Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  December 2014

 LANGUTELO RA BIBELE

Misava

Misava

Hi xihi xikongomelo xa Xikwembu hi misava?

“Yehovha, . . . Muvumbi wa misava, . . . loyi a nga yi tumbuluxelangiki swa hava, loyi a yi vumbeke leswaku ku akiwa eka yona.”Esaya 45:18.

LESWI VANHU VA SWI VULAKA

Vanhu vo tala va vula leswaku misava a yi vumbiwanga hi muvumbi. Vukhongeri byi dyondzisa leswaku misava i ndhawu ya xinkarhana leyi Xikwembu xi yi tirhisaka ku vona loko vanhu va faneriwa hi ku nyikiwa vutomi etilweni kumbe va avanyisiwa endzilweni wa tihele.

LESWI BIBELE YI SWI VULAKA

Bibele yi vula leswaku “Xikwembu xi tumbuluxe matilo ni misava.” (Genesa 1:1) Xi byele mpatswa wo sungula wa vanhu xi ku: “Tswalanani mi andza, mi tata misava, mi yi fuma, mi fuma . . . swivumbiwa hinkwaswo leswi famba-fambaka ehenhla ka misava.” (Genesa 1:28) Ku hlamuseriwe leswaku vanhu lava nga yingisiki hi vona ntsena lava a va ta fa. (Genesa 2:17) Xisweswo, xikongomelo xa Xikwembu hi misava a ku ri leswaku yi va kaya ra vanhu ra hilaha ku nga heriki. A yi ta tala hi vanhu lava yingisaka lava a va ta yi khathalela ni ku hanya eka yona hilaha ku nga heriki.

 Xana misava yi ta lovisiwa?

“U simeke misava etindhawini leti a ti endleleke tona; a yi nge tsekatsekisiwi hilaha ku nga riki na makumu, kumbe hi masiku.”Pisalema 104:5.

LESWI VANHU VA SWI VULAKA

Vativi va sayense va ringanyete swikombiso swo hambana-hambana leswi eka swona misava yi nga ta lovisiwa ha swona kumbe yi nga ha vi ni vaaki. Minkarhi yin’wana makhombo lama xungetaka vumundzuku bya vanhu, ma katsa timhangu ta ntumbuluko—to tanihi tipulanete letitsongo leti rhendzelekaka exibakabakeni, tivholkheno leti onhaka swinene, ku dlayiwa hi dyambu kumbe maxelo lama hisaka swinene—naswona ma katsa timhangu leti vangiwaka hi vanhu—to tanihi nyimpi ya nyutliya kumbe vutherorisi bya tikhemikhali.

LESWI BIBELE YI SWI VULAKA

Xikongomelo xa Xikwembu hi misava a xi cincanga. Rito ra Xikwembu ri swi veka erivaleni ri ku: “Misava yi kona hilaha ku nga riki na makumu.” (Eklesiasta 1:4) Ku engetela kwalaho, yi ta va ni vaaki hilaha ku nga heriki: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

HA YINI SWI RI SWA NKOKA?

Dyondzo ya leswaku eku heteleleni misava yi ta lovisiwa yi endle van’wana va teka swilo swa yona swa risima. Yi endle leswaku van’wana va nga vi ni ntshembo hi vumundzuku kutani va hanyela ra namuntlha ntsena. Leswi swi endla leswaku va hanya vutomi lebyi nga riki na xikongomelo. Hi hala tlhelo, loko hi tshemba leswaku hi nga hanya hilaha ku nga heriki emisaveni, hi ta endla swiboho leswi nga ta hi vuyerisa swin’we ni mindyangu ya hina—hambi ku ri enkarhini lowu taka.

Xana tilo i ndhawu yo hetelela leyi vanhu va nga ta ya eka yona?

“Loko ku ri matilo, i matilo ya Yehovha, kambe misava u yi nyike vana va vanhu.”Pisalema 115:16.

LESWI VANHU VA SWI VULAKA

Vanhu vo tala va tshemba leswaku vanhu hinkwavo vo lulama va ya etilweni.

LESWI BIBELE YI SWI VULAKA

Matilo i ya Xikwembu, kambe misava i ya vanhu. Bibele yi vulavula hi “misava leyi akiweke leyi taka.” (Vaheveru 2:5) Yesu a ku ri munhu wo sungula loyi a tlhandlukeleke etilweni naswona Bibele yi kombisa leswaku ku hlawuriwe vanhu van’wana va nga ri vangani lava nga ta ya etilweni hi xikongomelo xo karhi. Vona swin’we na Yesu, va ta va “tihosi emisaveni.”—Nhlavutelo 5:9, 10; Luka 12:32; Yohane 3:13.

HA YINI SWI RI SWA NKOKA?

Dyondzo ya leswaku vanhu hinkwavo vo lulama va ta ya etilweni a yi pfumelelani ni leswi Bibele yi swi dyondzisaka hakunene. Loko a ku ri hileswaku Xikwembu xi ta teka vanhu hinkwavo vo lulama va ya etilweni, a swi ta vula leswaku xi tsandzeke ku hetisisa xikongomelo xa xona xo sungula hi misava naswona switshembiso swa xona malunghana ni vutomi lebyi nga heriki laha misaveni a hi ntiyiso. Ku hambana ni sweswo, Rito ra Xikwembu ri tshembisa leswi: “Tshemba Yehovha u hlayisa ndlela yakwe, u ta ku tlakusa leswaku u dya ndzhaka ya misava.”—Pisalema 37:34.

DYONDZA SWO TALA

XIHONDZO XO RINDZA

Xana Pulanete Ya Hina Yi Endliwe Hi Xikongomelo?

Xana xikongomelo xa misava xi ta kala xi hetiseka?