Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

XALAMUKA! NOVEMBER 2011

 Vantshwa Va Vutisa

Ndzi Nga Byi Kuma Kwihi Vuhungasi Lebyinene?

Ndzi Nga Byi Kuma Kwihi Vuhungasi Lebyinene?

Loko u ri Mukreste u fanele u hlawula vuhungasi bya wena. A wu nambi u teka leswi vanhu van’wana va vulaka leswaku u fanele u swi hlalela, u swi hlaya kumbe u swi yingisela. Ha yini? Hikuva namuntlha vuhungasi byo tala byi kucetela vuxaka bya rimbewu lebyi nga riki enawini, madzolonga ni vungoma, ku nga swilo leswi u faneleke u swi papalata. Hambiswiritano, vuhungasi lebyinene bya kumeka. A hi voneni ndlela leyi u nga byi kumaka ha yona. *

TIFILIMI

Laha hansi, fungha hi ✔ etlhelo ka muxaka wa tifilimi leti u ti rhandzaka.

  • Ta mafenya

  • Drama

  • Ta madzolonga

  • Ta mintsheketo ya sayense

  • Tin’wana

Xana a wu swi tiva . . . ? Hakanyingi tiko ra Indiya ri humesa tifilimi to tlula gidi hi lembe naswona ri tlula matiko laman’wana hinkwawo.

Leswi u faneleke u swi papalata. Tifilimi to tala ti khutaza mahanyelo lama lwisanaka ni milawu ya Bibele. Tin’wana ti kombisa swifaniso swa vuxaka bya rimbewu ni madzolonga, kasi tin’wana ti kombisa swilo swa masalamusi. Kambe Bibele yi ri: “Cukumetani hinkwaswo ekule na n’wina, vukarhi, ku hlundzuka, vubihi, mavulavulelo ya nhlambha, ni mavulavulelo lama thyakeke.” (Vakolosa 3:8) Ku tlula kwalaho, Xikwembu xi sola swiendlo swin’wana ni swin’wana leswi fambisanaka ni vungoma.—Deteronoma 18:10-13.

Ndlela yo hlawula tifilimi. “A ndzi nge yi hlaleli filimi loko swinavetisi swa yona swi nga basanga.”—Jerrine. *

“A ndzi teki swiringanyeto swa munhu wun’wana handle ka loko ndzi tiyiseka leswaku munhu wa kona u ni mahanyelo lama fanaka ni ya mina.”—Caitlyn.

“Loko ndzi ri karhi ndzi hlalela filimi yo karhi endhawini yo hlalela tifilimi kutani yi kombisa swilo leswi nga basangiki, ndza huma.”—Marina.

“Leswaku ndzi kota ku tiva swo tala malunghana ni leswi nga endzeni ka filimi yin’wana ni yin’wana, ndzi tirhisa Website yin’wana eka Internet leyi vikaka loko filimi ya kona yi kombisa swifaniso swa vuxaka bya rimbewu, madzolonga ni nhlambha.”—Natasha.

Xitsundzuxo: Lavisisa tifilimi leti swi nga talangiki leswaku ti va ti ri ni swilo leswi thyakeke. Masami u ri: “Ndzi tsakela ngopfu tifilimi leti  vulavulaka hi minkarhi ya khale, to tanihi leti sekeriweke etibukwini leti nga hundzeriwiki hi nkarhi.

Tivutise,

‘Xana tifilimi leti ndzi ti hlalelaka ti endla leswaku swi ndzi olovela kumbe swi ndzi tikela ku yingisa milawu ya Xikwembu malunghana ni timhaka ta masangu, madzolonga ni vungoma?

TIBUKU

Laha hansi, fungha hi ✔ etlhelo ka muxaka wa tibuku leti u ti rhandzaka.

  • Ta mintsheketo

  • Leti nga riki mintsheketo

  • Ta xikhale

  • Tin’wana

Xana a wu swi tiva . . . ? Le United States, ku kandziyisiwa tibuku to tlula gidi vhiki ni vhiki.

Bindzu ra vuhungasi a ri lahlekeriwi hi nchumu kambe ra vuyeriwa swinene loko u honisa ripfalo ra wena leri leteriweke hi Bibele ivi u hambeta u hlalela, u hlaya kumbe u yingisela xin’wana ni xin’wana lexi dumeke.

Leswi u faneleke u swi papalata. Ku fana ni tifilimi, tibuku to tala ti kucetela mahanyelo lama lwisanaka ni milawu ya Bibele. Hi xikombiso, tin’wana ti ni swifaniso leswi kombisaka timhaka ta rimbewu kumbe ti vulavula hi vungoma. Kambe Bibele yi ri: “Vumbhisa ni thyaka ra muxaka wun’wana ni wun’wana kumbe makwanga swi nga vuriwi hambi ku ri ku vuriwa exikarhi ka n’wina.” (Vaefesa 5:3) Yi tlhela yi vula leswaku swiendlo swa vungoma i nchumu wo “biha ematihlweni ya Yehovha.”—2 Tihosi 17:17.

Ndlela yo hlawula tibuku. “Loko ndzi ri karhi ndzi lava buku leyinene, ndzi hlaya xifunengeto xa le ndzhaku ndzi tlhela ndzi pfula-pfula matluka ya yona. Loko ndzi vona xo karhi lexi nga basangiki eka yona, ndzi namba ndzi nga yi xavi.”—Marie.

“Loko ndzi ri karhi ndzi kula naswona ndzi sungula ku tiendlela swiboho ndzi wu xiyile nkoka wo yingisa ripfalo ra mina. Loko ndzi vona leswaku buku ya kona a hi yinene, a ndzi namba ndzi tshika ku yi hlaya. A ndzi swi vona leswaku a yi fambisani ni mianakanyo ya Xikwembu.”—Corinne.

Xitsundzuxo: Hlaya tibuku to hambana-hambana. Lara wa malembe ya 17 u ri: “Ndzi xiye leswaku ndzi nga titoloveta ku hlaya tibuku leti  tolovelekeke ematshan’weni yo hlaya ta mintsheketo ya manguva lawa. Ndlela leyi marito ma tirhisiweke ha yona, swimunuhatwa swa kona ni ku landzelelana ka swiendlakalo swa kona, swa tsakisa hakunene!”

Tivutise,

‘Xana ndzi tihungasa hi tibuku leti nga ni mikhuva leyi nga amukelekiki eka Xikwembu?’

VUYIMBELERI

Laha hansi, fungha hi ✔ etlhelo ka vuyimbeleri lebyi u byi rhandzaka.

  • Rhok

  • Classic

  • Jazz

  • R&B

  • Hip-hop

  • Byin’wana

Xana a wu swi tiva . . . ? Hi lembe, tikhampani letikulu ta mune leti rhekhodaka vuyimbeleri ti humesa ti albamu ta kwalomu ka 30 000.

Leswi u faneleke u swi papalata. Ku fana ni tifilimi ni tibuku, vuyimbeleri byo tala namuntlha byi thyakile. Marito lama thyakeke ni swifaniso swa kona swi nga ha endla leswaku swi ku tikela ku lawula ku navela ka wena ka rimbewu. (1 Vakorinto 6:18) Leigh wa malembe ya 21 u ri: “Vuyimbeleri byo tala namuntlha byi hlohlotela mahanyelo lama lwisanaka ni milawu ya Bibele naswona swichayachayana swa kona swi endla vanhu cina hi ndlela leyi nga basangiki.”

Ndlela yo hlawula vuyimbeleri. “Ndza tivutisa ‘Loko ndzi ta khomiwa hi tingana loko ndzi fanele ndzi pfumelela Vakreste lava kuleke leswaku va vona kumbe ku yingisela vuyimbeleri lebyi ndzi byi yingiselaka?’ Sweswo swi ndzi pfuna ku hlawula muxaka wa vuyimbeleri lebyi ndzi faneleke ku byi yingisela.”—Leanne.

Xitsundzuxo. Tiyimisele ku ringeta mixaka yo hambana-hambana ya vuyimbeleri. Muntshwa loyi a vuriwaka Roberto u ri: “Tatana u rhandza vuyimbeleri lebyi nga hundzeriwiki hi nkarhi, kutani ndzi kule ndzi ri karhi ndzi byi yingisela. Ku dyondza ha byona ni ku dyondza ku tlanga piyano swi ndzi pfule mahlo.”

Tivutise,

‘Xana vuyimbeleri lebyi ndzi byi yingiselaka byi endla leswaku swi ndzi olovela kumbe swi ndzi tikela ku lawula ku navela ka mina ka rimbewu?’

HLAYA LESWI ENGETELEKEKE HI MHAKA LEYI!

Vona buku leyi nge Swivutiso Leswi Vantshwa Va Swi VutisakaTinhlamulo Leti Tirhaka, Vholumo 2, Tindzima 31 na 32, leyi kandziyisiweke hi Timbhoni ta Yehovha.

^ ndzim. 3 Xalamuka! a yi bumabumeli kumbe ku sola filimi, buku kumbe risimu ro karhi. Xikongomelo xa xihloko lexi i ku ku pfuna leswaku u hanya hi ku pfumelelana ni ripfalo ra wena leri leteriweke hi Bibele hi ku landza milawu ya Xikwembu.—Pisalema 119:104; Varhoma 12:9.

^ ndzim. 13 Mavito man’wana ma cinciwile exihlokweni lexi.

DYONDZA SWO TALA

U Nga Swi Kota Ku Hlula Ndzingo!

Magoza manharhu lama nga ku pfunaka ku hlula ndzingo.

Vantshwa Va Vutisa, Vholumo 2

Mhaka ya xikolo, vuhungasi, tintangha, vatswari, ku kula, ndlela leyi u titwaka ha yona, vafana ni vanhwanyana swi katsiwile.