Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! JANUARY 2015

 LANGUTELO RA BIBELE

Ku Xaniseka

Ku Xaniseka

Vanhu van’wana va vona onge Xikwembu hi xona xi vangaka ku xaniseka kumbe a xi khathali. Kambe, xana Bibele yi dyondzisa sweswo? Nhlamulo ya yona yi nga ha ku hlamarisa.

Xana Xikwembu xi hi vangela ku xaniseka?

“Ina, entiyisweni Xikwembu a xi endli hilaha ku hombolokeke.”Yobo 34:12.

LESWI VANHU VA SWI VULAKA

Van’wana va vula leswaku swilo hinkwaswo leswi endlekaka, i ku rhandza ka Xikwembu. Xisweswo va tshemba leswaku Xikwembu hi xona xi hi vangelaka ku xaniseka. Hi xikombiso, loko ku va ni timhangu ta ntumbuluko va anakanya leswaku swiendlakalo sweswo i ndlela ya Xikwembu ya ku xupula lava dyoheke.

LESWI BIBELE YI SWI VULAKA

Bibele yi dyondzisa leswaku Xikwembu a xi hi vangeli ku xaniseka. Hi xikombiso, Bibele yi vula leswaku loko hi xaniseka ku ta va ku ri xihoxo ku vula hi ku: “Ndzi ringiwa hi Xikwembu.” Ha yini? Hikuva “Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) Leswi swi vula leswaku Xikwembu a hi xona xi hi vangelaka miringo kumbe ku xaniseka loku hi langutanaka na kona. Ku endla tano a swi ta va swi kombisa vuhomboloki kambe “Xikwembu a xi endli hilaha ku hombolokeke.”—Yobo 34:12.

Loko ku ri leswaku Xikwembu a hi xona xi hi vangelaka ku xaniseka, i mani? Lexi twisaka ku vava hileswaku hakanyingi vanhu va twisiwa ku vava hi vanhu van’wana lava nga hetisekangiki. (Eklesiasta 8:9) Ku engetela kwalaho, hi nga ha langutana ni makhombo hikwalaho ka ‘swiendlakalo leswi nga languteriwangiki,’ sweswo swi nga vangiwa hi ku va endhawini leyi hoxeke hi nkarhi lowu hoxeke. (Eklesiasta 9:11) Bibele yi dyondzisa leswaku “mufumi wa misava leyi” Sathana Diyavulosi hi yena a vangaka ku xaniseka hikuva “misava hinkwayo yi le hansi ka matimba ya lowo homboloka.” (Yohane 12:31; 1 Yohane 5:19) Sathana hi yena a vangelaka vanhu ku xaniseka ku nga ri Xikwembu.

 Xana Xikwembu xi ni mhaka ni ku xaniseka ka hina?

Enkarhini wa maxangu ya vona hinkwawo, na yena a a ri emaxangwini.”Esaya 63:9.

LESWI VANHU VA SWI VULAKA

Van’wana va anakanya leswaku Xikwembu a xi khathali hi swiphiqo swa hina. Hi xikombiso, mutsari un’wana u vule leswaku Xikwembu “a xi na tintswalo kumbe ntwela-vusiwana eku xanisekeni ka hina.” Mutsari loyi u tlhela a vula leswaku loko ku ri leswaku Xikwembu xi kona, “a xi khathali hi vanhu.”

LESWI BIBELE YI SWI VULAKA

Bibele a yi dyondzisi leswaku Xikwembu a xi na ntwela-vusiwana kambe xi ni mhaka ni ku xaniseka ka hina naswona ku nga ri khale xi ta ku herisa. Xiya tinhla tinharhu ta le Bibeleni leti chavelelaka.

Xikwembu xa ku vona ku xaniseka ka hina. Ku sukela eku sunguleni ka ku xaniseka ka vanhu, a ku na nhloti ni wun’we lowu nga xiyiwangiki hi Yehovha * loyi a nga ni “mahlo lama vangamaka” lama vonaka swilo hinkwaswo. (Pisalema 11:4; 56:8) Hi xikombiso, loko valandzeri va xona va le minkarhini ya khale va tshikileriwa, Xikwembu xi te: “Entiyisweni ndzi vone ku xaniseka ka vanhu va mina.” Xana a xi ku ba hi makatla ku vava ka vona? Doo! Hikuva xi tlhele xi ku: “Ndza ku tiva swinene ku vava loku va ku twaka.” (Eksoda 3:7) Vanhu vo tala va chaveleleka hi ku twa marito lawa, ku tiva leswaku Xikwembu xa ku vona ku xaniseka hinkwako ka hina hambi ku ri makhombo lawa van’wana va nga ma voniki kumbe ku ma twisisa.—Pisalema 31:7; Swivuriso 14:10.

Xikwembu xi twelana na hina loko hi xaniseka. Ku xaniseka ka hina Yehovha Xikwembu a ngo ku vona ntsena kambe ku tlhela ku n’wi twisa ku vava. Hi xikombiso, Xikwembu a xi khumbeka swinene loko vagandzeri va xona va khale va xaniseka. Bibele yi ri: “Enkarhini wa maxangu ya vona hinkwawo, na yena a a ri emaxangwini.” (Esaya 63:9) Hambileswi Xikwembu xi tlakukeke swinene eka vanhu, xi twelana na vona lava xanisekaka onge hiloko ku vava ka vona ku ri embilwini ya xona. Hakunene “Yehovha u ni xinakulobye lexikulu swinene ni tintswalo.” (Yakobo 5:11) Ku engetela kwalaho, Yehovha wa hi pfuna leswaku hi langutana ni ku xaniseka ka hina.—Vafilipiya 4:12, 13.

Xikwembu xi ta ku herisa ku xaniseka hinkwako ka vanhu. Bibele yi vula leswaku Xikwembu xi ta ku herisa ku xaniseka hinkwako laha misaveni. Yehovha u ta tirhisa Mfumo wa matilo leswaku a cinca xiyimo xa vanhu. EBibeleni Xikwembu xi tshembisa leswaku loko nkarhi wolowo wu fika, “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Ku ta endleka yini hi lava se va feke? Xikwembu xi ta va pfuxela laha misaveni leswaku na vona va tsakela vutomi lebyi nga ta va byi nga ha ri na ku xaniseka. (Yohane 5:28, 29) Xana vanhu va ha ta karhatiwa hi ku tsundzuka ku xaniseka ka khale? E-e hikuva Yehovha u tshembisa a ku: “Swilo swo sungula a swi nge tsundzukiwi, hambi embilwini a swi nge ti.”—Esaya 65:17. *

^ ndzim. 13 Yehovha i vito ra Xikwembu hilaha swi kombisiweke hakona eBibeleni.

^ ndzim. 15 Leswaku u kuma leswaku ha yini Xikwembu xi pfumelela ku xaniseka ni leswaku xi ta ku herisa njhani, hi kombela u hlaya ndzima 8 na 11 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Ha Yini Xikwembu Xi Pfumelela Vubihi Ni Ku Xaniseka?

Vubihi byi sungule njhani naswona ha yini Xikwembu xi byi pfumelele byi ya emahlweni? Xana ku xaniseka ku ta kala ku hela?

Mfumo Wa Xikwembu I Yini?

I mani Hosi ya Mfumo wa Xikwembu naswona Mfumo wu ta hetisisa yini?