Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Xalamuka!  |  September 2012

 Langutelo Ra Bibele

Xana Wa Byi Lava Vukhongeri?

Xana Wa Byi Lava Vukhongeri?

LOKO u tshame u hetiwa matimba hi vukhongeri kumbe u tibyele leswaku a swi pfuni nchumu ku va xirho xa vukhongeri, a wu wexe. Entiyisweni, nhlayo ya vanhu lava nga laviki ku va swirho swa vukhongeri yi ya yi andza.

Van’wana va tshike vukhongeri bya vona hikuva va vula leswaku byi kucetela vukanganyisi naswona byi alela vanhu ku endla ku rhandza ka vona. Van’wanyana va byi tshike hileswi va kumeke leswaku swa va tikela ku landzelela xiyimiso lexi vekiweke xa vugandzeri. Kasi van’wana va vona onge va nga swi kota ku gandzela Xikwembu handle ko va xirho xa vukhongeri. Kahle-kahle i yini leswi Bibele yi swi dyondzisaka malunghana ni vukhongeri?

Vanghana Va Xikwembu Va Le Minkarhini Ya Khale

Bibele yi yi hlamusela hi ku kongoma ndlela leyi vavanuna va khale vo fana na Abrahama, Isaka na Yakobe a va xi gandzela ha yona Xikwembu. Hi xikombiso, Yehovha u tshame a ku: “Ndzi tolovelane na yena [Abrahama] leswaku a ta lerisa vana vakwe ni vandyangu wakwe lava nga ta n’wi landzela, leswaku va hlayisa tindlela ta Yehovha, va endla leswi lulameke ni vuavanyisi.” (Genesa 18:19) Abrahama a a ri munghana wa Xikwembu, xisweswo a a ri ni vuxaka lebyinene na xona. Kambe u tlhele a xi gandzela swin’we ni vandyangu wakwe. Hilaha ku fanaka, vavanuna van’wana va khale lava a va ri vanghana va Xikwembu a va xi gandzela tanihi ntlawa, naswona hi ntolovelo a va xi gandzela va ri ni swirho swa mindyangu ya vona, maxaka ni malandza ya vona.

Hi ku famba ka nkarhi, Xikwembu xi lerise Vaisrayele va khale ni Vakreste va lembe-xidzana ro sungula leswaku va hlengeletana va xi gandzela. (Levhitika 23:2, 4; Vaheveru 10:24, 25) Loko va hlengeletanile leswaku va xi gandzela, a va yimbelela, va hlaya Matsalwa va tlhela va khongela. (Nehemiya 8:1-8; Vakolosa 3:16) Nakambe Matsalwa ma lerise leswaku ku va ni ntlawa wa vavanuna lava fanelekaka leswaku va rhangela vandlha.—1 Timotiya 3:1-10.

Vuyelo Byo Gandzela Xikwembu Tanihi Vandlha

Hi ku ya hi leswi Matsalwa ma swi vulaka, swa twala ku gimeta hi ku vula leswaku ninamuntlha Xikwembu xi lava leswaku vanghana va xona va xi gandzela hi ndlela leyi fanaka. Nakambe ku gandzela Xikwembu tanihi vandlha swa vuyerisa.

Hi xikombiso, Matsalwa ma fanisa mugandzeri wa ntiyiso wa Xikwembu ni munhu loyi a fambaka egondzweni ro lala swin’we ni munhu loyi a tsutsumaka eka mphikizano. (Matewu 7:14; 1 Vakorinto 9:24-27) Loko xitsutsumi xo tsutsuma endhawini leyi swi tikaka ku tsutsuma eka yona, xi nga ha karhala hi ku olova ivi xi hetelela xi lan’wa. Kambe loko ku ri ni lava va xi khutazaka, xi nga tikarhata swinene xi hambeta xi tsutsuma. Hilaha ku fanaka, munhu loyi a lavaka ku gandzela Xikwembu hi ndlela leyi amukelekaka, a nga swi kota ku tshama a ri ni vuxaka lebyinene na xona hambiloko a langutana ni maxangu, ntsendze loko a khutaziwa hi vagandzeri-kulobye.

Leswi swi hi endla hi twisisa marito ya Bibele lama nga eka Vaheveru 10:24, 25, lama nge:  “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina.” Entiyisweni, Matsalwa ma vula leswaku vagandzeri va ntiyiso va ta gandzela Xikwembu tanihi vamakwavo lava nga ni vun’we ku fana ni miri wo fanekisela.

Xana u fanele u papalata vukhongeri hinkwabyo?

Bibele yi vula leswaku miri kumbe vandlha rolero ri hlanganisiwa hi xiboho xa rirhandzu ni ku rhula. Hi xikombiso, Vaefesa 4:2, 3 yi khutaza vagandzeri va ntiyiso leswaku va endla swilo “hi mianakanyo yo titsongahata hi ku helela ni hi ku rhula, hi ku va ni mbilu yo leha, [va] lehiselana mbilu hi rirhandzu, [va] tiyimisela hi mbilu hinkwayo ku hlayisa vun’we bya moya exibohweni lexi hlanganisaka xa ku rhula.” A wu ta xi yingisa njhani xikhutazo lexi loko a wu gandzela Xikwembu u ri wexe?

Ku rhandza ka Xikwembu hileswaku vagandzeri va ntiyiso va hlangana ni vagandzeri-kulobye ematshan’wini yo va munhu a xi gandzela a ri yexe. Bibele yi khutaza vagandzeri va Xikwembu leswaku va vulavula hi ku twanana, va papalata ku avana naswona va “hlangana hilaha ku faneleke emianakanyweni yin’we ni le ndleleni yin’we ya ku ehleketa.” (1 Vakorinto 1:10) Marito wolowo a ma nga ta twisiseka loko Xikwembu a xi lava leswaku munhu a xi gandzela a ri yexe.

Vumbhoni lebyi nga eBibeleni byi kombisa leswaku vugandzeri lebyi amukelekaka eka Xikwembu hi lebyi vanhu va kona va xi gandzelaka tanihi ntlawa. Nakambe vukhongeri lebyi Matsalwa ma vulavulaka ha byona lebyi amukelaka eka Xikwembu byi nga ku pfuna leswaku u kota ku enerisa ku navela ka wena ka moya.—Matewu 5:3.

I ntiyiso leswaku vukhongeri byo tala namuntlha byi ni vukanganyisi naswona byi homboloke ngopfu. Kambe sweswo a swi vuli swona leswaku u fanele u papalata vukhongeri hinkwabyo. Ku fanele ku ri ni vukhongeri byo karhi emisaveni lebyi kombisaka rirhandzu eka vanhu hinkwavo—vukhongeri lebyi dyondzisaka van’wana milawu ya Xikwembu ya mahanyelo. Vukhongeri byo tano byi nga ku pfuna leswaku u va ni ripfumelo ra xiviri. Bibele yi ni swikombiso leswi nga ku pfunaka leswaku u vona vukhongeri lebyi amukelekaka eka Xikwembu.

 

DYONDZA SWO TALA

XALAMUKA!

Bibele Yi Ri Yini Hi Vukhongeri?

Bibele ya hlamusela leswaku ha yini ku ri ni vukhongeri byo tala.

MAHUNGU LAMANENE LAMA HUMAKA EKA XIKWEMBU!

U Nga Byi Vona Njhani Vugandzeri Bya Ntiyiso?

Xana ku ni vukhongeri byin’we ntsena bya ntiyiso? Xiya swilo swa ntlhanu leswi kombisaka kahle swikombiso swa vugandzeri bya ntiyiso.