Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! FEBRUARY 2013

 LANGUTELO RA BIBELE

Swisiwana

Swisiwana

Xana Xikwembu xa khathala hi swisiwana?

“Mukhuva wa n’wina wa vutomi a wu pfumale rirhandzu ra mali . . . Hikuva [Xikwembu] xi te: ‘Ndzi nga ka ndzi nga ku tshiki naswona ndzi nga ka ndzi nga ku fularheli.’”—Vaheveru 13:5.

NDLELA LEYI XIKWEMBU XI KHATHALAKA HA YONA

Loko mugandzeri wa Xikwembu a koka exilogweni, nkhathalelo wa xona wu nga ha vonaka hi tindlela to hambana-hambana. Yin’wana ya tona i nseketelo lowu humaka eka Vakreste-kulobye. * Yakobo 1:27 yi ri: “Muxaka wa vugandzeri lebyi baseke ni lebyi nga nyamangiki hi ku ya hi langutelo ra Xikwembu tlhelo Tata wa hina hi lowu: ku khathalela lava nga riki na vatswari ni tinoni enhlomulweni wa tona.”

Vakreste vo sungula a va pfunana. Hi xikombiso, loko ku profetiwe leswaku ndlala leyikulu a yi ta hlasela eYudiya, Vakreste va le mutini wa Siriya wa Antiyoka va tiyimisele “ku rhumela swo phalala vamakwavo lava tshamaka eYudiya.” (Mintirho 11:28-30) Hikwalaho ka sweswo, Vakreste-kulobye lava a va ri swisiwana va kume swakudya leswi a va swi lava swinene. Ku hanana koloko loku humaka embilwini ku kombise rirhandzu ra Vukreste hi swiendlo.—1 Yohane 3:18.

 Swisiwana swi nga tipfuna njhani?

“Mina Yehovha, ndzi Xikwembu xa wena, Loyi a ku dyondziselaka ku ku pfuna.”—Esaya 48:17, 18.

XIKWEMBU XA HI PFUNA LESWAKU NA HINA HI TIPFUNA

Hilaha vanhu va timiliyoni va swi xiyeke hakona, vutlhari lebyi nga eBibeleni bya pfuna naswona byi nyikela nkongomiso lowunene. Swivuriso 2:6, 7 yi ri: “Yehovha u nyika vutlhari; enon’wini wakwe ku ni vutivi ni ku twisisa. Lavo lulama u ta va hlengeletela vutlhari lebyi pfunaka.” Loko vanhu va lavisisa vutlhari byebyo va tlhela va byi tirhisa, va vuyeriwa.

Hi xikombiso, va papalata mikhuva leyi nga ni khombo ni leyi dyaka mali yo tala, yo tanihi ku tirhisa swidzidziharisi ni ku nwa byala ku tlula mpimo. (2 Vakorinto 7:1) Nakambe va va vanhu vo tshembeka, lava nga ni matirhelo lamanene ni lava nga ni vutihlamuleri, xisweswo va pfulekeriwa hi tindlela to kuma mintirho kumbe ku tekiwa tanihi vatirhi lavanene. Vaefesa 4:28 yi ri: “Muyivi a nga ha tlheli a yiva, kambe ematshan’weni ya sweswo a a tirhe hi matimba, . . . leswaku a kuma xo xi avela loyi a pfumalaka.”

Xana byi kona vumbhoni lebyi kombisaka leswaku vutlhari lebyi nga eBibeleni bya swi pfuna swisiwana?

“Vutlhari bya Xikwembu byi tikombisa byi lulamile hi vuyelo bya byona.”—Matewu 11:19, The New English Bible.

VUYELO LEBYI NYIKELAKA VUMBHONI

Wilson, loyi a a ri mutirhi wa nkarhinyana loyi a tshamaka eGhana, a a ta heleriwa hi ntirho hileswi kontraka yakwe a yi ri kusuhi ni ku hela. Hi siku rakwe ro hetelela loko a ri karhi a hlantswa movha wa mininjhere, u kume mali endhawini leyi ku tshamaka mindzhwalo eka yona. Murhangeri wakwe u n’wi byele leswaku a yiva mali yoleyo. Kambe Wilson, loyi a nga Mbhoni ya Yehovha, u arile. Kutani u tlherisele mali yoleyo eka n’wini wa yona. Ematshan’weni yo heleriwa hi ntirho, u thoriwe ku va mutirhi wa nkarhi hinkwawo naswona endzhaku ka nkarhi u tlakusiwile entirhweni.

Le Yuropa, Géraldine u heleriwe hi ntirho hileswi muthori wakwe a a venga Timbhoni ta Yehovha. Hambiswiritano, mana wa muthori yoloye u n’wi byele leswaku u endle xihoxo lexikulu. U te: “Loko u lava mutirhi wo tshembeka ni loyi a nga ta wu tekela enhlokweni ntirho wakwe, tlhola Mbhoni ya Yehovha.” N’wana wakwe u endle ndzavisiso hi Timbhoni kutani u tlhele a thola Géraldine.

Loko Sarah, manana loyi a nga yexe wa le Afrika Dzonga, a langutane ni minkarhi yo tika, u tivonele hi ya yena rirhandzu ra Vukreste hi mintirho loko swirho swa vandlha ra ka vona swi nyike ndyangu wakwe swakudya ni ku wu pfuna hi xo famba. Endzhakunyana, vana vakwe va te: “Hi ni vatswari vo tala evandlheni.”

Leswi ko va swikombiso swi nga ri swingani ntsena. Swikombiso leswi swi hi tsundzuxa marito lama nga eka Swivuriso 1:33 lama nge: “Loko ku ri loyi a ndzi yingisaka [Yehovha], u ta tshama a sirhelelekile.” Marito wolawo i ntiyiso hakunene!

^ ndzim. 5 Ematikweni man’wana, hulumendhe yi pfuna swisiwana hi tlhelo ra timali. Kambe ematikweni lawa mpfuno wolowo wu nga riki kona, vanhu lava ngopfu-ngopfu va nga ni vutihlamuleri byo pfuna swisiwana i maxaka ya swona.—1 Timotiya 5:3, 4, 16.