Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  June 2015

 LESWI BIBELE YI SWI VULAKA

Vuoswi

Vuoswi

Hambileswi ku nga tshembeki evukatini swi nga tekiwiki ku ri nchumu wo biha, vuoswi byi ya emahlweni byi pfuxa hasahasa emindyangwini yo tala.

Vuoswi i yini?

LESWI VANHU VA SWI VULAKA

Eka mindhavuko yin’wana vuoswi a byi bihanga evukatini loko ngopfungopfu byi endliwa hi wanuna. Van’wana a va teki vukati ku ri xiboho xa vutomi hinkwabyo.

LESWI BIBELE YI SWI VULAKA

EBibeleni vuoswi byi vula ku va wanuna kumbe wansati loyi a tekiweke, a endla timhaka ta masangu ni munhu un’wana loyi a nga tekanangiki na yena. (Yobo 24:15; Swivuriso 30:20) Vuoswi i nchumu lowu nyenyetsaka eka Yehovha. EIsrayele wa khale loyi a endlaka vuoswi a a dlayiwa. (Levhitika 18:20, 22, 29) Yesu u dyondzise valandzeri vakwe leswaku va balekela vuoswi.—Matewu 5:27, 28; Luka 18:18-20.

HA YINI BYI BIHILE?

Loyi a endlaka vuoswi u onha xihlambanyo lexi a xi endleke eka loyi a tekaneke na yena loko va tekana. Nakambe i ku “dyohela Xikwembu.” (Genesa 39:7-9) Vuoswi byi hambanisa vana ni vatswari. Ku tlula kwalaho, Bibele yi vula leswaku “Xikwembu xi ta avanyisa timbhisa ni vaoswi.”—Vaheveru 13:4.

“Vukati a byi xiximeke exikarhi ka hinkwavo, ni sangu ra vukati ri nga vi ni xilo lexi nyamisaka.”Vaheveru 13:4.

 Xana vuoswi byi endla leswaku vanhu va dlaya vukati?

LESWI BIBELE YI SWI VULAKA

Bibele yi pfumelela munhu leswaku a dlaya vukati ntsena loko loyi a tekaneke na yena a endle vuoswi. (Matewu 19:9) Kambe loyi a dyoheriweke hi yena a faneleke a titekela xiboho emhakeni leyi.—Vagalatiya 6:5.

Eka Xikwembu, vukati i xiboho xa vutomi hinkwabyo. (1 Vakorinto 7:39) Xikwembu xa swi venga loko munhu a dlaya vukati hi swivangelo leswi nga twaliki swo tanihi ku nga ha n’wi tsakeli loyi u tekaneke na yena. Hikokwalaho, ku dlaya vukati a ko va xiboho lexi munhu a nga xi tekaka hi ku olova.—Malakiya 2:16; Matewu 19:3-6.

“Mina ndzi ri eka n’wina, un’wana ni un’wana la tshikaka nsati wakwe, loko ku nga ri hikwalaho ka vumbhisa, u n’wi hoxa endzingweni wo endla vuoswi.”Matewu 5:32.

Xana vuoswi i xidyoho lexi nga rivalelekiki

LESWI BIBELE YI SWI VULAKA

E-e. Bibele yi vula leswaku Xikwembu xi kombise tintswalo eka lava hundzukeke va tshika swiendlo swa vona swo biha ku katsa ni vuoswi. (Mintirho 3:19; Vagalatiya 5:19-21) Entiyisweni Bibele yi vulavula hi vavanuna ni vavasati lava tshikeke vuoswi ivi hi ku famba ka nkarhi va va vanghana va Xikwembu.—1 Vakorinto 6:9-11.

Xikwembu xi kombise tintswalo ta xona eka Hosi Davhida wa le Israyele wa khale. Davhida u endle vuoswi ni nsati wa un’wana wa vatirhi va yena. (2 Samuwele 11:2-4) Bibele yi swi veka erivaleni leswaku ‘nchumu lowu Davhida a wu endleke a wu bihile’ eka Xikwembu. (2 Samuwele 11:27) Endzhaku ka loko Davhida a tshinyiwile, u hundzukile naswona Xikwembu xi n’wi rivalerile. Hambiswiritano, Davhida u xanisekile hikwalaho ka leswi a swi endleke. (2 Samuwele 12:13, 14) Hosi Solomoni wo tlhariha u vule leswaku “un’wana ni un’wana la endlaka vuoswi . . . u ni mbilu yo hunguka.”—Swivuriso 6:32.

LESWI U NGA SWI ENDLEKA

Loko u endle vuoswi, u fanele u kombela ndzivalelo eka Xikwembu ni le ka loyi u tekaneke na yena. (Pisalema 51:1-5) Dyondza ku venga vuoswi hilaha Xikwembu xi byi vengaka hakona. (Pisalema 97:10) Tiyimisele ku balekela ku hlalela swilo swo navetisa timhaka ta masangu, ku tlanga hi rirhandzu kumbe swin’wana leswi nga ha endlaka leswaku u rhandza munhu un’wana loyi u nga tekanangiki na yena.—Matewu 5:27, 28; Yakobo 1:14, 15.

Loko loyi u tekaneke na yena a tshame a endla vuoswi, tiyiseka leswaku Xikwembu xa yi twisisa ndlela leyi u titwaka ha yona. (Malakiya 2:13, 14) Kombela nchavelelo ni nkongomiso eka xona “[xi] ta ku seketela.” (Pisalema 55:22) Loko u hlawula ku rivalela loyi u tekaneke na yena naswona mi nga dlayi vukati, havumbirhi bya n’wina mi fanele mi tirha hi matimba leswaku mi tlhela mi tiyisa vukati bya n’wina.—Vaefesa 4:32.

Muprofeta Natani u byele Davhida loyi a hundzukeke endzhaku ka loko a endle vuoswi a ku: “Yehovha na yena u tshika xidyoho xa wena xi hundza.”2 Samuwele 12:13.

DYONDZA SWO TALA

U NGA VA NI NDYANGU LOWU TSAKEKE

Tshembeka Eka Nkataku

Xana swi kona swin’wana leswi hi faneleke hi tshembeka eka swona evukatini ku tlula ku papalata vuoswi?

XIHONDZO XO RINDZA

Endlani Leswaku Mi Tlhela Mi Tshembana eVukatini

Loko u tikarhatela ku hlayisa vukati bya wena endzhaku xiphiqo xo endla vuoswi, u langutane ni ntlhontlho lowukulu. Kambe u nga swi hlula!

MAHUNGU LAMANENE LAMA HUMAKA EKA XIKWEMBU!

Ndyangu Wa Wena Wu Nga Va Ni Ntsako Hi Ndlela Yihi?

Yehovha ku nga Xikwembu lexi tsakeke u lava leswaku mindyangu yi va ni ntsako. Kuma ndzayo ya Bibele leyi pfunaka leyi yaka eka vavanuna, vavasati, vatswari ni vana.