Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 24

Ku Hava Lexi Nga Ta Hi “Hambanisa Ni Rirhandzu Ra Xikwembu”

Ku Hava Lexi Nga Ta Hi “Hambanisa Ni Rirhandzu Ra Xikwembu”

1. Hi kwihi ku titwa loku hoxeke loku karhataka vanhu vo tala, ku katsa ni Vakreste va ntiyiso?

XANA Yehovha Xikwembu xa ku rhandza wena hi ku kongoma? Van’wana va pfumela leswaku Xikwembu xa va rhandza vanhu, hilaha Yohane 3:16 yi vulaka ha kona. Kambe hi hala tlhelo va titwa hi ndlela leyi: ‘Xikwembu a xi nge ndzi rhandzi hi ku kongoma.’ Minkarhi yin’wana hambi ku ri Vakreste va ntiyiso, va swi kanakana sweswo. Wanuna un’wana la heleke matimba u te: “Swa ndzi tikela ku tshemba leswaku Xikwembu xi ni mhaka na mina.” Xana na wena u titwa hi ndlela yoleyo minkarhi yin’wana?

2, 3. I mani loyi a lavaka hi tivona hi ri vanhu lava nga pfuniki nchumu kumbe hi ri lava nga rhandzekiki eka Yehovha, naswona hi nga lwisana njhani ni mianakanyo yoleyo?

2 Sathana u hisekela ku hi endla hi pfumela leswaku Yehovha Xikwembu a nga hi rhandzi naswona a nga hi teki hi ri nchumu. Ina, Sathana u kanganyisa vanhu hi ku va endla va tibuma hi leswi va langutekisaka xiswona ni ku tikukumuxa. (2 Vakorinto 11:3) U tsakela ku endla vanhu lava tsaneke va titwa va nga ri nchumu. (Yohane 7:47-49; 8:13, 44) Leswi swi tano ngopfu-ngopfu “emasikwini [lawa] yo hetelela” ya mangava. Vo tala namuntlha va kulela emindyangwini leyi “nga riki na xinakulobye xa ntumbuluko.” Van’wana va tshama va ri karhi va langutana ni vanhu lava nga ni vukarhi, lava nga ni vutianakanyi ni lava omeke tinhloko. (2 Timotiya 3:1-5) Leswi va heteke malembe va ri karhi va xanisiwa, va kombiwa xihlawu-hlawu kumbe ku vengiwa, va ha tivona va ri vanhu lava nga pfuniki nchumu kumbe va ri lava nga rhandzekiki.

3 Loko u tshuka u titwa onge a wu pfuni nchumu kumbe a wu rhandziwi, u nga heli matimba. Vo tala va hina minkarhi yo tala hi tivona hi nga pfuni nchumu. Kambe tsundzuka, Rito ra Xikwembu ri tsaleriwe “ku lulamisa swilo” ni ku “wisetela swilo leswi simekiweke  swi tiya.” (2 Timotiya 3:16; 2 Vakorinto 10:4) Bibele yi ri: “Hi ta tiyisekisa timbilu ta hina emahlweni ka yena malunghana ni xin’wana ni xin’wana lexi timbilu ta hina ti nga hi solaka ha xona, hikuva Xikwembu i xikulu eka timbilu ta hina naswona xi tiva swilo hinkwaswo.” (1 Yohane 3:19, 20) Kutani ke, a hi xiyeni tindlela ta mune laha eka tona Matsalwa ma hi pfunaka ku “tiyisekisa timbilu ta hina” hi rirhandzu ra Yehovha.

Yehovha U Ku Teka U Ri Wa Nkoka

4, 5. Xana xikombiso xa Yesu xa swindzingiri xi swi kombisa njhani leswaku hi va nkoka ematihlweni ya Yehovha?

4 Ndlela yo sungula, Bibele yi swi veka erivaleni leswaku Xikwembu xi teka un’wana ni un’wana wa malandza ya xona a ri wa nkoka. Hi xikombiso, Yesu u te: “Xana swindzingiri swimbirhi a swi xavisiwi hi mali ya nsimbi ya risima leritsongo ke? Kambe ku hava ni xin’we xa swona lexi nga waka ehansi Tata wa n’wina a nga swi tivi. Hambi ku ri misisi ya tinhloko ta n’wina yi hlayiwile hinkwayo. Hikokwalaho mi nga chavi: Mi ni risima ku tlula swindzingiri swo tala.” (Matewu 10:29-31) Xiya leswaku marito wolawo a a ma vula yini eka vayingiseri va Yesu va le ka lembe-xidzana ro sungula.

“Mi ni risima ku tlula swindzingiri swo tala”

5 Hi nga ha hlamala leswaku munhu u tikarhatela yini hi ku xava xindzingiri. Phela, esikwini ra Yesu xindzingiri a xi ri xona xo chipa ngopfu eka tinyenyana hinkwato leti a ti dyiwa. Xiya leswaku hi mali yin’we ya nsimbi leyi nga riki ya nkoka ngopfu, muxavi a a kuma swindzingiri swimbirhi. Kambe endzhakunyana Yesu u vule leswaku loko munhu a lava ku xava hi timali timbirhi ta nsimbi, a a kuma swindzingiri swa ntlhanu ku nga ri swa mune. Xinyenyana lexa vuntlhanu a wu bazeriwa hi xona tanihi leswi a xi nga ri xa risima. Kumbexana swivumbiwa sweswo a swi nga ri swa risima ematihlweni ya vanhu, kambe xana Muvumbi wa swona u swi languta njhani? Yesu u te: “Ku hava ni xin’we xa swona lexi rivalekaka emahlweni ka Xikwembu.” (Luka 12:6, 7) Leswi swa hi pfuna leswaku hi twisisa yinhla ya Yesu. Loko Yehovha a nga xi rivali xindzingiri ni xin’we, munhu yena i wa risima ku tlula xindzingiri! Hilaha Yesu a hlamuseleke ha kona, Yehovha u tiva vuxokoxoko hinkwabyo bya hina. Phela, misisi ya tinhloko ta hina yi hlayiwile!

6. Hi swi tivisa ku yini leswaku Yesu a a nga hundzeleti loko a vulavula hi ku hlayiwa ka misisi ya hina?

 6 Xana misisi ya hina yi hlayiwile? Van’wana va nga ha ehleketa leswaku Yesu a a hundzeleta swilo. Wa nga ehleketa hi ntshembo wa ku pfuxiwa ka vafi. Yehovha u fanele a hi tiva swinene loko a ta kota ku tlhela a hi pfuxa! U hi teka hi ri va nkoka swinene lerova u tsundzuka xin’wana ni xin’wana, ku katsa ni xitekela xa hina ni swilo hinkwaswo leswi hi swi tivaka ni leswi hi swi endleke. * Ku hlayela misisi ya hina—laha nhloko ha yin’we yi nga ni misisi ya 100 000 hi xiringaniso—sweswo a hi ntirho eka yena.

I Yini Leswi Yehovha A Swi Vonaka Eka Hina?

7, 8. (a) Hi tihi timfanelo leti Yehovha a tsakelaka ku ti kuma loko a ri karhi a kambisisa timbilu ta vanhu? (b) Hi yihi mintirho yin’wana leyi hi yi endlaka leyi Yehovha a yi tsakelaka?

7 Ndlela ya vumbirhi, Bibele yi hi dyondzisa leswi Yehovha a tsakelaka ku swi vona eka malandza yakwe. Kahle-kahle, u tsakisiwa hi timfanelo ta hina letinene ni matshalatshala lama hi ma endlaka. Hosi Davhida u byele n’wana wakwe Solomoni a ku: “Yehovha u kambisisa timbilu hinkwato, naswona u xiya mboyamelo wun’wana ni wun’wana wa miehleketo.” (1 Tikronika 28:9) Loko Xikwembu xi kambisisa timbilu ta vanhu va magidi ya timiliyoni emisaveni leyi nga ni madzolonga, leyi teleke hi rivengo, handle ko kanakana xa tsaka swinene loko xi vona mbilu leyi rhandzaka ku rhula, ntiyiso ni vululami! Xana ku humelela yini loko Xikwembu xi kuma mbilu leyi xi rhandzaka, leyi lavaka ku dyondza ha xona ni ku avelana vutivi lebyi ni van’wana? Yehovha u hi byela leswaku u va tekela enhlokweni lava byelaka van’wana ha yena. U ni “buku ya xitsundzuxo” ya hinkwavo “lava va chavaka Yehovha ni lava va anakanyaka hi vito ra yena.” (Malakiya 3:16) Timfanelo to tano i ta risima eka yena.

8 Hi yihi mintirho leyinene leyi Yehovha a yi tsakelaka? I matshalatshala  ya hina yo tekelela N’wana wa yena Yesu Kreste. (1 Petro 2:21) Ntirho wun’wana wa nkoka lowu Xikwembu xi wu tsakelaka i ku hangalasiwa ka mahungu lamanene ya Mfumo wa xona. Eka Varhoma 10:15, ha hlaya: “Ya languteka hakunene milenge ya lava va vulaka mahungu lamanene ya swilo leswinene!” Hi ntolovelo a hi nge ehleketi leswaku milenge ya hina leyi nga nyawuliki ya “languteka,” kumbe yi xongile. Kambe laha, yi yimela matshalatshala lawa malandza ya Yehovha ya ma endlaka hi ku chumayela mahungu lamanene. Matshalatshala wolawo hinkwawo ma xongile naswona i ya risima ematihlweni ya yena.—Matewu 24:14; 28:19, 20.

9, 10. (a) Hikwalaho ka yini hi nga tiyisekaka leswaku Yehovha a nga ku honisi ku tiyisela ka hina loko hi langutane ni swiphiqo? (b) Hi wahi malangutelo lamanene lawa Yehovha a nga na wona hi malandza yakwe yo tshembeka?

9 Nakambe Yehovha a nga ku tekeli ehansi ku tiyisela ka hina. (Matewu 24:13) Tsundzuka, Sathana u lava leswaku u fularhela Yehovha. Siku rin’wana ni rin’wana loko ri pela wa ha tshembekile, u va u nyike Yehovha nhlamulo eka ntlhontlho wa Sathana. (Swivuriso 27:11) Minkarhi yin’wana a swi olovi ku tiyisela. Mavabyi, swiphiqo swa timali, ntshikilelo ni swihinga swin’wana swi nga endla leswaku siku rin’wana ni rin’wana ri va ndzingo.  Loko munhu a langutela nchumu lowu tlheriseriwaka endzhaku, na swona swi nga n’wi heta matimba. (Swivuriso 13:12) Yehovha wa tsaka swinene loko a hi vona hi tiyisela ehansi ka mintlhontlho yo fana ni leyi. Hi yona mhaka leyi Hosi Davhida a kombeleke Yehovha leswaku a chela mihloti yakwe ‘eguleni ra dzovo,’ naswona u engeterile a ku: “Xana a yi kona ebukwini ya wena?” (Pisalema 56:8) Ina, Yehovha u yi teka yi ri ya nkoka naswona wa yi tsundzuka mihloti ni ku xaniseka loku hi ku tiyiselaka loko hi ri karhi hi lwela ku tshembeka eka yena. Na yona i ya nkoka ematihlweni ya yena.

Yehovha a nga ku languteli ehansi ku tiyisela ka hina loko hi langutane ni miringo

10 Kambe mbilu leyi tivonaka yi nga pfuni nchumu yi nga ha ala leswaku hi va risima ematihlweni ya Xikwembu. Yi nga ha hlevetela hi ku phindha-phindha yi ku: ‘Kambe ku ni vo tala lava nga xikombiso lexinene ku tlula mina. Yehovha u fanele a khomiwa hi tingana swinene loko a ndzi pimanisa na vona!’ Yehovha a nga va pimanisi vanhu naswona wa anakanyela. (Vagalatiya 6:4) U twisisa timbilu ta hina hi vuenti, naswona u vona leswinene eka tona, hambi swi ri swintsongo.

Yehovha U Sefa Leswinene Eka Leswo Biha

11. Hi nga dyondza yini eka ndlela leyi Yehovha a khomeke Abiya ha yona?

11 Ndlela ya vunharhu, loko Yehovha a ri karhi a kambisisa timbilu, u xiyisisa leswi nga swinene eka hina. Hi xikombiso, loko Yehovha a lerisa leswaku yindlu ya Hosi Yerobuwamu leyi xandzukeke yi fanele yi lovisiwa, U lerise leswaku un’wana wa vana va yona, ku nga Abiya, a lahliwa kahle. Ha yini? “Yehovha Xikwembu xa Israyele a [kume] leswinene eka yena.” (1 Tihosi 14:1, 10-13) Entiyisweni, Yehovha u kambisise mbilu ya jaha rero kutani a kuma “leswinene” eka rona. Hambileswi a swi ri switsongo leswi a swi kumeke embilwini ya jaha leri, Yehovha u vone swi fanerile leswaku mhaka ya rona yi tsariwa eRitweni ra yena. Exikarhi ka ndyangu wolowo wa vaxandzuki, u tlhele a hakela jaha rero hi ku ri kombisa tintswalo.

12, 13. (a) Xana mhaka ya Hosi Yoxafati yi swi kombisa njhani leswaku Yehovha u languta leswinene eka hina hambiloko hi dyohile? (b) Loko swi ta eka mintirho ni timfanelo ta hina letinene, xana Yehovha u tikombisa a fana ni Mutswari loyi a nga ni rirhandzu hi ndlela yihi?

12 Xikombiso xin’wana lexinene xi nga ha dyondziwa eka  Hosi yo lulama, ku nga Yoxafati. Loko hosi leyi yi endle vuphukuphuku, muprofeta wa Yehovha u yi byele leswi: “Hikwalaho ka leswi Yehovha u ku hlundzukerile.” Swa vavisa hakunene! Kambe rungula ra Yehovha a ri helelanga kwalaho. Ri ya emahlweni: “Nilokoswiritano, ku ni swilo leswinene leswi kumiweke eka wena.” (2 Tikronika 19:1-3) Ku hlundzuka ka Yehovha a ku n’wi endlanga leswaku a nga swi voni swilo leswinene eka Yoxafati. Wa nga vona ndlela leyi a nga faniki ni vanhu lava nga hetisekangiki ha yona! Loko vanhu va hi hlundzukisa, hi nga ha va ni mboyamelo wo tsandzeka ku vona leswinene eka vona. Loko hi dyoha, hi hela matimba, hi tlhela hi va ni tingana, naswona ndlela leyi hi tivonaka nandzu ha yona yi nga hi sivela ku vona leswinene eka hina. Kambe tsundzuka, leswaku loko hi hundzuka eswidyohweni swa hina naswona hi lwela ku nga swi phindhi, Yehovha wa hi rivalela.

13 Loko Yehovha a ri karhi a kambisisa mbilu ya wena, u susa swidyoho swoleswo, ku fana ni musefi la lavaka nsuku loko a ri karhi a susa maribye lama nga pfuniki nchumu. Xana ku vuriwa yini hi timfanelo ta wena letinene ni mintirho ya wena leyinene? Ina, leti i “tindzalama” leti a ti hlayisaka! Xana u tshama u xiya ndlela leyi vatswari lava nga ni rirhandzu va swi tsakelaka ha  yona swifaniso leswi vana va vona va swi endleke exikolweni, hambiloko se ku hundze malembe va swi endlile ni vana se va swi rivele? Yehovha i Mutswari la nga ni rirhandzu swinene. Ntsena loko hi tshama hi tshembekile eka yena, a nge yi rivali nikatsongo mintirho ni timfanelo letinene ta hina. Kahle-kahle, eka yena ku nga va ku ri ku pfumala vululami loko o swi rivala, naswona u tshama a lulamile. (Vaheveru 6:10) Nakambe ku ni ndlela yin’wana leyi a hi kambisisaka ha yona.

14, 15. (a) Leswi hi nga hetisekangiki, ha yini sweswo swi nga endli leswaku Yehovha a honisa leswinene eka hina? Kombisa. (b) Xana Yehovha u ta endla yini hi leswinene leswi a swi kumaka eka hina, naswona u ma languta njhani malandza layo tshembeka?

14 Yehovha a nga xiyi ku nga hetiseki ka hina kambe u languta leswi hi nga kotaka ku swi endla. Hi xikombiso: Vanhu lava rhandzaka swilo leswi endliweke hi mavoko, va tikarhata va lunghisela swifaniso leswi onhakeke swinene. Hi xikombiso, loko xifaniso xa Leonardo da Vinci lexi durhaka 30 wa timiliyoni ta tidolara, lexi nga eka National Gallery eLondon, le Nghilandhi xi onhiwile hi un’wana loyi a xi baleseleke, a nga kona la ringanyeteke leswaku leswi se xi nga onhiwa xi fanele xi cukumetiwa. Hi ku hatlisa ntirho wo lunghisa xifaniso lexi xi endliweke hi vutshila, lexi nga ni malembe ya kwalomu ka 500, wu sunguriwile. Hikwalaho ka yini? Hikuva a xi ri xa risima eka lava rhandzaka swilo leswi endliweke hi mavoko. Xana wena a wu wa risima ku tlula xifaniso lexi tsariweke hi choko ni pensele? U wa risima hakunene ematihlweni ya Xikwembu—hambileswi u nga vaka u onhiwile swinene hi xidyoho lexi u tswariweke na xona. (Pisalema 72:12-14) Yehovha Xikwembu, Muvumbi wa ndyangu wa vanhu, la nga ni vutshila, u ta endla leswaku hinkwavo lava amukelaka nkhathalelo wa yena wa rirhandzu va hetiseka.—Mintirho 3:21; Varhoma 8:20-22.

15 Ina, Yehovha u vona leswinene eka hina, leswi hina vini hi nga swi voniki. Loko hi ri karhi hi n’wi tirhela, u ta endla leswaku leswinene swi engeteleka kukondza hi hetiseka hilaha ku heleleke. Ku nga khathariseki ndlela leyi misava ya Sathana yi hi khomiseke xiswona, Yehovha u languta malandza ya yena yo tshembeka ma ri lama navelekaka.—Hagayi 2:7.

 Yehovha U Kombisa Rirhandzu Ra Yena

16. Hi xihi xitiyisekiso lexikulu xa leswaku Yehovha wa hi rhandza, naswona hi swi tivisa ku yini leswaku nyiko leyi yi endleriwe hina?

16 Ndlela ya vumune, Yehovha u kombisa leswaku wa hi rhandza hi tindlela to tala. Hakunene, gandzelo ra Kreste ra nkutsulo i nhlamulo ya matimba eka mavunwa ya Sathana ya leswaku a hi pfuni nchumu kumbe a hi rhandzeki. A hi fanelanga hi rivala leswaku ndlela yo vava leyi Yesu a feke ha yona emhandzini ya nxaniso, swin’we ni gome leri Yehovha a veke na rona loko a langute N’wana wa yena la rhandzekaka a ri karhi a fa, i xikombiso xa leswaku va hi rhandza. Khombo ra kona, vanhu vo tala swa va tikela ku tshemba leswaku nyiko leyi, a yi endleriwa vona hi ku kongoma. Va titwa va nga faneleki. Kambe tsundzuka leswaku muapostola Pawulo a a ri muxanisi wa valandzeri va Kreste. Kambe u tsarile: ‘N’wana wa Xikwembu u ndzi rhandzile kutani a tinyiketa hikwalaho ka mina.’Vagalatiya 1:13; 2:20.

17. Xana Yehovha u hi kokela njhani eka yena ni le ka N’wana wa yena?

17 Yehovha u kombisa leswaku wa hi rhandza hi ku hi pfuna ha un’we-un’we leswaku hi vuyeriwa eka gandzelo ra Kreste. Yesu u te: “Ku hava munhu loyi a nga taka eka mina handle ka loko Tatana, loyi a ndzi rhumeke, a n’wi koka.” (Yohane 6:44) Ina, Yehovha u hi kokela eka N’wana wa yena ni le ka ntshembo wa vutomi lebyi nga heriki. Njhani? Hi ku endla leswaku hi dyondzisiwa, ni hi moya wa yena lowo kwetsima, lowu Yehovha a wu tirhiselaka ku hi pfuna leswaku hi twisisa ni ku tirhisa mintiyiso ya moya, hambileswi hi tsaneke naswona hi nga hetisekangiki. Hikwalaho, leswi Yehovha a swi vuleke eka Vaisrayele a nga swi vula ni le ka hina a ku: “Ndzi ku rhandzile hi rirhandzu leri nga riki na makumu. Hi yona mhaka leyi ndzi ku kokeke hi musa wa rirhandzu.”—Yeremiya 31:3.

18, 19. (a) Hi yihi ndlela leyi Yehovha a kombisaka ha yona leswaku wa hi rhandza swinene, naswona i yini leswi kombisaka leswaku ntirho lowu a tiendlela wona hi yexe? (b) Xana Rito ra Xikwembu ri hi tiyisekisa njhani leswaku Yehovha i muyingiseri la nga ni ntwela-vusiwana?

18 Kumbexana loko hi khongela hi swi vona kahle leswaku Yehovha u hi rhandza ngopfu. Bibele yi rhamba un’wana ni un’wana wa hina leswaku a ‘khongela minkarhi hinkwayo.’ (1 Vatesalonika 5:17) Wa yingisela. Naswona u vuriwa “Mutwi wa xikhongelo.”  (Pisalema 65:2) Xikhundla lexi a nga xi nyikanga un’wana, hambi ku ri N’wana wa yena n’wini. Wa nga ehleketa hi leswi: Muvumbi wa vuako hinkwabyo u hi khutaza leswaku hi n’wi tshinelela hi vulavula na yena hi ntshunxekile hi xikhongelo. Xana yena i muyingiseri wa njhani? Xana a nga na musa, a nga na ntwela-vusiwana, a nga khathali? A swi tano nikatsongo.

19 Yehovha u ni ntwela-vusiwana. Xana ntwela-vusiwana i yini? Mukrete un’wana wo tshembeka la kuleke u te: “Ntwela-vusiwana i ku twa xitlhavi lexi nga eka wena embilwini ya mina.” Xana Yehovha u twa xitlhavi xa hina? Hi dyondza hi ta ku xaniseka ka vanhu va yena va Israyele: “Enkarhini wa maxangu ya vona hinkwawo, na yena a a ri emaxangwini.” (Esaya 63:9) Yehovha a nga lo vona maxangu ya vanhu va yena ntsena; kambe u va twele vusiwana. Ndlela leyi a titweke ha yona yi kombisiwa hi marito ya Yehovha lawa a ma vuleke eka malandza ya yena a ku: “Loyi a mi khumbaka u khumba ndzololo ya tihlo ranga.” * (Zakariya 2:8) A hi ku vava ka swona! Ina, Yehovha u hi twela ku vava. Loko hi twa ku vava, na yena wa vaviseka.

20. Hi yihi mianakanyo leyi nga riki yinene leyi hi faneleke hi yi papalata loko hi yingisa ndzayo leyi kumekaka eka Varhoma 12:3?

20 A nga kona Mukreste loyi a tlhariheke kahle, loyi a nga tirhisaka vumbhoni byolebyo bya rirhandzu ra Xikwembu ni ku khathala ka xona hi malandza ya xona, leswaku a tivona a ri wa le henhla kumbe a tidzunisa. Muapostola Pawulo u tsarile: “Hi musa lowu nga faneriwiki lowu ndzi nyikiweke wona ndzi byela un’wana ni un’wana kwalaho exikarhi ka n’wina leswaku a nga tiehleketeleli ku tlula mpimo lowu a faneleke ku tiehleketelela ha wona; kambe a a ehlekete hi xikongomelo xo va ni mianakanyo leyi hlutekeke, un’wana ni un’wana hilaha Xikwembu xi n’wi aveleke ripfumelo hakona.” (Varhoma 12:3) Vuhundzuluxeri byin’wana byi vula leswaku: “Ndzi ta byela un’wana ni un’wana wa n’wina leswaku a nga titeki a ri wa nkoka kambe a tiveke exiyin’weni lexi faneleke.”  (A Translation in the Language of the People, hi Charles B. Williams) Loko hi ri karhi hi tiphina hi rirhandzu ra Tata wa hina wa le tilweni, a hi hlutekeni emianakanyweni naswona hi tsundzuka leswaku rirhandzu ra Xikwembu a hi ri fanelekeli.—Luka 17:10.

21. Hi wahi mavunwa ya Sathana lawa hi faneleke hi ya emahlweni hi ma ala, naswona i ntiyiso wihi wa Xikwembu lowu hi nga hambetaka hi tiyisekisa timbilu ta hina ha wona?

21 Hinkwerhu a hi endleni leswi nga ematimbeni ya hina leswaku hi ala mavunwa ya Sathana swin’we ni vunwa bya leswaku a hi pfuni nchumu kumbe a hi rhandzeki. Loko swilo leswi swi ku humeleleke evuton’wini swi ku endla u tivona u ri ni xiphiqo lexikulu lerova u vona u nga faneriwi hi rirhandzu ra Xikwembu, kumbe u vona mintirho ya wena leyinene yi ri yitsongo swinene lerova u anakanya leswaku a xi yi voni hi mahlo ya xona lama vonaka hinkwako, kumbe u vona onge swidyoho swa wena i swikulu swinene lerova hambi ku ri rifu ra N’wana wa xona ri nge swi susi, u dyondzisiwe mavunwa ya rihlaza. Ala mavunwa yo tano hi mbilu ya wena hinkwayo! A hi hambeteni hi tiyisekisa timbilu ta hina hi ntiyiso lowu vuriweke hi marito ya Pawulo lama huhuteriweke: “Ndza kholwa leswaku rifu ni vutomi ni tintsumi ni tihulumendhe ni swilo leswi nga laha sweswi ni swilo leswi taka ni vaungameri ni vutlakuki ni vuenti ni xivumbiwa xihi ni xihi xin’wana a swi nge swi koti ku hi hambanisa ni rirhandzu ra Xikwembu leri nga eka Kreste Yesu Hosi ya hina.”—Varhoma 8:38, 39.

^ ndzim. 6 Loko Bibele yi vulavula hi ku phindha-phindha hi ntshembo wa ku pfuxiwa ka vafi, yi tlhela yi vulavula hi vuswikoti bya Yehovha bya ku tsundzuka. Yobo wanuna wo tshembeka u byele Yehovha a ku: “Onge u nga . . . ndzi vekela nkarhi kutani u ndzi tsundzuka!” (Yobo 14:13) Yesu u vulavula hi ku pfuxiwa ka “hinkwavo lava nga eka masirha-bako ya xitsundzuxo.” Leswi a swi fanela hikuva Yehovha u va tsundzuka kahle vafi lava a tiyimiseleke ku va pfuxa.—Yohane 5:28, 29.

^ ndzim. 19 Vuhundzuluxeri byin’wana laha byi vula leswaku loyi a khumbaka vanhu va Xikwembu, u khumba tihlo ra rakwe hi yexe kumbe tihlo ra Israyele, ku nga ri tihlo ra Xikwembu. Xihoxo lexi xi endliwe hi vatsari van’wana lava languteke xiga lexi xi ri lexi nga xiximekiki, kutani va xi soholota. Matshalatshala ya vona lama hoxeke ma funengete vuenti bya ntwela-vusiwana wa Yehovha.

DYONDZA SWO TALA

Xana Ndzi Munhu La Tsandzekaka?

Xana u titwa u ri xikangalafula kumbe u chava ku tsandzeka?