Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! OCTOBER 2012

Khathalela Rihanyo Ra Wena

Khathalela Rihanyo Ra Wena

Ku khathalela rihanyo ra wena swi nga ku pfuna leswaku u wu endla kahle ntirho wa wena wa xikolo u tlhela u va ni rihanyo lerinene.

I SWINENE ku khathalela miri lowu Xikwembu xi ku nyikeke wona. (Pisalema 139:14) Hi xikombiso: A hi nge u ni movha kambe a wu si tshama u tinyika nkarhi wo wu khathalela. Movha wolowo wu nga onhaka swi nga si ya kwihi. Ku nga ha endleka leswi fanaka ni hi miri wa wena. Kutani u nga wu khathalela njhani?

Ku etlela.

Loko u nga etleli tiawara leti ringaneke swi nga ku endla u languteka u karhele naswona u titwa u nga ri na matimba, u pfilunganyekile hambi ku ri ku titwa u tshikilelekile. Ku hambana ni sweswo, ku etlela tiawara leti ringaneke swi ta endla leswaku u va ni matimba swinene. Swi nga tlhela swi endla leswaku u kula hi ku hatlisa, byongo bya wena byi tirha kahle, miri wa wena wu kota ku tisirhelela eka mavabyi naswona u kota ku lawula mintlhaveko ya wena. Vuyelo byebyo byo tala u nga byi kuma ntsena loko u etlela, ku nga nchumu lowu nga tikiki ku wu endla!

Xitsundzuxo: Loko swi koteka, ringeta ku etlela hi nkarhi lowu fanaka masiku hinkwawo.

Swakudya.

Vantshwa va kula hi ku hatlisa. Hi xikombiso, exikarhi ka malembe ya 10 na 17, ntiko wa miri wa vafana vo tala wu kula hi mpimo lowu phindhiwaka kambirhi. Vanhwanyana na vona va kula hi ku hatlisa. Miri wa vona lowu kulaka wu lava swakudya swo tala leswi nga ni rihanyo ni ku kuma ntamu. Kutani tiyiseka leswaku miri wa wena u wu wundla hi swakudya leswi nga ni rihanyo.

Xitsundzuxo: Fihlula siku ni siku. Ku dya u nga si ya exikolweni swi nga ku pfuna leswaku u rhiya ndleve etlilasini naswona u nga rivali hi ku hatlisa.

Endla vutiolori.

Bibele ya pfumela leswaku “ku endla vutiolori i swinene eka miri wa wena.” (1 Timotiya 4:8, Bibele ya Contemporary English Version) Swi nga tiyisa tinyama ni marhambu ya wena, swi endla leswaku u nga hatli u karhala loko u tirha, swi lawula ntiko wa wena, swi endla leswaku mianakanyo ya wena yi tirha kahle, swi pfuna miri wa wena leswaku wu lwisana ni mavabyi, swi hunguta ntshikilelo swi tlhela swi endla leswaku u tshama u tsakile. Entiyisweni, ku endla vutiolori swi nga tlhela swi tsakisa tanihi leswi byi nga katsaka ku endla mintlangu leyi u yi rhandzaka!

Makumu ya mhaka: Ku etlela tiawara leti ringaneke, ku dya swakudya leswi nga ni rihanyo ni ku endla vutiolori hi ku ringanisela, swi ta endla leswaku miri wa wena wu hambeta wu tirha kahle. Kutani sweswo swi ta ku pfuna leswaku u tirha kahle etlilasini. *

Ha yini u nga sunguli sweswi? Tiendlele xiyimiso xo olova xo endla vutiolori. Tsala ehansi leswaku u etlela tiawara tingani nileswaku u dya swakudya swa njhani ku ringana n’hweti kutani u vona laha u faneleke u antswisa kona.

“Loko ndzi famba ndzi beriwa hi moya, ndzi kuma matimba lama engetelekeke hambileswi ndzi vaka ndzi karhele loko ndza ha suka.”—Jason wa le New Zealand.

“Ndzi ehleketa leswaku Xikwembu xi endle swakudya leswaku swi hi nyika matimba kutani ndzi lava ku dya swakudya leswi nga ni rihanyo!”—Jill wa le United States.

“Ndzi tsutsuma masiku manharhu evhikini naswona ndzi fambisa xikanyakanya kumbe ndzi famba ndzi beriwa hi moya kambirhi evhikini. Ku endla vutiolori swi ndzi nyika matimba yo tala swi tlhela swi ndzi hungutela ntshikilelo.”—Grace wa le Australia.

^ ndzim. 9 Leswaku u kuma rungula leri engetelekeke malunghana ni rihanyo ra wena, hlaya ndzima ya vukhume ya buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 1, leyi kandziyisiweke hi Timbhoni ta Yehovha.

DYONDZA SWO TALA

Ndzi Nga Swi Hisekela Njhani Ku Endla Vutiolori?

Anakanya hi vuyelo byinharhu lebyi u nga byi kumaka hi ku endla vutiolori nkarhi na nkarhi.