Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XALAMUKA! SEPTEMBER 2014

 LANGUTELO RA BIBELE

Xikhongelo

Xikhongelo

Xana u kona loyi a yingisaka swikhongelo swa hina?

“Oho Mutwi wa xikhongelo, vanhu hinkwavo va ta ta eka wena.”Pisalema 65:2.

LESWI VANHU VA SWI VULAKA

Ku vuriwa leswaku swi tikomba onge a nga kona loyi a yingisaka swikhongelo. Vanhu lava dyaka mbitsi va xeva hi nhlomulo hi vona lava nga ha kanakanaka leswaku swikhongelo swa vona swa yingisiwa.

LESWI BIBELE YI SWI VULAKA

Bibele yi ri: “Mahlo ya Yehovha [Xikwembu] ma le ka lavo lulama, naswona tindleve ta yena ti yingisela swikombelo swa vona; kambe xikandza xa Yehovha xi nyenya lava endlaka swilo swo biha.” (1 Petro 3:12) Swi le rivaleni, leswaku Xikwembu xa swi yingisa swikhongelo. Kambe, xi yingisa ngopfu swikhongelo swa vanhu lava hanyaka hi ku pfumelelana ni milawu ya xona. Malunghana ni ndlela leyi Xikwembu xi tiyimiseleke ha yona ku yingisa swikhongelo swa hina, tsalwa rin’wana ri ri: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:14) Xisweswo, vanhu lava khongelaka va fanele va twisisa leswaku i swikombelo swa njhani leswi fambisanaka ni ku rhandza ka Xikwembu.

 Hi fanele hi khongela njhani?

“Loko u khongela, u nga vuli swilo leswi fanaka hi ku phindha-phindha.”Matewu 6:7.

LESWI VANHU VA SWI VULAKA

Valandzeri va vukhongeri byo hambana-hambana byo tanihi Vubudha, Vukhatoliki, Vuhindu ni Vumoslem, va dyondzisiwe ku tirhisa vuhlalu loko va khongela ni ku hlayela swikhongelo swa vona.

LESWI BIBELE YI SWI VULAKA

Swikhongelo swi fanele swi suka embilwini naswona swi endliwa hi ku tshembeka, a swi fanelanga swi hlokohatiwa kumbe ku phindha-phindhiwa. Matsalwa ma hi khutaza ma ku: “Loko u khongela, u nga vuli swilo leswi fanaka hi ku phindha-phindha, hilaha vanhu va matiko va endlaka hakona, hikuva va anakanya leswaku va ta twiwa hi ku tirhisa marito yo tala. Hikwalaho, mi nga tifanisi na vona, hikuva Xikwembu Tata wa n’wina xa swi tiva swilo leswi mi swi lavaka mi nga si swi kombela eka xona.”—Matewu 6:7, 8.

LESWI ENDLAKA SWI VA SWA NKOKA

Loko munhu a khongela hi ndlela leyi nga amukelekiki eka Xikwembu, u va a ri ku tlangeni hi nkarhi wakwe kumbe eku hlundzukiseni ka Xikwembu. Bibele yi hi tsundzuxa leswaku swikhongelo leswi endliwaka hi vanhu lava alaka ku hanya hi ku pfumelelana ni nawu wa Xikwembu, swa xi “nyenyetsa.”—Swivuriso 28:9.

I mani loyi hi faneleke hi khongela eka yena?

“Lavisisani Yehovha [Xikwembu], loko a ha kumeka. N’wi vitaneni a ha ri ekusuhi.”Esaya 55:6.

LESWI VANHU VA SWI VULAKA

Vanhu van’wana va vukhongeri va khongela Mariya kumbe swivumbiwa swin’wana swo tanihi tintsumi ni vanhu lava tekiwaka va ri “vakwetsimi.” Van’wana va vakwetsimi volavo i “Mukwetsimi” Anthony wa le Padua, loyi ku vuriwaka leswaku wa va khathalela hi “tlhelo ra moya ni ra nyama swa xinkarhana” na “Mukwetsimi” Jude, loyi a tekiwaka tanihi mukwetsimi loyi a pfunaka vanhu lava “heleriweke hi ntshembo.” Vanhu vo tala lava khongelaka, va khongela eka “vakwetsimi” vo tano ni le ka tintsumi va tshemba leswaku swivumbiwa sweswo swi ta hundzisela swikhongelo swa vona eka Xikwembu.

LESWI BIBELE YI SWI VULAKA

Vagandzeri va ntiyiso va fanele va khongela eka “Tata wa hina la nge matilweni.” (Matewu 6:9) Bibele yi hi khutaza yi ku: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina.”—Vafilipiya 4:6.

DYONDZA SWO TALA

SWIVUTISO LESWI HLAMURIWAKA HI BIBELE

I Yini Leswi Ndzi Nga Swi Khongelelaka?

Xiya leswaku ha yini Xikwembu xi swi teka swi ri nkoka swilaveko swa hina.

XIHONDZO XO RINDZA

“Xana Yehovha U Kombela Leswaku U N’wi Tlherisela Yini?”

Xana Xikwembu xi langutele yini eka lava va lavaka ku xi gandzela? Xana swa koteka leswaku vanhu lava nga hetisekangiki va tsakisa Xikwembu?

XIHONDZO XO RINDZA

“Hambetani Mi Kombela, Mi Ta Nyikiwa”

Kambisisa swifaniso swimbirhi swa Yesu eka Luka ndzima 11 leswi hlamuselaka ndlela leyi u nga tiyisekaka ha yona loko swikhongelo swa wena swi twiwa hi Xikwembu.