Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 2

Xana U Nga Swi Kota Hakunene “Ku Tshinela Eka Xikwembu”?

Xana U Nga Swi Kota Hakunene “Ku Tshinela Eka Xikwembu”?

1, 2. (a) I yini lexi nga twalaka xi ri norho eka vanhu vo tala, kambe Bibele yi hi tiyisekisa ha yini? (b) Hi byihi vunghana lebyikulu lebyi Abrahama a veke na byona, naswona ha yini?

XANA u nga titwa njhani loko Mutumbuluxi wa tilo ni misava a vula leswi ha wena, “Loyi i munghana wa mina”? Eka vo tala wolowo i norho. Xana munhu wa nyama a nga xi endla njhani xinghana na Yehovha Xikwembu? Bibele ya hi tiyisekisa leswaku hakunene hi nga va ni vunghana ni Xikwembu.

2 Abrahama wa khale hi wun’wana wa vanhu lava veke ni vunghana byo tano. Yehovha u vulavule hi kokwana-xinguwe yoloye tanihi “nakulorhi.” (Esaya 41:8) Ina, Yehovha a a languta Abrahama tanihi munghana wakwe. Abrahama u ve ni vunghana byebyo lebyikulu hikuva a a “ve[ke] ripfumelo eka Yehovha.” (Yakobo 2:23) Ninamuntlha, Yehovha u pfule tindlela ta ku ‘tihlanganisa’ ni lava va n’wi tirhelaka hikwalaho ka ku va va n’wi rhandza. (Deteronoma 10:15) Rito rakwe ra khongotela: “Tshinelani eka Xikwembu, kutani xi ta tshinela eka n’wina.” (Yakobo 4:8) Eka marito lawa, hi kuma xirhambo swin’we ni xitshembiso.

3. Yehovha u hi rhamba leswaku hi endla yini, naswona hi xihi xitshembiso lexi fambisanaka ni xirhambo xexo?

3 Yehovha wa hi rhamba leswaku hi tshinela ekusuhi na yena. U tiyimiserile naswona wa swi lava ku hi kombisa musa leswaku hi va vanghana vakwe. Hi nkarhi lowu fanaka, wa hi tshembisa leswaku loko hi teka magoza ya ku tshinela eka yena, u ta hi amukela. U ta tshinela eka hina. Xisweswo, hi nga kuma nchumu wa risima swinene—ku nga “xinakulobye na Yehovha.” * (Pisalema 25:14) Rito leri nge “xinakulobye” ri ni mongo wa ku bula hi timhaka ta xihundla ni munghana wo hlawuleka.

4. Xana u nga n’wi hlamusela njhani munghana lonkulu, naswona Yehovha u tikombisa njhani a ri munghana yoloye eka lava va tshinelaka eka yena?

 4 Xana u ni munghana lonkulu loyi u nga n’wi phofulelaka ta mbilu ya wena? Munghana yoloye hi loyi a khathalaka ha wena. Wa n’wi tshemba, hikuva wa tshembeka. Ntsako wa wena wu va wukulu ngopfu loko u n’wi phofulela tona. Ku ku yingisa kakwe hi ndlela leyi nga ni ntwela-vusiwana ku vevukisa mpingu wa wena. Hambiloko a nga ri kona un’wana loyi a ku twisisaka, yena wa ku twisisa. Hilaha ku fanaka, loko u tshinela eka Xikwembu, u va ni Munghana wo hlawuleka loyi a ku tekaka u ri wa nkoka, loyi a ku khathalelaka swinene naswona a ku twisisaka hi ku helela. (Pisalema 103:14; 1 Petro 5:7) Wa n’wi tshemba hi mbilu hinkwayo, hikuva wa swi tiva leswaku u tshembekile eka lava tshembekeke eka yena. (Pisalema 18:25) Hambiswiritano, hi nga swi kota ku va ni lunghelo ra ku va ni vunghana lebyi ni Xikwembu hikuva xi hi pfulele tindlela.

Yehovha U Pfule Ndlela

5. Xana Yehovha u endle yini leswaku hi swi kota ku tshinela eka yena?

5 Loko ho tshikiwa, hina vadyohi a hi nga ta swi kota ku tshinela eka Xikwembu. (Pisalema 5:4) Muapostola Pawulo u tsarile: “Kambe Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.” (Varhoma 5:8) Ina, Yehovha u hlele leswaku Yesu a “nyikela moya-xiviri wakwe wu va nkutsulo wa lavo tala.” (Matewu 20:28) Ripfumelo ra hina eka gandzelo ra nkutsulo ri endla leswaku hi swi kota ku tshinela eka Xikwembu. Leswi Xikwembu xi nga “sungula xi hi rhandza,” xi veke xisekelo xa leswaku hi va ni vuxaka na xona.—1 Yohane 4:19.

6, 7. (a) Hi swi tivisa ku yini leswaku Yehovha a nga tumbelanga, a hi Xikwembu lexi nga tiviwiki? (b) Xana Yehovha u tipaluxe hi ndlela yihi?

6 Yehovha u teke goza rin’wana: U tipaluxile eka hina. Eka vunghana hambi byi ri byihi, vuxaka lebyi vaka kona byi tiya hi ku n’wi tiva kahle munhu yoloye ni ku tsakela timfanelo ni tindlela takwe. Kutani, loko Yehovha a a ri Xikwembu lexi tumbeleke, lexi nga tiviwiki, a hi nga ta tshinela eka yena. Kambe, a nga titumbeti, u lava leswaku hi n’wi tiva. (Esaya 45:19)  Tlhandlakambirhi, leswi a swi hlavutelaka malunghana na yena n’wini, vanhu hinkwavo va nga swi kuma, hambi ku ri vanhu lava hi ku ya hi mimpimanyeto ya misava va tekiwaka va nga ri nchumu.—Matewu 11:25.

Yehovha u tihlavuterile hi mintirho yakwe ya ku tumbuluxa ni hi Rito rakwe leri tsariweke

7 Xana Yehovha u tipaluxe njhani eka hina? Leswi a swi tumbuluxeke swi hlavutela timfanelo tin’wana ta vumunhu byakwe—vukulu bya matimba yakwe, ku enta ka vutlhari byakwe, ku tala ka rirhandzu rakwe. (Varhoma 1:20) Kambe Yehovha a nga tihlavutelanga ntsena hi leswi a swi tumbuluxeke. Tanihi Muhundziseri Lonkulu wa Rungula, u hi nyike Rito rakwe leri n’wi hlavutelaka, ku nga Bibele.

Ku Vona “Ku Tsakisa Ka Yehovha”

8. Ha yini ku nga vuriwaka leswaku Bibele hi yoxe i vumbhoni bya ndlela leyi Yehovha a hi rhandzaka ha yona?

8 Bibele hi yoxe i vumbhoni bya ndlela leyi Yehovha a hi rhandzaka ha yona. ERitweni rakwe, u tihlavutela hi marito lawa hi ma twisisaka—ku nga vumbhoni bya leswaku a ngo hi rhandza ntsena, kambe u lava nileswaku hi n’wi tiva hi tlhela hi n’wi rhandza. Leswi hi swi hlayaka ebukwini leyi ya risima swi hi pfuna leswaku hi vona “ku tsakisa ka Yehovha Xikwembu” naswona swi hi susumetela leswaku hi lava ku va ekusuhi na yena. (Pisalema 90:17) A hi buleni hi tindlela tin’wana leti tsakisaka leti Yehovha a tihlavutelaka ha tona eRitweni rakwe.

9. Hi swihi swikombiso swin’wana swa swiga leswi kongomeke leswi nga eBibeleni leswi hlavutelaka timfanelo ta Xikwembu?

9 Matsalwa ma tamele swiga swo tala leswi kongomeke leswi hlavutelaka timfanelo ta Xikwembu. Xiya swikombiso swin’wana. “Yehovha u rhandza vululami.” (Pisalema 37:28) Xikwembu xi “tlakukile hi matimba.” (Yobo 37:23) “‘Ndza tshembeka,’ ku vula Yehovha.” (Yeremiya 3:12) “Xi ni mbilu yo tlhariha.” (Yobo 9:4) I “Xikwembu xa tintswalo ni nsovo, [lexi] hlwelaka ku hlundzuka, [lexi] teleke musa wa rirhandzu ni ntiyiso.” (Eksoda 34:6) “Oho Yehovha, u lonene naswona u lunghekele ku rivalela.” (Pisalema 86:5) Naswona, hilaha swi boxiweke ha kona exihlokweni lexi hundzeke, i mfanelo yin’we leyi nga yikulu: “Xikwembu i rirhandzu.” (1 Yohane 4:8) Loko u ri karhi u ehleketa  hi timfanelo leti to tsakisa, xana a wu kokeleki eka Xikwembu lexi xi nga pimanisekiki na nchumu?

Bibele ya hi pfuna leswaku hi tshinela ekusuhi na Yehovha

10, 11. (a) Yehovha u katse yini eRitweni rakwe lexi hi pfunaka leswaku hi byi vona kahle vumunhu byakwe? (b) Hi xihi xikombiso xa le Bibeleni lexi nga hi pfunaka leswaku hi vona matimba ya Xikwembu hi mahlo ya miehleketo?

10 Yehovha u hi byele hi timfanelo takwe, naswona hi rirhandzu a tlhela a nghenisa swikombiso swo karhi eRitweni rakwe swa ndlela leyi timfanelo leti a ti tirhiseke ha yona. Marungula ya kona ma hi kombisa vumunhu byakwe kahle. Kutani sweswo swi hi pfuna ku tshinela eka yena. Xiya xikombiso lexi.

11 Ku hlaya leswaku Xikwembu xi ni “ntamu lowukulu,” swi hambanile swinene ni ku hlaya hi ndlela leyi xi kutsuleke Vaisrayele ha yona eLwandle ro Tshwuka, kutani xi khathalela tiko emananga ku ringana malembe ya 40. (Esaya 40:26) Hi mahlo ya miehleketo, u nga ma vona mati ma ri karhi ma pfuleka. U nga ri vona tiko hi mahlo ya miehleketo—kumbexana vanhu va 3 000 000 loko va helerile—ri famba elwandle leri omeke, mati lama tiyeke ma yime ma endla tintshava hala ni hala. (Eksoda 14:21; 15:8) U nga byi vona vumbhoni bya nsirhelelo wa Xikwembu emananga. Mati a ma khuluka ma huma eribyeni. Swakudya leswi fanaka ni tindzoho to basa, swi humelele ehenhla ka misava. (Eksoda 16:31; Tinhlayo 20:11) Laha Yehovha a a nga paluxi ntsena leswaku u ni matimba, kambe nileswaku u ma tirhisela ku pfuna vanhu vakwe. Xana a swi hi chaveleli ku tiva leswaku swikhongelo swa hina swi tlhandlukela eka Xikwembu lexi nga ni matimba lexi nga “vutumbelo ni ntamu wa hina, mpfuno lowu kumekaka hi ku hatlisa hi nkarhi wa maxangu”?—Pisalema 46:1.

12. Xana Yehovha u hi pfuna njhani leswaku hi n’wi “vona” hi ku tirhisa tindlela leti twisisekaka eka hina?

 12 Yehovha, loyi a nga moya, u endle swilo swo tala leswaku a hi pfuna leswaku hi n’wi tiva. Hina vanhu, hi vona ntsena swilo leswi vonakaka ematihlweni ya hina, xisweswo a hi swi koti ku vona swilo leswi nga eswivandleni swa moya. Loko Xikwembu a xo tihlamusela eka hina hi marito ya le swivandleni swa moya, a swi ta fana ni loko wena u ringeta ku hlamusela ndlela leyi wena u langutekaka ha yona eka munhu la tswariweke a ri bofu, u n’wi byela hi muvala wa mahlo ya wena kumbe swivati leswi nga enhlongeni ya wena. Ematshan’weni ya sweswo, Yehovha hi tintswalo u hi pfuna leswaku hi n’wi “vona” hi tindlela leti twisisekaka eka hina. Minkarhi yin’wana u tirhisa swigego ni swifananisi, a tifanisa ni swilo leswi hi swi tivaka. U tlhela a hlamusela leswaku u languteka ku fana ni vanhu. *

13. Xana Esaya 40:11 yi endla leswaku hi vona yini hi mahlo ya miehleketo, naswona wena swi ku khumba njhani?

13 Xiya nhlamuselo leyi vulavulaka hi Yehovha eka Esaya 40:11: “U ta risa ntlhambi wa yena ku fana ni murisi. Hi voko ra yena u ta hlengeleta swinyimpfana; u ta swi rhwala exifuveni xa yena.” Laha Yehovha u fanisiwa ni murisi la tlakulaka swinyimpfana hi “voko ra yena.” Marito lawa ma kombisa vuswikoti bya Xikwembu bya ku sirhelela ni ku seketela vanhu vakwe, hambi ku ri lava nga ekhombyeni swinene. Hi nga titwa hi sirhelelekile emavokweni yakwe lama tiyeke, hikuva loko hi tshembeka eka yena, a nge hi fularheli. (Varhoma 8:38, 39) Murisi Lonkulu u rhwala swinyimpfana “exifuveni xa yena”—xiga lexi xi kombetela eka nguvu leyi petsiweke, leyi minkarhi yin’wana murisi a a rhwala xinyimpfana lexi xa ha ku tswariwaka ha yona. Xisweswo ha tiyisekisiwa leswaku Yehovha wa hi rhandza  naswona u hi khathalela hi tintswalo. I swa ntumbuluko leswaku hi rhandza ku va ekusuhi na yena.

‘N’wana U Rhandza Ku N’wi Hlavutela’

14. Ha yini ku nga vuriwaka leswaku Yehovha u tihlavutele kahle hi ku tirhisa Yesu?

14 ERitweni rakwe, Yehovha u tihlavutela hi ndlela leyi nga erivaleni hi ku tirhisa N’wana wakwe la rhandzekaka, Yesu. A nga kona loyi a nga yi kombisaka ku antswa ndlela leyi Xikwembu xi ehleketaka ni ku titwa ha yona, kumbe loyi a nga hi paluxelaka Xikwembu hi vuxokoxoko ku tlula hilaha Yesu a endleke hakona. Phela, N’wana yoloye wa mativula a a ri kona etlhelo ka Tata wakwe ku nga si tumbuluxiwa swivumbiwa swin’wana swa moya ni vuako lebyi hi byi vonaka. (Vakolosa 1:15) Yesu a a n’wi tiva kahle Yehovha. Hi yona mhaka leyi a vuleke a ku: “Leswaku N’wana i mani ku hava loyi a swi tivaka handle ka Tatana; ni leswaku Tatana i mani, ku hava loyi a swi tivaka handle ka N’wana, ni loyi N’wana a rhandzaka ku n’wi hlavutela eka yena.” (Luka 10:22) Loko a ri emisaveni tanihi munhu, Yesu u hlavutele Tata wakwe hi tindlela timbirhi ta nkoka.

15, 16. Hi tihi tindlela timbirhi leti Yesu a paluxeke Tata wakwe ha tona?

 15 Xo sungula, tidyondzo ta Yesu ta hi pfuna leswaku hi tiva Tata wakwe. Yesu u hlamusela Yehovha hi marito lama fikelelaka timbilu ta hina. Hi xikombiso, loko Yesu a hlamusela Xikwembu lexi nga ni musa lexi tlhelaka xi amukela vadyohi lava hundzukaka, u fanise Yehovha ni tatana la rivalelaka, loyi a tsakeke ngopfu loko a vona n’wana wakwe wa vusopfa a vuya lerova a tsutsuma a ya wela enhan’wini ya n’wana wakwe kutani a n’wi tswontswa hi rirhandzu. (Luka 15:11-24) Yesu u tlhele a hlamusela Yehovha tanihi Xikwembu lexi ‘kokaka’ vanhu va timbilu letinene hikuva xi rhandza un’wana ni un’wana wa vona. (Yohane 6:44) Wa swi vona hambiloko xinyenyana lexitsongo lexi vuriwaka xindzingiri xi wela emisaveni. Yesu u te: “Mi nga chavi: mi ni risima ku tlula swindzingiri swo tala.” (Matewu 10:29, 31) Kunene hi titwa hi kokeleka eka Xikwembu xo tano lexi khathalelaka.

16 Xa vumbirhi, xikombiso xa Yesu xi hi kombisa leswaku Yehovha u njhani. Yesu u tekelele Tata wakwe hi ndlela leyi hetisekeke lerova u vule a ku: “Loyi a ndzi voneke u vone na Tatana.” (Yohane 14:9) Xisweswo, loko hi hlaya Tievhangeli leti vulavulaka hi Yesu—mintlhaveko leyi a a ri na yona ni ndlela leyi a tirhisaneke ni van’wana ha yona—swi fana niloko hi vona Tata wakwe hi byakwe. A yi kona ndlela yin’wana leyi Yehovha a a ta va a ti paluxe ha yona timfanelo takwe hi ndlela leyi nga erivaleni ku tlula leyi. Ha yini?

17. Hlamusela leswi Yehovha a swi endleke leswaku a hi pfuna hi tiva leswaku u njhani.

17 Hi xikombiso: Ehleketa u ri karhi u ringeta ku nyikela nhlamuselo ya rito leri nge, musa. U nga ha ri hlamusela hi marito. Kambe loko wo kombetela eka munhu wo karhi hi ku kongoma loyi a endlaka xiendlo xa musa kutani u ku, “Lexi i xikombiso xa musa,” rito leri nge “musa” ri hlamuseleka kahle naswona ri tlhela ri twisiseka hi ku olova. Yehovha u endle leswi fanaka leswaku a hi pfuna hi n’wi vona leswaku u njhani. U hi nyike xikombiso xa xiviri xa N’wana wakwe a tlhela a tihlamusela hi marito. Timfanelo ta Xikwembu ti vonaka eka swiendlo swa Yesu.  Eka Tievhangeli leti vulavulaka ha Yesu, entiyisweni Yehovha u ri, “Ndzi tano.” Xana tirhekhodo leti huhuteriweke ti n’wi hlamusela njhani Yesu loko a ri emisaveni?

18. Xana Yesu u yi kombise njhani mfanelo ya matimba, ya vululami ni ya vutlhari?

18 Yesu u ti kombise kahle timfanelo ta mune letikulu ta Xikwembu. A a ri ni matimba yo tshungula swifo, yo herisa ndlala hambi ku ri rifu. Kambe, ku hambana ni vanhu va vutianakanyi lava tirhisaka matimba ya vona hi ndlela yo biha, a nga tirhisanga matimba yakwe ya ku tshungula leswaku ku pfuneka yena kumbe ku vavisa vanhu van’wana. (Matewu 4:2-4) A a rhandza vululami. A swi fanerile ku va a hlundzuka loko a vona van’wamabindzu lava dyelelaka va ri karhi va dyelela vanhu. (Matewu 21:12, 13) A a nga ri na xihlawuhlawu loko a tirhisana ni vanhu lava nga swisiwana ni lava tshikileriwaka, a a pfuna vanhu volavo leswaku mimoya-xiviri ya vona yi ‘kuma ku phyuphya.’ (Matewu 11:4, 5, 28-30) Tidyondzo ta Yesu a ti kombisa vutlhari lebyikulu ngopfu, naswona a a ‘tlula Solomoni’ hi vutlharhi. (Matewu 12:42) Kambe Yesu a nga kalanga a bombisa vutlhari byakwe. Marito yakwe a ma fikelela timbilu ta vanhu lava nga exiyin’weni xa le hansi, hikuva tidyondzo takwe a ti olova naswona a ti twisiseka.

19, 20. (a) Xana Yesu a a ri xikombiso lexikulu xa rirhandzu hi ndlela yihi? (b) Loko hi ri karhi hi hlaya ni ku anakanyisisa hi xikombiso xa Yesu, xana hi fanele hi tsundzuka yini?

19 Yesu a a ri xikombiso lexikulu xa rirhandzu. Evutirhelini byakwe hinkwabyo, u kombise rirhandzu hi tindlela to tala, leti tin’wana ta tona ku nga nsovo ni ntwela-vusiwana. A a va ni ntwela-vusiwana loko a vona van’wana va xaniseka. Hi ku phindha-phindha, ntwela-vusiwana wakwe a wu n’wi susumetela ku teka goza. (Matewu 14:14) Hambileswi a tshunguleke vavabyi ni ku phamela lava nga ni ndlala, Yesu u kombise ntwela-vusiwana hi ndlela yin’wana ya nkoka swinene. U pfune van’wana leswaku va tiva, va amukela ni ku rhandza ntiyiso malunghana ni Mfumo wa Xikwembu, lowu nga ta tisela vanhu mikateko leyi nga heriki. (Marka 6:34; Luka 4:43) Ku tlula kwalaho, Yesu u kombise rirhandzu ra le mbilwini yakwe hi ku nyikela  hi moya-xiviri wakwe hi ku tirhandzela hikwalaho ka vanhu van’wana.—Yohane 15:13.

20 Hikwalaho, a swi hlamarisi leswi vanhu lavakulu ni lavatsongo ni va mindhavuko hinkwayo va titweke va kokeleka eka munhu loyi wa rirhandzu lerikulu. (Marka 10:13-16) Hambiswiritano, loko hi ri karhi hi hlaya ni ku anakanyisisa hi xikombiso xa xiviri xa Yesu, a hi tsundzukeni leswaku eka N’wana loyi, hi vona xikombiso lexi heleleke xa Tata wakwe.—Vaheveru 1:3.

Buku Leyi Nga Hi Pfunaka

21, 22. Xana ku katseka yini eku laveni ka Yehovha, naswona buku leyi yi tamele yini lexi nga ta hi pfuna eku lavisiseni koloko?

21 Yehovha u swi veka erivaleni leswaku u lava hi va ekusuhi na yena, hi ku tihlavutela kahle eRitweni rakwe. Hi nkarhi lowu fanaka, a nga hi sindzisi leswaku hi va ni vuxaka lebyinene na yena. Hi hina hi faneleke hi tiendlela xiboho xo lava Yehovha “loko a ha kumeka.” (Esaya 55:6) Ku lava Yehovha swi katsa ku tiva timfanelo takwe ni tindlela takwe hilaha ti hlavuteriweke hakona eBibeleni. Buku leyi u yi hlayaka sweswi yi endleriwe ku ku pfuna eku laveni loku.

22 U ta swi lemuka leswaku buku leyi yi avanyisiwe hi swiyenge leswi fambisanaka ni timfanelo ta mune ta Yehovha: matimba, vululami, vutlhari ni rirhandzu. Xiyenge ha xin’we xi sungula hi nkatsakanyo wa mfanelo ya kona. Tindzima ti nga ri tingani  leti landzelaka ti ta hlamusela vuxokoxoko bya ndlela leyi Yehovha a kombisaka mfanelo yoleyo ha yona. Xiyenge ha xin’we xi tamele ni ndzima leyi kombisaka ndlela leyi Yesu a kombiseke mfanelo yoleyo ha yona swin’we ni ndzima yin’wana leyi kombisaka ndlela leyi hi nga yi kombisaka ha yona evuton’wini bya hina.

23, 24. (a) Hlamusela bokisi ro hlawuleka leri nge “Swivutiso Swo Gayela Ha Swona.” (b) Xana ku anakanyisisa ku nga hi pfuna njhani leswaku hi tshinela eka Xikwembu?

23 Ku sukela eka ndzima leyi, ku ni bokisi ro hlawuleka leri nga ni xihloko lexi nge “Swivutiso Swo Gayela Ha Swona.” Hi xikombiso, vona bokisi leri nga eka tluka 24. Matsalwa wolawo ni swivutiso swa kona a swi endleriwanga ku pfuxeta ndzima leyi u yi hlayaka. Ematshan’weni ya sweswo, xikongomelo xa swona i ku ku pfuna leswaku u gayela hi tinhla ta nkoka ta mhaka leyi u yi hlayaka. Xana u nga ma tirhisa njhani hi ndlela leyi vuyerisaka mabokisi lawa? Languta tsalwa ha rin’we leri kombisiweke, kutani u hlaya tindzimana ta kona hi vukheta. Kutani, tivutise xivutiso lexi fambisanaka ni tsalwa ra kona. Anakanyisisa hi tinhlamulo ta kona. U nga endla ni vulavisisi byin’wana. Tivutise swivutiso swin’wana: ‘Xana rungula leri ri ndzi byela yini hi Yehovha? Xana ri byi khumba njhani vutomi bya mina? Ndzi nga ri tirhisa njhani ku pfuna van’wana?’

24 Ku anakanyisisa ko tano ku nga hi pfuna leswaku hi tshinela ekusuhi na Yehovha. Ha yini? Bibele yi hlanganisa ku anakanyisisa ni mbilu. (Pisalema 19:14) Loko hi anakanyisisa hi ndlela yo tlangela leswi hi swi dyondzaka hi Xikwembu, rungula leri ri fika ri dzika embilwini ya hina yo fanekisela, laha ri fikaka ri khumba ndlela ya hina ya ku anakanya, ri susumeta mintlhaveko ya hina naswona ri hetelela hi ku hi susumetela ku teka goza. Rirhandzu ra hina eka Xikwembu ra kula, naswona rirhandzu rero ri endla leswaku hi lava ku n’wi tsakisa tanihi Munghana wa hina loyi hi n’wi rhandzaka. (1 Yohane 5:3) Leswaku hi nghena evuxakeni byebyo, hi fanele hi tiva timfanelo ta Yehovha ni tindlela takwe. Kambe, a hi rhangeni hi bula hi vumunhu bya Xikwembu lebyi byi hi susumetelaka ku tshinela eka yena—ku nga vukwetsimi bya xona.

^ ndzim. 3 Lexi tsakisaka, rito ra Xiheveru leri hundzuluxeriweke va ku “xinakulobye,” ri tirhisiwe eka Amosi 3:7, leyi vulaka leswaku Yehovha, Hosi leyi Lawulaka, u hlavutela “mhaka ya yena leyi nga xihundla” eka malandza yakwe, u va byela swilo leswi a lavaka ku swi endla swi nga si endleka.

^ ndzim. 12 Hi xikombiso, Bibele yi vulavula hi xikandza xa Xikwembu, matihlo ya xona, tindleve ya xona, nhompfu ya xona, nomu wa xona, mavoko ni milenge ya xona. (Pisalema 18:15; 27:8; 44:3; Esaya 60:13; Matewu 4:4; 1 Petro 3:12) Marito wolawo ya ku fanekisela a ma fanelanga ma tekiwa hi ku kongoma, tanihi leswi hi nga taka hi nga ma teki hi ku kongoma marito lama vulaka leswaku Yehovha i “Ribye” kumbe “xitlhangu.”—Deteronoma 32:4; Pisalema 84:11.

DYONDZA SWO TALA

Xana Hakunene Yehovha Wa Khathala Hi Wena?

Xana swa ku tikela ku tshemba leswaku Xikwembu xi ku teka u ri wa nkoka? Marito ya Yesu lama nga eka Yohane 6:44 ma tiyisekisa leswaku Xikwembu xa khathala hi un’wana ni un’wana.