Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! OCTOBER 2012

 Langutelo Ra Bibele

Xana Tinyeleti Ta Byi Khumba Vutomi Bya Wena?

Xana Tinyeleti Ta Byi Khumba Vutomi Bya Wena?

Xana wa ndzi rhandza?

Xana ndzi nga teka riendzo namuntlha?

Xana ndzi nga wu kuma tirho lowu?

VANHU vo tala va tsutsumela eka vungoma bya swilo swa le mpfhukeni * leswaku va kuma tinhlamulo ta swivutiso swo fana ni leswi nga laha henhla. Kambe, xana tinyeleti ta byi khumba hakunene vutomi bya wena? Xana ti nga ku pfuna leswaku u tiva leswi vumundzuku byi ku khomeleke swona? Bibele yi ri yini hi mhaka leyi?

Xana Tinyeleti Ti Nga Byi Khumba Vumundzuku Bya Hina?

Vanhu van’wana va kholwa leswaku a hi nge swi koti ku balekela swilo leswi nga ta hi humelela evuton’wini enkarhini lowu taka. Va vula leswaku vumundzuku bya hina byi kunguhatiwe khale naswona tinyeleti ti nga hi paluxela byona. Kambe Bibele yi vula leswi hambaneke ni sweswo. Yi hi byela leswaku Xikwembu xi nyika vanhu lunghelo ro tihlawulela leswi va swi lavaka, leswi swi vula leswaku swilo swo tala leswi va humelela evuton’wini hi vona va swi lawulaka. Hi xikombiso, Xikwembu xi byele Vaisrayele xi ku: “Ndzi veke vutomi ni rifu, nkateko ni ndzhukano emahlweni ka n’wina; mi fanele mi hlawula vutomi leswaku mi ta ya emahlweni mi hanya, n’wina ni vana va n’wina.”—Deteronoma 30:19.

Hi marito wolawo, Yehovha Xikwembu u swi  veke erivaleni eka vanhu vakwe leswaku va nga swi kota ku lawula swilo swo tala leswi nga va humelelaka evuton’wini bya vona. Loko va yingisa swileriso swakwe, a va ta kuma mikateko kambe loko va nga swi yingisi, a va ta tivangela makhombo.

Ehleketisisa hi swivutiso leswi: Loko vumundzuku bya Muisrayele un’wana ni un’wana a byi tsariwe eka tinyeleti, xana a swi ta twala ku va Xikwembu xi va khutaza leswaku va hlawula vutomi? Xana a swi ta va swi lulamile eka Xikwembu ku va xi va xupula hikwalaho ka swiendlo swa vona leswi a va nga ta swi kota ku swi papalata?

Leswi Bibele yi swi dyondzisaka swi le rivaleni: Ndlela leyi hi hanyaka ha yona yi titshege hi swiboho leswi hi swi endlaka, ku nga ri hi tinyeleti.—Vagalatiya 6:7.

Xana Tinyeleti Ti Nga Byi Khumba Vumunhu Bya Hina?

Vangoma vo tala va tinyeleti a va yi tekeli enhlokweni mhaka ya leswaku swilo hinkwaswo leswi hi humelelaka evuton’wini swi kunguhatiwe khale. Mungoma un’wana wa tinyeleti u te: “Hi kota ku lawula swilo hinkwaswo leswi hi humelelaka evuton’wini bya hina.” Kambe u tlhele a ku: “Hi hala tlhelo, nkarhi lowu hi velekiwaka ha wona wu ni nkucetelo eka ndlela leyi vumunhu bya hina byi nga ta va xiswona.” Vanhu vo tala va swi tshemba sweswo. Va ehleketa leswaku leswi tinyeleti ni tipulanete ti nga ni nkucetelo wo karhi eka pulaneke ya hina, ti fanele ti tlhela ti va ni nkucetelo wo karhi eka hina. Bibele yi ri yini hi mhaka leyi?

Bibele a hi buku ya sayense leyi hlamuselaka vuxokoxoko hinkwabyo malunghana ni miri wa munhu swin’we ni vuako hinkwabyo. Hambiswiritano, yi hi hlamusela xikongomelo xa Xikwembu xo vumba swilo swa le mpfhukeni. Genesa 1:14, 15 yi ri: “Xikwembu xi ku, ‘A ku ve ni timboni etilweni, leti nga ta hambanisa nhlekanhi ni vusiku, ti komba tinguva . . . Timboni leti a ti pfurhe etilweni, ti voninga misava.’”—Bibele—Mahungu Lamanene.

Ehleketisisa hi xivutiso lexi: Loko Xikwembu a xi tumbuluxe tinyeleti leswaku ti kucetela vumunhu bya hina, xana a xi ta va xi nga hi byelanga sweswo?

I yini leswi hi nga gimetaka ha swona? Hi nga gimeta hileswaku tinyeleti i swin’wana swa swilo leswi Xikwembu xi swi tumbuluxeke kambe a ti byi kuceteli vumunhu bya hina.

Laha Hi Nga Wu Kumaka Kona Nkongomiso

I swinene loko hi lava ku tiva hi vumundzuku bya hina kumbe hi hina vini. Kambe ku ni xihlovo lexinene lexi hi nga byi lavaka eka xona vutivi byebyo ku nga ri eka tinyeleti.

Bibele yi vula leswaku Yehovha Xikwembu hi “Loyi a vulaka ka ha ri eku sunguleni leswi nga ta humelela emakumu.” (Esaya 46:10) U ni xikongomelo lexi a nga ta xi hetisisa. (Esaya 55:10, 11) Hi nga dyondza hi xikongomelo xakwe hi ku hlaya Bibele. Buku leyi ya khale leyi kwetsimaka, yi tlhela yi hi hlamusela leswaku ha yini hi xaniseka nileswaku Xikwembu xi ta swi herisa njhani swiyimo hinkwaswo leswi cinisaka vanhu gija. *2 Petro 3:13; Nhlavutelo 21:1-4.

Bibele i xihlovo xa vutivi lexi nga hi pfunaka ku dyondza hi hina vini ni ku antswisa vumunhu bya hina. Ha yini? Hikuva ku yi hlaya swi ta hi pfuna leswaku hi tikambisisa hi vukheta. Hi xikombiso, Bibele yi vula leswaku Yehovha Xikwembu u ni “tintswalo,” u ‘hlwela ku hlundzuka’ naswona u “lunghekele ku rivalela.” (Eksoda 34:6; Pisalema 86:5) Xana hi na tona timfanelo teto? Bibele yi nga paluxa mianakanyo ya hina leyi hoxeke kutani yi hi pfuna ku vona laha hi faneleke hi lulamisa kona.

Hikwalaho, loko hi lava ku tiva hi vumundzuku bya hina kumbe hi hina vini, a hi fanelanga hi tsutsumela eka tinyeleti kambe hi fanele hi tsutsumela eBibeleni hikuva yi ‘huhuteriwe hi Xikwembu naswona yi pfuna ku dyondzisa, ku tshinya ni ku lulamisa swilo.’—2 Timotiya 3:16, 17.

^ ndzim. 6 Vungoma bya swilo swa le mpfhukeni i ku hlahluva hi dyambu, n’weti, tipulanete ni tinyeleti hikwalaho ko kholwa leswaku swilo leswi swi ni nkucetelo evuton’wini bya hina naswona swi nga hi pfuna leswaku hi titiva kahle.

^ ndzim. 19 Leswaku u kuma rungula leri engetelekeke hi xikongomelo xa Xikwembu, hlaya ndzima ya vunharhu ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

DYONDZA SWO TALA

Ha Yini U Fanele U Dyondza Bibele?

Bibele yi le ku pfuneni ka vanhu va timiliyoni emisaveni hinkwayo leswaku va kuma tinhlamulo ta swivutiso swa nkoka evuton’wini. Xana na wena u nge tsakeli leswaku yi ku pfuna?

Milawu Ya Xikwembu Yi Hi Pfuna Njhani?

Yesu u hlamusele leswaku ha yini hi lava nkongomiso ni leswaku hi yihi milawu ya Bibele leyi nga ya nkoka.

Xana Nkarhi Wa Hina Wa Ku Fa Wu Kunguhatiwile?

Ha yini Bibele yi vula leswaku ku ni “nkarhi wa ku fa”?