kambe swi vangiwa hi ndlela leyi hi swi tekaka ha yona swiyimo swoleswo.

^ ndzim. 3 Swilo swin’wana leswi hetaka matimba swi nga vangiwa hi vuvabyi byo karhi lebyi lavaka vutshunguri. Xalamuka! a yi seketeli muxaka wo karhi wa vutshunguri. Un’wana ni un’wana u fanele a sungula a kambisisa swiboho swakwe a nga se swi teka.

^ ndzim. 5 Buku ya pisalema eBibeleni yi tele hi swikhongelo swa Davhida leswi a swi tsaleke.

^ ndzim. 13 Leswaku u kuma rungula leri engetelekeke, hlaya swihloko swa ntlhandlamano leswi nge, “U Nga Ku Hlula Njhani Ku Vilela?” eka Xihondzo xo Rindza xa July 1, 2015.