Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! JULY 2014

 NHLOKO-MHAKA YA XIFUNENGETO | LOKO U WERIWA HI MAXANGU—NDLELA YO LANGUTANA NA WONA

Ku Lahlekeriwa Hi Nhundzu

Ku Lahlekeriwa Hi Nhundzu

Hi Ravuntlhanu March 11, 2011, ku tsekatseka ka misava ka mpimo wa 9,0 ku hlasele tiko ra Japani naswona ku dlaye vanhu vo tlula 15 000 ni ku onha nhundzu leyi durhaka 2 000 wa tibiliyoni wa tirhandi. Leswi ku veke ni xilemukiso malunghana ni tsunami leyi a yi ta hlasela hi xitshuketa, Kei loyi a nga ni malembe ya 32 u balekele endhawini leyi a kumeke vutumbelo. U ri: “Hi siku leri landzelaka nimixo, ndzi ye ekaya ndzi ya teka swilo leswi a swi sele kambe hinkwaswo a swi khukhuriwile ku katsa ni yindlu. A ku lo sala masungulo ya yindlu ya mina ntsena.

“Swi ndzi tekele nkarhi wo leha ku amukela leswaku ndzi lahlekeriwe hi nhundzu ya mina hinkwayo. A ndzi nga ha salanga na nchumu—movha wa mina, tikhompyuta leti a ndzi tirha ha tona, matafula, switulu ni sofa leri a ku tshama vayeni eka rona, ogeni ya mina, katara, ukulele, xitiringo, switirhisiwa leswi a ndzi swi tirhisa loko ndzi penda, mafurha, tikhirayoni ni swilo leswi a ndzi swi tirhisa loko ndzi dirowa ni hinkwaswo leswi ndzi swi mpfampfarhuteke swi khukhuriwile.”

KU LANGUTANA NI MAXANGU

Ringeta ku ehleketa hi swilo leswi wa ha riki na swona, ematshan’weni yo ehleketa hi swilo leswi ku lahlekeleke. Bibele yi ri: “Hambiloko munhu a ri ni swo tala, vutomi byakwe a byi humi eka swilo leswi a nga na swona.” (Luka 12:15) Loko Kei a tsundzuka xiyimo xa yena u ri: “Ndzi xaxamete swilo leswi a ndzi swi lava kambe ku endla tano swi lo ndzi pfuxela mabibi ya mbilu hikwalaho ka nhundzu ya mina leyi khukhuriweke. Kutani ndzi vone swi antswa ku tsala swilo leswi nga swa nkoka ntsena. Ku endla tano swi endle leswaku ndzi hlakarhela.”

Ematshan’weni yo tianakanyela, tirhisa ntokoto wa wena leswaku u chavelela van’wana. Kei u tlhela a ku: “Ndzi pfuniwe ngopfu hi ntlawa lowu phalalaka ni vanghana kambe leswi se a ndzi ya ndzi tolovela ku nyikiwa, a ndzi titwa ndzi nga ha ri na xindzhuti. Hiloko ndzi tsundzuka leswi Bibele yi swi vulaka eka Mintirho 20:35 leyi vulaka leswaku ‘ku nyika swi tisa ntsako lowukulu ku tlula ku amukela.’ Leswi a ndzi nga ri na nhundzu leyi a ndzi ta yi nyika vanhu lava weriweke hi mhangu ya ntumbuluko, ndzi endle xiboho xo ya va chavelela hi marito lama khutazaka. Ku nyika hi ndlela yoleyo swi ndzi pfunile swinene.”

Khongela eka Yehovha u kombela vutlhari leswaku u ta kota ku langutana ni swiyimo swa wena. Kei u tshembe xitiyisekiso xa Bibele lexi vulaka leswaku Xikwembu xi ta “hundzulukela exikhongelweni xa lava va tekeriweke hinkwaswo.” (Pisalema 102:17) Na wena u nga xi tshemba.

Xana a wu swi tiva? Bibele yi profete hi nkarhi lowu ku nga ta ka ku nga ha vi na munhu ni un’we loyi a nga ta karhateka hi ku lahlekeriwa hikwalaho ka mhangu ya ntumbuluko. *Esaya 65:21-23.

^ ndzim. 9 Leswaku u dyondza hi xikongomelo xa Xikwembu hi misava, hlaya ndzima 3 ya buku leyi nge, Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Xana Timhangu Ta Ntumbuluko I Nxupulo Lowu Humaka Eka Xikwembu?

Xiya tinhla tinharhu leti nga eBibeleni leti kombaka vuavanyisi bya Xikwembu.

A Ku Nge He Vi Na Timhangu!

Timhangu ta ntumbuluko ti vonaka onge a ti nge heli kambe Bibele yi nyikela ntshembo lowu tiyeke leswaku ku nga ri khale timhangu teto a ti nge he vi kona.