Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! MARCH 2011

Landzela Magoza Yo Antswisa Rihanyo Ra Wena

Landzela Magoza Yo Antswisa Rihanyo Ra Wena

XANA wa n’wi tsundzuka Ram loyi a boxiweke eka xihloko xo sungula xa swihloko leswi swa nxaxamelo? Ku fana ni vanhu vo tala emisaveni hinkwayo, Ram a a nga yi xiyi ndlela leyi swi nga swa nkoka ha yona ku dya swakudya leswi nga ni rihanyo swin’we ni mikhuva yin’wana ya siku ni siku leswaku ya vuyerisa. Wa hlamusela: “Xalamuka! ya May 8, 2002 leyi nga ni xihloko lexi nge, ‘Swakudya Swo Xawula Leswi Hi Nga Swi Kumaka’ yi ndzi pfunile ku twisisa leswaku ha yini swi ri swa nkoka ku hlawula swakudya leswi hi faneleke hi swi dya.”

Ram u ri: “Tanihi ndyangu, hi ringete ku tirhisa swilo leswi hi swi dyondzeke exihlokweni xexo. Endzhaku ka nkarhi, hi xiye leswaku masocha ya hina ya miri ma tirha kahle. Loko hi nga si sungula ku hlawula-hlawula swakudya, a hi tshamela ku khomiwa hi mukhuhlwana kambe sweswi a wa ha hi khomi nkarhi na nkarhi. Hi tlhele hi dyondza tindlela leti nga dyeki mali leti hi hala tlhelo ti olovaka to kuma mati yo tenga, ha xi tlangela xihloko xa Xalamuka! lexi nge ‘Tindlela Ta Ntsevu Ta Ku Hlayisa Rihanyo Ra Wena.’”—September 22, 2003.

“Xihloko xin’wana xa Xalamuka! lexi ndzi pfuneke leswaku ndzi antswisa rihanyo ra ndyangu wa mina. Hi lexi a xi ri ni nhloko-mhaka leyi nge, ‘Xisibi—“Murhi Lowu Sivelaka Mavabyi,”’ eka nkandziyiso wa December 8, 2003. Hi sungule ku tirhisa swiringanyeto leswi nga exihlokweni lexi endzhaku ko xi hlaya. Sweswi vuvabyi bya mahlo a bya ha hi karhati ku fana ni le ku sunguleni.

“Endhawini leyi hi tshamaka eka yona, vanhu a va na mhaka ni tinhonghana ni tinsuna leti nga lo mphaa! Kambe ndyangu wa hina wu dyondze eka vhidiyo leyi nge, The Bible—Its Power in Your Life, * leswaku hi fanele hi tisirhelela eka switsotswana sweswo. Vutivi lebyi na byona byi hi pfunile leswaku hi tshama hi ri ni rihanyo lerinene.”

U nga lahli thawula! Ku nga khathariseki mindzulamiso leyi u lavaka ku yi endla, u nga vona vuyelo bya kona loko u sungula hakatsongo-tsongo naswona u nga tivekile tipakani leti u nga ta ka u nga tifikeleli. Hi xikombiso, ringeta ku hunguta swakudya leswi nga riki na rihanyo ro tala ematshan’weni yo swi tshika hi ku helela. Ringeta ku etlela ka ha ri na nkarhi naswona u endlanyana vutiolori. Swa antswa ku endla swo karhi ku ri ni ku tshama u ku mbaa! Hakanyingi swi teka nkarhi—mavhiki kumbe tinh’weti—u nga si tolovela mukhuva lowuntshwa. Loko u nga byi voni hi ku hatlisa vuyelo bya matshalatshala ya wena, u nga wi mapa. Loko u phikelela, ku nga khathariseki swilo leswi nga ku hetaka matimba, rihanyo ra wena ri nga va exiyin’weni lexinene.

Emisaveni leyi leyi nga hetisekangiki, a swi koteki leswaku munhu a va ni rihanyo leri hetisekeke. Minkarhi yin’wana swi nga ha endleka leswaku a wu vabyi hileswi u nga riki na mhaka ni rihanyo ra wena, kambe u vabya hikwalaho ka leswi u nga hetisekangiki. Hikokwalaho, u nga pfumeleli rihanyo ra wena ri ku vilerisa kumbe nchumu wihi ni wihi wu ku endla u va ni ntshikilelo. Yesu u vutise a ku: “Xana i mani eka n’wina loyi hi ku vilela a nga engetelaka xisungunu xin’we empin’weni wa vutomi byakwe?” (Luka 12:25) Ematshan’weni ya sweswo, ringeta ku papalata swilo leswi nga pfuniki nchumu leswi nga endlaka leswaku u hanya nkarhi wo koma naswona swi ku vangela mavabyi. Ku endla tano swi ta ku pfuna leswaku u va ni rihanyo lerinene sweswi, kukondza ku fika misava leyintshwa ya Xikwembu leyi eka yona ‘ku nga riki na munhu la nga ta ku: “Ndza vabya.’”—Esaya 33:24.

^ ndzim. 5 Yi kandziyisiwe hi Timbhoni ta Yehovha.