Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! SEPTEMBER 2013

 MBULAVURISANO | CÉLINE GRANOLLERAS

Mutivi Wa Tinso A Hlamusela Hi Ta Ripfumelo Rakwe

Mutivi Wa Tinso A Hlamusela Hi Ta Ripfumelo Rakwe

Dok. Céline Granolleras, i dokodela wa le Furwa la tshungulaka vuvabyi bya tinso. Endzhaku ka malembe yo tlula 20 a ri dokodela, u gimete hileswaku ku ni Muvumbi loyi a hi khathalelaka. Mutsari wa Xalamuka! u n’wi vutise hi ntirho wakwe ni hi ripfumelo rakwe.

Hi byele hi ta vutsongwana bya wena.

Ndyangu wa ka hina wu suke eSpain wu rhurhela eFurwa loko ndzi ri ni malembe ya kaye. Vatswari va mina a va ri Makhatoliki, kambe ndzi tshike ku pfumela eka Xikwembu loko ndzi ri ni malembe ya 16. Eka mina, vukhongeri a byi nga ri bya nkoka evuton’wini. Loko munhu a ndzi vutisa leswaku vutomi byi sungurise ku yini loko ku nga ri na Xikwembu, a ndzi ku, “Ku ta fikela sweswi, vativi va sayense a va swi koti ku swi hlamusela, kambe va ta swi kota siku rin’wana.”

I yini lexi ku endleke u dyondzela ku tshungula vuvabyi bya tinso?

Ndzi dyondze exikolweni xa swa vutshunguri le Montpellier, eFurwa. Profesa un’wana kwalaho u vulavule na mina hi ku dyondzela ku tshungula tinso. Ntirho wa kona a wu katsa ku endla ndzavisiso malunghana ni ku khathalela vanhu lava nga ni vuvabyi byolebyo. Sweswo a ku ri leswi a ndzi swi lava. Hi 1990, ndzi sungule ku hlanganyela eku endleni ka ndzavisiso malunghana ni ku tirhisiwa ka erythropoietin (EPO) leyi hlanganisiweke ni swiaki swa xitekela leswintshwa leswaku ku lawuriwa ku endliwa ka tisele to tshwuka ta ngati emarhambyini ya hina. Hi nkarhi wolowo, mhaka yoleyo a yi tekiwa yi ri yintshwa eka ta ndzavisiso.

I yini lexi ku endleke u sungula ku anakanya hi Xikwembu?

Hi 1979, nuna wa mina Floréal, u sungule ku dyondza Bibele ni Timbhoni ta Yehovha. Kambe mina a ndzi nga swi tsakeli. Vukhongeri byi ndzi karharise ndza ha ri n’wana. Nilokoswiritano, nuna wa mina ni  vana va hina va ve Timbhoni naswona swi nga si ya kule vanghana va hina vo tala a va ri Timbhoni. Un’wana wa vona, ku nga Patricia, u ringanyete leswaku ndzi ringeta ku khongela. U te: “Loko ku nga ri na munhu etilweni, a wu nge lahlekeriwi hi nchumu. Kambe loko a ri kona, u ta vona leswi nga ta endleka.” Endzhaku ka malembe yo tala, ndzi sungule ku tivutisa hi xikongomelo xa vutomi, kutani hiloko ndzi tsundzuka marito ya Patricia. Ndzi sungule ku khongela ndzi kombela ku twisisa.

I yini lexi endleke u tivutisa hi xikongomelo xa vutomi?

Ku hlaseriwa ka miako ya World Trade Center le New York hi matherorisi swi ndzi endle ndzi tivutisa leswaku ha yini ku ri ni vuhomboloki byo tarisa xileswi evanhwini. Ndzi te: ‘Vanhu lava hisekelaka vukhongeri ku tlula mpimo va veka vumundzuku bya hina ekhombyeni. Kambe ndzi hanya ni Timbhoni ta Yehovha leti rhuleke. A ti hisekeli etlhelo. Ti landzela Bibele. Kumbexana ndzi fanele ndzi kambisisa leswi yi swi vulaka.’ Hikwalaho ndzi sungule ku tihlayela Bibele.

Leswi u nga dokodela, xana a swi ku tikela ku pfumela eka Muvumbi?

Doo! A ndzi yi xixima swinene ndlela leyi miri wa hina wu endliweke hi ndlela yo rharhangana ha yona. Hi xikombiso, ndlela leyi tinso ta hina ti wu lawulaka ha yona mpimo wa tisele to tshwuka engatini ya hina ya hlamarisa swinene.

Ha yini u vula tano?

Swi ndzi fikele emianakanyweni leswaku i Xikwembu ntsena lexi nga endlaka fambiselo ro tano leri rharhanganeke

Hilaha u swi tivaka hakona, tisele to tshwuka ta ngati ti fambisa okisijini. Loko wo huma ngati yo tala kumbe loko wo ya endhawini leyi tlakukeke swinene, miri wa wena wu ta heleriwa hi okisijini. Tinso ta hina ti ni switwi swa okisijini. Loko swi vona leswaku okisijini ya kayivela engatini, swi sungula ku humesa EPO, naswona mpimo wa EPO engatini wu nga ha tlakuka wu phindhiwa ka gidi. EPO yi endla leswaku mongo wa marhambu wu humesa tisele to tshwuka leti engetelekeke, ivi tona ti fambisa okisijini yo tala. Swa hlamarisa! Lexi hlamarisaka, ndzi dyondze hi endlelo leri ku ringana malembe ya khume swi nga si ndzi fikela emianakanyweni leswaku i Xikwembu ntsena lexi nga endlaka fambiselo ro tano leri rharhanganeke.

I yini lexi ku tsakiseke hi Bibele?

Ndzi hlaye tibuku to tala ta matimu ni swirungulwana leswi dumeke, kambe ndzi hatle ndzi swi xiya leswaku Bibele a yi hambanile na swona. Ndzayo ya yona yi tirha swinene lerova a swi tikomba leswaku yi fanele yi huma eka munhu la tlakukeke ku tlula vanhu. Vumunhu bya Yesu byi ndzi tsakisile. Ndzi swi vonile leswaku a a ri munhu wa xiviri. A a ri ni mintlhaveko naswona a a ri ni vanghana. Tanihi leswi a ndzi nga swi lavi ku tirhisa minkandziyiso ya Timbhoni ta Yehovha, a ndzi endla ndzavisiso eka minsonga-vutivi ni le ka tibuku tin’wana loko ndzi va ni swivutiso.

A wu endla ndzavisiso malunghana na yini?

Ndzi endle ndzavisiso eka tibuku ta matimu . . . Eku heteleleni, ndzi gimete hileswaku vuprofeta lebyi bya le Bibeleni byi hetiseke hi nkarhi wa byona

Eka swin’wana swa swilo leswi ndzi endleke ndzavisiso ha swona, ndzi tsakisiwe hi ndlela leyi Bibele yi profeteke lembe leri Yesu a a ta khuvuriwa ha rona. Yi swi kombisa hi ku kongoma leswaku a ku ta hundza nkarhi wo tanihi kwihi exikarhi ka lembe ra vu-20 ra ku fuma ka Atazekiseki mufumi wa le Peresiya ni lembe leri Yesu a a ta tikombisa ha rona tanihi Mesiya. * Ndzi swi toloverile ku endla ndzavisiso—i xiphemu xa ntirho wa mina. Hikwalaho ndzi endle ndzavisiso eka tibuku ta matimu ku tiyisekisa nkarhi lowu Atazekiseki a fumeke ha wona ni nkarhi lowu Yesu a endleke vutirheli bya yena ha wona. Eku heteleleni, ndzi gimete hileswaku vuprofeta lebyi bya le Bibeleni byi hetiseke hi nkarhi wa byona nileswaku byi fanele byi huhuteriwe hi Xikwembu.

^ ndzim. 19 Hlaya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha, matluka 197-199.