Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 30

“Mi Hambeta Mi Famba eRirhandzwini”

“Mi Hambeta Mi Famba eRirhandzwini”

1-3. Xana ku humelela yini loko hi tekelela xikombiso xa Yehovha xo kombisa rirhandzu?

“KU NYIKA swi tisa ntsako lowukulu ku tlula ku amukela.” (Mintirho 20:35) Marito lawa ya Yesu ma kandziyisa ntiyiso lowu wa nkoka: Rirhandzu ro pfumala vutianakanyi ra vuyerisa. Hambileswi swi tsakisaka ku amukela rirhandzu, swa tsakisa swinene ku kombisa van’wana rirhandzu.

2 A nga kona loyi a tivaka leswi ku tlula Tata wa hina wa le tilweni. Hilaha hi swi voneke ha kona eka tindzima leti hundzeke ta xiyenge lexi, Yehovha hi yena a kombisaka rirhandzu hi ku hetiseka. A nga kona la kombiseke rirhandzu hi ndlela leyikulu kumbe nkarhi wo leha ku fana na yena. Kutani ke, a swi hlamarisi leswi Yehovha a vitaniwaka “Xikwembu lexi tsakeke.”—1 Timotiya 1:11.

3 Xikwembu xa hina lexi nga ni rirhandzu xi lava leswaku hi ringeta ku fana na xona, ngopfu-ngopfu loko swi ta emhakeni yo kombisa rirhandzu. Vaefesa 5:1, 2 yi hi byela leswi: “Leswi mi nga vana lava rhandzekaka, vanani vatekeleri va Xikwembu, mi hambeta mi famba erirhandzwini.” Loko hi tekelela xikombiso xa Yehovha xo kombisa rirhandzu, hi kuma ntsako lowukulu hikwalaho ko nyika. Nakambe ha eneriseka loko hi tiva leswaku Yehovha wa tsaka hi hina, hikuva Rito ra yena ri hi khutaza leswaku hi “rhandzana.” (Varhoma 13:8) Kambe ku ni swivangelo swin’wana leswi endlaka leswaku hi “hambeta [hi] famba erirhandzwini.”

Leswi Endlaka Rirhandzu Ri Va Ra Nkoka

4, 5. Ha yini swi ri swa nkoka leswaku hi rhangisa swilaveko swa vapfumeri-kulorhi?

4 Ha yini swi ri swa nkoka leswaku hi kombisa rirhandzu eka vapfumeri-kulorhi? Kahle-kahle, rirhandzu i nchumu wa nkoka eka Vukreste bya ntiyiso. Loko hi nga ri na rirhandzu a hi nge swi koti ku rhandza Vakreste-kulorhi, naswona a hi nge amukeleki eka Yehovha.  Xiya ndlela leyi Rito ra Xikwembu ri yi kandziyisaka ha yona mintiyiso leyi.

5 Eka vusiku bya yena byo hetelela loko a ha ri emisaveni, Yesu u byele valandzeri vakwe a ku: “Ndzi mi nyika xileriso lexintshwa, leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) “Tanihi leswi ndzi mi rhandzeke”—ina, hi lerisiwa leswaku hi kombisa musa wa rirhandzu lowu kombisiweke hi Yesu. Eka Ndzima 29 hi xiye leswaku Yesu u veke xikombiso lexinene ngopfu, xa ku rhangisa swilaveko swa van’wana. Na hina hi fanele hi kombisa rirhandzu ro pfumala vutianakanyi, naswona hi fanele hi swi endla swi huma embilwini lerova swi olova leswaku vanhu lava nga ehandle ka vandlha ra Vukreste va ri vona. Kunene rirhandzu ra vumakwerhu i mfungho lowu hi tiviwaka ha wona tanihi valandzeri va Kreste.

6, 7. (a) Hi swi tivisa ku yini leswaku Rito ra Yehovha ri kandziyisa nkoka wa ku kombisa rirhandzu? (b) Xana marito ya Pawulo lama tsariweke eka 1 Vakorinto 13:4-8 ma vulavula hi rirhandzu ra muxaka muni?

6 Ku vuriwa yini hi loko hi nga ri na rirhandzu? Muapostola Pawulo u te: “Loko ndzi . . . nga ri na rirhandzu, ndzi hundzuka xingelengele lexi baka pongo kumbe xiphambati lexi ketlaketlaka.” (1 Vakorinto 13:1) Xiphambati lexi ketlaketlaka xi ba pongo leri tingaka. Ku vuriwa yini hi xingelengele lexi baka pongo? Vuhundzuluxeri byin’wana byi ri, “pongo lerikulu” kumbe “pongo leri pfalaka tindleve.” Mawaku ku faneleka ka swifaniso leswi! Munhu la nga riki na rirhandzu u fana ni xichayachayana lexi baka pongo swinene, leri tingaka ri tlhela ri siringa. Munhu wo tano a nga tiphina njhani hi vuxaka lebyinene ni van’wana? Pawulo u tlhele a ku: “[Loko] ndzi ri ni ripfumelo leri hetisekeke, lerova ndzi nga simula ni ku simeka tintshava, kambe ndzi nga ri na rirhandzu, a ndzi nchumu.” (1 Vakorinto 13:2) Wa nga ehleketa, phela munhu loyi a nga riki na rirhandzu “a nga pfuni nchumu,” ku nga khathariseki mintirho leyi a nga ha yi endlaka! (The Amplified Bible) Xana a swi le rivaleni leswaku Rito ra Yehovha ri ri i swa nkoka ku kombisa rirhandzu?

7 Xana hi nga yi kombisa njhani mfanelo leyi eka ndlela leyi hi hanyisanaka ni van’wana ha yona? Leswaku hi hlamula xivutiso  lexi a hi kambisiseni marito ya Pawulo lama kumekaka eka 1 Vakorinto 13:4-8. Leswi kandziyisiwaka eka tindzimana leti a swi vulavuli hi ndlela leyi Xikwembu xi hi rhandzaka ha yona kumbe leswi hina hi xi rhandzisaka xiswona. Ematshan’weni ya sweswo, Pawulo u vulavula hi ndlela leyi hi faneleke hi rhandza van’wana ha yona. U hlamusele swilo swin’wana leswi rirhandzu ri nga swona ni leswi rirhandzu ri nga riki swona.

Leswi Rirhandzu Ri Nga Swona

8. Ku va ni mbilu yo leha swi nga hi pfuna njhani loko hi tirhisana ni van’wana?

8 Rirhandzu ri ni mbilu yo leha.” Ku va ni mbilu yo leha swi vula ku tiyiselela swihoxo swa van’wana. (Vakolosa 3:13) Xana a hi fanelanga hi lehisa mbilu? Leswi hi nga swivumbiwa leswi nga hetisekangiki leswi tirhaka swin’we, handle ko kanakana ku ta va ni minkarhi leyi Vakreste-kulorhi va nga ta hi kandziya swikunwana ivi na hina hi endla leswi fanaka eka vona. Kambe ku lehisa mbilu ku nga hi pfuna leswaku hi nga vi na mhaka na swona loko  van’wana va hi kandziya swikunwana—hi ta hlayisa ku rhula evandlheni.

9. Hi nga kombisa van’wana musa hi tindlela tihi?

9 “Rirhandzu ri ni . . . musa.” Musa wu kombisiwa hi ku tiyimisela ku pfuna ni hi marito lama lungiweke hi rirhandzu. Rirhandzu ri hi endla leswaku hi lava tindlela to kombisa musa, ngopfu-ngopfu eka lava pfumalaka. Hi xikombiso, mupfumeri-kulorhi loyi a kuleke, a nga ha va a ri ni xivundza naswona ku nga ha laveka leswaku a endzeriwa, a ta khutazeka. Manana loyi a nga swakwe kumbe makwerhu wa xisati loyi a nga endyangwini lowu hambaneke hi vukhongeri, a nga ha lava mpfuno wo karhi. Munhu loyi a vabyaka kumbe loyi a nga emaxangwini a nga ha lava ku twa marito lama chavelelaka yo huma eka munghana loyi a tshembekaka. (Swivuriso 12:25; 17:17) Loko hi va vo sungula ku kombisa musa hi tindlela teto, hi va hi kombisa leswaku rirhandzu ra hina i ra xiviri.—2 Vakorinto 8:8.

10. Xana rirhandzu ri hi pfuna njhani ku yima ni ntiyiso ni ku vulavula ntiyiso hambiloko swi nga olovi ku endla tano?

10 “Rirhandzu . . . ri tsaka ni ntiyiso.” Vuhundzuluxeri byin’wana byi ri: “Rirhandzu . . . ri yima ni ntiyiso.” Rirhandzu ri hi susumetela leswaku hi yima ni ntiyiso ni ku “vulavul[a] ntiyiso un’wana eka un’wana.” (Zakariya 8:16) Hi xikombiso, loko munhu loyi hi n’wi rhandzaka a endle xidyoho lexikulu, ku rhandza ka hina Yehovha—ni loyi a dyoheke—swi ta hi pfuna leswaku hi namarhela milawu ya Xikwembu ematshan’weni yo ringeta ku tumbeta, ku sasa kumbe ku hemba malunghana ni xidyoho lexi endliweke. Ina, swi nga ha tika ku pfumela ntiyiso wa mhaka. Kambe loko loyi hi n’wi rhandzaka hi n’wi navelela leswinene, hi ta lava leswaku a tshinyiwa hi ndlela ya Xikwembu ya rirhandzu naswona a yi amukela. (Swivuriso 3:11, 12) Tanihi Vakreste lava nga ni rirhandzu, na hina hi navela “ku tikhoma hi ku tshembeka eka swilo hinkwaswo.”—Vaheveru 13:18.

11. Leswi rirhandzu ‘ri byarhaka swilo hinkwaswo,’ xana hi fanele hi tikarhatela ku endla yini hi swihoxo swa vapfumeri-kulorhi?

11 “Rirhandzu . . . ri byarha swilo hinkwaswo.” Xiga lexi hi ku kongoma xi vula “swilo hinkwaswo leswi ri swi funengetaka.” (Kingdom Interlinear) Petro wo Sungula 4:8 yi ri: “Rirhandzu ri funengeta swidyoho swo tala.” Ina, Mukreste loyi a lawuriwaka hi  rirhandzu a nga tsakisiwi hi ku paluxa swihoxo ni ku tsana ka Vakreste-kulobye. Etimhakeni to tala, swihoxo swa vapfumeri-kulorhi a swi nyawuli naswona swi nga ha funengetiwa kunene hi rirhandzu.—Swivuriso 10:12; 17:9.

Rirhandzu ri hi susumetela ku tshemba vamakwerhu

12. Xana muapostola Pawulo u swi kombise njhani leswaku wa n’wi tshemba Filemoni, naswona hi nga dyondza yini eka xikombiso xa Pawulo?

12 “Rirhandzu . . ri kholwa swilo hinkwaswo.” Vuhundzuluxeri bya Moffatt byi ri, rirhandzu “minkarhi hinkwayo ri hisekela ku kholwa leswi nga swinene.” A hi ehleketeleli vapfumeri-kulorhi swo biha, hi handza timhaka tin’wana ni tin’wana ta vona. Rirhandzu ri hi pfuna “ku kholwa leswi nga swinene” mayelana ni vamakwerhu va hina ni ku va tshemba. * Xiya xikombiso lexi nga epapileni ra Pawulo leri yaka eka Filemoni. Pawulo a a ri tsalele ku khutaza Filemoni leswaku a amukela Onesima hlonga leri balekeke, loyi hi nkarhi wolowo se a ri Mukreste. Ematshan’weni yo sindzisa Filemoni, Pawulo u kombisane na yena hi rirhandzu. U byele Filemoni leswaku wa swi tiva leswaku u ta endla leswi faneleke a ku: “Ndza ku tsalela, hi ku tshemba ku yingisa ka wena, ndza swi tiva leswaku u ta endla ku tlula ni leswi ndzi swi vulaka.” (Ndzimana 21) Loko na hina rirhandzu ri hi susumetela ku byela vamakwerhu leswaku ha va tshemba va ta endla leswi nga ematimbeni ya vona.

13. Xana hi nga swi kombisa njhani leswaku hi ni ntshembo hi vamakwerhu va hina?

13 “Rirhandzu . . . ri va ni ntshembo eka swilo hinkwaswo.” Rirhandzu ri tshemba hinkwaswo naswona ri ni ntshembo. Rirhandzu ri hi susumetela ku va ni ntshembo malunghana ni vamakwerhu va hina. Hi xikombiso, loko makwerhu “a teka goza leri hoxeke a nga si swi lemuka,” hi va ni ntshembo wa leswaku u ta angula kahle eka matshalatshala yo n’wi ololoxa. (Vagalatiya 6:1) Hi tlhela hi va ni ntshembo wa leswaku lava tsaneke eripfumelweni va ta hlakarhela. Hi va lehisela mbilu vanhu vo tano, hi endla leswi hi nga swi kotaka leswaku hi va pfuna va tiya eripfumelweni. (Varhoma 15:1; 1 Vatesalonika 5:14) Hambiloko munhu loyi hi n’wi  rhandzaka a hambuka, a hi heleli hi ntshembo wa leswaku siku rin’wana u ta tianakanyisisa kutani a tlhelela eka Yehovha, ku fana ni n’wana wa vusopfa wa le xifanisweni xa Yesu.—Luka 15:17, 18.

14. Ku tiyisela ka hina ku nga ringiwa hi tindlela tihi evandlheni, naswona rirhandzu ri ta hi pfuna leswaku hi angula njhani?

14 “Rirhandzu . . . ri tiyisela swilo hinkwaswo.” Ku tiyisela ku hi endla hi yima hi tiyile loko hi langutane ni maxangu kumbe ku hetiwa matimba. Miringo a yi humi ntsena eka vanhu lava nga riki evandlheni. Minkarhi yin’wana, hi nga ha ringiwa hi vamakwerhu evandlheni. Hikwalaho ka ku nga hetiseki, vamakwerhu va hina minkarhi yin’wana va nga ha hi heta matimba. Marito lama tlhavaka ma nga ha hi vavisa swinene. (Swivuriso 12:18) Kumbexana mhaka yin’wana evandlheni a yi tameriwanga hi ndlela leyi a hi anakanya leswaku a yi fanele yi tamerisiwa xiswona. Mahanyelo ya makwerhu la xiximekaka ma nga ha hi khunguvanyisa, ma hi endla hi tivutisa leswaku ‘Ha yini Mukreste a endla swilo swo fana ni sweswo?’ Loko hi langutane ni swiyimo swo tano, xana hi ta tshika ku ta evandlheni ivi hi tshika ni ku tirhela Yehovha? Sweswo a swi nge humeleli loko hi ri ni rirhandzu hakunene! Ina, rirhandzu ri hi sivela ku pfilunganyiwa hi swihoxo swa makwerhu lerova hi nga ha voni nchumu lexinene eka yena kumbe evandlheni hinkwaro. Rirhandzu ri hi endla leswaku hi tshama hi tshembekile eka Xikwembu ni ku seketela vandlha, ku nga khathariseki leswi vanhu van’wana lava nga hetisekangiki va nga ha swi vulaka kumbe ku swi endla.—Pisalema 119:165.

Leswi Rirhandzu Ri Nga Riki Swona

15. Xana mavondzo i yini, naswona rirhandzu ri nga hi pfuna njhani leswaku hi papalata nchumu lowu, lowu nga ni khombo?

15 “Rirhandzu a ri na mavondzo.” Mavondzo ma nga hi endla leswaku hi vondzoka leswi van’wana va nga na swona—nhundzu ya vona, malunghelo kumbe vuswikoti bya vona. Mavondzo yo tano ma vangiwa hi vutianakanyi, ma ni khombo, naswona loko ma nga lawuriwi ma nga kavanyeta ku rhula ka vandlha. I yini leswi nga ta hi pfuna ku sivela “ku taleriwa hi mona”? (Yakobo 4:5) I rirhandzu. Mfanelo leyi ya risima yi nga hi endla leswaku hi tsaka ni lava hi vonaka onge swilo swi va fambela kahle ku tlula hina. (Varhoma 12:15) Rirhandzu ri hi pfuna leswaku hi  nga khunguvanyeki loko un’wana a bumabumeriwa hikwalaho ka vuswikoti kumbe nhluvuko wa yena.

16. Loko hi va rhandza hakunene vamakwerhu, hikwalaho ka yini hi fanele hi papalata ku tikurisa hi leswi hi swi endlaka entirhweni wa Yehovha?

16 “Rirhandzu . . . a ri tikurisi, a ri tikukumuxi.” Rirhandzu ri ta hi sivela ku bombisa vuswikoti bya hina kumbe mintirho ya hina. Loko hi va rhandza hakunene vamakwerhu, xana hi nga tshamela ku tikurisa hikwalaho ka leswi swi hi fambelaka kahle entirhweni wa nsimu, kumbe leswi hi nga ni malunghelo evandlheni? Ku tikukumuxa ko tano ku nga vavisa van’wana, ku va endla va titwa va ri vampheheleni. Rirhandzu a ri hi pfumeleli leswaku hi tikurisa hi leswi Xikwembu xi hi pfumelelaka leswaku hi swi endla entirhweni wa xona. (1 Vakorinto 3:5-9) Ku tlula kwalaho, rirhandzu “a ri tikukumuxi,” kumbe hilaha The New Testament in Modern English yi vulaka ha kona, a ri “endli munhu a tivona onge wa antswa eka van’wana.” Rirhandzu ri hi endla hi papalata ku tivona onge hi tlakukile ku tlula van’wana.—Varhoma 12:3.

17. Rirhandzu ri ta hi susumetela leswaku hi anakanyela van’wana hi ndlela yihi, naswona i ku tikhoma ka njhani loku hi faneleke hi ku papalata?

17 “Rirhandzu . . . a ri tikhomi hi ndlela leyi nga tengangiki.” Munhu loyi a tikhomaka hi ndlela leyi nga tengangiki u endla swilo leswi khunguvanyisaka. Swiendlo swo tano a swi kombisi rirhandzu, hikuva swi kombisa leswaku munhu a nga na mhaka ni mintlhaveko ya van’wana. Ku hambana ni sweswo, rirhandzu leri hi susumetelaka ku anakanyela van’wana ri ni nsovo. Rirhandzu ri hi endla leswaku hi va ni xichavo, hi va ni mahanyelo lamanene ni ku xixima vapfumeri-kulorhi. Xisweswo, rirhandzu a ri nge hi pfumeleli leswaku hi “tikhoma [hi ndlela leyi] nyumisaka”—a ri nge hi pfumeleli leswaku hi tikhoma hi ndlela yihi na yihi leyi chavisaka kumbe leyi nga khunguvanyisaka Vakreste-kulorhi.—Vaefesa 5:3, 4.

18. Ha yini munhu la nga ni rirhandzu a nga sindzisi leswaku swilo hinkwaswo swi endliwa hi ndlela yakwe?

18 “Rirhandzu . . . a ri lavi leswi vuyerisaka rona ntsena.” Bibele Ya Xitsonga yi ri: “Rirhandzu a ri tilaveri swa rona ntsena.” Munhu la nga ni rirhandzu a nga sindzisi leswaku swilo hinkwaswo swi endliwa hi ndlela yakwe, onge hiloko minkarhi hinkwayo mavonelo yakwe ma ri kahle. A nga sindzisi van’wana, kumbe ku tirhisa  matimba yakwe leswaku a kandziyela lava va nga ni mavonelo lama hambaneke ni ya yena. Ku sihalala ko tano ku nga kombisa leswaku munhu wa tikukumuxa, naswona Bibele yi ri: “Ku tinyungubyisa ku le kusuhi ni ku wa.” (Swivuriso 16:18) Loko hi va rhandza hakunene vamakwerhu va hina, hi ta yingisa vonelo ra vona naswona loko swi koteka, hi ta amukela vonelo ra vona. Moya wo amukela vonelo ra van’wana, wu pfumelelana ni marito ya Pawulo lama nge: “Un’wana ni un’wana a a hambete a lava leswaku ku pfuneka un’wana, hayi yena n’wini.”—1 Vakorinto 10:24.

19. Rirhandzu ri hi pfuna leswaku hi angurisa ku yini loko van’wana va hi khunguvanyisa?

19 “Rirhandzu . . .a ri hlundzuki. A ri hlayisi mhaka yo biha.” Rirhandzu a ri hlundzukisiwi hi ku olova hi leswi van’wana va swi vulaka kumbe va swi endlaka. Ina, hi ntolovelo ha hlundzuka loko van’wana va hi khunguvanyisa. Hambiloko hi ri ni xivangelo lexi twalaka xo hlundzuka, rirhandzu a ri hi pfumeleli leswaku hi tshama hi hlundzukile. (Vaefesa 4:26, 27) A hi nge ma hlayisi marito lama khunguvanyisaka, onge hiloko hi ma tsala ebukwini ya milandzu leswaku hi nga ma rivali. Ku hambana ni sweswo, rirhandzu ri hi susumetela ku tekelela Xikwembu xa hina xa rirhandzu. Hilaha hi swi voneke ha kona eka Ndzima 26, Yehovha wa rivalela loko ku ri ni xivangelo lexi twalaka xo endla tano. Loko a hi rivalela, wa rivala, a nge hi xupuli enkarhini lowu taka hikwalaho ka swidyoho leswi hi swi endleke. Xana a hi tlangeli leswi Yehovha a nga hlayisiki mhaka yo biha?

20. Xana hi fanele hi titwisa ku yini loko mupfumeri-kulorhi a phasiwa hi xidyoho kutani a nghena ekhombyeni hikwalaho ka xona?

20 “Rirhandzu . . . a ri tsaki hi leswi nga lulamangiki.” The New English Bible yi hlayekisa xileswi: “Rirhandzu . . . a ri tsaki loko vanhu van’wana va wela eswidyohweni.” Vuhundzuluxeri bya Moffatt byi ri: “Rirhandzu a ri tsaki loko van’wana va hambuka.” Rirhandzu a ri kumani ni vubihi, xisweswo a hi ku seketeli ku tikhoma loko biha ka muxaka wihi na wihi. Xana hi titwisa ku yini loko mupfumeri-kulorhi a phasiwa hi xidyoho kutani a nghena ekhombyeni hikwalaho ka xona? Rirhandzu a ri nge hi pfumeleli leswaku hi tsaka, onge hiloko hi ku, ‘U layekile! I mhangu ku tilavela!’ (Swivuriso 17:5) Hambiswiritano, ha tsaka loko makwerhu la endleke xihoxo, a teka magoza yo tlhela a hlakarhela hi tlhelo ra moya.

 “Ndlela Leyi Tlakukeke”

21-23. (a) Xana Pawulo a a vula yini loko a ku “rirhandzu a ri heli”? (b) Xana hi ta bula hi yini eka ndzima yo hetelela?

21 “Rirhandzu a ri heli.” Xana Pawulo a a vula yini hi marito lawa? Hilaha mongo wu kombisaka ha kona, a a vulavula hi tinyiko ta moya leti Vakreste vo sungula a va ri na tona. Tinyiko teto a ti ri xikombiso xa leswaku Xikwembu xa ri amukela vandlha leri ra ha ku simekiwaka. Kambe a hi Vakreste hinkwavo lava a va hanyisa, va profeta kumbe ku vulavula hi tindzimi. Hambiswiritano, sweswo a swi nga ri na mhaka hikuva tinyiko leti to endla masingita a ti ta hela hi ku famba ka nkarhi. Kambe, wu kona nchumu lowu a wu ta sala, lowu Mukreste un’wana ni un’wana a nga wu hlakulelaka. I nchumu wa nkoka swinene, lowu a wu ta tshama nkarhi wo leha swinene ku tlula nyiko yihi na yihi yo endla masingita. Kahle-kahle, Pawulo u wu vule “ndlela leyi tlakukeke.”  (1 Vakorinto 12:31) Xana “ndlela leyi tlakukeke” a ku ri yini? A ku ri ndlela ya rirhandzu.

Vanhu va Yehovha va tiviwa hi ku rhandzana

22 Hakunene, rirhandzu ra Vukreste leri Pawulo a vulavulaka ha rona “a ri heli,” leswi vulaka leswaku a ri na vugamo. Ninamuntlha, rirhandzu leri ra vumakwerhu, leri rhangisaka swilaveko swa van’wana, ra ha ri mfungho lowu valandzeri va Yesu va ntiyiso va tiviwaka ha wona. Xana a hi ri voni rirhandzu ro tano emavandlheni ya vagandzeri va Yehovha emisaveni hinkwayo? Rirhandzu rero ri ta tshama hi masiku, hikuva Yehovha u tshembisa malandza yakwe yo tshembeka leswaku u ta ma nyika vutomi lebyi nga heriki. (Pisalema 37:9-11, 29) Onge hi nga endla leswi nga ematimbeni ya hina leswaku hi “hambeta [hi] famba erirhandzwini.” Loko hi endla leswi, hi ta kuma ntsako lowukulu lowu tisiwaka hi ku nyika. Ku tlhandlekela kwalaho, hi ta hambeta hi hanya—ina, hi ta hambeta hi rhandzana—hi masiku ni masiku, hi ri karhi hi tekelela Yehovha Xikwembu xa hina xa rirhandzu.

23 Eka ndzima leyi, leyi gimetaka xiyenge lexi vulavulaka hi rirhandzu, hi hlamusele ndlela yo kombisana rirhandzu. Kambe, leswi rirhandzu ra Yehovha ri hi vuyerisaka hi tindlela ta ntsandza-vahlayi—naswona hi vuyeriwaka eka matimba, vululami ni vutlhari bya yena—i swinene ku tivutisa xivutiso lexi, ‘Xana ndzi nga n’wi kombisa njhani Yehovha leswaku ndza n’wi rhandza hakunene?’ Xivutiso lexi ku ta buriwa ha xona eka ndzima yo hetelela.

^ ndzim. 12 Kambe, rirhandzu ra Vukreste a hi mapfumela-hinkwaswo. Bibele ya hi khutaza: “Mi hambeta mi veka tihlo ra n’wina eka lava va vangaka ku avana ni swiyimo leswi khunguvanyisaka . . . mi va papalata.”—Varhoma 16:17.

DYONDZA SWO TALA

Vukhongeri Lebyi Amukelekaka Eka Xikwembu Byi Dyondzisa Swirho Swa Byona Ku Rhandzana Ni Ku Rhandza Vanhu Van’wana

Hi byihi vukhongeri lebyi byi dyondzisaka swirho swa byona ku papalata rivengo leri vangiwaka hi xihlawuhlawu lexi nga ha vangiwaka hi mpfilumpfilu wa tipolitiki, wa rixaka swin’we ni ku tekela van’wana ehansi hileswi va nga ringaniki hi tlhelo ra timali?