Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  June 2013

 LESWI NGA PFUNAKA NDYANGU | VUKATI

Ndlela Yo Herisa “Mukhuva Wo Tsuvelana”

Ndlela Yo Herisa “Mukhuva Wo Tsuvelana”

NTLHONTLHO

Swi ta njhani leswaku vanhu vambirhi lava hlambanyeke leswaku va ta rhandzana, va tshika ku vulavurisana ku ringana tiawara to tala kumbe masiku yo hlayanyana? Va nga ha tibyela va ku ‘swa antswa hikuva hi tshike ku lwa.’ Hambiswiritano, mholovo a yi lulamisiwanga naswona havumbirhi bya vona a va tsakanga.

LESWI WU VANGAKA

Ku rihisela. Mimpatswa yin’wana yi tsuvelana hi xikongomelo xo rihisela. Hi xikombiso, a hi nge nuna u kunguhata ku endla swo karhi hi mahelo-vhiki kambe a nga n’wi byelanga nsati wakwe. Loko nsati a tshubula mhaka leyi, wa hlundzuka kutani a byela nuna wakwe leswaku a nga anakanyeli. Kutani nuna u byela nsati wakwe leswaku u hlundzikisiwa hi swilo leswi nga vuliki nchumu. Hi loko nsati a tsuva a suka emahlweni ka nuna wakwe. Entiyisweni, u ri, “U ndzi twise ku vava, na mina ndzi lava ku ku twisa ku vava.”

Ku sindzisa. Van’wana va tsuva hi xikongomelo xo lava ku kuma swilo leswi va swi lavaka. Hi xikombsio, a hi nge nuna ni nsati va kunguhata ku teka riendzo, kutani nsati u lava leswaku va famba ni vatswari vakwe. Nuna wa ala, ivi a byela nsati wakwe a ku: “U tekiwe hi mina ku nga ri hi vatswari va wena.” Endzhaku ka sweswo u tsuvela nsati a tlhela a n’wi papalata ku fikela laha nsati a pfumelelanaka na yena.

Minkarhi yin’wana loku u titwa leswaku u ya u hlundzuka ngopfu loko mi ri karhi mi holova, a swi bihanga ku miyela ku kondza u kala u vohla. Ku tsuva ko tano ku nga pfuna swinene. Bibele yi vula leswaku ku ni “nkarhi wa ku miyela.” (Eklesiasta 3:7) Kambe loko ku tsuva ku tirhisiwa hi xikongomelo xo rihisela kumbe xo sindzisa, a swi pfurheteli timholovo ntsena kambe swi tlhela swi endla leswaku mpatswa wu nga ha xiximani. U nga tisirhelela njhani eka mukhuva lowu?

 LESWI U NGA SWI ENDLAKA

Goza ro sungula u fanele u tiva leswaku ku tsuva i yini, kambe ku swi tiva ntsena a swi nge tlhantlhi swiphiqo swa wena hi ku helela. I ntiyiso leswaku ku tsuva ku nga ha va ndlela yin’wana yo rihisela kumbe yo endla leswaku munghana wa wena wa vukati a pfumelelana na wena eka leswi u swi lavaka. Xana hi yona hakunene ndlela leyi u lavaka ku khoma munhu loyi u hlambanyeke leswaku wa n’wi rhandza? Ku ni tindlela to antswa to tlhantlha timholovo.

Vana la twisisaka. Bibele yi vula leswaku rirhandzu “a ri hlundzuki.” (1 Vakorinto 13:4, 5) Kutani, tikhome loko munghana wa wena wa vukati a ku byela timhaka a hlundzukile, to tanihi loko a ku: “A wu si tshama u ndzi yingisela” kumbe “Minkarhi hinkwayo u tshama u letile.” Ematshan’weni yo hlundzuka, twisisa leswaku ha yini a vulavula hi ndlela yoleyo. Hi xikombiso, swi nga ha endleka leswaku loko a ku, “A wu si tshama u ndzi yingisela” a a lava ku vula leswaku “Ndzi vona onge mavonelo ya mina a wu ma teki ma ri ya nkoka.”—Nawu wa Bibele: Swivuriso 14:29.

Teka munghana wa wena wa vukati tanihi munhu loyi mi tlangelaka xipano xin’we

Vulavulela ehansi. Timholovo ti nyanya ku biha loko ti hambeta ti ya emahlweni. Hambiswiritano, u nga swi kota ku sivela timholovo leswaku ti nga nyanyi ku biha. Njhani? Buku leyi nge Fighting for Your Marriage yi ri: “Ku vulavulela ehansi ni ku ma tekela enhlokweni mavonelo ya munghana wa wena wa vukati i switirhisiwa swa nkoka swinene leswi u nga swi tirhisaka leswaku u vohlisa vukarhi kumbe ku heta timholovo. Hakanyingi, sweswo swa pfuna swinene.”—Nawu wa Bibele: Swivuriso 26:20.

Ehleketelela “n’wina” ku nga ri “wena” ntsena. Bibele yi ri: “Un’wana ni un’wana a a hambete a lava leswaku ku pfuneka un’wana, hayi yena n’wini.” (1 Vakorinto 10:24) Loko u teka munghana wa wena wa vukati tanihi munhu loyi mi tlangelaka xipano xin’we, a wu nge khunguvanyeki hi ku hatlisa, a wu nge n’wi holovisi naswona a wu nge n’wi tsuveli.—Nawu wa Bibele: Eklesiasta 7:9.

Ku tsuvela munghana wa vukati a ku pfumelelani na swona leswi Bibele yi swi dyondzisaka loko yi ku: “Un’wana ni un’wana wa n’wina a a rhandze nsati wakwe hilaha a tirhandzaka hakona; hi hala tlhelo, wansati u fanele ku va ni xichavo xo enta eka nuna wakwe.” (Vaefesa 5:33) Ha yini u nga endli ntwanano ni munghana wa wena wa vukati wa leswaku a mi fanelanga mi tsuvelana evukatini bya n’wina?

DYONDZA SWO TALA

XALAMUKA!

Ndlela Yo Papalata Mavulavulelo Lama Tlhavaka

I yini leswi mi nga swi endlaka loko mi pfumelele marito lama tlhavaka ma hlakata vukati bya n’wina?

U NGA VA NI NDYANGU LOWU TSAKEKE

Titshege Hi Xikwembu Leswaku U Va Ni Vukati Lebyi Tsakisaka

Ku tirhisa swivutiso swimbirhi swo olova swi nga ku pfuna leswaku u antswisa vukati bya wena.