Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! APRIL 2014

 LANGUTELO RA BIBELE

Xihlawuhlawu

Xihlawuhlawu

Xana tinxaka ta vanhu ti sungule njhani?

‘Adamu u thye nsati wakwe vito ra Evha, hikuva a a ta va mana wa hinkwavo lava hanyaka.’—Genesa 3:20.

LESWI VALAVISISI VA SWI VULAKA

Vandla ra Nhlangano wa Matiko ra Dyondzo, Sayense ni Ndhavuko [United Nations Educational, Scientific, and Cultural Organization (UNESCO)] ri vule leswaku “vanhu hinkwavo lava hanyaka va huma eka rixaka rin’we.”—Declaration on Race and Racial Prejudice, 1978.

LESWI BIBELE YI SWI VULAKA

Xikwembu xi vumbe vanhu vambirhi, ku nga Adamu na Evha kutani xi ku eka vona: “Tswalanani mi andza, mi tata misava, mi yi fuma.” (Genesa 1:28) Xisweswo, Adamu na Evha va ve vatswari va vanhu hinkwavo. Endzhakunyana loko ndhambi yi lovise vanhu vo tala emisaveni, ku pone mimpatswa ya mune, ku nga Nowa ni nsati wakwe, vana va vona vanharhu va majaha ni vasati va vona. Bibele yi dyondzisa leswaku hinkwerhu hi huma eka vana va Nowa.—Genesa 9:18, 19.

 Xana ku ni rixaka leri tlakukeke ku tlula rin’wana?

“Hi munhu un’we [Xikwembu] xi endle matiko hinkwawo ya vanhu, leswaku va tshama ehenhla ka vuandlalo hinkwabyo bya misava.”—Mintirho 17:26.

LESWI VAN’WANA VA SWI VULEKE

Ku sukela emalembeni ya va-1900, vanhu vo tala va tekelele mukhuva wa ku va ni xihlawuhlawu. Hi xikombiso, Manazi a ma pfumela leswaku rixaka ra vona ri tlakuke ku tlula ra van’wana. Hi hala tlhelo, vandla ra UNESCO leri ku vulavuriweke ha rona laha henhla ri vule leswaku “vanhu hinkwavo va ringana hikuva va huma eka munhu un’we.”

LESWI BIBELE YI SWI VULAKA

Mintirho 10:34, 35 yi ri: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.” Hikwalaho, a nga kona la faneleke a teka rixaka rin’wana ri tlakukile ku tlula rin’wanyana.

Yesu u vekele Vakreste xikombiso lexinene loko a byela vadyondzisiwa vakwe a ku: “hinkwenu mi vamakwavo.” (Matewu 23:8) U khongelele leswaku valandzeri va yena va va ni vun’we naswona va “hetisisiwa va va un’we” va nga avani kumbe ku hambana.—Yohane 17:20-23; 1 Vakorinto 1:10.

Xana xihlawuhlawu xi ta kala xi hela?

“Exiphen’wini xo hetelela xa masiku ntshava ya yindlu ya Yehovha yi ta simekiwa yi tiya . . . , kutani matiko hinkwawo ma fanele ma khitikanela eka yona.”—Esaya 2:2.

LESWI VAN’WANA VA SWI ANAKANYAKA

Leswi ku vengana ka tinxaka ku yaka emahlweni, swi endla leswaku ematikweni yo tala vanhu va tivutisa loko ku ri ni swo karhi leswi endliwaka leswaku ku antswisiwa xiyimo lexi xa xihlawuhlawu. Van’wana va gimeta hi ku vula leswaku a va nge pfuki va vone tinxaka ta vanhu ti ringana.

LESWI BIBELE YI SWI VULAKA

Xikwembu a xi nge swi pfumeleli leswaku xihlawuhlawu xi tshama hilaha ku nga heriki. Eka Mfumo wa xona, vavanuna ni vavasati lava ‘humaka eka matiko hinkwawo ni tinyimba hinkwato ni vanhu hinkwavo ni tindzimi hinkwato’ va ta xi tirhela hi vun’we va ri karhi va kombisana rirhandzu ra xiviri. (Nhlavutelo 7:9) Mfumo wa Xikwembu a hi xiyimo xa mbilu kambe i hulumendhe leyi nga ta lulamisa misava, ku nga ndhawu leyi Xikwembu a xi lava leswaku vanhu va tinxaka hinkwato va tshama eka yona ku nga ri na xihlawuhlawu. *

^ ndzim. 15 U nga kuma rungula leri engetelekeke eka ndzima 3 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Xana Misava Leyi Nga Riki Na Xihlawuhlawu Yi Ta Fika Rini?

Mintokoto leyi kombisaka ndlela leyi Bibele yi va pfunaka ha yona vanhu ku tshika xihlawuhlawu. Hi rini laha xi nga ta heriseriwa makumu?