Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XALAMUKA! JULY 2013

 LANGUTELO RA BIBELE

Mfumo Wa Xikwembu

Mfumo Wa Xikwembu

Xana Mfumo wa Xikwembu wu le mbilwini ya munhu?

“A wu le kule ni mfumo wa Xikwembu.”—Marka 12:34.

LESWI VANHU VA SWI VULAKA

Vanhu vo tala va pfumela leswaku Mfumo wa Xikwembu wu hilaha tikereke leti tivulaka ta Vukreste ti dyondzisaka hakona ti ku, “mfumo wa Xikwembu wu le mbilwini ya munhu.”

LESWI BIBELE YI SWI VULAKA

Mfumo wa Xikwembu i hulumendhe ya xiviri, naswona a wu fanekiseli ku va munhu a amukele Xikwembu embilwini yakwe. Mfumo wa Xikwembu wu ta fuma misava hinkwayo.—Pisalema 72:8; Daniyele 7:14.

Xana ku vuriwa yini hi marito ya Yesu lama nge, “mfumo wa Xikwembu wu le ndzeni ka n’wina”? (Marito hi lo tivoyamisela; Luke 17:21, King James Version) Yesu a a nga vuli swona leswaku Mfumo Xikwembu a wu ri etimbilwini ta vayingiseri vakwe. Ha yini? Hikuva hi nkarhi wolowo vanhu lava a va n’wi yingiserile a ku ri Vafarisi. Yesu u vule leswaku a va nga ta nghena eMfun’weni wa Xikwembu hikuva vugandzeri bya vona a byi ri bya vukanganyisi kutani a byi nga amukeleki eka Xikwembu. (Matewu 23:13) Hambiswiritano, Yesu a a ta vula a ku Mfumo wa Xikwembu wu le “ndzeni ka n’wina” kumbe hilaha Vuhundzuluxeri Bya Misava Leyintshwa byi vulaka hakona byi ku, “wu le xikarhi ka n’wina.” Ha yini? Hikuva yena, tanihi leswi a a ta va Hosi ya Mfumo wolowo a a yime emahlweni ka vona.—Luka 17:21.

 I yini Mfumo wa Xikwembu?

“Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”—Matewu 6:10.

LESWI BIBELE YI SWI VULAKA

Mfumo wa Xikwembu i hulumendhe ya xiviri, leyi Mufumi wa yona ku nga Yesu Kreste. (Matewu 28:18; 1 Timotiya 6:14, 15) Xikongomelo xa yona i ku endla ku rhandza ka Xikwembu etilweni ni laha misaveni. (Matewu 6:10) Xisweswo, hi ku tirhisa Mfumo wa xona, Xikwembu xi ta tlhantlha swiphiqo leswi vanhu va nga na swona. Nakambe, Mfumo wolowo wu ta endla swilo leswi tihulumendhe ta vanhu ti nga taka ti nga swi koti nikatsongo ku swi endla.

Ehansi ka Mfumo wa Xikwembu, vanhu va ta va ni ku rhula ni nsirhelelo naswona va ta kuma mikateko yo tala emisaveni leyi nga paradeyisi. (Pisalema 46:9; Esaya 35:1; Mikiya 4:4) Ku hava munhu loyi a nga ta vabya kumbe ku fa naswona mavabyi ma ta herisiwa. (Esaya 33:24; Nhlavutelo 21:4) Ni ku dyuhala ku ta va ku nga ha ri kona. Bibele yi profete yi ku: “Nyama yakwe a yi ve yintshwa ku tlula evuntshweni; a a vuyele emasikwini ya matimba yakwe ya vuntshwa.”—Yobo 33:25.

LESWI U NGA SWI ENDLAKA

Ku nga khathariseki ndyangu kumbe ndhawu leyi u velekeriweke eka yona, u nga nghena eMfun’weni wa Xikwembu loko ntsena u endla leswi xi ku kombelaka swona. Bibele yi ri: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

Xana matshalatshala ya vanhu ma nga wu tisa Mfumo wa Xikwembu?

“Xikwembu xa le tilweni xi ta veka mfumo lowu nga ta ka wu nga lovisiwi.”—Daniyele 2:44.

LESWI VANHU VA SWI VULAKA

Van’wana va pfumela leswaku vanhu va ta tisa Mfumo wa Xikwembu laha misaveni, va nga ha endla tano hi ku va va kucetela vanhu leswaku va joyina vukhongeri bya vona kumbe hi ku tikarhatela ku kondletela ku rhula emisaveni hinkwayo ni ku hanyisana hi vun’we.

LESWI BIBELE YI SWI VULAKA

Xikwembu—ku nga ri vanhu—xi simeke Mfumo. (Daniyele 2:44) Loko ku simekiwa Mfumo wolowo, Xikwembu xi te: “Mina ndzi veke hosi yanga.” (Pisalema 2:6) Vanhu a va nge wu tisi Mfumo wa Xikwembu, naswona a va nge ku kavanyeti ku rhula ka wona, tanihi leswi wu nga ta fuma misava wu ri etilweni.—Matewu 4:17.

HA YINI MHAKA LEYI YI FANELE YI VA YA NKOKA EKA WENA?

I swa ntumbuluko ku navela leswaku onge siku rin’wana vanhu va nga tshama hi ku rhula ni vun’we. U nga ha endla matshalatshala yo ringeta ku tisa ku rhula kambe u nga ha heleriwa hi ntshembo loko u vona onge matshalatshala ya wena ko va nyuku wa mbyana. Ku tiva leswaku Mfumo wa Xikwembu hi wona ntsena lowu nga ta tisa ku rhula, swi ta ku pfuna leswaku u teka goza leri faneleke hi ku va loyi u tikarhatelaka ku nghena eka wona.