Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

XALAMUKA! JULY 2011

Ha Yini Ku Ri Ni Ku Xaniseka Konghasi?

Ha Yini Ku Ri Ni Ku Xaniseka Konghasi?

VAFUNDHISI lava vulaka leswaku va yi tiva nhlamulo ya xivutiso lexi nga eximatsini va tala ku dyondzisa leswaku vanhu va xaniseka hikwalaho ka leswi Xikwembu xi va xupulaka. Hi xikombiso, endzhaku ka ku tsekatseka ka misava loku veke kona eHaiti, muprista wa kwalaho u byele vandlha rakwe leswaku ku na leswi Xikwembu xi ringetaka ku va byela swona. Kambe van’wana va ni mavonelo lama hambaneke. Profesa wa vukhongeri wa le Amerika u vula leswaku vanhu vo tala va swi vonisa xileswi: “A hi fanelanga hi vutisa leswaku ha yini Xikwembu xi vanga timhangu toleto. Hina ho fanele hi va ni ripfumelo.”

Xana hakunene Xikwembu hi xona xi vangaka ku xaniseka ka vanhu? Bibele yi ri a swi tano! A ku nga ri xikongomelo xa Yehovha Xikwembu leswaku vanhu va xaniseka. Mpatswa wo sungula wu xandzukele vulawuri bya Xikwembu, wu tivekela nawu wa wona wa leswinene ni leswo biha. Wu fularhele Xikwembu kutani wu xaniseka hikwalaho ka sweswo. Namuntlha ha xaniseka hikwalaho ka xiboho xa wona lexi nga riki xinene. Kambe Xikwembu a hi xona xi endlaka leswaku vanhu va xaniseka. Bibele yi ri: “Loko a ri endzingweni, munhu a nga vuli a ku: ‘Ndzi ringiwa hi Xikwembu.’ Hikuva Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) Ku xaniseka ku khumba un’wana ni un’wana, hambi ku ri vanhu lava Xikwembu xi va rhandzaka. Xiya swikombiso leswi landzelaka:

  • Muprofeta Elixa u tshame a khomiwa hi vuvabyi lebyi dlayaka.—2 Tihosi 13:14.

  • Muapostola Pawulo u tsale leswaku u ve “ni ndlala ni torha ni ku pfumala swiambalo leswi eneleke ni ku himeteriwa ni ku pfumala [kaya].”—1 Vakorinto 4:11.

  • Mukreste la vuriwaka Epafrodito a a vabya naswona a a ‘karhatekile.’—Vafilipiya 2:25, 26.

Bibele a yi vuli leswaku vavanuna lavanharhu a va xupuriwa hi Xikwembu hikwalaho ka swidyoho swa vona. Kambe yi hi byela swo tala ku tlula ku boxa loyi a nga endliki leswaku hi xaniseka. Yi tlhela yi boxa swivangelo swinharhu leswi endlaka hi xaniseka.

 Ku Tihlawulela

“Xin’wana ni xin’wana lexi munhu a xi byalaka, u ta tlhela a tshovela xona.” (Vagalatiya 6:7) I ntiyiso leswaku munhu la dzahaka, la chayelaka hi ndlela yo biha kumbe la tlangaka hi muholo wakwe u ta langutana ni vuyelo bya swiboho swa yena.

Hi nga ha xaniseka hikwalaho ka swiboho swa munhu la nga ni vutianakanyi. Vanhu hi vona va vangeke vubihi byo tala, byin’wana byi sungule eka Manazi lawa a ma ri ni tihanyi naswona namuntlha se ku xanisiwa ni vana. Loko vanhu va nga wu tirhisi kahle ntshunxeko lowu va nga na wona, swiboho leswi va swi endlaka swi endla leswaku ku xaniseka van’wana.

Swiendlakalo Leswi Nga Languteriwangiki

Hi lembe-xidzana ro sungula C.E., xihondzo lexikulu xa le Yerusalema xi wile, xi dlaya vanhu va 18. Loko Yesu a vulavula hi vanhu lava khumbekeke eka xiendlakalo xexo u te: “Xana mi ehleketa leswaku a va ri ni nandzu ku tlula vanhu hinkwavo va le Yerusalema? A swi tano nikatsongo.” (Luka 13:4, 5, The New American Bible) Yesu a a swi tiva leswaku vanhu volavo a va nga xupuriwi hi Xikwembu. A a swi tiva leswi Rito ra Xikwembu ri swi vuleke: “Nkarhi ni xiendlakalo lexi nga languteriwangiki swa va wela hinkwavo.” (Eklesiasta 9:11) Vanhu vo tala va weriwa hi makhombo hileswi va vaka endhawini leyi hoxeke hi nkarhi lowu hoxeke. Hi xikombiso, swiviko swi kombisa leswaku vanhu vo tala va xaniseka hikwalaho ka ku nga swi tekeli enhlokweni swilemukiso ni hileswi va tshamaka eka miako leyi nga kotiki ku tiyisela maxelo yo biha kumbe ku tsekatseka ka misava. Eka swiyimo swo tano, swiendlakalo leswi nga languteriwangiki swikhumba vanhu vo tala naswona swi endla leswaku va xaniseka.

“Mufumi Wa Misava Leyi”

Bibele yi ri: “Misava hinkwayo yi le hansi ka matimba ya lowo homboloka.” (Yohane 12:31; 1 Yohane 5:19) “Lowo homboloka” i Sathana Diyavulosi, xivumbiwa xa matimba lexi hlamuseriwaka tanihi “mufumi wa vulawuri bya moya.” Sathana u hlohlotela “moya lowu sweswi wu tirhaka eka vana lava nga yingisiki.” (Vaefesa 2:2) Vugevenga byo tanihi ku yayarheriwa ka rixaka ni ku xanisiwa ka vana se i khale byi tsema vanhu nhlana lerova swa va tikela ku pfumela leswaku byi vangiwa hi Sathana.

Kambe, xana leswi swi vula leswaku Xikwembu a xi na mhaka ni ku xaniseka ka hina? Xana xi ta endla swo karhi leswaku xi herisa ku xaniseka?

DYONDZA SWO TALA

MAHUNGU LAMANENE LAMA HUMAKA EKA XIKWEMBU!

Ha Yini Xikwembu Xi Pfumelela Vubihi Ni Ku Xaniseka?

Vubihi byi sungule njhani naswona ha yini Xikwembu xi byi pfumelele byi ya emahlweni? Xana ku xaniseka ku ta kala ku hela?