Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  November 2012

Leswi Nga Ku Pfunaka Ku Twisisa Bibele

Leswi Nga Ku Pfunaka Ku Twisisa Bibele

“U swi tiva njhani leswaku ndlela leyi u yi hlamuselaka ha yona Bibele a yi hoxanga? Phela yi nga hlamuseriwa hi tindlela to tala!”

Xana u tshame u twa vanhu va vula sweswo? Kambe, xana a wu swi tiva leswaku Bibele yi nga swi kota ku tihlamusela hi yoxe? Endlelo leri nga ku pfunaka hi leri: Loko tindzimana leti nga ekusuhi ti nga yi hlamuseli kahle mhaka yo karhi, pimanisa mhaka yoleyo ni tindzimana tin’wana ta Bibele leti vulavulaka hi mhaka leyi fanaka. Hi ndlela yoleyo, hi tshika Bibele yi kongomisa mianakanyo ya hina, ematshan’weni ya mavonelo ya hina vini.

Hi xikombiso, kambisisa leswi Bibele yi swi dyondzisaka malunghana ni xiyimo xa lava feke. Laha hansi ku ni matsalwa ya tsevu lama humaka eBibeleni. Xiya ndlela leyi ma pfumelelanaka ha yona.

  • “Lava feke, va nga hinkwavo lava nga rhelelela exivandleni xa vafi, va nga ka va nga dzunisi Hosi Xikwembu.”Pisalema 115:17. *

  • “Mi nga veki ku tshemba ka n’wina eka vanhu va swiyimo swa le henhla, hikuva i va nyama ni ngati, va nge ponisi munhu! Siku va hlalaka, va tlhelela entshurini, kutani makungu ya vona ma lovisa sweswo, enkarhini wolowo!”Pisalema 146:3, 4.

  • “Lava hanyaka va swi tiva, va ya eku feni, kasi lava feke a va ha tivi nchumu.”Eklesiasta 9:5.

  • “Xivandla xa vafi xi nga ka xi nga ku nkhensi, ni rifu ri nge ku dzunisi . . . Vanhu lava hanyaka, hi vona ntsena lava kotaka ku ku nkhensa, ku fana na mina ndzi ku nkhensaka sweswi.”Esaya 38:18, 19.

  • “Moya lowu dyohaka, hi wona lowu nga ta fa!”Ezekiel 18:4, Bibele Ya Xitsonga.

  • Loko Yesu Kreste a vulavula hi munghana wakwe Lazaro loyi a ha ku fa, u te: “Lazaro murhandziwa wa hina, u etlele, kambe ndzi ya ku ya n’wi pfuxa.” Vadyondzisiwa va ku eka yena: “Hosi, loko a etlele, u ta hanya.” . . . Kutani Yesu a va byela erivaleni, a ku: “Lazaro u file.”Yohane 11:11-14.

Xana wa yi vona ndlela leyi matsalwa lawa ma pfumelelanaka ha yona? Ku hambana ni tidyondzo leti dumeke, Bibele yi dyondzisa leswaku vafi va file hi ku helela. A va hanyi etilweni kumbe exivandleni xin’wana kambe va etlele vurhongo lebyikulu hi ndlela yo fanekisela, naswona a va tivi nchumu nikatsongo. Hikwalaho, a va nge swi koti ku dzunisa Xikwembu hambi ku ri ku ehleketa. *

Yinhla-nkulu hi leyi: Loko hi dyondza Bibele hi ku ya hi nhloko-mhaka yo karhi, tidyondzo ta yona ta xisekelo ta twisiseka hi ku olova. Kutani endlelo leri, leri tirhisiwaka hi Timbhoni ta Yehovha ri lava matshalatshala lamakulu. (Swivuriso 2:1-5) Entiyisweni, swilo swo tala leswi nga swa nkoka swinene swi lava matshalatshala lamakulu.

^ ndzim. 5 Matsalwa lawa ma tekiwe eka Bibele—Mahungu Lamenene.

^ ndzim. 11 Bibele yi dyondzisa leswaku vafi lava nga emianakanyweni ya Xikwembu va ta pfuxiwa hi nkarhi lowu Xikwembu xi wu vekeke enkarhini lowu taka.—Hlaya Yobo 14:14, 15; Yohane 5:28, 29; Mintirho 24:15.