Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! APRIL 2014

 NHLOKO-MHAKA YA XIFUNENGETO | NDZA HA HANYELA YINI?

U Nga Wu Kuma Mpfuno

U Nga Wu Kuma Mpfuno

‘Lahlela ku vilela hinkwako ka wena eka Xikwembu, hikuva xa ku khathalela.’—1 PETRO 5:7.

Loko u vona onge a ku na lexi u nga xi endlaka leswaku u antswisa xiyimo xa wena u nga ha vona swi antswa leswaku u tidlaya. Kambe xiya swilo swin’wana leswi nga ku pfunaka.

Xikhongelo. Xikhongelo a ko va ndlela leyi nga ku endlaka u titwa u antswa ntsena; naswona a wu fanelanga u khongela loko u nga ha ri na ntshembo ntsena. Xikhongelo i ndlela ya xiviri yo vulavurisana na Yehovha Xikwembu, loyi a khathalaka ha wena. Yehovha u lava leswaku u n’wi byela leswi ku karhataka. Entiyisweni, Bibele ya hi khutaza yi ku: “Lahlela ndzhwalo wa wena eka Yehovha, u ta ku seketela.”—Pisalema 55:22.

Ha yini u nga khongeli eka Xikwembu namuntlha? Tirhisa vito ra xona ra Yehovha kutani u xi phofulela ta le mbilwini ya wena. (Pisalema 62:8) Yehovha u lava leswaku u n’wi tiva tanihi munghana wa wena. (Esaya 55:6; Yakobo 2:23) Xikhongelo i ndlela yo vulavurisana leyi u nga yi tirhisaka nkarhi wihi na wihi, endhawini yihi na yihi.

Hi ku ya hi Vandla ra le Amerika ro Sivela ku Tidlaya, “nkarhi na nkarhi loko ku endliwa ndzavisiso ku kumeka leswaku vanhu vo tala swinene lava tidlayaka—lava endlaka 90 wa tiphesente kumbe ku tlula—a va ri ni vuvabyi bya ku pfilunganyeka ka mianakanyo loko va tidlaya. Hambiswiritano, hakanyingi vuvabyi lebyi a byi nga tikombi kumbe a byi tshunguriwanga hi ndlela leyi faneleke”

Vanhu lava khathalaka ha wena. Vutomi bya wena i bya nkoka eka van’wana—ku katsa ni swirho swa ndyangu wa wena kumbe vanghana lava nga ha vaka se va swi kombisile leswaku va khathala ha wena. Vanhu van’wana lava khathalaka ha wena va katsa ni lava u nga ha vaka u nga si tshama u hlangana na vona. Hi xikombiso, minkarhi yin’wana Timbhoni ta Yehovha loko ti ri ensin’wini ti hlangana ni vanhu lava karhatekeke swinene, lava van’wana va vona va pfumeleke leswaku a va lava mpfuno wa xihatla naswona a va anakanya ku tidlaya. Ntirho wo chumayela hi yindlu ni yindlu wu endle leswaku Timbhoni ta Yehovha ti va ni lunghelo ro hlawuleka ro pfuna vanhu vo tano. Timbhoni ta Yehovha ti landzela xikombiso xa Yesu xo khathala hi vanhu-kulobye. Ta khathala hi wena.Yohane 13:35.

Mpfuno wa vanhu lava swi dyondzeleke. Hakanyingi loko munhu a anakanya ku tidlaya swi va swi kombisa leswaku u ni vuvabyi bya ku pfilunganyeka ka mianakanyo, byo tanihi ntshikilelo lowukulu wa mianakanyo. A wu fanelanga u khomiwa hi tingana loko u ri ni vuvabyi bya ku pfilunganyeka ka mianakanyo—tanihi leswi u nga khomiwiki hi tingana loko u ri ni vuvabyi byin’wana ni byin’wana. Entiyisweni, ntshikilelo wa mianakanyo wu vitaniwa “mukhuhlwana wa mianakanyo.” Munhu un’wana ni un’wana a nga va na wona—naswona wu nga tshunguleka. *

TSUNDZUKA LESWI: Hakanyingi a swi nge koteki leswaku ntshikilelo wa wena wu tshunguleka u nga lavanga mpfuno. Kambe loko u lava mpfuno, u nga tshunguleka.

LESWI U NGA SWI ENDLAKA SWESWI: Lava dokodela la nga ni ndhuma leyinene loyi a tshungulaka vuvabyi bya ku pfilunganyeka ka mianakanyo byo tanihi ntshikilelo wa mianakanyo.

^ ndzim. 8 Loko u tshamela ku anakanya hi ku tidlaya, lavisisa tindhawu leti u nga kumaka mpfuno eka tona—kumbexana minhlangano leyi pfunaka vanhu leswaku va nga tidlayi kumbe kamara ra le xibedlhele ra lava vabyaka ngopfu. Etindhawini leti ku tirha vanhu lava leteriweke ku pfuna vanhu.

DYONDZA SWO TALA

Xana Xikwembu Xi Ta Ndzi Pfuna Loko Ndzi Khongela?

Xana Xikwembu xa khathala hi swiphiqo swa hina?