Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 1

“Maswivo! Lexi I Xikwembu Xa Hina”

“Maswivo! Lexi I Xikwembu Xa Hina”

1, 2. (a) Hi swihi swivutiso leswi u nga rhandzaka ku swi vutisa Xikwembu? (b) Xana Muxe u xi vutise yini Xikwembu?

XANA wa tivona u ri karhi u vulavula ni Xikwembu? Swa chavisa ku vona Hosi ya vuako hinkwabyo yi ri karhi yi vulavula na wena! U rhanga hi ku kanakana, kambe, endzhaku wa yi hlamula. Ya ku yingisela, ya angula yi tlhela yi endla leswaku u titwa u ntshunxekile ku yi vutisa hambi ku ri yini leswi u lavaka ku swi tiva. Kutani, a wu ta yi vutisa yini?

2 Khale ka khaleni, a ku ri ni wanuna loyi a a ri exiyin’weni xo tano. Vito rakwe a ku ri Muxe. Kambe, xi nga ku hlamarisa xivutiso lexi a hlawuleke ku xi vutisa Xikwembu. A nga vutisanga nchumu ha yena n’wini, hi vumundzuku byakwe kumbe hi xiyimo xo biha lexi vanhu a va ri eka xona. Ematshan’weni ya sweswo, a a lava ku tiva vito ra Xikwembu. Sweswo swi nga ha ku hlamarisa, hikuva Muxe a a ri tiva vito ra Xikwembu. Kutani, xivutiso xakwe a xi tamele swin’wana swa ntshima. Entiyisweni, xexo a ku ri xivutiso xa nkoka ku tlula swivutiso swin’wana leswi Muxe a a ta va a swi vutisile. Nhlamulo ya xona ya hi khumba hinkwerhu ka hina. Yi nga ku pfuna leswaku u teka goza ra nkoka leswaku u tshinela eka Xikwembu. Njhani? A hi kambisiseni bulo rero ro hlawuleka.

3, 4. Ku endleke yini emahlweni ka ku va Muxe a vulavula ni Xikwembu, naswona va vulavule ha yini?

3 Muxe a a ri ni malembe ya 80 hi vukhale. A a hete malembe ya 40 a hambanisiwe ni varikwavo, ku nga Vaisrayele, lava a va ri mahlonga aEgipta. Siku rin’wana, loko a ri karhi a byisa ntlhambi wa mukon’wana wakwe, u vone xiendlakalo lexi nga tolovelekangiki. A ku ri ni ndzilo exihlahleni xa mitwa, kambe xona a xi nga tshwi. A xi hambeta xi pfurha, xi hatima ku fana ni rivoningo leri nga entshaveni. Muxe u tshinerile leswaku a ta kambela leswi a swi humelela. U fanele a hlamale ngopfu loko a twa rito ri vulavula na yena ri huma endzilweni! Xikwembu xi vulavule na Muxe hi ku tirhisa ntsumi. Naswona, hilaha u nga ha vaka u swi  tiva hakona, kwalaho Xikwembu xi byele Muxe loyi a a ri karhi a kanakana, leswaku a tshika vutomi byakwe lebyo nandziha, kutani a tlhelela aEgipta a ya kutsula Vaisrayele evuhlongeni.—Eksoda 3:1-12.

4 Hi nkarhi wolowo, Muxe a a ta va a vutise Xikwembu xivutiso hambi xihi ni xihi lexi a a ri na xona. Kambe, xiya leswaku u hlawule ku vutisa yini: “A hi nge, ndzi fika eka vana va Israyele ndzi va byela ndzi ku: ‘Xikwembu xa vatata wa n’wina xi ndzi rhume eka n’wina,’ kutani va ku eka mina, ‘I mani vito ra xona?’ Ndzi ta ku yini eka vona?”—Eksoda 3:13.

5, 6. (a) Xivutiso xa Muxe xi hi dyondzisa ntiyiso wihi wo olova, lowu nga wa nkoka? (b) Xana ku endliwe yini xo nyenyetsa hi vito ra Xikwembu? (c) Ha yini swi ri swa nkoka swinene leswi Xikwembu xi paluxeke vito ra xona eka vanhu?

5 Xo sungula, xivutiso xexo xi hi dyondzisa leswaku Xikwembu xi ni vito. A hi fanelanga hi wu tekela ehansi ntiyiso lowu wu nga erivaleni. Kambe vo tala va wu tekela ehansi. Vito ra Xikwembu ri kwamuriwile eka vuhundzuluxeri byo tala bya Tibibele kutani ri siviwa hi swithopo, swo kota lexi nge “Hosi” ni lexi nge “Xikwembu.” Lexi hi xin’wana xa swilo swo biha swinene ni leswi nyenyetsaka ngopfu leswi endliweke hi vukhongeri. I yini lexi u rhangaka u xi endla loko u hlangana ni munhu un’wana? Xana a wu n’wi vutisi vito rakwe? Swi tano ni le mhakeni ya ku tiva Xikwembu. A hi Xikwembu lexi nga riki na vito, lexi nga ekule swinene, lexi hi nga taka hi nga xi tivi kumbe ku xi twisisa. Hambileswi xi nga vonakiki, i munhu, naswona xi ni vito—i Yehovha.

6 Ku tlula kwalaho, loko Xikwembu xi paluxa vito ra xona, ku ni nchumu wun’wana lowukulu ni lowu tsakisaka lowu xi lavaka leswaku hi wu endla. Xi hi rhamba leswaku hi xi tiva. Xi lava leswaku hi endla nhlawulo lowunene ku tlula hinkwayo—ku nga ku tshinela ekusuhi na xona. Kambe Yehovha a nga hi byelanga vito rakwe ntsena u endle ni swin’wana swa nkoka. U tlhele a hi dyondzisa hi munhu loyi ri yimelaka yena.

Leswi Vito Ra Xikwembu Ri Vulaka Swona

7. (a) Xana vito ra Xikwembu ri vula yini? (b) Kahle-kahle i yini lexi Muxe a a lava ku xi tiva loko a vutisa Xikwembu vito ra xona?

7 Yehovha u tihlawulele vito rakwe, vito leri nga ni nhlamuselo  leyi fuweke. Vito leri nge “Yehovha” ri vula leswaku “U Endla Leswaku Swi Va Kona.” Yehovha u tihlawulele vito rakwe, vito leri nga ni nhlamuselo leyi fuweke. Vito leri nge “Yehovha” ri vula leswaku “U Endla Leswaku Swi Va Kona.” U hlawulekile evuakweni hinkwabyo, hikuva hi yena la endleke swilo hinkwaswo naswona u endla leswaku swikongomelo swakwe hinkwaswo swi hetiseka. Mhaka yoleyo hi yoxe ya chavisa. Xana nkoka wa vito rakwe wu n’wi hlamusela tanihi muvumbi ntsena? Swi le rivaleni leswaku Muxe a a lava ku tiva swo tala, a a swi tiva leswaku Yehovha i Muvumbi naswona a a ri tiva vito ra Xikwembu. Phela, vito ra Xikwembu a ri nga ri rintshwa. I khale vanhu va ri karhi va ri tirhisa. Entiyisweni, loko Muxe a vutisa Xikwembu vito ra xona, a a vutisa malunghana ni munhu la yimeriwaka hi vito rero. Handle ko kanakana, a a ku: ‘I yini lexi ndzi nga byelaka vanhu va wena va Israyele ha wena, lexi nga ta aka ripfumelo ra vona eka wena, lexi nga ta va khorwisa leswaku u ta va kutsula hakunene?’

8, 9. (a) Xana Yehovha u xi hlamule njhani xivutiso xa Muxe, naswona i yini lexi hoxeke eka ndlela leyi nhlamulo ya xona yi talaka ku hundzuluxeriwa ha yona? (b) Xana xi vula yini xiga lexi nge, “Ndzi ta tikombisa ndzi ri lexi ndzi nga ta tikombisa ndzi ri xona”?

8 Yehovha u angurile kutani a paluxa vumunhu byakwe lebyi tsakisaka, ku nga nchumu lowu fambisanaka ni nhlamuselo ya vito rakwe. U byele Muxe a ku: “Ndzi ta tikombisa ndzi ri lexi ndzi nga ta tikombisa ndzi ri xona.” (Eksoda 3:14) Vuhundzuluxeri byo tala bya Bibele byi hlayekisa xileswi: “Ndzi lexi ndzi nga xona.” Kambe mavekelo ya vurhon’wana ma kombisa leswaku Xikwembu a a xi nga tiyisekisi ntsena leswaku xi kona. Ematshan’weni ya sweswo, Yehovha a a dyondzisa Muxe—na hina hinkwerhu—leswaku A a ta ‘tikombisa a ri lexi a nga xona,’ kumbe a hlawula ku tiendla xin’wana ni xin’wana lexi a faneleke ku va xona leswaku a hetisisa switshembiso swakwe. Vuhundzuluxeri bya J. B. Rotherham byi hundzuluxela ndzimana leyi hi ku kongoma, byi ku: “Ndzi Ta Va hambi ku ri yini lexi ndzi tsakelaka ku va xona.” Mutivi un’wana wa Xiheveru xa le Bibeleni u hlamusela xiga lexi hi ndlela leyi: “Eka xiyimo xin’wana ni xin’wana . . . , Xikwembu ‘xi ta’ nghenelela xi lunghisa timhaka.”

9 Xana sweswo a swi vula yini eka Vaisrayele? Ku nga khathariseki xihinga hambi xi ri xihi lexi a va ta langutana na xona, ku  nga khathariseki leswaku xiyimo lexi va tikumaka va ri eka xona xi tika ku fikela kwihi, Yehovha a a ta va nchumu wun’wana ni wun’wana lowu lavekaka leswaku a va kutsula evuhlongeni kutani a va nghenisa eTikweni ra Xitshembiso. Kunene, vito leri a ri khutaza munhu leswaku a tshembela eka Xikwembu. Ri nga hi endlela leswi fanaka na hina namuntlha. (Pisalema 9:10) Ha yini?

10, 11. Xana vito ra Yehovha ri hi rhamba njhani leswaku hi ehleketa ha yena tanihi Tatana lonene ngopfu, la pfumelelanaka ni swiyimo? Kombisa.

10 Hi xikombiso: Vatswari va swi tiva leswaku va fanele va cinca-cinca ni ku pfumelelana ni swiyimo leswaku va khathalela vana va vona. Hi siku rin’we, mutswari a nga ha boheka ku va muongori, musweki, mudyondzisi, mutshinyi, muavanyisi ni swin’wana swo tala. Vo tala va titwa va tshikilelekile loko va ehleketa hi mintirho yo hambana-hambana leyi va faneleke va yi endla. Va swi xiya leswaku vana va vona va va tshemba swinene, a va kanakani leswaku Tatana kumbe Manana a nga va chavelela, a nga herisa timholovo hinkwato, a nga lunghisa thoyi hambi yi ri yihi leyi tshovekeke, ni ku hlamula xivutiso xin’wana ni xin’wana lexi va xi ehleketaka emiehleketweni ya vona leyi tshamelaka ku lava ku tiva swo karhi. Vatswari van’wana va tivona va nga ri nchumu, minkarhi yin’wana va hela matimba hikwalaho ko tsandzeka ku endla swo karhi. Va titwa va nga faneleki nikatsongo ku endla mintirho yo tala leyi va faneleke va yi endla.

11 Yehovha na yena i mutswari la nga ni rirhandzu. Kambe, loko a tirhisa milawu yakwe leyi hetisekeke, ku hava lexi a nga tsandzekaka ku va xona leswaku a khathalela vana vakwe va laha misaveni hi ndlela leyinene ngopfu. Hikwalaho vito rakwe leri nge Yehovha, ra hi rhamba leswaku hi ehleketa ha yena tanihi Tatana lonene ngopfu. (Yakobo 1:17) Muxe swin’we ni Vaisrayele lavan’wana hinkwavo vo tshembeka va swi vone hi ku hatlisa leswaku Yehovha u hanya hi ku pfumelelana ni vito rakwe. Va hlalele va hlamarile loko a va Mukongomisi wa Nyimpi la nga hluriwiki, N’wini wa ntumbuluko hinkwawo, Munyiki wa Nawu loyi ku nga riki na munhu la fanaka na yena, Muavanyisi, Mupfapfarhuti, Munyiki wa swakudya ni mati, Muhlayisi wa swiambalo ni tintanghu leswaku swi nga onhaki—ni swin’wana swo tala.

12. Xana langutelo ra Faro ha Yehovha ri hambane njhani ni leriya ra Muxe?

 12 Xisweswo, Xikwembu xi endle leswaku vito ra xona ri tiviwa, xi paluxe swilo swo tsakisa malunghana ni munhu loyi a yimeriwaka hi vito rero naswona xi tlhele xi swi kombisa leswaku leswi xi swi vulaka I ntiyiso. Handle ko kanakana, Xikwembu xi lava leswaku hi xi tiva. Xana hi titwisa ku yini? Muxe a a lava ku tiva Xikwembu. Ku navela koloko lokukulu ku kongomise ndlela leyi Muxe a a hanya ha yona ni ku n’wi endla a tshinela eka Tata wakwe wa le tilweni. (Tinhlayo 12:6-8; Vaheveru 11:27) Lexi twisaka ku vava, a va talanga vanhu va le nkarhini wa Muxe lava a va ri ni ku navela loku fanaka. Loko Muxe a boxa vito leri nge Yehovha eka Faro, mufumi yoloye wa le Egipta la tikurisaka u vutise hi vukarhi a ku: “I mani Yehovha?” (Eksoda 5:2) Faro a a nga lavi ku tiva nchumu hi Yehovha. Ku ri na sweswo, u nyefule Xikwembu xa Israyele tanihi lexi nga riki xa nkoka kumbe lexi nga pfuniki nchumu. Vonelo ro tano ro va tshamela maxelo namuntlha. Ri sivela vanhu leswaku va nga wu voni ntiyiso wa nkoka ku tlula hinkwayo—ku nga leswaku Yehovha i Hosi leyi Lawulaka.

Yehovha Hosi Leyi Lawulaka

13, 14. (a) Ha yini Yehovha a nyikiwe swithopo swo tala eBibeleni, naswona hi swihi swin’wana swa swona? (Vona bokisi leri nge “ Swin’wana Swa Swithopo Swa Yehovha.”) (b) Ha yini ku ri Yehovha ntsena la faneriwaka hi ku vitaniwa “Hosi leyi Lawulaka”?

13 Yehovha u pfumelelana ni swiyimo hakunene, lerova swi fanerile leswi a nga ni swithopo swo hambana-hambana eMatsalweni. Swithopo leswi a hi swa nkoka ku tlula vito rakwe; kambe swi hi dyondzisa swo tala malunghana ni leswi vito rakwe ri swi yimelaka. Hi xikombiso, u vitaniwa “Yehovha, Hosi leyi Lawulaka.” (2 Samuwele 7:22) Xithopo xexo lexi tlakukeke, lexi humelelaka minkarhi yo tala eBibeleni, xi hi hlamusela xikhundla xa Yehovha. Yena a ri swakwe u ni mfanelo ya ku va Mufumi wa vuako hinkwabyo. Xiya xivangelo xa kona.

14 Leswi Yehovha a nga Mutumbuluxi, u hlawulekile. Nhlavutelo 4:11 yi ri: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” A ku na munhu ni un’we  loyi a nga faneriwaka hi marito lawa ya vukulukumba. Nchumu wun’wana ni wun’wana lowu nga evuakweni wu tumbuluxiwe hi Yehovha! Handle ko kanakana, Yehovha u faneriwa hi ku dzunisiwa, hi matimba ni hi ku vangama hikwalaho ka leswi a nga Hosi leyi Lawulaka tlhelo Mutumbuluxi wa swilo hinkwaswo.

15. Ha yini Yehovha a vuriwa “Hosi leyi nga riki na makumu”?

15 Xithopo xin’wana lexi tirhaka ntsena eka Yehovha hi lexi nge “Hosi leyi nga riki na makumu.” (1 Timotiya 1:17; Nhlavutelo 15:3) Xana leswi swi vula yini? Mianakanyo ya hina leyi nga nyawuliki a yi nge swi koti ku swi twisisa hi ku helela, kambe Yehovha a nga na masungulo naswona a nga na makumu. Pisalema 90:2 yi ri: “U Xikwembu ku suka enkarhini lowu nga riki na makumu ku ya enkarhini lowu nga riki na makumu.” Hikwalaho Yehovha a nga na masungulo; a a ri kona hilaha ku nga riki na masungulo. Swi fanerile ku va a vuriwa “Nkulukumba wa Masiku,”—u ve kona hilaha ku nga riki na makumu ku nga si va na munhu kumbe nchumu evuakweni hinkwabyo! (Daniyele 7:9, 13, 22) I mani loyi a nga kanakanaka mfanelo yakwe ya ku va Hosi leyi Lawulaka?

16, 17. (a) Ha yini hi tsandzeka ku vona Yehovha, naswona ha yini sweswo swi nga fanelanga swi hi hlamarisa? (b) Hikwalaho ka yini hi nga vulaka leswaku Yehovha i wa xiviri ku tlula nchumu hambi wu ri wihi lowu hi nga wu vonaka kumbe hi nga wu khumbaka?

16 Kambe, van’wana va yi kanakana mfanelo yoleyo, ku fana na Faro. Xiphiqo xin’wana hi leswi vanhu lava nga hetisekangiki va nga vamakholwa hi ku vona. A hi nge swi koti ku vona Hosi leyi Lawulaka. I xivumbiwa xa moya, vanhu va nyama a va nge swi koti ku yi vona. (Yohane 4:24) Phela, loko munhu wa nyama ni ngati a a ta swi kota ku vona Yehovha Xikwembu, a a ta fa. Yehovha hi byakwe u byele Muxe a ku: “A swi koteki leswaku u vona xikandza xa mina, hikuva a ku na munhu la nga ndzi vonaka ivi a hanya.”—Eksoda 33:20; Yohane 1:18.

17 Sweswo a swi fanelanga swi hi hlamarisa. Muxe u vone xiphemu ntsena xa ku vangama ka Yehovha, entiyisweni, a ko va ntsumi. Ku ve ni vuyelo byihi? Mombo wa Muxe a wa ha “humesa miseve” hambiloko se ku hundze nkarhinyana a yi vonile. Vaisrayele a va chava hambi ku ri ku languta Muxe exikandzeni hi ku kongoma. (Eksoda 33:21-23; 34:5-7, 29, 30) Hakunene a nga kona munhu wa nyama la nga langutana ni Hosi leyi Lawulaka eku vangameni  ka yona hinkwako! Xana leswi swi vula leswaku a hi ya xiviri, a yi fani na nchumu lowu hi nga wu vonaka kumbe hi nga wu khumbaka? Doo, ana ha pfumela leswaku swi kona swilo swo tala leswi hi nga kotiki ku swi vona—hi xikombiso, moya, magandlati ya xiya-ni-moya ni miehleketo. Tlhandlakambirhi, Yehovha a nga na makumu, ku hundza ka nkarhi a ku n’wi khumbi helo, hambi ku ri magidi ya timiliyoni ta malembe! Xisweswo, i wa xiviri ku tlula nchumu wun’wana ni wun’wana lowu hi nga wu khumbaka kumbe lowu hi nga wu vonaka, hikuva swilo leswi hi swi vonaka swi hundzeriwa hi nkarhi, swa kurha ni ku bola. (Matewu 6:19) Kambe, xana hi fanele hi n’wi teka a ri matimba lama nga twisisekiki, naswona a nga ri munhu wa xiviri, kumbe a ri Mutumbuluxi la nga ni vutianakanyi? A hi voneni.

Xikwembu Lexi Nga Ni Vumunhu

18. Xana Ezekiyele u kombisiwe xivono xihi, naswona swikandza swa mune swa ‘swivumbiwa leswi hanyaka’ leswi nga ekusuhi na Yehovha swi fanekisela yini?

18 Hambileswi hi nga taka hi nga swi koti ku vona Xikwembu, ku ni tindzimana leti tsakisaka eBibeleni leti hi pfunaka leswaku hi hlometela etilweni. Xikombiso xin’wana, i ndzima yo sungula ya Ezekiyele. Ezekiyele u nyikiwe xivono xa nhlengeletano ya Yehovha ya le tilweni, leyi a yi voneke tanihi kalichi leyikulu ya le tilweni. Lexi tsakisaka ngopfu i nhlamuselo ya swivumbiwa swa moya leswi nga ni matimba, leswi rhendzeleke Yehovha. (Ezekiyele 1:4-10) ‘Swivumbiwa leswi swi hanyaka’ swi le kusuhi swinene na Yehovha, naswona swivumbeko swa swona swi hi byela swo karhi swa nkoka mayelana ni Xikwembu lexi swi tirhelaka xona. Ha xin’we xi ni swikandza swa mune—xikandza xa nkunzi, xa nghala, xa gama ni xa munhu. Handle ko kanakana leswi swi fanekisela timfanelo ta mune letikulu ta vumunhu bya Yehovha.—Nhlavutelo 4:6-8, 10.

19. Hi yihi mfanelo leyi fanekiseriwaka hi (a) xikandza xa nkunzi? (b) xikandza xa nghala? (c) xikandza xa gama? (d) xikandza xa munhu?

19 EBibeleni, hakanyingi nkunzi yi fanekisela matimba, naswona swa fanela hakunene, hikuva i xifuwo lexi nga ni matimba swinene. Nghala, yona hakanyingi yi fanekisela vululami, hikuva vululami bya xiviri byi lava xivindzi, ku nga mfanelo leyi tinghala ti  tivekaka ha yona. Magama ma tiveka ngopfu hi matihlo ya wona yo kariha, ma vona hambi ku ri swilo leswitsongo leswi nga ekule swinene. Hikwalaho xikandza xa gama xi byi fanekisela kahle vutlhari bya Xikwembu byo vona ekule. Ku vuriwa yini hi xikandza xa munhu? Phela, munhu u endliwe hi xifaniso xa Xikwembu, u hlawulekile hi vuswikoti byakwe byo kombisa mfanelo leyikulu ya Xikwembu—ku nga rirhandzu. (Genesa 1:26) Timfanelo leti ta vumunhu bya Yehovha—ku nga matimba, vululami, vutlhari ni rirhandzu—ti kandziyisiwa ngopfu eMatsalweni lerova ku nga ha kombeteriwa eka tona tanihi timfanelo letikulu ta Xikwembu.

20. Xana hi fanele hi karhateka hileswaku vumunhu bya Yehovha swi nga ha endleka byi cincile, naswona ha yini u hlamula tano?

20 Xana hi fanele hi karhateka hi ku anakanya leswaku swi nga ha endleka Xikwembu xi cincile emalembeni ya magidi, hi mpfhuka xi hlamuseriwile eBibeleni? Doo, vumunhu bya Xikwembu a byi cinci. Xa hi byela: “Hi mina Yehovha; a ndzi hundzukanga.” (Malakiya 3:6) Ematshan’weni ya leswaku a tshamela ku cinca-cinca, Yehovha u tikombise a ri Tatana la fanelekaka hi ndlela leyi a langutanaka ni xiyimo xin’wana ni xin’wana ha yona. U tirhisa timfanelo ta vumunhu byakwe hi ku ya hi xiyimo xa kona. Eka timfanelo leti ta mune, leyikulu eka tona hinkwato i rirhandzu. Yi vonaka eka hinkwaswo leswi Xikwembu xi swi endlaka. Xi tirhisa matimba ya xona, vululami bya xona ni vutlhari bya xona  hi ndlela ya rirhandzu. Entiyisweni, Bibele yi vula swin’wana leswikulu malunghana ni Xikwembu ni mfanelo leyi. Yi ri: “Xikwembu i rirhandzu.” (1 Yohane 4:8) Xiya leswaku a yi vuli leswaku Xikwembu xi ni rirhandzu, kambe yi ri, Xikwembu i rirhandzu. Rirhandzu, ku nga vumunhu bya xona, xa ri tirhisa eka hinkwaswo leswi xi swi endlaka.

“Maswivo! Lexi I Xikwembu Xa Hina”

21. Xana hi ta titwa njhani loko hi ya hi ti tiva ku antswa timfanelo ta Yehovha?

21 Xana u tshama u vona n’wana loko a komba vanghana tata wakwe kutani a vula hi ntsako ni hi ku tinyungubyisa lokukulu a ku, “Loyi i tatana”? Vagandzeri va Xikwembu va ni xivangelo lexi twalaka xo titwa hi ndlela leyi fanaka ha Yehovha. Bibele yi vulavula hi nkarhi lowu vanhu vo tshembeka va nga ta vula ha wona va ku: “Maswivo! Lexi i Xikwembu xa hina.” (Esaya 25:8, 9) Loko u ya u ti twisisa kahle timfanelo ta Yehovha, u ta ya u swi vona leswaku u ni Tatana lonene ku tlula hinkwavo.

22, 23. Xana Bibele yi n’wi hlamusela njhani Tata wa hina wa le tilweni, naswona hi swi tivisa ku yini leswaku u lava hi va ekusuhi na yena?

22 Tatana loyi a hi munhu la nga riki na vunghana, la nga khathaliki kumbe la nga ekule—hambileswi vanhu van’wana lava nghenaka kereke lava hisekelaka etlhelo swin’we ni vativi va filosofi va dyondziseke sweswo. A hi nga ta kokeleka eka Xikwembu lexi nga riki na vunghana naswona Bibele a yi n’wi hlamuseli hi ndlela yoleyo Tata wa hina la nga ni rirhandzu. Ematshan’weni ya sweswo, yi n’wi vitana “Xikwembu lexi tsakeke.” (1 Timotiya 1:11) Ku ni leswi n’wi hlundzukisaka ni leswi a kombisaka musa eka swona. Wa “vaviseka embilwini yakwe” loko swivumbiwa swakwe leswo tlhariha swi tlula milawu leyi a swi nyikeke yona leswaku yi swi pfuna. (Genesa 6:6; Pisalema 78:41) Kambe loko hi endla hi ndlela ya vutlhari hi ku landza Rito ra yena, hi “tsakisa mbilu” yakwe.—Swivuriso 27:11.

23 Tata wa hina u lava leswaku hi va ekusuhi na yena. Rito rakwe ri hi khutaza leswaku hi n’wi “ambamba kutani [hi n’wi] kuma hakunene, hambileswi, entiyisweni, [a] nga riki kule ngopfu ni un’wana ni un’wana wa hina.” (Mintirho 17:27) Kutani, xana swi nga koteka leswaku vanhu va nyama va tshinela ekusuhi ni Hosi leyi Lawulaka ya vuako hinkwabyo?