Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  May 2015

 LESWI BIBELE YI SWI VULAKA

Madzolonga

Madzolonga

Matimu ya vanhu ma tele hi madzolonga. Xana ma ta tshama ma ri kona?

Xikwembu xi titwa njhani hi madzolonga?

LESWI VANHU VA SWI VULAKA

Vanhu vo tala ku katsa ni vanhu va vukhongeri, va vona onge madzolonga a ma bihanga loko munhu a ti sirhelela. Vanhu va timiliyoni va vona onge madzolonga lama kombisiwaka eka thelevhixini i vuhungasi lebyi amukelekaka.

LESWI BIBELE YI SWI VULAKA

Le kusuhi ni doroba ra Mosul, en’walungwini wa Iraq, ku ni marhumbi ya muti lowu tshameke wu duma swinene, ku nga Ninivha. Muti lowu a ku ri ntsindza wa Mfumo wa khale wa Asiriya. Loko muti wolowo swa ha wu fambela kahle, Bibele yi profete leswaku Xikwembu xi ta “endla Ninivha wu va rhumbi.” (Sofaniya 2:13) Xikwembu xi te: “Ndzi ta ku endla u nyangatsa.” Ha yini? Hikuva Ninivha a ku ri “muti lowu halataka ngati.” (Nahume 1:1; 3:1, 6) Pisalema 5:6 yi vula leswaku “Yehovha wa n’wi nyenya munhu la halataka ngati.” Namuntlha Ninivha i marhumbi naswona lexi i xitiyisekiso xa leswi Xikwembu xi swi vuleke.

Madzolonga ma sunguriwe hi nala lonkulu wa Xikwembu ni nala wa vanhu, ku nga Sathana Diyavulosi loyi Yesu Kreste a n’wi vitaneke “mudlayi.” (Yohane 8:44) Ku engetela kwalaho, leswi ‘misava hinkwayo yi nga le hansi ka matimba ya lowo homboloka,’ mintirho yakwe yi vonaka kahle eka ndlela leyi vanhu va ma langutaka ha yona madzolonga, ku katsa ni lawa misava hinkwayo yi ma kombisaka eka tithelevhixini ni le ka tifilimi. (1 Yohane 5:19) Leswaku hi tsakisa Xikwembu hi fanele hi tikarhatela ku venga madzolonga ivi hi rhandza leswi Xikwembu xi swi rhandzaka. * Xana sweswo swa koteka?

“Yehovha . . . wa n’wi venga un’wana ni un’wana la rhandzaka madzolonga.”Pisalema 11: 5.

Xana vanhu lava hanyaka hi madzolonga va nga cinca?

LESWI VANHU VA SWI VULAKA

Madzolonga ko va nchumu wa ntumbuluko, lowu nga cinciki.

LESWI BIBELE YI SWI VULAKA

Tshikani “vukarhi, ku hlundzuka, vubihi, mavulavulelo ya nhlambha, ni mavulavulelo lama thyakeke.” Yi tlhela yi ku: “Hluvulani vumunhu bya khale ni mikhuva ya byona, kutani mi tiambexa vumunhu lebyintshwa.” (Vakolosa 3:8-10) Xana Xikwembu xa hi tikisela? Doo! Vanhu va nga swi kota ku cinca. * Njhani?

 Goza ro sungula i ku dyondza hi vutivi lebyi kongomeke bya Xikwembu. (Vakolosa 3:10) Loko munhu loyi a nga ni mbilu leyinene a dyondza hi timfanelo letinene ni milawu ya Muvumbi wa hina, u tshinela eka Xikwembu hi rirhandzu naswona a lava ku xi tsakisa.—1 Yohane 5:3.

Goza ra vumbirhi ri fambelana ni ndlela leyi hi hlawulaka vanghana va hina ha yona. “U nga vi nakulobye wa loyi a voyameleke eku hlundzukeni; naswona u nga ngheni ni munhu la karihaka ngopfu, leswaku u nga yi toloveli ndlela ya yena kutani u vekela moya-xiviri wa wena ntlhamu.”—Swivuriso 22:24, 25.

Goza ra vunharhu i ku va munhu a twisisa. A vona mboyamelo lowu endlaka munhu a va ni madzolonga, ku nga ku tsandzeka ku tikhoma. Munhu wo rhula u kota ku tikhoma. Swivuriso 16:32 yi ri: “Loyi a hlwelaka ku hlundzuka wa antswa ku ri ni wanuna wa matimba.”

“Lavisisani ku rhula ni vanhu hinkwavo.”Vaheveru 12:14.

Xana madzolonga ma ta hela?

LESWI VANHU VA SWI VULAKA

Madzolonga i khale ma ri kona naswona a ma nge pfuki ma herile.

LESWI BIBELE YI SWI VULAKA

“Hi nkarhinyana, lowo homboloka a nge he vi kona . . . Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:10, 11) Entiyisweni, leswaku vanhu lavanene ni lavo rhula va sirheleriwa, Xikwembu xi ta herisa lava rhandzaka madzolonga hilaha xi endleke hakona emutini wa khale wa Ninivha. Endzhaku ka sweswo madzolonga a ma nge he pfuki ma va kona emisaveni!—Pisalema 72:7.

“Lava nga ni moya wo rhula. . . va ta dya ndzhaka ya misava.”—Matewu 5:5

Kutani sweswi i nkarhi wa leswaku hi lava ku tsakeriwa hi Xikwembu, hi tikarhatela ku va ni ku rhula. 2 Petro 3:9 yi ri: “Yehovha . . . u mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.”

Kutani va ta fula mabanga ya vona ma va swikomu ni mafumu ya vona ma va swikhutulo.”Esaya 2:4.

^ ndzim. 7 Hambiswiritano, Xikwembu xi pfumelele Vaisrayele va khale ku lwa leswaku va sirhelela tiko ra vona. (2 Tikronika 20:15, 17) Kambe sweswo swi cincile loko Xikwembu xi herisa ntwanano wa xona ni Vaisrayele kutani xi simeka vandlha ra Vukreste leri nga riki na mindzilakano.

^ ndzim. 11 Swikombiso swa vanhu lava cinceke vutomi bya vona swi nga kumiwa eka swihloko leswi humaka nkarhi ni nkarhi leswi nge “Bibele Yi Hundzula Vutomi Bya Vanhu” leswi kumekaka eka Xihondzo xo Rindza.

DYONDZA SWO TALA

XALAMUKA!

Madzolonga Ya Le Mindyangwini Ma Ta Hela

Milawu ya Bibele yi nga va pfuna njhani vanhu lava nga ni madzolonga swinene leswaku va hundzula mahanyelo ya vona?