Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  April 2014

 MATIKO NI VANHU

Ku Endzela Tiko Ra Cambodia

Ku Endzela Tiko Ra Cambodia

SWIMUTANA SWA LE MATINI leswi nga ni timakete to tala ni swithuthuthu leswi rhwalaka tihuku hambi ku ri swigwitsirisi—leswi ko va swin’wana swa swilo leswi endlekaka eCambodia.

Vanhu va le Cambodia va tiviwa hi musa, xinghana ni vun’we. Hi ntolovelo loko va vonana va tirhisa swithopo swo tanihi buti, sesi, hahani, malume kumbe kokwana, hambiloko va vonana ro sungula.

Vanhu van’wana va le Cambodia va tshama eka tiyindlu ta swikepe kasi van’wana va tshama eka tiyindlu leti akiweke ematini. Ku ni swikolo, titliliniki, timakete ni tindhawu to xavisa petirolo leswi na swona swi akiweke ematini

Dragon fruit i mbhandzu lowu rhandziwaka ngopfu eCambodia

Rhayisi i swakudya leswi tolovelekeke eCambodia. Hi ntolovelo ku swekiwa mihlovo yinharhu kumbe mune ya swakudya ku katsa ni sopo naswona tinhlampfi ti rhandziwa ngopfu. Swi tolovelekile leswaku va hlanganisa swakudya swo tsokombela, swo dzunga ni swa munyu eka ndyelo yin’we.

Kwalomu ka malembe ya 2000 lama hundzeke, van’wamabindzu va le Indiya ni vapfhumba lava yaka eChayina, a va tala ku hundza eribuweni ra Cambodia ku ya cincisa siliki ni tinsimbi leswaku va kuma  swinyunyeteri, tihunyu to endla swinun’wherisi, timhondzo ta tindlopfu ni nsuku. Hi ku famba ka nkarhi, vanhu va le Cambodia va tekelele mahanyelo ya le Indiya ni ya le Chayina naswona Vuhindu ni Vubudha na byona byi andzile. Namuntlha, ku tlula 90 wa tiphesente ta vaaki i Mabudha.

Timbhoni ta Yehovha ti chumayela mahungu lamanene lama sekeriweke eBibeleni le Cambodia. Ti pfune vanhu vo tala hi ku tirhisa buku leyi nge Xana Bibele Yi Dyondzisa Yini Hakunene? Ya kumeka hi tindzimi ta kwalomu ka 250 ku katsa ni Xicambodia.

Vanhu vo tlula 1 500 eCambodia, va dyondza Bibele ni Timbhoni ta Yehovha naswona va kuma tinhlamulo ta swivutiso swo tanihi lexi nge “Lava feke va kwihi?” ni lexi nge “Hi xihi xikongomelo xa Xikwembu hi misava?”

Buku leyi nge Xana Bibele Yi Dyondzisa Yini Hakunene? leyi kandziyisiwaka hi Timbhoni ta Yehovha, ya kumeka hi Xicambodia (leyi kombisiweke laha).