Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XALAMUKA! NOVEMBER 2012

A Va Ndzi Helelanga Mbilu

A Va Ndzi Helelanga Mbilu

A ndzi rhandza byala ni madzolonga. Kutani siku rin’wana ndzi byeriwe mahungu yo biha lama ndzi susumeteleke ku byi kambisisa hi vuntshwa vutomi bya mina. Inge ndzi mi chumbutela.

NDZI velekiwe hi 1943 edorobeni ra Rubottom eOklahoma le U.S.A. Ku sukela evutsongwaneni bya mina, a ndzi rhandza madzolonga. Hi lembe ra mina ro hetelela exikolweni xa le henhla, ndzi sungule ku nwa byala ku tlula mpimo. Tanihi leswi tatana a a ri xindzendzele naswona a a rhandza madzolonga, swi endle leswaku ndzi va ni xinghana lexi nga tolovelekangiki na yena hileswi na mina a ndzi ri xindzendzele. A hi ya eswinkhubyaneni swa mincino ni le ka swiendlakalo swin’wana swo tihungasa leswaku hi ya kukutlela byala ni ku lwa ni van’wana.

Hi 1966, ndzi tekane na Shirley naswona hi ve ni vana vambirhi, Angela na Shawn. Hambiswiritano, a ndzi tshikanga ku kukutlela byala. Leswaku ndzi kuma mali leyi engetelekeke, ndzi sungule ku byala mbangi ni ku yi xavisa. Ndzi tlhele ndzi tirha etibarheni ta laha a ndzi tshama kona, ndzi sivela vanhu lava a va nga laveki ni ku hlongola lava pfuxaka timholovo naswona ntirho wolowo wu endle leswaku ndzi enerisa ku navela ka mina ko nwa byala ni ku endla madzolonga. Hi nkarhi wolowo, a ndzi nga chavi munhu hambi ku ri nchumu wo karhi naswona a ndzi nga ri na mhaka ni mintlhaveko ya van’wana.

“U Nga Tisi Munhu Leswaku A Ta Vulavula Na Mina!”

Muzala wa Shirley u rhurhele eCalifornia, laha a veke Mbhoni ya Yehovha endzhaku ko dyondza na tona Bibele. Loko a tlhelele eOklahoma, u fike a rungulela Shirley timhaka leti a ti dyondzeke naswona Shirley u nambe a swi vona leswaku timhaka teto a ku ri ntiyiso. Endzhaku ka loko Shirley a dyondze Bibele ni Timbhoni, na yena u endle xiboho xo va Mbhoni naswona u khuvuriwe hi 1976. A ndzi nga lavi ku twa nchumu hi vukhongeri byakwe. Ndzi n’wi byele ndzi ku: “U nga tisi munhu leswaku a ta vulavula na mina! Mina a ndzi nge pfuki ndzi hundzukile.”

Shirley a nga tshikanga ni siku ni rin’we ku namarhela milawu ya Bibele naswona u hambete a ndzi rhandza. Entiyisweni, loko yena ni vana va hina va nga si ya eminhlanganweni ya Vukreste eHolweni ya Mfumo ya laha a hi tshama kona, a a ndzi rhamba leswaku ndzi famba na vona. Angela na yena a a ndzi byela a ku: “Tatana, hi navela onge u nga famba na hina.”

Leswi a ndzi endla swilo leswi nga riki enawini, a ndzi tshama ndzi khome xibamu. Ku tlula kwalaho, minkarhi yin’wana a ndzi famba ndzi nga vuyi ekaya ku ringana masiku yo hlayanyana naswona sweswo a swi vanga timholovo evukatini bya hina. Loko ndzi vuya, a ndzi ringeta ku kombela ndzivalelo eka Shirley hi ku ya eminhlanganweni ya Vukreste masiku ma nga ri mangani. Minkarhi hinkwayo Timbhoni a ti ndzi komba musa naswona tidyondzo ta tona a ti twala ti ri ntiyiso.

Hi ku famba ka nkarhi, nkulu un’wana wa le  vandlheni u kombele ku dyondza na mina Bibele. Ndzi pfumerile. Hambiswiritano, lexi vavisaka hileswaku leswi ndzi swi dyondzeke a swi ndzi pfunanga ngopfu hikuva ndzi hambete ndzi tihlanganisa ni vanghana va mina va khale. Loko nkulu yoloye a xiye xiphiqo xexo, u vulavule na mina hi milawu yin’wana ya le Bibeleni leyi vulavulaka hi makhombo yo va ni vanghana vo biha. (1 Vakorinto 15:33) Hambileswi ndzayo yakwe a yi sekeriwe eBibeleni, yi ndzi khunguvanyisile naswona ndzi tshike ku dyondza na yena Bibele ivi ndzi nghena ndzi twelela emintirhweni ya mina ya khale. Ku tikukumuxa ka mina ku twise Shirley ku vava swin’we ni vana va hina!

“Ha Ha Ku Rhandza”

Hi 1983, ndzi byeriwe mahungu yo biha ya leswaku muzala wa mina loyi a ndzi n’wi rhandza swinene u file. Sweswo swi ndzi tshove mbilu naswona swi ndzi susumetele ku ehleketisisa hi vutomi bya mina. A ndzi swi vona leswaku ndzi le ku hlakateni ka vukati bya hina ni ku twisa ndyangu wa mina ku vava, ku nga swilo leswi a ndzi swi teka swi ri swa nkoka swinene eka mina. Sweswo swi ndzi susumetele ku cinca vutomi bya mina. Exilahlweni xa muzala wa mina, mukhalabye un’wana loyi a nga Mbhoni loyi a vuriwaka John, u ndzi angarhile kutani a ku, “Ndzi lava ku ku byela leswaku ha ha ku rhandza.” Xexo a ku ri xikhutazo lexi a ndzi xi lava! Hi xa mundzuku xa kona, ndzi fonele John ndzi n’wi byela leswaku ndzi lava ku tlhela ndzi sungula ku dyondza Bibele hikuva a ndzi tshemba leswaku se a ndzi ta swi kota ku endla mindzulamiso leyi a ndzi fanele ndzi yi endle khale.

Eka dyondzo ya hina yo sungula, hi dyondze hi xikhongelo naswona ndzi byele John leswaku ndzi ta ringeta ku khongela. Hi siku leri landzeleke ndzi sungule ku lava ntirho lowunene, kambe a ndzi wu kumanga. Loko ndzi ri eku chayeleni ka lori ya mina, ndzi khongele hi rito leri tlakukeke ndzi ku, “Yehovha, loko u lava leswaku ndzi tshama endhawini leyi, u fanele u ndzi pfuna ndzi kuma ntirho.” Kutani ndzi tibyele ndzi ku, ‘Leswi ndzi swi endlaka i vuphukuphuku, ndzi nga chayela njhani ndzi ri karhi ndzi vulavula ndzi ri ndzexe?’ Swi le rivaleni leswaku a ndzi fanele ndzi antswisa swikhongelo swa mina naswona a ndza ha fanele ndzi tiyisa ripfumelo ra mina ra leswaku Xikwembu i “Mutwi wa xikhongelo”! (Pisalema 65:2) Kambe lexi ndzi hlamariseke hileswi ndzi kumeke ntirho hi siku leri landzeleke!

Ku xiya ndlela leyi xikhongelo xi nga ni matimba ha yona swi endle leswaku ndzi n’wi rhandza swinene Yehovha swi tlhela swi endla leswaku ndzi wu tshemba swinene nkongomiso wakwe

Endzhaku ka sweswo, ndzi sungule ku khongela hi mbilu hinkwayo minkarhi hinkwayo. Nkarhi ni nkarhi ndzi vone mikateko leyi humaka eka Yehovha. Minkarhi hinkwayo a ndzi pfumela eka Xikwembu, kambe mintokoto leyi yi ndzi pfune leswaku ndzi vona ntiyiso wa marito lama nga eka 1 Yohane 5:14 lama nge: “Ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” Ku xiya ndlela leyi xikhongelo xi nga ni matimba ha yona swi endle leswaku ndzi n’wi rhandza swinene Yehovha swi tlhela swi endla leswaku ndzi wu tshemba swinene nkongomiso wakwe.—Swivuriso 3:5, 6.

 Loko ndzi tlhele ndzi sungula ku ya eminhlanganweni ya Vukreste, Timbhoni ti ndzi amukele hi mandla mambirhi. Ku engetela kwalaho, ndzi sungule ku xiya leswaku Timbhoni ta ‘rhandzana swinene ku suka embilwini,’ naswona sweswo swi ndzi khumbe mbilu. (1 Petro 1:22) Ndzi tlhele ndzi twisisa ntiyiso wa marito lama nga eka Swivuriso 13:20 lama nge: “Loyi a fambaka ni vanhu vo tlhariha u ta tlhariha, kambe loyi a tirhisanaka ni lavo hunguka, a swi nge n’wi fambeli kahle.”

Ndzi vangele ndyangu wa mina maxangu ni ku wu twisa ku vava ku ringana malembe yo tala, kambe sweswi ndzi ringeta ku va munhu wo rhula tlhelo nuna ni tatana lonene. Ndzi sungule ku tirhisa ndzayo ya le Bibeleni ya leswaku “vavanuna va fanele ku rhandza vasati va vona ku fana ni mimiri ya vona” nileswaku vatatana va fanele va ‘nga dyisi vana va vona mbitsi, leswaku va nga heli mbilu.’—Vaefesa 5:28; Vakolosa 3:21.

Mindzulamiso leyi a ndzi ri karhi ndzi yi endla yi wu khutaze ngopfu ndyangu wa mina. Hikwalaho ka sweswo, ndzi vone ntiyiso wa marito ya Yesu lama nga eka Matewu 5:3 lama nge: “Va tsaka lava khathalaka hi xilaveko xa vona xa moya.” Eku heteleleni, ndzi kume ntsako wa xiviri!

Hi June 1984, xinhwanyetana xa mina Angela ku vulavurisaniwe na xona enhlengeletanweni ya Timbhoni ta Yehovha naswona xi hlamusele leswaku a ndzi ri munhu wa njhani khale ivi xi vulavula hi mindzulamiso leyi ndzi yi endleke. Xi gimete hi ku vula leswaku xi tsake swinene ku ndzi vona ndzi tshame eswitulwini swa le mahlweni swin’we ni lava a va ya eku khuvuriweni hi siku rero.

Ndzi ri na nkatanga, Shirley

Ndza n’wi nkhensa Yehovha hileswi a nga va heleriki mbilu vanhu vo fana na mina! Nakambe ndzi n’wi nkhensa swinene Shirley ni vana va hina hileswi va nga ndzi helelangiki mbilu. Tanihi Mukreste wa xiviri, Shirley u tirhise xikhutazo lexi nga eka 1 Petro 3:1 lexi nge: “Vavasati lava tekiweke, tivekeni ehansi ka vanuna va n’wina, leswaku, loko ku ri ni lava nga yingisiki rito, va ta kokiwa handle ka rito hi ku tikhoma ka vasati va vona.” Hikwalaho ka ku tshembeka kakwe, ku lehisa kakwe mbilu ni mahanyelo yakwe lamanene ndzi kote ku dyondza ntiyiso loko ndzi tshike mahanyelo ya mina yo biha kutani ndzi tikhoma hi ndlela leyinene.

Ku sukela loko ndzi khuvuriwile, ndzi tala ku tirhisa xikombiso xakwe leswaku ndzi khutaza Timbhoni tin’wana leti vanghana va tona va vukati va nga riki Timbhoni leswaku va nga va heleli mbilu. Ndzi va byela ndzi ku, “Loko nkarhi wu fika, Yehovha a nga tirhisa matimba ya Rito rakwe, ku nga Bibele, ni mahanyelo ya wena lamanene leswaku a pfuna munhu loyi u tekaneke na yena leswaku a cinca vutomi byakwe—hambiloko eku sunguleni sweswo a swi tikomba onge a swi nge endleki.”