Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 19

“Vutlhari Bya Xikwembu Bya Xihundla Xo Kwetsima”

“Vutlhari Bya Xikwembu Bya Xihundla Xo Kwetsima”

1, 2. Hi xihi “xihundla xo kwetsima” lexi faneleke xi hi tsakisa naswona ha yini?

SWIHUNDLA! Tanihi leswi swi nyanyulaka, swi tsakisaka ni ku hlamarisa, hakanyingi vanhu swa va tikela ku fa na swona. Hambiswiritano, Bibele yi ri: “Ku vangama ka Xikwembu i ku hlayisa mhaka yi ri xihundla.” (Swivuriso 25:2) Ina, leswi Yehovha a nga Mufumi ni Muvumbi wa Vuako Hinkwabyo, u ni mfanelo yo hlayisa swilo swin’wana swi ri xihundla eka vanhu, kukondza ku fika nkarhi wa yena wa ku swi paluxa.

2 Hambiswiritano, ku ni xihundla lexi tsakisaka, lexi nyanyulaka lexi Yehovha a xi paluxeke eRitweni rakwe. Xi vuriwa “xihundla xo kwetsima xa ku rhandza ka [Xikwembu].” (Vaefesa 1:9) Ku xi tiva ka hina a swi nge hi nyanyuli ntsena, kambe ku ta hi yisa eku ponisiweni naswona ku ta hi endla hi byi twisisanyana vutlhari bya Yehovha lebyi nga pimekiki.

Xi Paluxiwa Hakatsongo-tsongo

3, 4. Xana vuprofeta lebyi tsariweke eka Genesa 3:15 byi nyikele ntshembo hi ndlela yihi naswona hi xihi xihundla kumbe “xihundla xo kwetsima” lexi a byi ri na xona?

3 Loko Adamu na Evha va dyoha, swi nga ha va swi vonake onge xikongomelo xa Yehovha xa leswaku misava ya paradeyisi yi akiwa hi vanhu lava hetisekeke, xi kavanyetiwe hi ku helela. Kambe Xikwembu xi vulavule hi xiphiqo lexi ta ha suka. Xi te: “Ndzi ta veka vulala exikarhi ka wena [nyoka] ni wansati ni le xikarhi ka mbewu ya wena ni mbewu ya yena. Yi ta ku pfotlosa nhloko kutani wena u ta yi luma xirhendze.”—Genesa 3:15.

4 Lawa a ku ri marito lawa swi tikaka ku ma twisisa. Xana a ku ri mani wansati loyi? Xana nyoka a ku ri mani? Xana “mbewu” leyi nga ta pfotlosa nhloko ya nyoka a ku ri mani? Adamu na Evha a va nga swi tivi. Hambiswiritano, Rito ra Xikwembu ri nyike ntshembo eka vana vahi ni vahi va mpatswa lowu, lowu nga  tshembekangiki. Vululami hi byona a byi ta hlula. Xikongomelo xa Yehovha a xi ta hetiseka. Kambe a xi ta hetiseka njhani? Aha, xexo a ku ri xihundla! Bibele yi xi vitana “vutlhari bya Xikwembu bya xihundla xo kwetsima, ku nga vutlhari lebyi fihliweke.”—1 Vakorinto 2:7.

5. Kombisa leswaku ha yini Yehovha a xi paluxe hakatsongo-tsongo xihundla xa yena.

5 Leswi a nga “Muhlavuteri wa swihundla,” Yehovha u ta hetelela a byi paluxile vuxokoxoko lebyi lavekaka malunghana ni ku hetiseka ka xihundla lexi. (Daniyele 2:28) Kambe sweswo u ta swi endla hakatsongo-tsongo. Hi xikombiso, hi nga ha ehleketa hi ndlela leyi tatana la nga ni rirhandzu a nga ha hlamulaka ha yona loko xijahatana xa yena xi n’wi vutisa xi ku, “Tatana, xana ndzi huma kwihi?” Tatana la nga ni vutlhari u nyika xijahetana rungula leri xi nga ta ri twisisa hi ku olova. Loko xijahatana xi ri nkarhi xi kula, tatana u xi byela swo tala. Hilaha ku fanaka, Yehovha wa wu tiva nkarhi lowu ha wona vanhu vakwe swi nga ta va olovela ku twisisa ku paluxiwa ka ku rhandza ka yena, swin’we ni xikongomelo xakwe.—Swivuriso 4:18; Daniyele 12:4.

6. (a) Xana ntwanano wu tirha yini? (b) Ha yini swi hlamarisa leswi Yehovha a endlaka mintwanano ni vanhu?

6 Xana Yehovha u xi hlavutele njhani? U tirhise ntlhandlamano wa mintwanano leswaku a paluxa swilo swo tala. Kumbexana na wena u tshame u endla ntwanano wo karhi—wu nga ha va wu ri wa ku xava yindlu, wo lomba mali kumbe ku yi lombisa. Ntwanano wo tano wu ni xitiyisekiso xa le nawini xa leswaku leswi mi twananeke swona swi ta hetiseka. Kambe ha yini swi kala swi lava leswaku Yehovha a endla ntwanano ni vanhu, ximfumo? Handle ko kanakana, rito ra yena ri enerile ku va xitiyisekiso xa switshembiso swa yena. Sweswo i ntiyiso kambe minkarhi yo tala Xikwembu xi tiyisekise rito ra xona hi ku endla mintwanano ya le nawini. Mintwanano leyi, leyi tiyisekisiweke, yi endla leswaku hina vanhu lava nga hetisekangiki hi tiyiseka swinene hi switshembiso swa Yehovha.—Vaheveru 6:16-18.

 Ntwanano Na Abrahama

7, 8. (a) Hi wihi ntwanano lowu Yehovha a wu endleke na Abrahama, naswona swi endle xihundla xo kwetsima xi twisiseka hi ndlela yihi? (b) Xana Yehovha u ye emahlweni a paluxa rixaka ra Mbewu leyi tshembisiweke hi ndlela yihi?

7 Endzhaku ka malembe yo tlula magidi mambirhi ku sukela loko munhu a hlongoriwile eParadeyisini, Yehovha u byele Abrahama, nandza wakwe wo tshembeka a ku: “Ndzi andzisa mbewu ya wena ku fana ni tinyeleti ta matilo. . . . Tinxaka hinkwato ta misava ti ta tikatekisa hi mbewu ya wena hikwalaho ka leswi u yingiseke rito ra mina.” (Genesa 22:17, 18) Lexi a ku nga ri xitshembiso ntsena; Yehovha u xi endle xi va ntwanano wa le nawini a tlhela a hlambanya hi xihlambanyo xo tiya. (Genesa 17:1, 2; Vaheveru 6:13-15) Swa hlamarisa swinene ku vona leswaku Hosi ya Vuako Hinkwabyo yi endle ntwanano wo katekisa vanhu!

“Ndzi [ta] andzisa mbewu ya wena ku fana ni tinyeleti ta matilo”

8 Ntwanano wa Abrahama wu paluxe leswaku Mbewu leyi tshembisiweke yi ta ta hi xivumbeko xa munhu, naswona u ta va wa rixaka ra Abrahama. Xana a a yi ta va mani? Hi ku famba ka nkarhi, Yehovha u paluxe leswaku eka vana va Abrahama, Isaka hi yena a nga ta va kokwana-xinguwe wa Mbewu leyi. Eka vana va Isaka, ku hlawuriwe Yakobe. (Genesa 21:12; 28:13, 14) Malunghana ni un’wana wa vana va yena va-12, endzhakunyana Yakobe u vule vuprofeta lebyi: “Nhonga ya vuhosi a yi nge hambukisiwi eka Yuda hambi ku ri nhonga ya ndhuna emilengeni yakwe, kukondza ku fika Xilo [“Loyi Yi Nga Ya Yena”]; naswona vanhu va ta yingisa yena.” (Genesa 49:10) Sweswi se a a swi tiveka leswaku Mbewu yi ta va hosi, leyi nga ya rixaka ra Yuda!

Ntwanano Na Israyele

9, 10. (a) Hi wihi ntwanano lowu Yehovha a wu endleke ni tiko ra Israyele, naswona ntwanano lowu wu va sirhelele njhani? (b) Xana Nawu wu swi kombise njhani leswaku vanhu va lava nkutsulo?

9 Hi 1513 B.C.E., Yehovha u endle lunghiselelo ra leswaku xihundla xo kwetsima xi ya emahlweni xi paluxiwa. U endle ntwanano ni vatukulu va Abrahama, ku nga tiko ra Israyele. Hambileswi sweswi wu nga ha tirhiki, ntwanano lowu wa Nawu wa Muxe, a wu ri xiphemu lexikulu xa xikongomelo xa Yehovha xo tisa Mbewu leyi tshembisiweke. Njhani? Xiya tindlela tinharhu. Yo sungula, Nawu a wu fana ni rirhangu ro sirhelela. (Vaefesa 2:14) Milawu  ya wona a yi endla leswaku ku va ni rihlampfu exikarhi ka Muyuda ni wa Matiko. Xisweswo Nawu wu endle leswaku rixaka ra Mbewu leyi tshembisiweke ri tshama ri ri kona. Hikwalaho ka nsirhelelo wo tano, rixaka leri a ra ha ri kona, loko nkarhi lowu vekiweke wa Xikwembu wu fika, wa leswaku Mesiya a velekiwa erixakeni ra Yuda.

10 Ya vumbirhi, Nawu wu swi kombise hi ndlela leyi nga kanakanisiki leswaku munhu u lava nkutsulo. Nawu lowu hetisekeke, wu swi veke erivaleni leswaku vanhu lava nga ni xidyoho a va nge swi koti ku wu namarhela hi laha ku hetisekeke. Xisweswo wu endle leswaku “ku tlula nawu ku kombisiwa, kukondza ku fika mbewu leyi xitshembiso xi endliweke eka yona.” (Vagalatiya 3:19) Hi ku tirhisa magandzelo ya swiharhi, Nawu wu endle leswaku munhu a rivaleriwa swidyoho swa xinkarhana. Tanihi leswi “swi [nga] koteki[ki] leswaku ngati ya tinkunzi ni ya timbuti yi susa swidyoho,” hilaha Pawulo a tsaleke ha kona, magandzelo lawa a ma fanekisela ntsena gandzelo ra nkutsulo ra Kreste. (Vaheveru 10:1-4) Kutani, eka Vayuda lava tshembekeke, ntwanano wolowo wu hundzuke “mukongomisi . . . la yisaka eka Kreste.”—Vagalatiya 3:24.

11. Hi wihi ntshembo lowu vangamaka lowu ntwanano wa Nawu wu wu nyikeke tiko ra Israyele, naswona ha yini tiko leri ri lahlekeriwe hi wona?

11 Ya vunharhu, ntwanano wolowo wu nyike tiko ra Israyele ntshembo lowu vangamaka. Yehovha u va byele leswaku loko vo kombisa ku tshembeka eka ntwanano lowu, va ta va “mfumo wa vaprista ni tiko ro kwetsima.” (Eksoda 19:5, 6) Eka Israyele wa nyama ku hetelele ku hume swirho swo sungula swa mfumo wa le tilweni, wa vaprista. Hambiswiritano, tiko hinkwaro ra Israyele ri xandzukele ntwanano wa Nawu, ri ala Mbewu ya Vumesiya, kutani ri lahlekeriwa hi ntshembo lowu. Kutani ke, i vamani lava a va ta nghenisiwa, leswaku mfumo lowu wa vaprista wu helela? Naswona xana tiko rero leri katekisiweke a ri ta hlangana njhani ni Mbewu leyi tshembisiweke? Timhaka leti ta xihundla xo kwetsima a ti ta paluxiwa hi nkarhi wa Xikwembu lowu vekiweke.

Ntwanano Wa Mfumo Wa Davhida

12. Hi wihi ntwanano lowu Yehovha a wu endleke na Davhida, naswona wu swi endle njhani leswaku xihundla xo kwetsima xa Xikwembu xi twisiseka?

12 Eka lembe-xidzana ra vu-11 B.C.E., Yehovha u tlhele a endla  xihundla xo kwetsima leswaku xi twisiseka loko a endla ntwanano wun’wana. U tshembise Hosi Davhida wo tshembeka a ku: “Kunene ndzi ta yimisa mbewu ya wena endzhaku ka wena, . . . hakunene ndzi ta wu simeka wu tiya mfumo wa yona. . . . Kunene ndzi ta simeka xiluvelo xa mfumo wa yona xi tiya hilaha ku nga riki na makumu.” (2 Samuwele 7:12, 13; Pisalema 89:3) Sweswi rixaka ra Mbewu leyi tshembisiweke ri fike endyangwini wa Davhida. Kambe, xana munhu wa nyama a nga swi kota ku fuma “hilaha ku nga riki na makumu”? (Pisalema 89:20, 29, 34-36) Naswona xana hosi yo tano leyi nga munhu wa nyama yi nga swi kota ku ponisa vanhu eka xidyoho ni rifu?

13, 14. (a) Hi ku ya hi Pisalema 110, hi xihi xitshembiso lexi Yehovha a xi endleke eka Hosi leyi totiweke? (b) Hi swihi swin’wana leswi paluxiweke mayelana ni Mbewu leya ha taka hi ku tirhisa vaprofeta va Yehovha?

13 Davhida u huhuteriwe ku tsala a ku: “Rito ra Yehovha eka Hosi ya mina ri ri: ‘Tshama evokweni ra mina ra xinene ku fikela loko ndzi veka valala va wena va va vunavelo bya milenge ya wena.’ Yehovha u hlambanyile (naswona a nge tisoli): ‘U muprista hilaha ku nga riki na makumu hi ku ya hi mukhuva wa Melkisedeke!’” (Pisalema 110:1, 4) Marito ya Davhida a ma kombetela hi ku kongoma eka Mbewu leyi tshembisiweke kumbe Mesiya. (Mintirho 2:35, 36) Hosi leyi yi ta fuma yi ri etilweni, “evokweni . . . ra xinene” ra Yehovha, yi nga ri eYerusalema. Leswi swi ta yi endla yi va ni vulawuri ehenhla ka misava hinkwayo, ku nga ri ehenhla ka tiko ra Israyele ntsena. (Pisalema 2:6-8) Laha ku hlamuseriwe ni swin’wana leswi engetelekeke. Tsundzuka leswaku Yehovha u vulavule hi xihlambanyo lexinene xa leswaku Mesiya u ta va “muprista . . . hi ku ya hi mukhuva wa Melkisedeke.” Ku fana na Melkisedeke, loyi a tirheke tanihi hosi tlhelo muprista esikwini ra Abrahama, Mbewu leyi ya ha taka yi vekiwe hi Xikwembu hi ku kongoma leswaku yi tirha tanihi Hosi ni Muprista!—Genesa 14:17-20.

14 Emalembeni lama hundzeke, Yehovha u tirhise vaprofeta vakwe leswaku a ya emahlweni a paluxa xihundla xa yena xo kwetsima. Hi xikombiso, Esaya, u paluxe leswaku Mbewu a yi ta fa rifu ra gandzelo. (Esaya 53:3-12) Mikiya u profete hi ndhawu leyi Mesiya a nga ta velekeriwa eka yona. (Mikiya 5:2) Daniyele na yena  u profete hi nkarhi wa ku velekiwa ka Mbewu ni ku fa ka yona.—Daniyele 9:24-27.

Xihundla Xo Kwetsima Xi Paluxiwile!

15, 16. (a) Swi tise ku yini leswaku N’wana wa Yehovha a ‘huma eka wansati’? (b) Hi yihi ndzhaka leyi Yesu a yi kumeke eka vatswari va yena va nyama, naswona a ku ri rini loko a va Mbewu leyi tshembisiweke?

15 Ndlela leyi vuprofeta a byi ta hetiseka ha yona yi tshame yi ri xihundla ku fikela loko Mbewu hi yoxe yi humelela. Vagalatiya 4:4 yi ri: “Loko nkarhi lowu pimiweke wu hela, Xikwembu xi rhume N’wana wa xona, loyi a humeke eka wansati.” Hi lembe ra 2 B.C.E., ntsumi yi byele nhwana wa Muyuda loyi vito ra yena ku nga Mariya yi ku: “Waswivo! u ta tika embelekweni wa wena, u ta veleka n’wana wa jaha, vito ra yena u ta n’wi thya Yesu. Yena u ta va lonkulu naswona u ta vuriwa N’wana wa La nge Henhla-henhla; Yehovha Xikwembu u ta n’wi nyika xiluvelo xa Davhida tata wakwe . . . Moya lowo kwetsima wu ta ta ehenhla ka wena, naswona matimba ya La nge Henhla-henhla ma ta ku funengeta. Hikwalaho ka sweswo lexi nga ta velekiwa na xona xi ta vuriwa lexo kwetsima, N’wana wa Xikwembu.”—Luka 1:31, 32, 35.

16 Hi ku famba ka nkarhi, Yehovha u suse vutomi bya N’wana wa yena etilweni a byi nghenisa embelekweni wa Mariya, ku endlela leswaku a ta huma eka wansati. Mariya a a ri wansati loyi a nga hetisekangiki. Kambe Yesu a nga tluleriwanga hi ku nga hetiseki ka yena, hikuva a a ri “N’wana wa Xikwembu.” Hi nkarhi lowu fanaka, leswi vatswari va Yesu va nyama va nga vatukulu va Davhida va endle leswaku hi ku velekiwa ni hi nawu A va ni mfanelo ya ku va mudyandzhaka wa Davhida. (Mintirho 13:22, 23) Loko Yesu a khuvuriwa hi 29 C.E., Yehovha u n’wi tote hi moya lowo kwetsima kutani a ku: “Loyi i N’wananga, la rhandzekaka, loyi ndzi n’wi amukeleke.” (Matewu 3:16, 17) Eku heteleleni Mbewu yi humelerile! (Vagalatiya 3:16) A ku ri nkarhi wa leswaku ku paluxiwa swo tala mayelana ni xihundla xo kwetsima.—2 Timotiya 1:10.

17. Swi endliwe njhani leswaku Genesa 3:15 yi twisiseka?

17 Hi nkarhi va vutirheli bya yena, Yesu u hlamusele leswaku nyoka leyi nga eka Genesa 3:15 i Sathana naswona mbewu ya nyoka i valandzeri va Sathana. (Matewu 23:33; Yohane 8:44)  Endzhakunyana, ku paluxiwe leswaku lava hinkwavo a va ta pfotloseriwa makumu. (Nhlavutelo 20:1-3, 10, 15) Naswona wansati u hlamuseriwe tanihi “Yerusalema wa le henhla,” ku nga nhlengeletano ya Yehovha ya le tilweni ya swivumbiwa swa moya, leyi fanaka ni wansati. *Vagalatiya 4:26; Nhlavutelo 12:1-6.

Ntwanano Lowuntshwa

18. Hi xihi xikongomelo xa “ntwanano lowuntshwa”?

18 Kumbexana nhlavutelo leyi xiyekaka ngopfu ya hinkwaswo yi humelele hi vusiku bya le mahlweni ka rifu ra Yesu, loko a byela vadyondzisiwa va yena vo tshembeka hi “ntwanano lowuntshwa.” (Luka 22:20) Ku fana ni lowo sungula, ku nga ntwanano wa Nawu wa Muxe, ntwanano lowu lowuntshwa a wu ta humesa “mfumo wa vaprista.” (Eksoda 19:6; 1 Petro 2:9) Hambiswiritano, ntwanano lowu a wu nga ta simeka tiko ra nyama, kambe a wu ta simeka tiko ra moya ku nga “Israyele wa Xikwembu” la vumbiwaka ntsena hi valandzeri vo tshembeka va Kreste lava totiweke. (Vagalatiya 6:16) Vanhu lava nga eka ntwanano lowuntshwa va ta hlanganyela na Yesu eku katekiseni ka rixaka ra vanhu!

19. (a) Ha yini ntwanano lowuntshwa wu swi kota ku humesa “mfumo wa vaprista”? (b) Ha yini Vakreste lava totiweke va vitaniwa “xivumbiwa lexintshwa,” naswona i vangani lava nga ta tirha na Kreste etilweni?

19 Kambe ha yini ntwanano lowuntshwa wu swi kota ku humesa “mfumo wa vaprista” leswaku wu ta katekisa vanhu? Hikuva ematshan’weni yo endla vadyondzisiwa va Kreste va languteka va ri vadyohi, wona wu endla leswaku va rivaleriwa swidyoho swa vona hi gandzelo ra yena. (Yeremiya 31:31-34) Loko Yehovha a kala a va teka va ri lava tengeke, u va amukela endyangwini wakwe wa le tilweni ni ku va tota hi moya lowo kwetsima. (Varhoma 8:15-17; 2 Vakorinto 1:21) Xisweswo va ‘velekiwa hi vuntshwa eka ntshembo lowu hanyaka lowu va vekeriweke wona ematilweni.’ (1 Petro 1:3, 4) Leswi lunghelo leri, leri tlakukeke swonghasi  ri nga rintshwa eka vanhu, Vakreste lava totiweke hi moya va vitaniwa “xivumbiwa lexintshwa.” (2 Vakorinto 5:17) Bibele yi paluxa leswaku i vanhu va 144 000 lava nga ta hetelela va ve ni xandla eku fumeni ka vanhu lava kutsuriwaka, va ri etilweni.—Nhlavutelo 5:9, 10; 14:1-4.

20. (a) Hi yihi nhlavutelo ya xihundla xo kwetsima leyi veke kona hi 36 C.E.? (b) I vamani lava nga ta kuma mikateko leyi tshembisiweke Abrahama?

20 Yesu swin’we ni vatotiwa lava, va va “mbewu ya Abrahama.” * (Vagalatiya 3:29) Lava va hlawuriweke ro sungula a ku ri Vayuda va nyama. Kambe hi 36 C.E., ku paluxiwe mhaka yin’wana ya xihundla xo kwetsima: Vamatiko, kumbe vanhu lava nga riki Vayuda, na vona a va ta va ni ntshembo wo hanya etilweni. (Varhoma 9:6-8; 11:25, 26; Vaefesa 3:5, 6) Xana Vakreste lava totiweke a ku ta va vona ntsena lava nga ta kuma mikateko leyi tshembisiweke Abrahama? Doo, hikuva gandzelo ra Yesu ri vuyerisa misava hinkwayo. (1 Yohane 2:2) Hi ku famba ka nkarhi, Yehovha u paluxe leswaku “ntshungu lowukulu” wa ntsandza-vahlayi a wu ta pona ku lovisiwa ka mafambiselo ya swilo ya Sathana. (Nhlavutelo 7:9, 14) Mintshungu yin’wana yi ta pfuxiwa yi ri ni ntshembo wo hanya eParadeyisini hilaha ku nga heriki!—Luka 23:43; Yohane 5:28, 29; Nhlavutelo 20:11-15; 21:3, 4.

Vutlhari Bya Xikwembu Ni Xihundla Xo Kwetsima

21, 22. Xana xihundla xa Yehovha xo kwetsima xi byi kombisa njhani vutlharhi bya yena?

21 Xihundla xo kwetsima xi kombisa “vutlhari byo hambana-hambana swinene bya Xikwembu” hi ndlela leyi hlamarisaka. (Vaefesa 3:8-10) Vona vutlharhi lebyi Yehovha a byi kombiseke loko a endla xihundla lexi, niloko a xi hlavutela hakatsongo-tsongo! Hikwalaho ka vutlharhi byakwe u anakanye hi ku tsana loku vanhu va nga na kona, kutani a va nyika nkarhi wo kombisa leswi timbilu ta vona ti nga xiswona.—Pisalema 103:14.

22 Nakambe Yehovha u kombise vutlharhi lebyi nga  pimanisekiki hi ku hlawula Yesu leswaku a va Hosi. N’wana wa Yehovha u tshembekile ku tlula xivumbiwa xihi ni xihi lexi nga kona evuakweni. Yesu u vone maxangu yo tala loko a ha ri munhu wa nyama ni ngati. U swi twisisa kahle swiphiqo swa vanhu. (Vaheveru 5:7-9) Ku vuriwa yini hi vafumi-kulobye Yesu? Eka malembe-xidzana lama hundzeke vavanuna ni vavasati—lava tekiweke eka tinxaka, tindzimi ni mindhavuko yo hambana-hambana hinkwayo—va totiwile. Kahle-kahle a xi kona xiphiqo lexi vanhu lava va nga si tshamaka va langutana na xona ni ku xi hlula, hi ku hambana-hambana ka vona. (Vaefesa 4:22-24) Swi ta tsakisa hakunene ku fumiwa hi tihosi leti tlhelo vaprista va musa!

23. Hi rihi lunghelo leri Vakreste va nga na rona mayelana ni xihundla xo kwetsima xa Yehovha?

23 Muapostola Pawulo u tsarile: “Xihundla xo kwetsima lexi a xi fihliwile ku sukela eka mafambiselo ya swilo lama hundzeke ni ku sukela eka switukulwana leswi hundzeke . . . xi kombisiwe vakwetsimi va xona.” (Vakolosa 1:26) Ina, vakwetsimi va Yehovha lava totiweke, i swinyingi leswi se va swi tivaka hi xihundla xo kwetsima, naswona va avelane ni van’wana va timiliyoni hi vutivi lebyi. Mayana lunghelo leri hinkwerhu hi nga na rona! Yehovha u “hi tivis[e] xihundla xo kwetsima xa ku rhandza ka [ye]na.” (Vaefesa 1:9) A hi aveleni van’wana xihundla lexi xo hlamarisa, hi va pfuna leswaku na vona va kambisisa vutlhari lebyi nga pimekiki bya Yehovha Xikwembu!

^ ndzim. 17 “Xihundla xo kwetsima xa ku tinyiketela loku ku nga ni vukwembu” na xona xi paluxiwe ha Yesu. (1 Timotiya 3:16) Ku hundze nkarhi wo leha swi nga tiviwi leswaku u kona loyi a nga ta tshembeka hi ndlela leyi hetisekeke eka Yehovha. Yesu u paluxe nhlamulo ya kona. U tshembekile ehansi ka ndzingo wihi ni wihi lowu Sathana a n’wi ringeke ha wona.—Matewu 4:1-11; 27:26-50.

^ ndzim. 20 Nakambe Yesu u endle “ntwanano wa mfumo” ni ntlawa lowu fanaka. (Luka 22:29, 30) Kahle-kahle, Yesu u endle ntwanano ni “ntlhambinyana” leswaku wu ta fuma na yena etilweni tanihi xiphemu xa vumbirhi xa mbewu ya Abrahama.—Luka 12:32.

DYONDZA SWO TALA

Yingisa Xikwembu Kutani U Vuyeriwa Eka Switshembiso Swa Xona Leswi Hlambanyiweke

Hi dyondza yini eka switshembiso swa Xikwembu, swihlambanyo ni le ka mintwanano ya xona?