Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! MARCH 2011

U Nga Swi Kota Ku Antswisa Rihanyo Ra Wena

U Nga Swi Kota Ku Antswisa Rihanyo Ra Wena

RUSTAM la tshamaka eRhaxiya u tshama a khomile. Enkarhini lowu nga hundzu a a nga ri na mhaka ni rihanyo rakwe kutani u swi xiyile leswaku u langutana ni vuyelo bya kona. U tshike ku dzaha ni ku nwa byala ku tlula mpimo. Hambiswiritano, ku heta nkarhi a ri karhi a tirha hi khompyuta swi n’wi siya a lo lee!

Hambileswi Rustam a a sungula ku tirha hi awara ya nhungu nimixo, hakanyingi a a titwa a xalamuke kahle hi awara ya khume naswona a a tshamela ku vabya. Kutani u sungule ku cinca ndlela leyi a endla swilo ha yona. Vuyelo byi ve byihi? Wa vika: “Eka malembe ya nkombo lama nga hundza, a ndzi tekanga masiku yo tlula mambirhi entirhweni hikwalaho ko vabya. Ndzi titwa ndzi phyuphyile, ndzi xalamukile naswona ndza byi tsakela vutomi!”

Ram ni nkatakwe ni vana va vona vambirhi va tshama eNepal. Ndhawu leyi va tshamaka eka yona a yi na nkululo naswona yi tele tinsuna ni tinhongana. Enkarhini lowu nga hundza, Ram ni ndyangu wakwe a va tshamela ku karhatiwa hi swiphiqo swo hefemula ku katsa ni vuvabyi bya mahlo. Na vona hilaha ku fanaka va endle mindzulamiso leyi antswiseke rihanyo ra vona.

Khathalela Rihanyo Ra Wena!

Vanhu vo tala, ku nga khathariseki leswaku i swigwili kumbe swisiwana, va tsandzeka ku vona ku yelana exikarhi ka ndlela leyi va hanyaka ha yona ni rihanyo ra vona. Lexi hlamarisaka, ku nga khathariseki leswaku i swigwili kumbe i swisiwana, vanhu vo tala va tsandzeka ku vona ku yelana exikarhi ka mikhuva ni rihanyo ra vona. Va nga ha tibyela leswaku ku tiphina hi rihanyo lerinene swo tiendlekela naswona a swi le matimbeni ya vona. Langutelo ro tano leri hoxeke ri sivela vanhu vo tala leswaku va nga ri antswisi rihanyo ra vona ni ku hanya vutomi lebyi vuyerisaka.

Hambiswiritano, ku nga khathariseki swiyimo swa wena swa timali, ku ni magoza ya nkoka lawa u nga ma landzelaka leswaku u sirhelela ni ku antswisa rihanyo ra wena ni ra ndyangu wa wena. Xana ku endla tano swi lava matshalatshala? Ina! U nga swi kota ku endla leswaku rihanyo ra wena ri va exiyin’weni lexinene hi ku papalata swilo leswi nga endlaka leswaku u hanya nkarhi wo koma.

Hi ku vulavula ni hi xikombiso xa vona lexinene, vatswari va nga dyondzisa vana va vona ku va ni mahanyelo lamanene lama nga endlaka leswaku va va ni rihanyo lerinene. Nkarhi ni mali leyi vatswari va yi tirhiselaka ku pfuna vana va vona yi nga endla leswaku va nga xaniseki, va nga karhatiwi hi mavabyi naswona va nga heti mali yo tala va ri karhi va va pfuna leswaku va kuma vutshunguri. Ku endla matshalatshala lamatsongo, swi nga hunguta mavabyi.

Eka swihloko leswi landzelaka hi ta kambisisa magoza ya ntlhanu ya nkoka lama pfuneke Rustam, Ram ni van’wana vo tala. Magoza lawa ma nga ku pfuna na wena!