Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! OCTOBER 2012

Ta Rivala

Ta Rivala

“Eka vanhu hinkwavo lava tlulaka 130 000 lava lembe ni lembe ku kumiwaka leswaku va khomiwe hi vuvabyi bya khensa le [United Kingdom], vavabyi lava lavaka ku ringana hafu va khomiwe hi vuvabyi byebyo hikwalaho ka swilo leswi vangiwaka hi mikhuva leyi nga papalatiwaka leyi katsaka ku dzaha, ku nwa ni ku dya swilo leswi hoxeke.”—XITICHI XA MAHUNGU XA BBC XA LE BRITAIN.

“Ku xavisiwa ka swirho swa swiharhi ka xiyimo xa le henhla loku nga riki enawini, loku endliwaka hi vanhu vo tala ku endla leswaku swiharhi leswi rhandziwaka swinene emisaveni swi herisiwa . . . hi mpimo lowukulu lowu nga si tshamaka wu va kona.”—NHLANGANO WA WILDLIFE CONSERVATION SOCIETY WA LE U.S.A.

Vanhu lava hi xiringaniso va hetaka tiawara ta tsevu hi siku va ri eku hlaleleni ka TV va nga langutela leswaku vutomi bya vona byi hunguteka hi 4,8 ku tlula lava nga hlaleriki TV. Hi marito man’wana, awara yin’wana ni yin’wana leyi munhu lonkulu loyi a tirhaka ntirho wa le hofisini a yi hetaka a ri karhi a hlalela TV, yi hunguta malembe yakwe ya ku hanya hi timinete ta kwalomu ka 22.—MAGAZINI WA BRITISH JOURNAL OF SPORTS MEDICINE WA LE BRITAIN.

Le Jarimani, vavasati lava tlulaka 90 wa tiphesente lava tikeke lava ku kumiwaka leswaku vana va vona lava nga si velekiwaka va khomiwe hi vuvabyi bya Down syndrome, va hlawula ku humesa khwiri.—PHEPHA-HUNGU RA DER TAGESSPIEGEL RA LE JARIMANI.

Mintshikilelo Ya Vutomi Bya Le Madorobeni

Magazini wa Przekrój wa le Poland wu vula leswaku ndzavisiso lowu endliweke wu kombisa leswaku “vanhu lava tshamaka emadorobeni lamakulu va ni tihanyi loko va tshikilelekile ku tlula vanhu lava tshamaka emadorobeni lamatsongo.” Mieczysław Jaskulski, dokodela wa vuvabyi bya mianakanyo wa le Warsaw’s Psychoeducation Laboratory, u ri: “Emadorobeni lamakulu vanhu va hlangavetana ni swilo swo tala leswi va vangelaka ntshikilelo. Hikwalaho, vanhu lava tshamaka emadorobeni lamakulu va le khombyeni ro hlaseriwa hi vuvabyi bya ntshikilelo wa mianakanyo hi tiphesente leti tlulaka 21 ni swipfukela hi tiphesente leti tlulaka 39 ku tlula vanhu lava tshamaka etindhawini ta le makaya.” Vaaki volavo va nga langutana njhani ni xiyimo lexi? Loko magazini wa Przekrój wu nyikela swiringanyeto wu ri: “U nga hlundzukisiwi hi swilo leswi nga ehenhla ka matimba ya wena, u nga karhateki hi ntirho loko se u chayisile, huma endlwini u famba u beriwa hi moya [naswona] u nga chavi ku teka masiku yo wisa entirhweni.”

Facebook Yi Khome Rungula Ro Fikela Kwihi?

Xichudeni xin’wana lexi dyondzelaka timhaka ta nawu xa le Austria a xi lava ku tiva leswaku web site ya Facebook leyi tirhisiwaka ngopfu emisaveni yo aka xinghana eka yona yi hlayise rungula ra xona ro tanihi kwihi eka malembe manharhu lawa xi joyineke ha wona, kutani xi yi kombele leswaku yi xi rhumelela rungula ra kona. Yi xi rhumele CD leyi nga ni rungula leri endlaka matluka ya 1 222. Hi ku ya hi xiviko xa phepha-hungu ra Der Tagesspiegel ra le Jarimani, xichudeni xexo xi te: “Ku hlayisiwe swilo hinkwaswo—timhaka tin’wana ni tin’wana leti a ndzi ti rhumela ni ku rhumeriwa tona, mbulavurisano wun’wana ni wun’wana ku katsa ni timhaka leti nga xihundla malunghana ni vanghana va mina.” Timhaka tin’wana hi leti a a ehleketa leswaku u ti sule hi ku helela!