Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

XALAMUKA! NO. 1 2017

Wansati wo tlhariha u xixima ripfalo rakwe

 LESWI BIBELE YI SWI VULAKA | KU SUSA KHWIRI

Ku Susa Khwiri

Ku Susa Khwiri

Lembe ni lembe vana lava dlayiwaka va nga si velekiwa, va tele ngopfu lerova nhlayo ya vona yi andze ku tlula ni nhlayo ya vaakatiko va le matikweni man’wana.

Xana swi bihile ku susa khwiri?

LESWI VANHU VA SWI VULAKA

Vavasati va susa makhwiri hikwalaho ka swivangelo swo hambanahambana, leswi katsaka swiphiqo swa timali, ku va ni swiphiqo ni vanhu lava va rhandzanaka na vona, ku lava ku yisa tidyondzo emahlweni kumbe ku chava ku kurisa vana va ri voxe. Kambe van’wana va teka ku susa khwiri ku ri nchumu wo biha, hikuva Xikwembu xi nyike vavasati vutihlamuleri byo veleka vana.

LESWI BIBELE YI SWI VULAKA

Xikwembu xi teka vutomi byi ri lebyi kwetsimaka, ngopfungopfu vutomi bya vanhu. (Genesa 9:6; Pisalema 36:9) Nsinya lowu wa nawu wa tirha ni le ka n’wana loyi a nga ekhwirini, ku nga ndhawu leyi hlayisekeke leyi Xikwembu xi endleke leswaku n’wana a tumbulukela eka yona. Mutsari un’wana wa Bibele u te: “U tshame u ndzi ungamerile ekhwirini ra manana.” U ye emahlweni a ku: “Mahlo ya wena ma vone ni xitumbulukwa xa mina. Swiphemu swa xona hinkwaswo swi tsariwe ebukwini ya wena, malunghana ni masiku lawa swi vumbiweke ha wona.”—Pisalema 139:13, 16.

Ndlela leyi Xikwembu xi byi tekaka ha yona vutomi bya n’wana loyi a ha riki embelekweni, yi vonaka kahle eka Nawu lowu a xi wu nyike Vaisrayele ni le ka ripfalo leri xi hi nyikeke rona. Nawu wa Xikwembu wu vule leswaku munhu loyi a vavisaka wansati loyi a tikeke kutani n’wana wakwe loyi a ha riki ekhwirini a fa, munhu yoleyo a a fanele a dlayiwa. (Eksoda 21:22, 23) Vaavanyisi a va fanele va rhanga hi ku lavisisa loko munhu a dlaye hi vomu kumbe ku nga ri hi vomu.—Tinhlayo 35:22-24, 31.

Xin’wana hileswaku vanhu va velekiwe va ri ni ripfalo. Loko wansati a yingisa ripfalo rakwe hi ku xixima vutomi bya n’wana wakwe loyi a ha riki ekhwirini, sweswo swi endla leswaku a vuyeriwa. * Loko a nga ri yingisi ripfalo rakwe, ri nga ha sungula ku n’wi kingindza swinene. (Varhoma 2:14, 15) Vulavisisi byi kombisa leswaku vavasati lava susaka makhwiri va le khombyeni ro khomiwa hi ntshikilelo wa mianakanyo.

Ku vuriwa yini hi loko munhu a twa onge ku kurisa n’wana swi ta n’wi tikela, ngopfungopfu loko khwiri ra kona a a nga ri langutelanga? Xiya xitshembiso lexi Xikwembu xi xi tshembisaka vanhu lava hanyaka hi milawu ya xona, lexi nge: “U ta n’wi endla hi vutshembeki loyi a tshembekeke; munhu la tiyeke emirini la pfumalaka xihoxo, u ta n’wi endla hi ku pfumala xihoxo.” (Pisalema 18:25) Bibele yi tlhela yi ku: “Yehovha u rhandza vululami, naswona a nge va siyi lava tshembekeke vakwe.”—Pisalema 37:28.

“Ripfalo ra vona i mbhoni ya vona, kutani miehleketo ya vona vini, ya va hehla kumbe hambi ku ri ku va yimelela.”Varhoma 2:15.

 Ku vuriwa yini loko ku ri leswaku u tshame u susa khwiri?

LESWI VANHU VA SWI VULAKA

Ruth, manana loyi a kurisaka vana a ri yexe u te: “A ndzi ri ni vana vanharhu naswona a ndzi nga ha ta swi kota ku kurisa n’wana wa vumune. Kambe endzhaku ka loko ndzi suse khwiri, ndzi xiye leswaku ndzi endle nchumu wo biha ngopfu.” * Xana Xikwembu a xi nge n’wi rivaleli hikwalaho ka leswi a swi endleke?

LESWI BIBELE YI SWI VULAKA

Yesu Kreste u te: “Ndzi tele ku ta vitanela vadyohi eku hundzukeni, ku nga ri vanhu lava lulameke.” (Luka 5:32) Hilaha ku fanaka, loko hi titwa nandzu hikwalaho ka xidyoho xo karhi lexi hi xi endleke ivi hi hundzuka hi tlhela hi kombela Xikwembu leswaku xi hi rivalela, xi hi rivalela hi ku ntshunxeka, ku nga khathariseki leswaku xidyoho xa kona i xi kulu ku fikela kwihi. (Esaya 1:18) Pisalema 51:17 yi ri: “Oho Xikwembu, mbilu leyi tshovekeke yi tlhela yi pfotloseka a wu nge yi languteli ehansi.”

Xikwembu xi nyika munhu loyi a kombisaka leswaku wa tisola hikwalaho ka swilo swo biha leswi a swi endleke ripfalo leri baseke ni ku rhula ka mianakanyo loko a khongela eka xona. Vafilipiya 4:6, 7 yi ri: “Tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo.” * Endzhaku ka loko Ruth a hlaye Bibele ni ku khongela eka Xikwembu, u ve ni ku rhula ka mianakanyo. U swi xiyile leswaku Xikwembu xi “ni ndzivalelo wa ntiyiso.”—Pisalema 130:4.

‘Xikwembu a xi hi khomanga hi ku ya hi swidyoho swa hina; naswona a xi hi tiselanga leswi swi hi faneleke hi ku ya hi swihoxo swa hina.’Pisalema 103:10.

^ ndzim. 8 Loko vutomi bya manana kumbe bya n’wana byi ri ekhombyeni, a swi vuli swona leswaku khwiri ri fanele ri susiwa. Loko vatekani va fanele va hlawula exikarhi ka vutomi bya manana ni bya n’wana hi nkarhi wa ku veleka, va fanele va tiendlela xiboho. Kambe ematikweni lama hluvukeke hi tlhelo ra swa vutshunguri, a swi talanga leswaku xiyimo lexi xi va kona.

^ ndzim. 12 Vito ri cinciwile.

^ ndzim. 14 Ntshembo wa ku pfuxiwa ka vafi na wona wu nga endla leswaku munhu a va ni ku rhula ka mianakanyo. Hlaya nhlokomhaka leyi nge “Swivutiso Swa Vahlayi” eka Xihondzo xo Rindza xa April 15, 2009, lexi vulavulaka hi misinya ya milawu ya Bibele, leyi vulavulaka hi ntshembo wa ku pfuxiwa ka vana lava feke va ha ri ekhwirini.