Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! NOVEMBER 2014

Ndzi Kume Nchavelelo Hi Nkarhi Lowu A Ndzi Wu Lava

Ndzi Kume Nchavelelo Hi Nkarhi Lowu A Ndzi Wu Lava

Ndzi tikume ndzi pavalale endzeni ka mati xikandza xi langute ehansi. Ndzi ringete ku tlakusa nhloko leswaku ndzi ta hefemula kambe nhamu ya mina a yi nga pfumeli. Hi ku chuha, ndzi ringete ku hundzuluka kambe mavoko ya mina ni milenge a swi pfumelanga. Ndzi sungule ku nwela. Hi ximumu xa 1991, vutomi bya mina byi cince hi ku helela.

NDZI velekiwe edorobeni ra Szerencs ivi ndzi kulela eximutanini xa Tiszaladány en’walungu-vuxa bya Hungary. Hi June 1991, mina ni vanghana va mina van’wana hi ye eka xiphemu xa Nambu wa Tisza lexi a hi nga xi tolovelanga. Hi ku anakanya leswaku eka xiphemu xexo ku entile, ndzi tlulele ematini. A ku ri xihoxo lexikulu. Ndzi tshoveke swirhambyana swinharhu swa le nhan’wini ndzi tlhela ndzi vaviseka longo. Un’wana wa vanghana va mina u swi xiyile leswaku a ndza ha tshukatshuki, hiloko a ndzi tlakula kahle a ndzi humesa ematini ndzi nga si nwela.

A ndzi nga titivalanga kambe a ndzi titwa leswaku ndzi vavisekile. Un’wana u fonele ndzawulo ya xilamulela-mhangu hiloko ku fika helekhopta yi ndzi yisa exibedlhele laha madokodela ma fikeke ma ndzi endla vuhandzuri bya longo. Hi ku famba ka nkarhi, ndzi yisiwe eBudapest ku nga ntsindza wa doroba laha va nga ndzi pfuna leswaku marhambu ya longo ma vuyelelana. A ndzi tshama ndzi ganamile emubedweni ku ringana tin’hweti tinharhu. A ndzi swi kota ku tshukatshukisa nhloko kambe ku sukela emakatleni ku ya ehansi a ndzi nga koti ku endla nchumu. Loko ndzi ri ni malembe ya 20, a ndzi nga ha koti ku endla nchumu. A ndzi hele matimba lerova a ndzi navela ku fa.

Loko ndzi tlhelela ekaya, vatswari va mina va kume ndzetelo leswaku va ta ndzi khathalela. Ntirho wolowo a wu va karharisa ni ku va endla va tshikileleka naswona endzhaku ka lembe ndzi khomiwe hi ntshikilelo wa mianakanyo. Ndzi kume mpfuno eka vanhu lava dyondzeleke ku khutaza vanhu naswona sweswo swi ndzi pfunile leswaku ndzi cinca ndlela leyi a ndzi ku languta ha yona ku lamala ka mina.

Kutani ndzi sungule ku anakanyisisa swinene hi vutomi. Xana vutomi byi ni xikongomelo? Ha yini leswi swi ndzi humelerile? Ndzi hlaye timagazini ni tibuku leswaku ndzi kuma tinhlamulo. Ndzi tlhele ndzi hlaya ni Bibele kambe a ndzi nga yi twisisi. Ndzi tshike ku yi hlaya ivi ndzi ya eka mufundhisi kambe a ndzi kumanga tinhlamulo leti enerisaka.

Hi ximun’wana xa 1994, Timbhoni ta Yehovha timbirhi ti endzele tata wa mina ivi a ti kombela leswaku ti ta vulavula na mina. A ndzi yingiserile loko ti ri karhi ti hlamusela xikongomelo xa Xikwembu xa ku endla misava yi va paradeyisi ni ku herisa vuvabyi ni ku xaniseka. Leswi a ti swi hlamusela a swi ndzi tsakisa kambe a ndzi kanakana. Hambiswiritano, ndzi teke tibuku timbirhi ta Bibele. Endzhaku ko hlaya tibuku leti, Timbhoni ti kombele ku dyondza na mina Bibele naswona  ndzi pfumerile. Ti tlhele ti ndzi khutaza ku khongela.

Ndzi khorwisekile leswaku hakunene Xikwembu xa khathala hi mina

Loko ti ri karhi ti hlaya na mina, ndzi kume tinhlamulo leti humaka eBibeleni ta swivutiso swo tala leswi a ndzi ri na swona. Ndzi tlhele ndzi khorwiseka leswaku Xikwembu xa khathala hakunene hi mina. Hi September 13, 1997, endzhaku ka loko ndzi hete malembe mambirhi ndzi ri karhi ndzi dyondza Bibele, ndzi khuvuriwe ebavhini ro hlambela ekaya. Rolero a ku ri siku ro hlawuleka evuton’wini bya mina.

Hi 2007, ndzi rhurhele eBudapest ndzi ya tshama ekaya ra vanhu vo lamala. Ku va ndzi rhurhele endhawini yoleyo swi endle leswaku ndzi kota ku byela van’wana hi timhaka to tsakisa leti a ndzi dyondza ha tona. Loko maxelo ma ri manene, a ndzi kota ku humela ehandle hi xitulu xa lava lamaleke lexi a ndzi kota ku xi kongomisa hi xilebvu leswaku ndzi ya vulavula ni vanhu hi Bibele.

Ndyangu wun’wana wa le vandlheni leri a ndzi ri eka rona, a wu ndzi pfuna hi swa timali naswona wu ndzi xavele ni laptop leyi a ndzi yi tirhisa hi ku tshukatshukisa nhloko. Hi xitirhisiwa lexi, ndzi kota ku fonela vanhu hi Internet, ndzi tsala mapapila, ndzi tsalela vanhu lava nga kumekangiki loko va chumayeriwa hi yindlu ni yindlu. Ku va ndzi pfuna vanhu hi ndlela leyi, swi endle leswaku ndzi antswisa vuswikoti bya mina byo vulavurisana ni vanhu naswona swi ndzi pfunile leswaku ndzi nga tshameli ku ehleketa hi xiyimo xa mina.

Ndzi ri karhi ndzi burisana ni van’wana hi Bibele eka Internet ndzi tirhisa laptop leyi ndzi yi kongomisaka hi ku tshukatshukisa nhloko

Sweswi se ndzi kota ni ku ya eminhlanganweni ya Vukreste. Loko ndzi fika eHolweni ya Mfumo, vapfumeri-kulorhi va ndzi tlakula hi xitulu xa mina va ndzi yisa eka xithezi xa le henhla laha minhlangano yi khomeriwaka kona. Loko minhlangano yi ri karhi yi ya emahlweni, makwerhu loyi a tshameke ekusuhi na mina u yimisa voko rakwe. Kutani loko va n’wi komba, u ndzi khomela Bibele kumbe buku leyi hlayiwaka leswaku ndzi hlamula.

Ndzi tshamela ku twa ku vava naswona ndzi lava ku pfuniwa eka hinkwaswo. Minkarhi yin’wana ndzi va ni gome. Kambe ku va ni vunghana na Yehovha Xikwembu ni ku tiva leswaku wa ndzi twa loko ndzi khongela eka yena, swa ndzi chavelela. Ku hlaya Bibele siku ni siku ni swikhutazo swa vapfumeri-kulorhi, swa ndzi tiyisa. Vunghana bya vona, nseketelo ni swikhongelo swa vona swa ndzi pfuna leswaku ndzi va ni langutelo lerinene.

Yehovha u ndzi nyike nchavelelo hi nkarhi lowu a ndzi wu lava. U tlhele a ndzi nyika ntshembo wa ku va ni rihanyo lerinene emisaveni leyintshwa. Hikwalaho, ndzi wu langutele hi mahlo-ngati nkarhi lowu ndzi nga ta kota ku ‘famba, ku tlula ni ku n’wi dzunisa’ hikwalaho ka rirhandzu ni musa wakwe lowukulu.—Mintirho 3:6-9.

DYONDZA SWO TALA

Hambeta U Hanya—Ku Ni Ntshembo

Ku fana ni ku vonakala loku vonakaka ekule, ntshembo wu nga ku pfuna leswaku u langutela vumundzuku.

Hambeta U Hanya—U Nga Wu Kuma Mpfuno

Swilo swinharhu leswi nga ku pfunaka leswaku u hambeta u hanya.

Loko U Weriwa Hi Maxangu

Bibele yi ta ku pfuna leswaku u langutana ni maxangu.