Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 27

“Mawaku Ku Kula Ka Vunene Bya Yena!”

“Mawaku Ku Kula Ka Vunene Bya Yena!”

1, 2. Xana vunene bya Xikwembu i byikulu ku fikela kwihi, naswona Bibele yi yi kandziyisa ku fikela kwihi mfanelo leyi?

LOKO dyambu ri ya eku peleni, hi lahaya, ku ni ntlawa wa vanghana lavakulu, wu le ku dyeni ehandle, hi hala tlhelo wu hlalele ntumbuluko, wu le ku buleni naswona wu tsakile. Le kule le, murimi u le ku n’wayiteleni loko a ri karhi a languta masimu yakwe, u tsakisiwa hi leswi a vonaka mapapa ya ntima naswona mathonsi ya mpfula ma sungulaka ku thona ma tsakamisa swimilana swakwe leswi swi nga ni torha. Endhawini yin’wana, wanuna ni nsati wakwe va tsakisiwa hi leswi va vonaka xihlangi xa vona xi sungulaka ku deya.

2 Hambi va swi tiva kumbe a va swi tivi, vanhu volavo va tsakisiwa hi xilo xin’we—ku nga vunene bya Yehovha Xikwembu. Swi tolovelekile ku twa vanhu va vukhongeri va vula leswaku “Xikwembu i xinene.” Kambe Bibele yi tlhela yi swi kandziyisa. Yi ri: “Mawaku ku kula ka vunene bya yena!” (Zakariya 9:17) Kambe swi tikomba onge a hi vanyingi vanhu lava swi twisisaka leswaku marito lawa ma vula yini hakunene. Kahle-kahle, xana vunene bya Yehovha Xikwembu byi katsa yini, naswona xana mfanelo leyi ya Xikwembu yi n’wi khumba njhani un’wana ni un’wana wa hina?

Mfanelo Leyi Xiyekaka Ya Rirhandzu Ra Xikwembu

3, 4. Vunene i yini, naswona ha yini vunene bya Yehovha byi nga ha hlamuseriwaka byi ri ndlela leyi a kombisaka rirhandzu ra yena ha yona?

3 Eka tindzimi to tala ta manguva lawa, “vunene” i rito leri hlamuselaka swilo swo tala. Kambe, hi ku ya hi Bibele, vunene byi vula mahanyelo ya xiyimo xa le henhla. Kutani ke, hi ndlela yin’wana hi nga ha vula leswaku vunene byi dzikile eka Yehovha. Timfanelo ta yena hinkwato—ku katsa ni matimba ya yena, vululami  bya yena ni vutlharhi bya yena—hinkwato i tinene hilaha ku heleleke. Hambiswiritano, vunene byi nga ha hlamuseriwa byi ri ndlela leyi Yehovha a kombisaka rirhandzu ra yena ha yona. Hikwalaho ka yini?

4 Vunene i mfanelo leyi fambisanaka ni ku endlela van’wana leswinene. Muapostola Pawulo u kombisa leswaku vanhu va yi rhandza ngopfu mfanelo leyi ku tlula mfanelo ya vululami. (Varhoma 5:7) Munhu wo lulama wa tshembeka loko swi ta emhakeni yo hlayisa nawu, kambe munhu lonene u endla swo tlula sweswo. Hi yena a rhangaka a lava tindlela to pfuna van’wana. Tanihi laha hi nga ta swi vona ha kona, Yehovha hi lonene ngopfu emhakeni yoleyo. Swi le rivaleni leswaku vunene byo tano byi huma eka rirhandzu ra Yehovha leri nga ringanisiwiki na nchumu.

5-7. Ha yini Yesu a arile ku vuriwa “Mudyondzi Lonene,” naswona i ntiyiso wihi wa risima lowu a wu kandziyiseke hi ku endla sweswo?

5 Vunene bya Yehovha byi hlawulekile. Loko Yesu a nga si fa, wanuna un’wana u n’wi vitane “Mudyondzisi Lonene,” loko a lava ku n’wi vutisa swo karhi. Yesu u hlamule a ku: “Ha yini u vula leswaku ndzi lonene? Munhu lonene a nga kona, handle ka un’we, ku nga Xikwembu.” (Marka 10:17, 18) Ina, ndlela leyi a hlamuleke ha yona yi nga ha ku hlamarisa. Ha yini Yesu a lulamise xihoxo xa wanuna loyi? Xana Yesu a a nga ri “Mudyondzisi Lonene”?

6 Swi le rivaleni leswaku wanuna loyi a a tirhisa marito lama nge “Mudyondzisi Lonene” tanihi xithopo xo n’wi tlhoma tinsiva. Hi xichavo Yesu u yise ku dzuneka koloko eka Tata wakwe wa le tilweni, loyi a nga lonene hi ndlela leyi tlakukeke. (Swivuriso 11:2) Hi nkarhi lowu fanaka, Yesu a a kandziyisa ntiyiso wa risima. I Yehovha ntsena a nga ni mfanelo yo vula leswaku hi swihi leswi nga swinene ni leswo biha. Loko Adamu na Evha va xandzuka va dya murhi wo tivisa leswinene ni leswo biha, a va lava ku tihlawulela leswi nga swinene ematihlweni ya vona. Ku hambana na vona, Yesu wa titsongahata a tshika Tata wakwe ku va yena a nyikelaka nkongomiso.

7 Ku tlula kwalaho, Yesu a a swi tiva leswaku swilo hinkwaswo leswinene swi huma eka Yehovha. Hi yena Munyiki wa “nyiko yin’wana ni yin’wana leyinene ni nyiko yin’wana ni yin’wana leyi  hetisekeke.” (Yakobo 1:17) A hi xiyeni ndlela leyi Yehovha a kombisaka ha yona vunene bya yena hi ku hanana.

Xikombiso Xa Vunene Lebyikulu Bya Yehovha

8. Xana Yehovha u byi kombise njhani vunene eka vanhu hinkwavo?

8 Un’wana ni un’wana loyi a nga tshama a hanya u vuyeriwile hi vunene bya Yehovha. Pisalema 145:9 yi ri: “Yehovha hi lonene eka hinkwavo.” Hi swihi swikombiso swin’wana swa vunene lebyi a byi kombisaka eka vanhu hinkwavo? Bibele yi ri: ‘A nga titshikangi a nga ri na vumbhoni bya leswaku u endle leswinene, u mi nyika timpfula ta le tilweni ni tinguva ta mihandzu, u tata timbilu ta n’wina hi ku helela hi swakudya ni ku khana lokukulu.’ (Mintirho 14:17) Xana u titwe njhani loko u ri karhi u dya swakudya leswi phomisaka marha? Loko Yehovha hi vunene byakwe, a nga endlanga misava yi va ni mati yo tenga ni “tinguva ta mihandzu,” swakudya a swi nga ta va kona. Yehovha a nga kombisi  vunene byebyo eka lava va n’wi rhandzaka ntsena, kambe u byi kombisa eka vanhu hinkwavo. Yesu u te: “[U tsuvukisa] dyambu ra yena eka vanhu vo homboloka ni lavanene naswona [u nisa] mpfula yakwe ehenhla ka vanhu lava lulameke ni lava nga lulamangiki.”—Matewu 5:45.

Yehovha u “mi nyika timpfula ta le tilweni ni tinguva ta mihandzu”

9. Xana apula ri byi fanekisela njhani vunene bya Yehovha?

9 Vo tala va honisa malwandla lama nga ringanisekiki lawa vanhu va kombisiwaka wona, hi leswi dyambu, mpfula ni tinguva ta mihandzu, swi tshamaka swi ri kona. Hi xikombiso, anakanya hi apula. Ri kumeka etindhawini hinkwato leti kufumelaka. Ri xongile, ra nandziha, ri ni mati lama phyuphyisaka naswona ri ni swiaka-miri swa nkoka. Xana a wu swi tiva leswaku ku ni mixaka ya kwalomu ka 7 500 ya maapula? Ya hambana hi mihlovo,  ku ni yo tshwuka, ya nsuku, ya xitshopana, ya rihlaza ni leswaku lamatsongo ma ringana ni kuwa kasi man’wana i makulu ku ringana ni lamula lerikulu. Nyungu ya rona, yi vonaka yi nga nyawuli. Loko yi byariwa ku mila murhi wo xonga swonghasi. (Risimu Ra Solomoni 2:3) Hi ximun’wana xin’wana ni xin’wana murhi wa maapula wa hluka wu saseka; kasi hi xixikana xin’wana ni xin’wana wu veka mihandzu. Lembe ni lembe murhi wa maapula wu veka mihandzu leyi nga tataka mabokisi ya 20, naswona bokisi rin’wana ni rin’wana ri tika tikhilogiramu ta 19, kasi murhi lowu wu nga heta malembe ya 75 wu ri karhi wu veka mihandzu!

Xinyungwana lexi, loko xi byariwa ku nga mila murhi lowu nga hetaka makume ya malembe wu ri karhi wu wundla ni ku tsakisa vanhu

10, 11. Xana vuswikoti byo twa byi kombisa vunene bya Xikwembu xerhu hi ndlela yihi?

10 Hikwalaho ka vunene bya yena lebyi nga heriki, Yehovha u hi ‘endle hi ndlela yo hlamarisa,’ hi ri ni switwi leswi hi pfunaka ku vona mintirho ya yena ni ku yi tsakela. (Pisalema 139:14) Wa nga tlhela u anakanya hi vanhu lavaya va hlamuseriweke eku sunguleni ka ndzima leyi. Va vona yini leswi swi va tsakisaka? Swirhamana leswi hatimaka swa xihlangi lexi tsakeke. Mathonsi ya mpfula leyi naka emasin’wini. Mihlovo yo tshwuka, ya nsuku ni ya xivunguvungu ya dyambu leri pelaka. Tihlo ra munhu ri endliwe leswaku ri vona mihlovo ya 300 000! Vuswikoti bya hina bya ku twa bya hi pfuna leswaku hi twa rito leri tsakisaka ra xilombe, moya lowu hungaka ematlukeni ya mirhi, ku hleka ka n’wana. Ha yini hi swi kota ku tsakela swilo leswi hi swi vonaka ni leswi hi swi twaka? Bibele yi ri: “Ndleve leyi twaka ni tihlo leri vonaka—Yehovha u swi endle haswimbirhi.” (Swivuriso 20:12) Kambe sweswi ha ha lo vulavula hi swilo swimbirhi ntsena.

11 Vuswikoti byo nun’hwetela i xikombiso xin’wana xa vunene bya Yehovha. Nhompfu ya munhu yi nga swi kota ku twa nun’hwelo ni masema ya kwalomu ka 10 000. Anakanya hi leswi: swakudya leswi u swi rhandzaka, swiluva, makamba, musi wa ndzilo lowu u wu orhaka. Vuswikoti bya wena byo twa loko u khumbiwa byi ku pfuna leswaku u kota ku twa rimoyana loko ri ku ba xikandza, u twa loko u angarhiwa hi loyi u n’wi rhandzaka, ku rhetela ka mbhandzu lowu u wu tamelaka. Loko u wu luma,  vuswikoti bya wena byo twa nantswo byi sungula ntirho wa byona. Loko u ri eku dyeni, ririmi ra wena ri kota ku hambanisa minantswo yo hambana-hambana ya mbhandzu lowu u wu dyaka. Ina, swa fanele leswaku hi nkhensa Yehovha hi ku: “Vunene bya wena byi tele swinene, lebyi u byi vekeleke lava va ku chavaka!” (Pisalema 31:19) I yini leswi Yehovha a swi “vekeleke” vanhu lava n’wi chavaka?

Vunene Lebyi Yisaka eVuton’wini Lebyi Nga Heriki

12. I malunghiselelo wahi ya Yehovha lama nga ya nkoka swinene, naswona ha yini ma ri ya nkoka?

12 Yesu u te: “Ku tsariwile, ‘Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.’” (Matewu 4:4) Kunene, malunghiselelo ya Yehovha ya moya ma nga hi pfuna swinene ku tlula ya nyama, hikuva ma yisa evuton’wini lebyi nga heriki. Eka Ndzima 8 ya buku leyi, hi dyondze leswaku Yehovha u tirhise matimba yakwe yo vuyetela emasikwini lawa yo hetelela, leswaku a tumbuluxa paradeyisi ya moya. Xin’wana xa leswi endlaka leswaku paradeyisi leyi ya moya yi va kona i ndzalo ya swakudya swa moya.

13, 14. (a) Xana muprofeta Ezekiyele u vone yini exivonweni, sweswo swi vula yini eka hina namuntlha? (b) Hi wahi malunghiselelo ya moya lama hanyisaka lawa Yehovha a ma nyikaka malandza ya yena yo tshembeka?

13 Eka byin’wana bya vuprofeta bya le Bibeleni bya ku vuyetela lokukulu, muprofeta Ezekiyele u kombiwe xivono xa tempele leyi pfuxetiweke yi tlhela yi kwetsimisiwa. A ku ri ni xinambyana lexi a xi khuluka xi huma etempeleni, lexi a xi ya xi anama ni ku ya xi enta kukondza xi va “xinambyana lexikulu.” Kun’wana ni kun’wana laha a xi khuluka kona a xi pfuna vanhu. Etimbuweni ta xona a ku mile mirhi leyi a yi humesa mihandzu leyi hanyisaka. Xinambyana xolexo a xi endla leswaku ku va ni vutomi eLwandle ro Tshwuka leri nga ni munyu! (Ezekiyele 47:1-12) Kambe, xana sweswo hinkwaswo a a swi vula yini?

14 Xivono xexo a xi vula leswaku Yehovha u ta vuyetela lunghiselelo ra yena ra vugandzeri lebyi tengeke, hilaha byi fanekiseriwaka hakona hi tempele leyi Ezekiyele a yi voneke. Ku fana ni  xinambyana lexiya xa le xivonweni, malunghiselelo ya Xikwembu ya vutomi ma ta khulukela eka vanhu va xona hi vunyingi. Ku sukela loko ku vuyeteriwe vugandzeri byo tenga hi 1919, Yehovha u katekise vanhu va yena hi ku va nyika malunghiselelo lama hanyisaka. Njhani? Phela, Tibibele, tibuku leti sekeriweke eBibeleni, minhlangano ni mintsombano, hinkwaswo ka swona swi tirha ku phamela timiliyoni ta vanhu mintiyiso ya risima. Yehovha u tirhise swona leswaku a dyondzisa vanhu hi rin’wana ra malunghiselelo ya yena ya risima yo nyika vanhu vutomi—ku nga gandzelo ra nkutsulo ra Kreste, leri endlaka munhu a amukeleka eka Yehovha, ni ku endla leswaku vanhu hinkwavo lava rhandzaka Xikwembu ni ku xi chava, va kuma vutomi lebyi nga heriki. * Hikwalaho ke, emasikwini lawa ya makumu, hambileswi misava yi dlayiwaka hi ndlala ya moya, vanhu va Yehovha va tiphina hi ndzalo ya moya.—Esaya 65:13.

15. Xana vunene bya Yehovha byi ta khuluka hi ndlela yihi eka vanhu vo tshembeka enkarhini wa ku Fuma ka Kreste ka Gidi ra Malembe?

15 Kambe nambu wa le xivonweni xa Ezekiyele a wu tshiki ku khuluka loko mafambiselo lawa ya swilo ma hela. Ematshan’weni ya sweswo, wu ta hambeta wu khuluka swinene eku Fumeni ka Kreste ka Gidi ra Malembe. Kutani ke, hi ku tirhisa Mfumo wa Mesiya, Yehovha u ta tirhisa gandzelo ra Yesu hi xitalo, u ta endla leswaku vanhu lavo tshembeka va ya va hetiseka hakantsongo-ntsongo. Mawaku ndlela leyi hi nga ta khana ha yona loko hi vona vunene bya Yehovha!

Timfanelo Tin’wana Leti Fambisanaka Ni Vunene Bya Yehovha

16. Xana Bibele yi swi kombisa njhani leswaku vunene bya Yehovha byi ni timfanelo tin’wana, naswona hi tihi tin’wana ta tona?

16 Vunene bya Yehovha byi katsa swin’wana handle ka ku hanana. Xikwembu xi byele Muxe xi ku: “Mina ndzi ta endla leswaku vunene bya mina hinkwabyo byi hundza emahlweni ka xikandza xa wena, naswona ndzi ta vula vito ra Yehovha emahlweni  ka wena.” U ye emahlweni a ku: “Yehovha a hundza emahlweni ka xikandza xakwe, a vula a ku: ‘Yehovha, Yehovha, Xikwembu xa tintswalo ni nsovo, la hlwelaka ku hlundzuka, la teleke musa wa rirhandzu ni ntiyiso.’” (Eksoda 33:19; 34:6) Hikwalaho, vunene bya Yehovha byi ni timfanelo to tala letinene. A hi xiyeni timbirhi ntsena.

17. Xana nsovo i yini naswona Yehovha u wu kombise njhani eka vanhu lava nga hetisekangiki?

17 “Nsovo.” Mfanelo leyi yi hi byela swo tala mayelana ni ndlela leyi Yehovha a khomaka swivumbiwa swa yena ha yona. Ematshan’weni yo kariha kumbe ku va makhonya, hilaha vanhu lava nga ni vulawuri ehenhla ka van’wana va endlaka ha kona, Yehovha u ni musa. Hi xikombiso, Yehovha u byele Abrama a ku: “Ndzi kombela u tlakusa mahlo ya wena, u languta tlhelo ra n’walungu ni tlhelo ra dzonga ni tlhelo ra vuxa ni tlhelo ra vupela-dyambu endhawini leyi u nga eka yona.” (Genesa 13:14) Vuhundzuluxeri byo tala byi siya marito lama nge “ndzi kombela.” Kambe swidyondzi swa Bibele swi vula leswaku marito lama nga eka Xiheveru xo sungula ma katsa rito rin’wana leri cincaka xiga xexo xi nga ha twali xi ri ndzeriso kambe xi va xikombelo. Ku na swiga swin’wana swo fana ni xexo. (Genesa 31:12; Ezekiyele 8:5) Anakanya hi Hosi ya vuako hinkwabyo yi ri karhi yi ku ‘ndza kombela,’ eka munhu la nga lo endliwa hi ntshuri! Emisaveni leyi yi taleke hi vanhu va vukarhi ni tihanyi, xana a swi phyuphyisi ku anakanyisisa hi nsovo wa Yehovha Xikwembu xerhu?

18. Yehovha hi “la teleke . . . ntiyiso” hi ndlela yihi, naswona ha yini marito lawa ma tiyisa nhlana?

18 “La teleke . . . ntiyiso.” Namuntlha vukanganyisi byi tolovelekile evanhwini. Kambe Bibele ya hi tsundzuxa: “Xikwembu a xi fani ni munhu leswaku xi nga hemba.” (Tinhlayo 23:19) Kahle-kahle, Tito 1:2 yi vula leswaku ‘Xikwembu a xi hembi.’ Vululami bya xona a byi fambisani ni ku hemba. Xisweswo, switshembiso swa Yehovha swa tshembeka swinene; marito yakwe ma ta hetiseka. Nakambe Yehovha u vitaniwa “Xikwembu xa ntiyiso.” (Pisalema 31:5) A nga papalati mavunwa ntsena kambe u tlhela a paluxa ntiyiso hi xitalo. A nga tlangi xitumbelelana kumbe ku tumbeta timhaka; kambe u tirhisa vutlharhi byakwe lebyikulu  leswaku a voningela malandza yakwe yo tshembeka. * U tlhela a va dyondzisa ku hanya hi ku pfumelelana ni ntiyiso lowu a va paluxelaka wona leswaku va ta kota ku ‘hambeta va famba entiyisweni.’ (3 Yohane 3) Kutani ke, xana vunene bya Yehovha byi fanele byi n’wi khumba njhani un’wana ni un’wana wa hina?

“Va Vangama Hikwalaho Ka Vunene Bya Yehovha”

19, 20. (a) Sathana u endle njhani leswaku Evha a kanakana vunene bya Yehovha, naswona vuyelo byi ve byihi? (b) Vunene bya Yehovha byi fanele byi hi khumba njhani, naswona ha yini?

19 Loko Sathana a ringa Evha entangeni wa Edeni, u tirhise vuxisi byo tsokombela leswaku a n’wi endla a kanakana vunene bya Yehovha. Yehovha u byele Adamu a ku: “U nga ha tidyela u eneriseka eka murhi wun’wana ni wun’wana wa ntanga.” Eka magidi ya mirhi leyi a yi bombise ntanga wolowo, a ko va wun’we ntsena lowu Yehovha a a wu yirisile. Kambe, xiya ndlela leyi Sathana a xi lungeke ha yona xivutiso xakwe loko a vutisa Evha: “Xana hakunene i ntiyiso leswaku Xikwembu xi vule leswaku mi nga tshuki mi dya eka murhi wun’wana ni wun’wana wa ntanga?” (Genesa 2:9, 16; 3:1) Sathana u soholote leswi vuriweke hi Yehovha, leswaku a endla Evha a ehleketa leswaku Yehovha u va tsona swin’wana swa kahle. Lexi twisaka ku vava, rhengu rakwe ri tirhile. Ku fana ni vavanuna ni vavasati vo tala lava veke kona endzhaku ka yena, Evha u sungule ku kanakana vunene bya Xikwembu, lexi n’wi nyikeke hinkwaswo leswi a a ri na swona.

20 Ha wu tiva nhlomulo ni mbitsi lowu vangiweke hi ku kanakana koloko. Kutani ke, a hi yingiseni swinene marito ya Yeremiya 31:12 lama nge: “Kunene . . . va [ta] vangama hikwalaho ka vunene bya Yehovha.” Kunene vunene bya Yehovha byi fanele byi hi endla hi tshama hi tsakile. A hi fanelanga hi kanakana Xikwembu xa hina, lexi xi nga ni vunene lebyikulu. Hi fanele hi xi tshemba hilaha ku heleleke, hikuva lava va xi rhandzaka xi va navelela leswinene.

21, 22. (a) Hi tihi tindlela tin’wana leti hi nga kombisaka ha tona leswaku ha byi tlangela vunene bya Yehovha? (b) Hi yihi mfanelo leyi hi nga ta dyondza ha yona eka ndzima leyi landzelaka, naswona yi hambana njhani ni mfanelo ya vunene?

 21 Ku tlula kwalaho, ha tsaka loko hi kota ku byela van’wana hi vunene bya Xikwembu. Pisalema 145:7 yi vula leswi mayelana ni vanhu va Yehovha: “Va ta vulavula hi vunene bya wena byo tala.” Siku rin’wana ni rin’wana ha vuyeriwa eka vunene bya Yehovha. Ha yini hi nga titoloveti ku nkhensa Yehovha siku ni siku hikwalaho ka vunene byakwe, hi boxa swilo leswi a hi endleleke swona hi ku kongoma? Loko ho anakanya hi vunene bya Yehovha, hi n’wi nkhensa siku ni siku hikwalaho ka byona, ni ku byela van’wana ha byona, sweswo swi ta hi pfuna leswaku hi tekelela Xikwembu xa hina lexinene. Loko hi ri karhi hi lava tindlela ta ku endla leswinene, hilaha Yehovha a endlaka hakona, hi ta ya hi tshinela swinene eka yena. Muapostola Yohane u tsarile: “Murhandziwa, vana mutekeleri wa leswi nga swinene, kambe ku nga ri wa leswo biha. Loyi a endlaka leswinene u huma eka Xikwembu.”—3 Yohane 11.

22 Vunene bya Yehovha byi tlhela byi fambisana ni timfanelo tin’wana. Hi xikombiso, Xikwembu xi ‘tele hi musa wa rirhandzu ni ntiyiso,’ kumbe rirhandzu ro tshembeka. (Eksoda 34:6) Ku hambana ni vunene, mfanelo leyi a yi kombisiwi mani na mani, hikuva Yehovha u yi kombisa ngopfu-ngopfu eka malandza yakwe yo tshembeka. Eka ndzima leyi landzelaka, hi ta dyondza ndlela leyi a yi kombisaka ha yona.

^ ndzim. 14 A ku na xikombiso xin’wana lexikulu xa vunene bya Yehovha lexi tlulaka nkutsulo. Eka timiliyoni hinkwato ta swivumbiwa swa moya leswi a a ta hlawula eka swona, Yehovha u hlawule N’wana wakwe la rhandzekaka, loyi a nga un’we, leswaku a hi fela.

^ ndzim. 18 Swa fanela leswi Bibele yi hlanganisaka ntiyiso ni ku vonakala. Mupisalema u yimbelerile a ku: “Rhumela ku vonakala ka wena ni ntiyiso wa wena.” (Pisalema 43:3) Lava lavaka ku dyondzisiwa kumbe ku voningeriwa, Yehovha u va nyika ku vonakala lokukulu ka moya.—2 Vakorinto 4:6; 1 Yohane 1:5.

DYONDZA SWO TALA

Xikwembu Xi “Tata Timbilu Ta” Hina

Siku ni siku xi pfumelela vanhu—hambi ku ri lava nga xi nkhensiki—leswaku va vuyeriwa hi vunene bya xona lebyikulu.