Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 28

“Hi Wena Ntsena U Tshembekeke”

“Hi Wena Ntsena U Tshembekeke”

1, 2. Ha yini ku nga vuriwaka leswaku Hosi Davhida a a swi tiva leswaku ku nga tshembeki i nchumu wa njhani?

HOSI DAVHIDA a a swi tiva leswaku ku nga tshembiki i nchumu wa njhani. Nkarhi wun’wana mfumo wakwe lowu ana se a wu tsekatseka, wu lave ku wisiwa hi vanhu va tiko rakwe lava n’wi dyeleke xikungu. Ku tlula kwalaho, Davhida u xengiwe hi van’wana va lava hi nga va tekaka va ri vanghana va yena va le kusuhi. Anakanya hi nsati wa yena wo sungula Mikala. Eku sunguleni, “a a rhandzana na Davhida,” a swi kanakanisi leswaku a a n’wi seketela eka vuhosi byakwe. Hambiswiritano, endzhakunyana “hiloko a sungula ku n’wi langutela ehansi embilwini yakwe,” a teka Davhida tanihi “un’wana wa vavanuna lava kalaka dzano.”—1 Samuwele 18:20; 2 Samuwele 6:16, 20.

2 Kutani a ku ri ni mutsundzuxi wa Davhida la vitaniwaka Ahitofele. Ndzayo ya yena a yi xiximiwa, yi tekiwa onge hi loko yi huma eka Yehovha hi ku kongoma. (2 Samuwele 16:23) Hambiswiritano, hi ku famba ka nkarhi, munghana loyi lonkulu u hundzuke muxengi kutani a fambisana ni ntlawa lowu a wu pfukela Davhida. I mani loyi a sunguleke xikhiri lexi? I Absalomu, n’wana wa Davhida! Muxengi yoloye a a “koka timbilu ta vanhu va Israyele,” a tiendla hosi leyi nga riki enawini. Xikhiri xa Absalomu xi ye xi nyanya ku biha lerova Hosi Davhida a boheka ku hlanula swirhendze.—2 Samuwele 15:1-6, 12-17.

3. I yini leswi Davhida a a tiyiseka ha swona?

3 Xana a nga kona ni un’we loyi a saleke a ha tshembeka eka Davhida? Eka swiphiqo hinkwaswo leswi a langutaneke na swona, Davhida a a swi tiva leswaku u kona loyi a ha tshembekaka eka yena. I mani? A nga va mani un’wana handle ka Yehovha Xikwembu. Davhida u vule leswi malunghana na Yehovha: “U ta n’wi endla hi vutshembeki loyi a tshembekeke.” (2 Samuwele 22:26) Ku tshembeka i yini, naswona Yehovha u veka xikombiso lexi tlakukeke ku tlula hinkwaswo hi ndlela yihi?

 Ku Tshembeka I Yini?

4, 5. (a) “Ku tshembeka” swi vula yini? (b) Xana ku tshembeka loku kombisiwaka hi swilo leswi nga hanyiki ku hambana njhani ni ku tshembeka loku kombisiwaka hi munhu?

4 Hi ku ya hi Matsalwa ya Xiheveru, rito leri nge “ku tshembeka”, ri vula musa lowu kombisiwaka munhu kumbe nchumu wo karhi hi ku helela. Munhu la tshembekeke u ni rirhandzu. * Lexi tsakisaka, mupisalema u vula leswaku n’weti i “mbhoni yo tshembeka exibakabakeni,” hikwalaho ka leswi wu tshamaka wu ri kona ni vusiku. (Pisalema 89:37) Eka mongo lowu, n’weti wa tshembeka. Kambe n’weti a wu nge tshembeki ku fana ni ndlela leyi munhu a tshembekaka ha yona. Ha yini? Hikuva ku tshembeka loku kombisiwaka hi munhu ku fambisana ni rirhandzu—ku nga nchumu lowu swilo leswi nga hanyiki swi nga swi kotiki ku wu kombisa.

N’weti wu vitaniwa mbhoni yo tshembeka, kambe i vanhu ni tintsumi ntsena lava nga kombisaka vutshembeki hilaha Yehovha a byi kombisaka ha kona

5 Hi ku ya hi Matsalwa, ku tshembeka loku, ku fambisana ni ntwela-vusiwana. Ndlela leyi ku tshembeka loku ku tivonakarisaka ha yona, yi kombisa leswaku ku ni vuxaka byo karhi exikarhi munhu loyi a kombisaka mfanelo leyi ni loyi a kombiwaka yona. Vutshembeki lebyi byi tshama byi ri kona. A byi fani ni magandlati ya lwandle lama biwaka hi moya ma ya hala ni hala. Ku  hambana ni sweswo, vutshembeki lebyi kumbe rirhandzu leri ro tshembeka, ra khomelela naswona ri ni matimba yo langutana ni swihinga leswikulu swinene.

6. (a) Xana vutshembeki exikarhi ka vanhu byi pfumaleka ku fikela kwihi naswona leswi swi kombisiwa njhani eBibeleni? (b) Hi yihi ndlela leyinene yo tiva leswi vutshembeki byi vulaka swona, naswona ha yini?

6 Ina, vutshembeki bya pfumaleka namuntlha. Hakanyingi, vanghana lavakulu va ‘tshovelelana.’ Swi tolovelekile ku twa leswaku vatekani va thalanile. (Swivuriso 18:24; Malakiya 2:14-16) Vukanganyisi byi tele swinene lerova hi nga ha tikuma hi vula marito yo fana ni ya muprofeta Mikiya lama nge: “Lowo tshembeka u lovile emisaveni.” (Mikiya 7:2) Hambileswi vanhu hakanyingi va tsandzekaka ku kombisa tintswalo, Yehovha yena u tshama a tshembekile. Kahle-kahle, ndlela leyinene yo tiva leswi vutshembeki byi vulaka swona i ku kambisisa ndlela leyi Yehovha a yi kombisaka ha yona mfanelo leyi fambisanaka ni rirhandzu ra yena.

Vutshembeki Bya Yehovha Lebyi Nga Pimanisiwiki Na Nchumu

7, 8. Ha yini ku vuriwa leswaku Yehovha hi yena ntsena la tshembekeke?

7 Bibele loko yi vulavula hi Yehovha yi ri: “Hi wena ntsena u tshembekeke.” (Nhlavutelo 15:4) Swi kotekisa ku yini sweswo? Xana vanhu ni tintsumi a va ku kombisanga ku tshembeka loku xiyekaka? (Yobo 1:1; Nhlavutelo 4:8) Ku vuriwa yini hi Yesu? Xana a hi “la tshembekeke” wa Xikwembu? (Pisalema 16:10) Kutani ke, ha yini ku vuriwa leswaku Yehovha hi yena ntsena la tshembekeke?

8 Xo sungula, tsundzuka leswaku vutshembeki byi fambisana ni rirhandzu. Tanihi leswi ‘Xikwembu ku nga rirhandzu’—naswona i ximunhuhatwa xa mfanelo leyi—xana u kona la nga kombisaka vutshembeki hi ndlela leyi hetisekeke ku tlula Yehovha? (1 Yohane 4:8) Tintsumi ni vanhu va nga ti kombisa timfanelo ta Xikwembu hi mpimo wo karhi, kambe i Yehovha ntsena la tshembekaka hi mpimo lowukulu swinene. Leswi a nga “Nkulukumba wa Masiku,” u hete nkarhi wo leha ku tlula swivumbiwa hinkwaswo, swa la misaveni ni swa le tilweni, a ri karhi a kombisa mfanelo leyi. (Daniyele 7:9) Hikwalaho, Yehovha i ximunhuhatwa xa ku  tshembeka. U kombisa mfanelo ya yena hi ndlela leyi nga faniki ni ya xivumbiwa xihi ni xihi. Xiya swikombiso leswi landzelaka.

9. Yehovha “wa tshembeka emintirhweni yakwe hinkwayo” hi ndlela yihi?

9 Yehovha “wa tshembeka emintirhweni yakwe hinkwayo.” (Pisalema 145:17) Hi ndlela yihi? Pisalema 136 ya hlamula. Eka yona ku longoloxiwe mintirho ya Yehovha yo ponisa, ku katsa ni ku ponisiwa ka Vaisrayele hi ndlela yo hlamarisa eLwandle ro Tshwuka. Lexi xiyekaka, ndzimana yin’wana ni yin’wana ya pisalema leyi yi kandziyisa xiga lexi nge: “Hikuva musa wakwe wa rirhandzu [kumbe ku tshembeka] i wa hilaha ku nga riki na makumu.” Pisalema leyi yi kona eka Swivutiso Swo Gayela Ha Swona leswi nga eka tluka 289. Loko u ri karhi u hlaya tindzimana toleto, u ta hlamala ku vona tindlela to tala leti Yehovha a kombiseke vanhu vakwe musa wa rirhandzu ha tona. Ina, Yehovha u kombisa musa wa yena wa rirhandzu hi ku yingisa ni ku teka goza hi nkarhi lowu faneleke, loko malandza yakwe yo tshembeka ma kombela mpfuno. (Pisalema 34:6) Rirhandzu ro tshembeka leri Yehovha a nga na rona eka malandza ya yena a ri tsekatseki, loko ntsena ma tshama ma tshembekile eka yena.

10. Yehovha u ku kombisa njhani ku tshembeka malunghana ni mimpimanyeto ya yena?

10 Ku engetela kwalaho, Yehovha u kombisa ku tshembeka eka malandza ya yena hi ku namarhela mimpimanyeto yakwe. Ku hambana ni vanhu lava phewaka, lava biwaka hi moya va ya hala ni hala, Yehovha a nga phewi, loko ku tiwa emhakeni leyi khumbaka leswi lulameke ni leswi hoxeke. Ndlela leyi a byi langutaka ha yona vungoma, ku gandzela swikwembu swa hava ni ku dlaya, a yi cincanga ku ta fikela namuntlha. “Hambiloko munhu a ri emalembeni ya vudyuhari, ndza ha ri Mina,” u vule marito lawa hi ku tirhisa muprofeta wakwe Esaya. (Esaya 46:4) Hikwalaho, hi nga tiyiseka leswaku hi ta vuyeriwa loko hi landzelela nkongomiso wa mahanyelo lowu andlariweke eRitweni ra Xikwembu.—Esaya 48:17-19.

11. Nyika swikombiso swa leswaku Yehovha wa swi hetisisa switshembiso swa yena.

11 Nakambe, Yehovha u kombisa musa wakwe wa rirhandzu hi ku hetisisa leswi a swi tshembiseke. Loko a vule xo karhi, xa  endleka. Xisweswo Yehovha u te: “Rito ra mina leri humaka enon’wini wa mina . . . a ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.” (Esaya 55:11) Yehovha u kombisa ku tshembeka ka yena hi ku hetisisa leswi a swi tshembiseke. A nga va tshiki va langutela nchumu wo karhi hi mahlo-ngati a ri karhi a swi tiva leswaku a wu nge hetiseki. Yehovha wa tshembeka swinene emhakeni leyi lerova nandza wakwe Yoxuwa u swi kotile ku vula a ku: “Ku hava xitshembiso lexi tsandzekeke eka switshembiso hinkwaswo leswinene leswi Yehovha a swi tshembiseke yindlu ya Israyele; hinkwaswo swi hetisekile.” (Yoxuwa 21:45) Kutani ke, hi nga tiyiseka leswaku a swi nge endleki leswaku Yehovha a nga swi hetisisi switshembiso swa yena.—Esaya 49:23; Varhoma 5:5.

12, 13. Xana musa wa Yehovha wa rirhandzu “i wa hilaha ku nga riki na makumu” hi tindlela tihi?

12 Hilaha hi swi voneke ha kona eku sunguleni, Bibele yi hi byela leswaku musa wa Yehovha wa rirhandzu “i wa hilaha ku nga riki na makumu.” (Pisalema 136:1) Swi endlekisa ku yini sweswo? Hikuva Yehovha u rivalela a tlhela a rivala. Hilaha swi hlamuseriweke hakona eka Ndzima 26, loko a rivalele munhu swidyoho swakwe, Yehovha a nga ha tlheli a swi pfuxa. Hikuva “hinkw[erhu hi] dyohile, naswona [hi] kayivela ku vangama ka Xikwembu,” xisweswo, un’wana ni un’wana wa hina u fanele a tsaka leswi musa wa Yehovha wa rirhandzu wu tshamaka hi masiku.—Varhoma 3:23.

13 Kambe ku ni ndlela yin’wana leyi musa wa Yehovha wa rirhandzu wu tshamaka hi masiku ha yona. Rito ra yena ri vula leswaku lowo lulama “u ta fana ni murhi lowu byariweke etlhelo ka swinambyana swa mati, lowu humesaka mbhandzu wa wona hi nguva ya kona, lowu switluka swa wona swi nga vuniki, hinkwaswo leswi a swi endlaka swi ta humelela.” (Pisalema 1:3) Anakanya hi murhi lowukulu lowu matluka ya wona ma nga vuniki! Kutani loko na hina ho ri tsakela swinene Rito ra Xikwembu, hi ta hanya vutomi byo leha, lebyi nga ni ku rhula ni lebyi vekaka mihandzu. Mikateko leyi Yehovha a yi nyikaka malandza ya yena yo tshembeka i ya hilaha ku nga heriki. Ina, emisaveni leyintshwa yo lulama leyi Yehovha a nga ta yi tisa, vanhu lava yingisaka  va ta kombisiwa musa wa yena wa rirhandzu hilaha ku nga heriki.—Nhlavutelo 21:3, 4.

Yehovha “A Nge Va Siyi Lava Tshembekeke Vakwe”

14. Xana Yehovha u swi kombisa njhani leswaku wa ku tsakela ku tshembeka ka malandza yakwe?

14 Yehovha u kombise ku tshembeka ka yena hi ku phindha-phindha. Leswi Yehovha a nga hundzukiki mavala, ku tshembeka loku a ku kombisaka malandza yakwe yo tshembeka a ku heli. Mupisalema u tsarile: “A ndzi ri jaha, kambe se ndzi dyuhele, kambe a ndzi si tshama ndzi vona munhu la lulameke a tshikiwa hi ku helela, hambi ku ri vana vakwe va lava xinkwa. Hikuva Yehovha u rhandza vululami, naswona a nge va siyi lava tshembekeke vakwe.” (Pisalema 37:25, 28) Ina, swa fanela leswaku hi gandzela Yehovha, hikuva i Muvumbi. (Nhlavutelo 4:11) Hambiswiritano, leswi a tshembekeke, Yehovha wa yi tsakela mintirho ya hina leyi kombisaka ku tshembeka.—Malakiya 3:16, 17.

15. Hlamusela leswaku ndlela leyi Yehovha a khomeke Vaisrayele ha yona yi ku kombisa njhani ku tshembeka ka Yena.

15 Hikwalaho ka musa wa yena wa rirhandzu, Yehovha hi ku phindha-phindha u pfuna vanhu vakwe loko va ri emahlomulweni. Mupisalema wa hi byela: “U rindza mimoya-xiviri ya lava tshembekeke vakwe; wa va kutsula evokweni ra lavo homboloka.” (Pisalema 97:10) Anakanya hi ndlela leyi a khomeke tiko ra Israyele ha yona. Endzhaku ka loko va kutsuriwe hi ndlela yo hlamarisaka eLwandle ro Tshwuka, Vaisrayele va yimbelelele Yehovha risimu va ku: “Wena hi musa wa wena wa rirhandzu [kumbe, “rirhandzu ro tshembeka”] u rhangele vanhu lava u va kutsuleke.” (Eksoda 15:13) Hakunene ku kutsuriwa ka vona eLwandle ro Tshwuka a ku ri xikombiso xa leswaku rirhandzu ra Yehovha ra tshembeka. Hikokwalaho Muxe u byele Vaisrayele a ku: “A ku nga ri hikwalaho ka ku va mi ri vanhu vo tala ku tlula vanhu hinkwavo leswi Yehovha a endleke xinakulobye na n’wina, lerova a mi hlawula, hikuva a mi ri nhlayo leyitsongo eka vanhu hinkwavo. Kambe a ku ri hikwalaho ka leswi Yehovha a a mi rhandza, ni hikwalaho ka leswi a hlayiseke marito yakwe yo hlambanya lawa a ma hlambanyeleke vatata wa n’wina, leswi endleke leswaku Yehovha a mi humesa hi voko ra matimba, leswaku a ta mi kutsula endlwini  ya mahlonga, evokweni ra Faro hosi ya Egipta.”—Deteronoma 7:7, 8.

16, 17. (a) I yini lexi kombisaka leswaku Vaisrayele a va nga tlangeli, naswona Yehovha u va kombise njhani ntsetselelo wa yena? (b) Xana Vaisrayele vo tala va swi kombise njhani leswaku ‘a va nga ta tshunguleka,’ naswona hi xihi xilemukiso lexi hina hi xi kumaka eka leswi?

16 Ina, Vaisrayele va tsandzekile ku kombisa ku tlangela ka vona musa wa Yehovha wa rirhandzu, hikuva endzhaku ka ku kutsuriwa ka vona “va hambet[e] va [n’wi] dyohela hilaha ku engetelekeke hi ku xandzukela La nge Henhla-henhla.” (Pisalema 78:17) Ku hele malembe-xidzana yo tala, va ri karhi va n’wi xandzukela hi ku phindha-phindha, va tshika Yehovha va ya gandzela swikwembu swa mavunwa ni ku landzelela mikhuva ya vuhedeni leyi va endleke va nyama. Hambiswiritano, Yehovha a nga wu herisanga ntwanano wakwe na vona. Ematshan’weni ya sweswo, Yehovha u kombele vanhu vakwe hi ku tirhisa muprofeta Yeremiya, a ku: “Vuya, Wena Israyele wo xandzuka. . . . A ndzi nge tshiki xikandza xa mina xi mi hlundzukela, hikuva ndza tshembeka.” (Yeremiya 3:12) Hambiswiritano, hi laha hi swi voneke ha kona eka Ndzima 25, Vaisrayele vo tala va swi be hi makatla. Hakunene, “a va ya emahlweni va monya varhumiwa va Xikwembu xa ntiyiso ni ku ma langutela ehansi marito yakwe ni ku vungunya vaprofeta vakwe.” Vuyelo byi ve byihi? Eku heteleleni, “vukarhi bya Yehovha byi wela vanhu vakwe, ku nga ha vi na ku tshunguriwa.”—2 Tikronika 36:15, 16.

17 Hi dyondza yini eka leswi? Leswaku ku tshembeka ka Yehovha a ku kombisiwi mani na mani. Ina, Yehovha hi “la teleke musa wa rirhandzu ni ntiyiso,” naswona wa swi tsakela ku kombisa tintswalo loko ku ri ni xivangelo xo endla tano. Kambe ku humelela yini loko mudyohi a sihalala evubihini byakwe? Emhakeni yo tano, Yehovha u namarhela mimpimanyeto ya yena yo lulama kutani a humesa nxupulo. Hi laha Muxe a byeriweke ha kona, “[Yehovha] a nga ka a nga tshiki ku xupula.”—Eksoda 34:6, 7.

18, 19. (a) Xana ku xupuriwa ka vanhu lavo homboloka ku swi kombisa njhani leswaku Yehovha wa tshembeka? (b) Xana Yehovha u ta ku kombisa njhani ku tshembeka kakwe eka malandza yakwe lama xanisiweke kukondza ma fa?

18 Loko Xikwembu xi xupula vanhu lavo biha xi va xi kombisa  ku tshembeka. Njhani? Xikombiso xin’wana xi kumeka ebukwini ya Nhlavutelo, eka swileriso leswi Yehovha a swi byelaka tintsumi ta nkombo: “Fambani mi ya chulula minkambana ya nkombo ya ku hlundzuka ka Xikwembu emisaveni.” Loko ntsumi ya vunharhu yi chulula nkambana wa yona “emilambyeni ni le minseledyaneni ya mati,” kava loko yi hundzuka ngati. Kutani ntsumi yi byela Yehovha yi ku: “Wena, Loyi a nga kona ni loyi a a ri kona, Mutshembeki, u lulamile, hikuva u endle swiboho leswi, hikuva va halate ngati ya vakwetsimi ni ya vaprofeta, kutani u va nyike ngati va nwa. Swi va lulamerile.”—Nhlavutelo 16:1-6.

Hikwalaho ka ku tshembeka ka yena, Yehovha u ta va tsundzuka vanhu lava feke va ri lava tshembekeke eka yena naswona u ta va pfuxa

19 Xiya leswaku loko ntsumi yi ri karhi yi vula rungula leri ra ku avanyisa, yi vula leswaku Yehovha i “Mutshembeki.” Hikwalaho ka yini? Hikuva loko a herisa vanhu vo homboloka, Yehovha u va a kombisa leswaku wa tshembeka eka malandza ya yena, lawa yo tala ya wona ma xanisiweke kukondza ma fa. Hi ku tshembeka, Yehovha a nga va rivali vanhu vo tano. U navela ku tlhela a va vona vanhu lava vo tshembeka, naswona Bibele ya hi tiyisekisa leswaku u tiyimisele ku va hakela hi ku va pfuxa eku feni. (Yobo 14:14, 15) Yehovha a nga ma rivali malandza ya yena yo tshembeka hambiloko ma file. Ku hambana ni sweswo, “eka [yena] hinkwavo va hanya.” (Luka 20:37, 38) Xikongomelo xa Yehovha xo  pfuxa lava a va tsundzukaka, i vumbhoni lebyi tiyeke lebyi kombisaka leswaku wa tshembeka.

Bernard Luimes (eximatsini) na Wolfgang Kusserow (exikarhi) va dlayiwe hi Manazi

Moses Nyamussua (exineneni) u tlhaviwe hi fumu a fa, hi vandla ra swa tipolitiki

Rirhandzu Ra Yehovha Ro Tshembeka Ri Hi Pfulela Ndlela Yo Kuma Ku Pona

20. “Swibya swa tintswalo” i vamani naswona Yehovha u kombisa njhani leswaku wa tshembeka eka swona?

20 Ematin’wini hinkwawo, Yehovha u kombise ku tshembeka lokukulu eka vanhu vo tshembeka. Kahle-kahle, eka magidi ya malembe lama hundzeke, Yehovha u swi “tiyiselele hi mbilu yo leha swinene swibya swa vukarhi leswi endliweke swi faneriwa hi ku lovisiwa.” Ha yini? “Leswaku [a] ta tivisa ku fuwa ka ku vangama ka [yena] ehenhla ka swibya swa tintswalo, leswi [a] swi lunghiseleleke ka ha ri emahlweni leswaku swi va ni ku vangama.” (Varhoma 9:22, 23) ‘Swibya leswi swa tintswalo’ i vanhu lavanene lava totiweke hi moya wo kwetsima leswaku va va vadya-ndzhaka swin’we na Kreste eMfun’weni wakwe. (Matewu 19:28) Hi ku pfula  ndlela yo ponisa swibya leswi swa tintswalo, Yehovha u tshame a tshembekile eka Abrahama, loyi a endleke ntwanano lowu wa xitshembiso na yena: “Tinxaka hinkwato ta misava ti ta tikatekisa hi mbewu ya wena hikwalaho ka leswi u yingiseke rito ra mina.”—Genesa 22:18.

Hikwalaho ka ku tshembeka ka Yehovha, malandza ya yena hinkwawo yo tshembeka ma tiyiseka hi vumundzuku bya wona

21. (a) Xana Yehovha u byi kombisa njhani vutshembeki eka “ntshungu lowukulu” lowu nga ni ntshembo wo pona “nhlomulo lowukulu”? (b) Xana ku tshembeka ka Yehovha ku ku susumetela leswaku u endla yini?

21 Yehovha u kombisa vutshembeki byo tano eka “ntshungu lowukulu” lowu nga ni ntshembo wo pona “nhlomulo lowukulu” ni wa ku hanya hilaha ku nga heriki emisaveni ya paradeyisi. (Nhlavutelo 7:9, 10, 14) Hambileswi malandza yena ma nga hetisekangiki Yehovha u ma nyika lunghelo ro hlawula ku hanya hi laha ku nga heriki eparadeyisini ya laha misaveni. Xana u swi endla njhani sweswo? Hi ku tirhisa nkutsulo—ku nga xikombiso lexikulu xa vutshembeki bya Yehovha. (Yohane 3:16; Varhoma 5:8) Vutshembeki bya Yehovha byi tsakeriwa hi lava timbilu ta vona ti navelaka vululami. (Yeremiya 31:3) Xana a wu titwi u ri ekusuhi na Yehovha hikwalaho ka vutshembeki byo enta lebyi a byi kombiseke ni lebyi a nga ta byi kombisa enkarhini lowu taka? Tanihi leswi hi navelaka ku tshinela ekusuhi ni Xikwembu, a hi kombiseni leswaku ha ri amukela rirhandzu ra xona, hi ku tiyimisela ku xi tirhela hi vutshembeki.

^ ndzim. 4 Lexi tsakisaka, rito leri hundzuluxeriweke va ku “ku tshembeka” eka 2 Samuwele 22:26, kun’wana ri hundzuluxeriwe va ku “musa wa rirhandzu” kumbe “rirhandzu ro tshembeka.”

DYONDZA SWO TALA

Ti Tlangele Swinene Timfanelo Ta Yehovha

Swi vula yini ku ngheneka ni ku nga yi hi nghohe? Ku kambisisa xikombiso xa Yehovha Xikwembu swi ta hi pfuna ku kombisa timfanelo toleto.