Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! OCTOBER 2012

 Vantshwa Va Vutisa

I Yini Leswi Ndzi Nga Swi Langutelaka eVukatini?—Xiyenge 2

I Yini Leswi Ndzi Nga Swi Langutelaka eVukatini?—Xiyenge 2

ENKANDZIYISWENI WA HINA LOWU HUNDZEKE, hi kambisise swilo leswi vuyerisaka ni mintlhontlho yin’wana leyi u nga yi langutelaka evukatini.

ENKANDZIYISWENI LOWU, hi ta kambisisa leswaku ha yini u fanele u langutela swilo leswi a wu nga swi rindzelanga.

Tsala ✔ etlhelo ka bokisi leri nga ni marito lawa u pfumelelanaka na wona ivi u tsala tinomboro hi ku landzelana ka tona hi ku ya hi leswi nga swa nkoka eka wena.

Ndzi langutele leswaku munhu loyi ndzi nga ta tekana na yena . . .

  • a va a sasekile
  • a ndzi endla ndzi tinyungubyisa
  • a va ni tipakani to fana ni ta mina
  • a rhandza vuhungasi byo fana ni bya mina

 Loko u ri eku laveni ka munhu loyi u nga ta tekana na yena, a swi bihanga ku langutela swilo leswi boxiweke eka tlula leri hundzeke. Swi nga ha endleka u kuma munhu loyi a nga ni swilo sweswo hinkwaswo. Kambe ntiyiso wa mhaka hileswaku hi ku famba ka nkarhi vanhu va cinca ni swiyimo swa cinca.

Makumu ya mhaka: Leswaku u endla vukati bya wena byi humelela, u fanele u langutela swilo leswi a wu nga swi rindzelanga.

Mhaka yo tsakisa. Swilo swin’wana leswi a wu nga swi rindzelanga evukatini swi nga ha ku tsakisa swinene.

“Leswi se hi tekaneke, swi ndzi tsakisa ngopfu ku lemuka leswaku Maria * u rhandza ku hleka ku tlula leswi a ndzi n’wi tivisa xiswona loko hi nga si tekana. Leswi na mina ndzi rhandzaka ku hleka, swiphiqo leswi hi vaka na swona evuton’wini a swi vi nchumu lowukulu.”—Mark.

Mhaka yo biha. Swilo swin’wana leswi a wu nga swi rindzelanga evukatini swi nga ha ku heta matimba. Ehleketa hi xikombiso lexi.

A hi nge wena ni munhu loyi u nga ta tekana na yena mi tivekele pakani yo va varhumiwa etikweni rimbe. Kambe a wu ta titwa njhani loko endzhaku ka loko mi tekanile, o khomiwa hi vuvabyi lebyi nga ni khombo swinene ivi mi nga ha swi koti ku fikelela pakani ya n’wina? Entiyisweni sweswo swi nga endleka hikuva Bibele yi vula leswaku “swilo swo biha swi humelela hinkwavo!” (Eklesiasta 9:11, Bibele ya Holy Bible—Easy-to-Read Version) A swi kanakanisi leswaku a wu ta karhateka hileswi a vabyaka naswona a wu ta hela matimba hileswi u tsandzekeke ku fikelela pakani ya wena. Hambiswiritano, loko wo humeleriwa hi xiyimo xo tano lexi a wu nga xi rindzelanga, u ta xi amukela hi mbilu yo basa ivi u fambisana na xona. Phela u tekane ni munhu ku nga ri pakani.

Makumu ya mhaka: Hilaha Bibele yi vulaka hakona, vanhu lava nghenelaka vukati va ta va ni “nhlomulo” minkarhi yin’wana. (1 Vakorinto 7:28) Minkarhi yin’wana nhlomulo wolowo wu nga ha vangiwa hi swiyimo leswi nga rindzeriwangiki.

U nga swi lunghekela njhani swiyimo swo tano? Loko u nghenela vukati, u fanele u hlakulela swilo swimbirhi.

 1. LANGUTELO LERINENE

Ku nga khathariseki leswaku wena ni munhu loyi u lavaka ku tekana na yena mi nga ha va mi twanana ku fikela kwihi, u fanele u langutela leswaku

  • a mi nge pfumelelani eka swilo hinkwaswo minkarhi hinkwayo.
  • a mi nge rhangisi swilo leswi fanaka minkarhi hinkwayo.
  • a mi nge rhandzi swilo leswi fanaka minkarhi hinkwayo.
  • rirhandzu ra n’wina a ri nge tshami ri ri eku pfurheni minkarhi hinkwayo.

Swilo leswi xaxametiweke laha henhla swi tolovelekile evukatini. Kambe a swi nge byi hahluli vukati bya n’wina handle ka loko mo swi pfumelela! Tsundzuka leswaku Bibele yi vula leswaku rirhandzu “ri tiyisela swilo hinkwaswo” naswona “a ri heli.”—1 Vakorinto 13:4, 7, 8.

Ntiyiso wa mhaka: Eku heteleleni, leswi nga ta tiyisa kumbe ku hahlula vukati bya wena a hi swiphiqo leswi u langutanaka na swona kambe i ndlela leyi u swi tlhantlhaka ha yona.Vakolosa 3:13.

2. KU TSHEMBEKA EKA YENA

Loko n’wina mi tiyimisele ku tshama swin’we hambi ko ba lexi dumaka, mi ta swi kota ku hlula swiphiqo leswi mi nga swi rindzelangiki.—Matewu 19:6.

Vanhu van’wana va vula leswaku ku tshembeka eka munhu loyi u tekaneke na yena swi endla leswaku vukati byi tika swinene. Kambe ntiyiso wa mhaka hileswaku swi endla leswaku vukati byi nga tiki. Ku tshembeka ku tiyisa vukati bya n’wina. Loko mi humeleriwa hi swiphiqo leswi a mi nga swi rindzelanga, mi ta lava tindlela to swi tlhantlha, ku nga ri ku swi balekela hi ku dlaya vukati.

Leswaku u hlakulela ku tshembeka eka yena, u fanele u ehleketisisa hi leswi vukati byi vulaka swona hakunene, ku nga ri leswi wena u byi tekaka ha yona. Leswaku u vona ndlela leyi sweswo swi hambanaka ha yona, endla xitoloveto lexi landzelaka.

1. A hi nge u nyikiwe thikithi ra xihaha-mpfhuka leswaku u endzela tiko rin’we emisaveni. Hi rihi tiko leri u nga hlawulaka ku ri endzela naswona ha yini?

Tiko:

Xivangelo:

  • ri ni tindhawu to saseka
  • ri ni ndhavuko wo tsakisa
  • ri ni maxelo lamanene
  • ri tele vuhungasi
  • ni swin’wana

2. A hi nge u nyikiwe thikithi ro famba ntsena naswona tiko leri u yaka eka rona u ta tshama eka rona vutomi bya wena hinkwabyo.

Sweswi hi rihi tiko leri u nga ri hlawulaka?

  • Tiko:
  • kumbe A ndzi ta hlawula ku tshama etikweni leri ndzi nga eka rona.

Eka xitoloveto lexi nga laha henhla, swi nga ha endleka leswaku tiko leri u ri hlawuleke eka xivutiso xo sungula a ri fani ni leri u ri hlawuleke eka lexa vumbirhi. Hambiloko u hlawule tiko rin’we eka swivutiso haswimbirhi, a swi kanakanisi leswaku u ehleketisise swinene hi nhlamulo ya wena ya xivutiso lexa vumbirhi. Ematshan’weni yo tivona hi mahlo ya mianakanyo u ganame elwandle kumbe u ri karhi u khandziya tintshava tanihi muendzi, u boheke ku tivona hi mahlo ya mianakanyo u ri karhi u tiphina hi swilo swo tsakisa ni ku langutana ni mintlhontlho ya siku ni siku tanihi muaka-tiko wa kwalaho.

Yoleyo i ndlela leyi u faneleke u byi teka ha yona vukati. Phela hi ku famba ka nkarhi swiyimo swi nga ha cinca. A swi kanakanisi leswaku ni swiyimo swa n’wina swi nga ha cinca. Kambe ku humelela ka vukati bya n’wina swi titshege hi vuswikoti bya wena byo lunghekela swilo leswi a wu nga swi rindzelanga ni ku langutana na swona hi ndlela leyinene loko swo tshuka swi humelela.

Xivutiso xo anakanyisisa ha xona: U langutana njhani ni swiyimo leswi u nga swi rindzelangiki evuton’wini sweswi tanihi leswi u nga siki nghenelaka vukati?

^ ndzim. 15 Mavito man’wana ma cinciwile exihlokweni lexi.

HA YINI U NGA VUTISI VATSWARI VA WENA?

Hi yihi mikateko ni mintlhontlho leyi a mi nga yi rindzelanga leyi mi langutaneke na yona loko ma ha ku tekana? Ndzi nga swi lunghekela njhani swilo leswi ndzi nga swi rindzelangiki loko ndzi nghenela vukati?