Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! MAY 2013

 LANGUTELO RA BIBELE

Xivumbeko Xa Xikwembu

Xivumbeko Xa Xikwembu

Xikwembu xi ni miri wa njhani?

“Xikwembu i Moya.”Yohane 4:24.

LESWI BIBELE YI SWI VULAKA

Bibele yi hlamusela Xikwembu tanihi xivumbiwa xa moya. (2 Vakorinto 3:17) Hikwalaho ka sweswo, xi tlakuke ngopfu eka hina naswona a hi nge swi koti ku twisisa ndlela leyi xi tlakukeke ha yona. Timotiya wo Sungula 1:17 yi vula leswaku Xikwembu i “Hosi leyi nga riki na makumu, leyi nga onhakiki, leyi nga vonakiki.” Nakambe Bibele yi ri: “A nga kona ni un’we la tshameke a vona Xikwembu.”—1 Yohane 4:12.

Muvumbi wa hina u tlakuke ngopfu eka hina lerova a hi nge swi twisisi leswaku u languteka njhani. Esaya 40:18 yi ri: “Xana n’wina mi nga xi fanisa na mani Xikwembu, naswona i xifaniso xihi lexi mi nga xi fanisaka na xona?” Hambi ku ri matilo lama hlamarisaka a ma nyawuli loko ma pimanisiwa ni Lowa Matimba Hinkwawo.—Esaya 40:22, 26.

Hambiswiritano, ku ni swivumbiwa swin’wana leswi nga kotaka ku vona Xikwembu hambi ku ri ku vulavula na xona hi ku kongoma. Ha yini? Hikuva na swona i swivumbiwa swa moya nakambe swi tshama etilweni. (1 Tihosi 22:21; Vaheveru 1:7) Malunghana ni swivumbiwa sweswo leswi nga ni matimba yo tlula ya munhu, leswi nakambe swi vuriwaka tintsumi, Yesu Kreste u te: “Minkarhi hinkwayo ti vona xikandza xa Tatana la nge tilweni.”—Matewu 18:10.

 Xana Xikwembu xi kumeka kun’wana ni kun’wana minkarhi hinkwayo?

“Kutani mi fanele mi khongela hi ndlela leyi: ‘Tata wa hina la nge matilweni.’”—Matewu 6:9.

LESWI BIBELE YI SWI VULAKA

Bibele a yi dyondzisi leswaku Xikwembu xi kumeka kun’wana ni kun’wana minkarhi hinkwayo ku fana ni matimba yo karhi lama nga twisisekiki. Ematshan’weni ya sweswo, hilaha marito ya Yesu lama tsariweke eka Matewu 6:9 na 18:10 ma swi kombisaka hakona, Xikwembu i “Tatana” naswona xi tshama etilweni, ku nga “ndhawu ya [xona] yo tshama eka yona.”—1 Tihosi 8:43.

Loko nkarhi wa leswaku Yesu a dlayiwa wu tshinela, u te: “Ndzi siya misava, ndzi ya eka Tatana.” (Yohane 16:28) Endzhaku ka loko Kreste a file ivi a pfuxiwa tanihi xivumbiwa xa moya, u tlhandlukele “etilweni hi koxe, kutani a humelela emahlweni ka Xikwembu hi xiviri.”Vaheveru 9:24.

Tinhla leti, leti vulavulaka hi Xikwembu i ta nkoka. Ha yini? Xo sungula, hikuva Xikwembu i munhu loyi hi nga kotaka ku dyondza ha yena hi tlhela hi tshinela eka yena. (Yakobo 4:8) Xa vumbirhi, ntiyiso malunghana ni Xikwembu wa hi sirhelela eka vugandzeri bya mavunwa byo tanihi ku gandzela swifaniso ni swilo leswi nga lo endliwa. Yohane wo Sungula 5:21 yi ri: “Vana lavatsongo, tivoneleni swifaniso.”

Vanhu va tumbuluxiwe njhani hi xifaniso xa Xikwembu?

“Xikwembu xi ya emahlweni xi tumbuluxa munhu hi xifaniso xa xona, xi n’wi tumbuluxe hi xifaniso xa Xikwembu; xi va tumbuluxe va ri waxinuna ni waxisati.”—Genesa 1:27.

LESWI BIBELE YI SWI VULAKA

Leswi hi nga vanhu, hi kota ku kombisa timfanelo ta Xikwembu to tanihi rirhandzu, vululami ni vutlhari. Entiyisweni, Bibele yi ri: “Leswi mi nga vana lava rhandzekaka, vanani vatekeleri va Xikwembu, mi hambeta mi famba erirhandzwini.”—Vaefesa 5:1, 2.

Nakambe Xikwembu xi hi tumbuluxe hi ri ni ntshunxeko wo tihlawulela, lowu endlaka leswaku hi kota ku hlawula ku endla leswinene kumbe leswo biha ni ku komba van’wana rirhandzu hi tindlela to hambana-hambana. (1 Vakorinto 13:4-7) Hi tlhela hi kota ku tiendlela swilo, ku tsakisiwa hi xilo xo saseka ni ku hlamarisiwa hi swilo leswi hlamarisaka leswi hi rhendzeleke. Ku tlula kwalaho, hi tumbuluxiwe hi ri ni ku navela ko dyondza hi Muvumbi wa hina ni ku rhandza kakwe.—Matewu 5:3.

Ndlela leyi ntiyiso wa Bibele wu nga ku pfunaka ha yona. Loko hi ya hi dyondza hi Xikwembu ni ku xi tekelela, hi ta ya hi hanya hi ndlela leyi a xi lava leswaku hi hanya ha yona eku sunguleni. Hikwalaho ka sweswo, hi ta tshama hi tsakile evuton’wini, hi enerisekile ni ku va ni ku rhula ka mianakanyo. (Esaya 48:17, 18) Xikwembu xa swi tiva leswaku timfanelo ta xona leti tsakisaka ti khumba timbilu ta vanhu, ti susumetela lava nga ni timbilu letinene leswaku va lunghekela ku famba egondzweni leri yisaka evuton’wini lebyi nga heriki.—Yohane 6:44; 17:3.