Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! MAY 2014

Vutlhari Bya Huwelela—Xana Wa Byi Twa?

Vutlhari Bya Huwelela—Xana Wa Byi Twa?

“Xana vutlhari a byi hambeti byi huwelela, ni ku twisisa a ku hambeti ku humesa rito? Byi yime ehenhla eku tlakukeni, endleleni, emahandzeni ya tindlela . . . byi huwelela ngopfu etlhelo ka tinyangwa, enon’wini wa muti, ni le vunghenweni bya tinyangwa.”—SWIVURISO 8:1-3.

VUTLHARI i bya nkoka swinene, handle ka byona a hi ta endla swihoxo swo tala. Kambe hi nga byi kuma kwihi vutlhari bya ntiyiso? Mutsari wa buku ya Swivuriso a a swi tiva leswaku a ku na vutlhari lebyi nga fanaka ni bya Muvumbi wa hina. Ku engetela kwalaho, vutlhari bya Yena byi nga kumiwa hi munhu un’wana ni un’wana hi ku tirhisa buku yo hlawuleka ku nga Bibele. Xiya leswi landzelaka:

  • The World Book Encyclopedia yi vula leswaku Bibele i “buku leyi vanhu vo tala va nga na yona ku tlula hinkwato ematin’wini.” Yi hundzuluxeriwe hi nhlayo leyikulu ni hi tindzimi to tala ku tlula tibuku tin’wana. Bibele yi kumeka hi tindzimi leti endlaka 2 600 yi helerile kumbe yi nga helelanga, leswi vulaka leswaku vanhu lava tlulaka 90 wa tiphesente va na yona.

  • Vutlhari na byona “byi hambeta byi rila swinene” ku tlula rini na rini. Matewu 24:14 yi ri: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu [ya misava ya sweswi] ma nga ta fika.”

“Mahungu lamanene” i ya vutlhari hikuva ma kombisa vutlhari bya Xikwembu byo tlhantlha swiphiqo swa vanhu hi ku tirhisa Mfumo wa xona. Mfumo wolowo i hulumendhe ya Xikwembu leyi nga ta fuma misava hinkwayo. (Daniyele 2:44; 7:13, 14) Hikwalaho, Yesu u khongele a ku: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:9, 10.

Timbhoni ta Yehovha ti swi teka swi ri swa nkoka ku tivisa vanhu hi Mfumo wa Xikwembu ematikweni lama endlaka 239. Hakunene, vutlhari bya Xikwembu ‘bya huwelela’ “ni le vunghenweni bya tinyangwa”. Xana wa byi twa?