Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XALAMUKA! AUGUST 2014

 LANGUTELO RA BIBELE

Milorho Leyi Humaka Eka Xikwembu

Milorho Leyi Humaka Eka Xikwembu

Xana Xikwembu xi tirhise milorho leswaku xi vulavurisana ni vanhu?

[Muprofeta wa Xikwembu] Daniyele u vone norho . . . esangwini ra yena. Enkarhini wolowo u tsale norho wolowo ehansi. U rungule xiviko lexi heleleke xa timhaka.”Daniyele 7:1.

LESWI BIBELE YI SWI VULAKA

Xikwembu xi hundzisele rungula ra nkoka eka vanhu hi tindlela to hambana-hambana. Eminkarhini ya Bibele minkarhi yin’wana a xi tirhisa milorho. Kambe a ku nga ri milorho leyi nga twisisekiki leyi tolovelekeke ya siku ni siku. Milorho leyi humaka eka Xikwembu a yi ri ni vuxokoxoko hinkwabyo, yi twisiseka naswona yi ri ni rungula leri kongomeke. Hi xikombiso, eka norho wakwe muprofeta Daniyele, u vone ntlhandlamano wa swivandzana leswi a swi fanekisela mimfumo ya tipolitiki ku sukela eka mfumo wa Babilona ku ta fikela enkarhini wa hina. (Daniyele 7:1-3, 17) Hi ku tirhisa norho, Xikwembu xi byele Yosefa wa le Nazareta loyi a a ta va tata wa Yesu la nga riki wa ngati leswaku a balekela aEgipta ni nsati ni n’wana. Sweswo swi endle leswaku Yesu a pona ku dlayiwa hi Hosi Heroda loyi a ri ni lunya. Loko Heroda a file, Xikwembu xi tivise rifu rakwe eka Yosefa hi norho xi tlhela xi n’wi byela leswaku a tlhelela etikweni ra rikwavo ni ndyangu wakwe.—Matewu 2:13-15, 19-23.

 Xana Xikwembu xi tirhisa milorho leswaku xi vulavurisana na hina namuntlha?

“Mi nga hundzeli halahaya ka swilo leswi tsariweke.”1 Vakorinto 4:6.

LESWI BIBELE YI SWI VULAKA

Milorho leyi tsariweke eBibeleni i xiphemu xa rungula ra Xikwembu leri xi ri hlavuteleke vanhu. Malunghana ni rungula rolero, 2 Timotiya 3:16, 17 yi ri: “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni, leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.”

Bibele yi hi ‘hlomisa hi ku helela’ lerova yi hi byela leswi hi faneleke hi swi tiva hi Xikwembu, timfanelo ta xona, milawu ya mahanyelo ni ndlela leyi hi katsekaka ha yona eka xikongomelo xa xona hi misava. Kambe Xikwembu a xa ha tirhisi milorho leswaku xi hundzisela rungula eka vanhu. Loko hi lava ku tiva hi vumundzuku ni xikongomelo xa Xikwembu hi hina, a hi fanelanga hi ‘hundzela halahaya ka swilo leswi tsariweke’ ku nga swilo leswi tsariweke eBibeleni. Ku engetela kwalaho, vanhu hinkwavo va nga yi kuma buku leyi naswona va nga dyondza swilo swo tala leswi hlavuteriweke hi Xikwembu ku katsa ni milorho.

Ha yini u fanele u tshemba milorho ni swivono leswi tsariweke eBibeleni?

“Vanhu a va vulavula leswi humaka eka Xikwembu va ri karhi va susumetiwa hi moya lowo kwetsima.”2 Petro 1:21.

LESWI BIBELE YI SWI VULAKA

Milorho ni swivono swo tala leswi nga eBibeleni a ku ri vuprofeta—bya swilo leswi a swi ta endleka enkarhini lowu taka. Vatsari va Bibele va tsale vuprofeta lebyi hi ku tshembeka naswona leswi va swi tsaleke swa pfumelelana. Xana leswi va swi tsaleke swa pakanisa? Xiya xikombiso lexi—xivono lexi nga eka Daniyele 8:1-7 lexi tsariweke eku heleni ka Mfumo wa Babilona.

Hi ndlela yo fanekisela, vuprofeta lebyi byi katsa khuna ni xiphongo lexi xi hlaseleke khuna xi ri lahlela ehansi. Daniyele a nga bohekanga ku mbambela leswaku xivono lexi xi vula yini. Ntsumi leyi nga murhumiwa wa Xikwembu yi te: ‘Khuna ra timhondzo timbirhi ri yimela tihosi ta Meda na Peresiya. Xiphongo lexi nga ni voya xi yimela hosi ya Grikiya.’ (Daniyele 8:20, 21) Matimu ma kombisa leswaku mfumo wa Meda-Peresiya wu tlhandlame Babilona wu va mfumo wa misava hinkwayo. Kamabe endzhaku ka malembe ya 200, mfumo wa Meda-Peresiya wu hluriwe hi Alekzanda Lonkulu wa le Greece. Ku hetiseka ka vuprofeta lebyi hi ndlela leyi hlamarisaka, ku tiyisekisa leswaku vuprofeta ni milorho ya le Bibeleni swa pakanisa. Leswi swi kombisa leswaku Bibele yi hambanile swinene ni tibuku letin’wana hinkwato to kwetsima naswona leswi swi endla swi fanela leswaku hi yi tshemba.

DYONDZA SWO TALA

XALAMUKA!

Muti Wa Babilona eMatin’wini Ya Bibele

Ha yini vuprofeta bya Xikwembu malunghana ni ku lovisiwa ka Babilona a byi hlamarisa?