Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! SEPTEMBER 2012

Tindlela Tin’wana To Tshungula Handle Ko Pompela Ngati

Tindlela Tin’wana To Tshungula Handle Ko Pompela Ngati

VATIVI lava dumeke lava humaka ematikweni lama tlulaka 40 va hlanganile edorobeni ra Moscow leswaku va khoma nhlangano wa vu-60 wa Jubilee International Congress of the European Society for Cardiovascular and Endovascular Surgery hi May 20-22, 2011. Muteki wa mahungu wa Russian TV u te: “Xiendlakalo xo kota lexi i xa nkoka swinene eka madokodela ku fana ni mintlangu ya Tiolimpiki eka switsutsumi.”

Kambe nchumu lowu kokeke rinoko ra vativi volavo emasikwini wolawo manharhu a ku ri tende leri a ri ri ni rungula leri vulavulaka hi tindlela tin’wana to tshungula handle ko pompela ngati. Vatirhi va Ndzawulo ya Rungula ra Swibedlhele ya Timbhoni ta Yehovha hi vona lava a va yime etendeni rero. Eka rona, madokodela ma teke swiphephana swa madzana, tibuku, ti-DVD ni swihloko swin’wana swa vutshunguri leswi vulavulaka hi mhaka leyi ya nkoka. DVD leyi a yi laviwa ngopfu hi leyi nga ni vhidiyo leyi nge Transfusion-Alternative Strategies—Simple, Safe, Effective. *

Vatirhi va Ndzawulo ya Rungula ra Swibedlhele ya Timbhoni ta Yehovha hi vona lava a va yime etendeni rero. Eka rona, madokodela ma teke swiphephana swa madzana, tibuku, ti-DVD ni swihloko swin’wana swa vutshunguri

 Madokodela yo tala lama teke etendeni rero ma pfumerile leswaku ku ni xilaveko xo va ku nga tirhisiwi ngati loko ku endliwa vuhandzuri. Dokodela wa le Italy loyi a endlaka vuhandzuri bya mbilu naswona a vulavuleke eka nhlangano wolowo u vule leswaku u ti toloverile Timbhoni ta Yehovha naswona se u endle ta kwalomu ka 70 vuhandzuri bya mbilu. U tlhele a vula leswaku ku endla vuhandzuri handle ko pompela ngati swi toloveleke ngopfu etliliniki yakwe. Profesa wa nhlangano ya Deutsches Herzzentrum Berlin (German Heart Institute Berlin) u titekele DVD a tlhela a tekela ni mutirhi-kulobye. U byele vayingiseri leswaku a ha ku endla vuhandzuri handle ka mpompelo wa ngati eka ricece leri tikaka tikhilogiramu ta 2,5; naswona tliliniki yakwe yi endle vuhandzuri bya mbilu eka tincece leti tikaka tikhilogiramu leti nga ehansi ka teto.

Madokodela ma kota ku endla vuhandzuri handle ko pompela ngati hileswi ma tirhisaka michini, mirhi swin’we ni maendlelo yo tshungula ni yo endla vuhandzuri lama nga tirhisiki ngati

Endzhaku ka n’hweti nhlangano wolowo wu khomiwile eMoscow, madokodela lama humaka ematikweni yo hambana-hambana ma ye eka nhlangano wun’wana wa Fourth Belomorsk Symposium of Anesthesiologists and Intensive Care Physicians of the Northwest Region of Russia, lowu a wu khomeriwe edorobeni ra Arkhangel’sk. Ndzawulo ya Rungula ra Swibedlhele yi tlhele yi ya ni kwalaho yi ya veka tende leri nga ni rungula leri vulavulaka hi tindlela tin’wana to tshungula handle ko pompela ngati naswona ri tlhele ri koka rinoko ra vo tala. Loko dokodela un’wana wa le St. Petersburg a vone rungula leri vekiweke kwalaho, u te: “Rungula leri hi rona leri hi ri lavaka.” U vule leswaku swi n’wi twisa ku vava leswi madokodela man’wana ma hambetaka ma va pompela ngati vavabyi lava tshweke hileswi ku nga ntolovelo wa kona. U tlhele a ku: “Rungula ra n’wina ri ta pfuna swinene enhlengeletanweni leyi nga ta vulavula hi ku tshungula vavabyi lava tshweke, leyi nga eku kunguhatiweni leswaku yi khomiwa eSt. Petersburg.”

Emisaveni hinkwayo madokodela lama nhlayo ya wona yi yaka yi andza ma le ku voneni ka vuyelo byo tirhisa mirhi leyi nga riki na ngati swin’we ni ku endla vuhandzuri handle ko pompela ngati. Swi ta tikomba loko siku rin’wana matshungulelo lawa ma ta tirhisiwa emisaveni hinkwayo.

^ ndzim. 3 Yi kandziyisiwe hi Timbhoni ta Yehovha.