Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  August 2013

 LANGUTELO RA BIBELE

Byala

Byala

Xana swi hoxile ku nwa byala?

“Vhinyo yi endla leswaku hi tsaka, mafurha ya mitlhwari ma endla leswaku hi khana, naswona xinkwa xi hi nyika matimba.”Pisalema 104:15, “Good News Translation.”

LESWI VANHU VA SWI VULAKA

Emakaya yo tala, byala byi tekiwa tanihi nchumu lowu tolovelekeke, byi nwiwa loko ku ri karhi ku dyiwa. Emakaya man’wana ku nwa byala a swi pfumeleriwi. Ha yini ku ri ni mavonelo yo hambana? Vanhu va susumetiwa hi swiyimo swo hambana-hambana, swo tanihi ndhavuko, ku karhateka hi rihanyo ni vukhongeri.

LESWI BIBELE YI SWI VULAKA

Bibele yi sola vudakwa ni ku nwa ku tlula mpimo kambe ku nga ri ku nwa hi ku ringanisela. (1 Vakorinto 6:9, 10) Entiyisweni, ku sukela khale, vavanuna ni vavasati lava a va gandzela Xikwembu a va yi nwa vhinyo, ku nga xakunwa lexi boxiweke minkarhi yo tlula madzana mambirhi eBibeleni. (Genesa 27:25) Eklesiasta 9:7 yi ri: “[Dyana] swakudya swa wena hi ku tsaka, u nwa vhinyo ya wena hi mbilu leyinene.” Leswi vhinyo yi endlaka leswaku munhu a tsaka, a yi tala ku tirhisiwa eminkhubyeni yo tanihi minkhuvo ya vukati. A ku ri eka nkhuvo wo tano loko Yesu Kreste a endla singita ra yena ro sungula, ro hundzula mati ma va “vhinyo leyinene.” (Yohane 2:1-11) Vhinyo yi tlhele yi tirhisiwa tanihi murhi.—Luka 10:34; 1 Timotiya 5:23.

 Xana Bibele yi veka swipimelo swo nwa mpimo wo tanihi kwihi?

[Mi nga vi] mahlonga ya vhinyo yo tala.”—Tito 2:3.

HA YINI SWI RI SWA NKOKA?

Lembe ni lembe, mindyangu ya ntsandza-vahlayi ya xaniseka hikuva mutswari un’we kumbe havambirhi va nwa byala ku tlula mpimo. Ku nwa ku tlula mpimo swi tlhela swi vanga swiphiqo swo tala ni makhombo man’wana, ku katsa ni timhangu ta le magondzweni. Hi ku famba ka nkarhi ku nwa ku tlula mpimo swi nga ha vanga mavabyi ya byongo, mbilu, xivindzi ni khwiri.

LESWI BIBELE YI SWI VULAKA

Xikwembu xi lava leswaku hi ringanisela eku nweni ni le ku dyeni. (Swivuriso 23:20; 1 Timotiya 3:2, 3, 8) Ku tsandzeka ku tikhoma swi hi endla hi nga amukeleki eka xona. Bibele yi ri: “Vhinyo i muhlekuri, swakunwa leswi pyopyaka swi ni matimba, naswona loyi swi n’wi pepetsekisaka a nga tlharihanga.”—Swivuriso 20:1.

Ndlela yin’wana leyi byala byi nga hambukisaka vo kala vutlhari, i ku onha mahanyelo ya vona. Hosiya 4:11 yi ri: “Vhinyo ni vhinyo yo tsokombela hi swona leswi swi susaka miehleketo leyinene.” Wanuna la vuriwaka John u xiye leswi endzhaku ka loko a kume vuyelo byo biha. * Endzhaku ko holova ni nkatakwe, u ye ehotela, laha a fikeke a nwa ku tlula mpimo, a tlhela a endla vuoswi, ku nga swilo leswi a tisoleke ngopfu ha swona ni ku tiyimisela ku ka a nga ha tlheli a swi endla. Ku nwa ku tlula mpimo swi nga hi vavisa emirini, emahanyelweni ni ku onha vuxaka bya hina ni Xikwembu, naswona Bibele yi vula leswaku swidakwa a swi nge byi kumi vutomi lebyi nga heriki.—1 Vakorinto 6:9, 10.

Hi rini laha ku nwa swi nga fanelangiki?

“Munhu wo tlhariha u vona khombo ra ha ri kule kutani a tumbela, kasi loyi a nga anakanyiki u tihoxa eka rona, kutani endzhaku a tisola.”—Swivuriso 22:3, “Good News Translation.”

HA YINI SWI RI SWA NKOKA?

World Book Encyclopedia yi ri: “Byala i xidzidziharisi lexi nga ni matimba swinene.” Hikwalaho ku ni swiyimo kumbe nkarhi lowu hambi ku ri ku nwa byala hi ku ringanisela swi nga vaka swi nga ri vutlhari.

LESWI BIBELE YI SWI VULAKA

Vanhu va tala ku “tihoxa [ekhombyeni]” hikwalaho ko nwa hi nkarhi lowu hoxeke. Bibele yi ri: “Xin’wana ni xin’wana xi ni nkarhi wa xona lowu vekiweke,” ku katsa ni nkarhi wo papalata byala. (Eklesiasta 3:1) Hi xikombiso, munhu a nga ha tikuma a nwa byala a ha ri ehansi ka malembe lama pfumeleriweke hi ku ya hi nawu wa tiko, a nga ha va a ri karhi a hlakarhela endzhaku ko godzomberiwa, kumbe a nga ha va a tirhisa vutshunguri lebyi nga twananiki ni byala. Nakambe eka vanhu vo tala, ‘nkarhi lowu vekiweke’ lowu va faneleke va byi papalata ha wona, hiloko va nga si ya entirhweni niloko va ri entirhweni, ngopfu-ngopfu loko va tirhisa michini leyi nga ni khombo. Hi nga tiyiseka leswaku vanhu vo tlhariha va languta vutomi ni rihanyo tanihi tinyiko ta risima leti humaka eka Xikwembu. (Pisalema 36:9) Loko hi pfumelela milawu ya Bibele leswaku yi hi kongomisa loko swi ta emhakeni ya byala, hi va hi kombisa leswaku ha ti xixima tinyiko leti.

^ ndzim. 11 Vito ri cinciwile.