Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! 2010-11

  Langutelo Ra Bibele

Xana Swi Fanerile Ku Khongela Eka Vakwetsimi?

Xana Swi Fanerile Ku Khongela Eka Vakwetsimi?

Marie na Theresa a va titeka va ri Makhatoliki ya xiviri. Havumbirhi bya vona a va tshembela eka vakwetsimi. Marie a pfumela leswaku a nga khongela eka vona leswaku a kuma mpfuno. Nkarhi na nkarhi Theresa a a khongela eka mukwetsimi loyi ku vuriwaka leswaku u pfuna vanhu va le mugangeni wa ka vona ni ku va sirhelela. Naswona a a khongela eka mukwetsimi loyi a thyiweke vito rakwe.

KU FANA na Marie na Theresa, vanhu va timiliyoni emisaveni hinkwayo va khongela eka vakwetsimi va vona leswaku va kombela mikateko. Hi ku ya hi New Catholic Encyclopedia, “vakwetsima va kombelela vanhu ndzivalelo,” nakambe “i ‘swinene naswona swa pfuna’ ku va va kombelela vanhu . . . mikateko eka Xikwembu.”

Kambe, xana Xikwembu xi yi languta njhani mhaka leyi? Xana swa amukeleka eka xona ku va hi khongela eka vakwetsimi hi va kombela leswaku va va vayimeri va hina? Xiya leswi Bibele yi swi vulaka.

Xana Hi Fanele Hi Khongela Eka Vakwetsimi?

EBibeleni, rito ra Xigriki leri hundzuluxeriweke ri va “mukwetsimi” eka Tibibele tin’wana ri vula “muhlawuriwa.” Hambiswiritano, a ku kona eBibeleni laha ku vuriwaka leswaku mugandzeri wa Xikwembu wo tshembeka u tshame a khongela eka vakwetsimi. Ha yini? New Catholic Encyclopedia yi vula leswaku “hi lembe-xidzana ra vunharhu vanhu va sungule ku pfumela leswaku ku khongela eka vakwetsimi a ku ri ndlela leyi amukelekaka yo tshinela eka Xikwembu.” Hi nkarhi wolowo se a ku hundze malembe ya kwalomu ka 200 Kreste a file. Hikwalaho, dyondzo yoleyo a yi sunguriwanga hi Yesu ni vatsari va Bibele lava tsaleke hi ntirho wakwe wo chumayela. Ha yini va nga hi byelanga leswaku hi khongela eka vakwetsimi?

Bibele yi dyondzisa leswaku hi fanele hi khongela eka Xikwembu ntsena, hi tirhisa vito ra Yesu Kreste. Yesu u te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yohane 14:6) Marito wolawo lama nga biki mariri ma pfumelelana ni dyondzo ya Yesu leyi tsariweke eka Matewu 6:9-13. Loko Yesu a ri karhi a hlamusela swilo leswi hi nga swi khongelelaka, u byele valandzeri vakwe a ku: “Mi fanele mi khongela hi ndlela leyi: Tata wa hina la nge matilweni, vito ra wena a ri kwetsimisiwe. . . . ”   (Matewu 6:9) Swi le rivaleni leswaku hi fanele hi khongela ntsena eka Tata wa hina wa le matilweni. Mhaka leyi yi sekeriwe eka nawu wa xisekelo wa le Bibeleni.

Xikhongelo I Xiphemu Xa Vugandzeri

The World Book Encyclopedia yi ri: “Xikhongelo i marito ni mianakanyo leyi kombisaka xichavo lexikulu leyi kongomisiwaka eka Xikwembu, swikwembu, swikwembukati, swivumbiwa kumbe swilo swin’wana leswi gandzeriwaka. . . . Xikhongelo i xiphemu xa nkoka xa vugandzeri lexi tirhisiwaka hi vukhongeri byo tala emisaveni.” Tivutise, ‘Xana swi fanerile leswaku hi nkhinsama hi khongela eka munhu un’wana handle ka Muvumbi tlhelo Munyiki wa hina wa vutomi?’ (Pisalema 36:9) Yesu u te: “Vagandzeri va ntiyiso va . . . ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.” (Yohane 4:23) Bibele yi tlhela yi vula leswaku Muvumbi u lava “ku tinyiketela loku heleleke.”—Deteronoma 4:24; 6:15.

Xiya xikombiso xa muapostola Yohane la nga Mukreste. Endzhaku ka loko a vone swivono swo hlamarisa leswi tsariweke ebukwini ya Bibele ya Nhlavutelo, u chuhe ngopfu lerova ‘u wele ehansi leswaku a gandzela emahlweni ka milenge ya ntsumi’ leyi n’wi kombeke swilo leswi. Xana ntsumi yi angule njhani? Yi te: “Tivonele! U nga endli sweswo! Mina ndzo va hlonga-kuloni swin’we ni vamakwenu . . . Gandzela Xikwembu.” (Nhlavutelo 22:8, 9) Ni le ka xiendlakalo lexi, Bibele yi kandziyisa leswaku hi fanele hi gandzela Yehovha Xikwembu ntsena.

Hi ku pfumelelana ni marito lama vuriweke laha henhla, Xikwembu hi xona xi ri xoxe lexi vitaniwaka “Mutwi wa xikhongelo.” (Pisalema 65:2) Ku engetela kwalaho, tanihi leswi a nga Lowa Matimba Hinkwawo, hi yena ntsena la nga ni vulawuri, vutivi ni matimba yo hlamula xikombelo xihi na xihi lexi hi xi kombelaka eka swikhongelo swa hina. (Yobo 33:4) Hambi ku ri Yesu Kreste hi byakwe a ku ri ni swilo swin’wana leswi a a nga koti ku swi endla. (Matewu 20:23; 24:36) Hambiswiritano, ku vuriwa leswaku a a nyikiwe vulawuri lebyikulu, ku katsa ni vutihlamuleri bya ku va muyimeri wa vanhu.

Muyimeri La Nga Ni Musa

Bibele yi vula leswi hi Yesu: “Wa swi kota ku va ponisa hi ku helela lava tshinelelaka Xikwembu ha yena, hikuva nkarhi hinkwawo wa hanya leswaku a va kombelela.” (Vaheveru 7:25) Hi marito man’wana, Yesu a nga va Muyimeri la nga ni ntwela-vusiwana eka lava va ‘yaka eka Xikwembu ha yena.’ Leswi a swi vuli swona leswaku hi fanele hi khongela eka Yesu nileswaku yena u ta hundzisa swikhongelo swa hina eka Xikwembu. Kambe swi vula leswaku hi khongela eka Xikwembu hi vito ra Yesu, hi ndlela yoleyo hi kombisa leswaku hi xixima vulawuri byakwe. Ha yini Yesu a ri muyimeri la fanelekaka?

Phela, Yesu u hanye laha misaveni tanihi munhu wa nyama, leswi n’wi endleke leswaku a ku twisisa kahle ku xaniseka ka vanhu van’wana. (Yohane 11:32-35) Nakambe u kombise vanhu rirhandzu hi ku hanyisa lava vabyaka, a pfuxa vafi ni ku pfuna vanhu hinkwavo lava teke eka yena leswaku va ta dyondza hi Xikwembu. (Matewu 15:29, 30; Luka 9:11-17) U tlhele a rivalela vanhu swidyoho swa vona. (Luka 5:24) Leswi swa hi tiyisa hikuva loko hi dyoha, “hi ni mupfuni eka Tatana, a nga Yesu Kreste, loyi a lulameke.”—1 Yohane 2:1.

Rirhandzu ni ntwela-vusiwana lowu Yesu a a ri na wona i timfanelo leti hi faneleke hi tikarhatela ku ti tekelela. I ntiyiso leswaku a hi hlawuriwanga ku va vayimeri, kambe hi nga swi kota ku khongelela van’wana. Entiyisweni, rirhandzu ri fanele ri hi susumetela ku endla tano. Yakobo u tsale a ku: “Mi khongelelana. . . . Xikombelo xa munhu la lulameke, loko xi endliwa, xi ni matimba lamakulu.”—Yakobo 5:16.

Marie na Theresa va dyondze ntiyiso wolowo wa risima hileswi va kambisiseke Bibele hi voxe. Timbhoni ta Yehovha ta ku rhamba na wena leswaku u endla tano. Hilaha Yesu a vuleke hakona, ‘lava gandzelaka Xikwembu va fanele va xi gandzela hi moya ni ntiyiso.’—Yohane 4:24.