Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 7

Matimba Ya Ku Sirhelela—‘Xikwembu I Vutumbelo Bya Hina’

Matimba Ya Ku Sirhelela—‘Xikwembu I Vutumbelo Bya Hina’

1, 2. Xana Vaisrayele a va ri ekhombyeni rihi loko va nghena emananga ya Sinayi hi 1513 B.C.E., naswona Yehovha u va tiyisekise njhani?

VAISRAYELE a va ri ekhombyeni loko va ri karhi va nghena emananga ya Sinayi eku sunguleni ka lembe ra 1513 B.C.E. A va langutane ni riendzo ro chavisa, ro tsemakanya “emananga lamakulu ni lama chavisaka, lama nga ni tinyoka leti nga ni vuxungu ni swipame.” (Deteronoma 8:15) A va ri ekhombyeni ro hlaseriwa hi matiko lama nga ni tihanyi. Yehovha hi yena a ngheniseke vanhu vakwe exiyin’weni lexi. Leswi a nga Xikwembu xa vona, xana u ta swi kota ku va sirhelela?

2 Marito ya Xikwembu a ma tiyisa nhlana swinene: “N’wina mi swi vonile leswi ndzi swi endleke eka Vaegipta, leswaku ndzi mi rhwala hi timpapa ta magama ndzi mi tisa eka mina.” (Eksoda 19:4) Yehovha u va tsundzuxe leswaku u va kutsurile aEgipta, onge hiloko a tirhisa magama, ku va yisa endhawini leyi sirhelelekeke. Kambe ku ni swivangelo swin’wana leswi endlaka leswaku “timpapa ta magama” ti faneleka kahle ku fanekisela nsirhelelo wa Xikwembu.

3. Ha yini swi fanerile leswaku “timpapa ta magama” ti fanekisela nsirhelelo wa Xikwembu?

3 Timpapa ta gama letikulu ta matimba, a ri ti tirhiseli ku haha ntsena kambe ri ti tirhisela ni swin’wana. Loko dyambu ri hisa lerova vusokoti byi famba byi tlakuse ni makhwiri, gama leri nga ni mavondlo ri phurumula timpapa ta rona—leti nga ha fikaka eka timitara timbirhi hi ku leha—leswaku ri sirhelela swivondlwana swa rona eka dyambu leri vavulaka. Minkarhi yin’wana, ri funengeta mavondlo ya rona leswaku ri ma sirhelela eka xirhami. Hilaha gama ri hlayisaka vana va rona hakona, Yehovha u sirhelele tiko ra Israyele leri nga riki na ntokoto hi ndlela leyi fanaka. Leswi sweswi va nga emananga, vanhu vakwe va ta hambeta va kuma nsirhelelo endzhutini wa timpapa takwe ntsena loko va tshama va tshembekile. (Deteronoma 32:9-11; Pisalema  36:7) Kambe, xana na hina namuntlha hi nga rindzela leswaku Xikwembu xi hi sirhelela?

Xitshembiso Xa Nsirhelelo Wa Xikwembu

4, 5. Ha yini hi fanele hi tshemba xitshembiso xa Xikwembu xa leswaku xi ta hi sirhelela?

4 Kunene Yehovha wa swi kota ku sirhelela malandza yakwe. I “Xikwembu xa Matimba Hinkwawo”—xithopo lexi kombisaka leswaku u ni matimba lama nga hluriwiki hi nchumu. (Genesa 17:1) Matimba ya Yehovha ma nga ka ma nga kavanyetiwi, ma fana ni gandlati ra matimba. Leswi a swi kotaka ku endla xin’wana ni xin’wana lexi a rhandzaka ku xi endla, hi nga ha vutisa, ‘Xana Yehovha wa swi rhandza ku tirhisa matimba yakwe leswaku a sirhelela vanhu vakwe?’

5 Hi ku kongoma, nhlamulo i ina! Yehovha wa hi tiyisekisa leswaku u ta va sirhelela vanhu vakwe. Pisalema 46:1 yi ri: “Xikwembu i vutumbelo ni ntamu wa hina, mpfuno lowu kumekaka hi ku hatlisa hi nkarhi wa maxangu.” Leswi Xikwembu “xi nga hembiki,” hi nga xi tshemba xitshembiso xa xona xa leswaku xi ta hi sirhelela. (Tito 1:2) A hi kambisiseni swikombiso swin’wana leswi nga lo dla, erivaleni leswi Yehovha a swi tirhisaka ku hlamusela ndlela leyi a hi sirhelelaka ha yona.

6, 7. (a) Murisi wa le minkarhini ya Bibele a a ti sirhelela njhani tinyimpfu takwe? (b) Xana Bibele yi swi kombisa njhani leswaku Yehovha wa swi navela ku sirhelela ni ku khathalela tinyimpfu takwe?

6 Yehovha i Murisi, naswona hina “hi vanhu vakwe ni tinyimpfu ta madyelo yakwe.” (Pisalema 23:1; 100:3) A swi talanga swiharhi leswi nga swi kotiki ku tisirhelela ku fana ni tinyimpfu. Murisi wa le minkarhini ya Bibele a a fanele a va ni xivindzi leswaku a ta kota ku sirhelela tinyimpfu takwe eka tinghala, mahlolwa, tiberhe swin’we ni le ka makhamba. (1 Samuwele 17:34, 35; Yohane 10:12, 13) Kambe a ku ri ni minkarhi leyi ku sirhelela tinyimpfu a swi lava nkhathalelo lowukulu. Loko nyimpfu yi tswalela ekule ni tshanga, murisi la khathalelaka a a langutela nyimpfu yoleyo yi nga kotiki nchumu a tlhela a tlakula xinyimpfana a xi yisa etshangeni.

“U ta swi rhwala exifuveni xa yena”

 7 Leswi Yehovha a tifanisaka ni murisi, wa hi tiyisekisa leswaku wa swi navela hi mbilu hinkwayo ku hi sirhelela. (Ezekiyele 34:11-16) Tsundzuka nhlamuselo ya Yehovha leyi kumekaka eka Esaya 40:11, leyi ku buriweke ha yona eka Ndzima 2 ya buku leyi: “U ta risa ntlhambi wa yena ku fana ni murisi. Hi voko ra yena u ta hlengeleta swinyimpfana; u ta swi rhwala exifuveni xa yena.” Xana swi tise ku yini leswaku xinyimpfana xi kumeka “exifuveni” xa murisi—engubyeni ya yena ya le handle? Xinyimpfana xi nga ha ya eka murisi, xi fika xi tlanga-tlanga enengeni wakwe. Hambiswiritano, i murisi loyi a faneleke a korhama, a tlakula xinyimpfana kutani a xi vukarha exifuveni. Mawaku xikombiso lexinene xa ku tiyimisela ka Murisi wa hina Lonkulu ku hi sirhelela!

8. (a) Xikwembu xi tshembisa ku sirhelela vamani, naswona Swivuriso 18:10 yi swi kombisa njhani? (b) I yini lexi lavekaka leswaku hi kuma vutumbelo evitweni ra Xikwembu?

8 Xitshembiso xa Xikwembu xa ku nyikela nsirhelelo, a hi xa vanhu hinkwavo—xi sirhelela ntsena lava va tshinelaka eka xona. Swivuriso 18:10 yi ri: “Vito ra Yehovha i xihondzo xo tiya. Lowo lulama u tsutsumela eka xona naswona u kuma nsirhelelo.” Eminkarhini ya Bibele, minkarhi yin’wana swihondzo a swi akiwa enhoveni swi va tindhawu ta vutumbelo. Kambe, a ku ri vutihlamuleri bya loyi a nga ekhombyeni leswaku a balekela eswihondzweni swo tano leswaku a kuma vutumbelo. Swi tano na hi ku kuma vutumbelo evitweni ra Xikwembu. Leswi a swi vuli ntsena ku vitana vito ra Xikwembu; vito ra Xikwembu a ri na masalamusi. Xisweswo, hi fanele hi tiva ni ku tshemba N’wini wa vito rero kutani hi hanya hi ku pfumelelana ni milawu yakwe yo lulama. Yehovha u ni tintswalo hakunene, hikuva wa hi tiyisekisa leswaku loko hi hundzukela eka yena hi ripfumelo, u ta va xihondzo lexi hi sirhelelaka!

“Xikwembu Xa Hina . . . Xa Swi Kota Ku Hi Ponisa”

9. I yini lexi kombisaka leswaku Yehovha a nga lo tshembisa ku sirhelela ntsena?

9 Yehovha a nga lo hi tshembisa ku hi sirhelela ntsena. Eminkarhini ya Bibele, u swi kombise hi tindlela to hlamarisa leswaku wa swi kota ku ponisa vanhu vakwe. Hi nkarhi wa matimu ya  Israyele, “voko” ra Yehovha ra matimba ri hambete ri hlula valala. (Eksoda 7:4) Kambe, Yehovha u tlhele a tirhisa matimba yakwe ya ku sirhelela leswaku a sirhelela vanhu.

10, 11. Hi swihi swikombiso swa le Bibeleni leswi kombisaka ndlela leyi Yehovha a ma tirhiseke ha yona matimba ya yena leswaku a sirhelela vanhu?

10 Loko majaha manharhu ya Vaheveru—Xadraka, Mixaka na Abedinigo—va ale ku nkhinsamela xifaniso xa nsuku xa Hosi Nebukadnetsara, hosi leyi yo leva yi vule leswaku yi ta va hoxa ekheleni leri nga ni ndzilo lowu pfurhaka. “Hi xihi xikwembu lexi xi nga mi ponisaka emavokweni ya mina?” ku vungunya Nebukadnetsara, mufumi la nga ni matimba wa laha misaveni. (Daniyele 3:15) Majaha lawa manharhu a a ma tiyiseka leswaku Xikwembu xi na wona matimba ya ku ma sirhelela, kambe a ma swi tiva leswaku swi nga ha endleka xi nga va sirheleli. Hikwalaho ma hlamurise xileswi: “Loko swi fanele swi va tano, Xikwembu xa hina lexi hi xi tirhelaka xa swi kota ku hi ponisa.” (Daniyele 3:17) Kunene, hambileswi khele leri a ri hlanganyeteriwe ri hisa hilaha ku andzisiweke ka nkombo eka ku hisa loku tolovelekeke, a swi fana ni loko ri nga hisi eka Xikwembu xa matimba hinkwawo. Xi va sirhelerile, naswona hosi yi boheke ku pfumela yi ku: ‘A xi kona xikwembu xin’wana lexi xi kotaka ku kutsula ku fana ni lexi.’—Daniyele 3:29.

11 Yehovha u tlhele a kombisa matimba yakwe ya ku sirhelela loko a hundzisela vutomi bya N’wana wakwe la tswariweke a ri swakwe embelekweni wa wanhwana wa Muyuda loyi a vuriwaka Mariya. Ntsumi yi byele Mariya leswaku “u ta tika embelekweni wa [yena], u ta veleka n’wana wa jaha, vito ra yena u ta n’wi thya Yesu.” Ntsumi leyi yi hlamusele yi ku: “Moya lowo kwetsima wu ta ta ehenhla ka wena, naswona matimba ya La nge Henhla-henhla ma ta ku funengeta.” (Luka 1:31, 35) Swi vonaka onge N’wana wa Xikwembu a a nga si tshama a va exiyin’weni lexi nga ni khombo ku fana ni lexi. Xana xidyoho ni ku nga hetiseki ka manana loyi a nga munhu wa nyama a ku ta thyakisa xitumbulukwana lexi? Xana Sathana a a ta swi kota ku vavisa kumbe ku dlaya N’wana loyi A nga si velekiwa? Doo! Entiyisweni, Yehovha u vumbe makhumbi lama sirhelelaka eka Mariya leswaku ku nga  vi na nchumu—ku nga hetiseki, matimba lama vavisaka, vanhu lava dlayaka hambi ku ri dimona rihi ni rihi—lexi nga ta vavisa xitumbulukwana lexi kulaka, ku sukela loko xi tikiwa ku ya emahlweni. Yehovha u ye emahlweni a sirhelela Yesu evuntshweni byakwe. (Matewu 2:1-15) N’wana la rhandzekaka wa Xikwembu a a nga ta hlaseleka kukondza ku fika nkarhi lowu xi wu vekeke.

12. Ha yini Yehovha a sirhelele vanhu vo karhi hi singita eminkarhini ya Bibele?

12 Ha yini Yehovha a sirhelele vanhu vo karhi hi tindlela teto ta masingita? Hi minkarhi yo tala, Yehovha u sirhelele vanhu leswaku a ta sirhelela nchumu wo karhi wa nkoka swinene: ku nga ku hetiseka ka xikongomelo xakwe. Hi xikombiso, ku pona ka Yesu loko a ha ri xihlangi, a ku ri nchumu wa nkoka eku hetisekeni ka xikongomelo xa Xikwembu, naswona eku heteleleni a ku ta vuyerisa vanhu hinkwavo. Matsalwa ma ni timhaka to tala leti kombisaka ku tirhisiwa ka matimba yo sirhelela, leti “tsaleriwe[ke] ku letela hina, leswaku hi ta va ni ntshembo hikwalaho ka ku tiyisela ka hina ni hikwalaho ka nchavelelo lowu humaka eMatsalweni.” (Varhoma 15:4) Ina, swikombiso leswi swi tiyisa ripfumelo ra hina eka Xikwembu xa matimba hinkwawo. Kambe, hi nga rindzela nsirhelelo wa njhani eka Xikwembu namuntlha?

Leswi Nsirhelelo Wa Xikwembu Wu Nga Vuriki Swona

13. Xana Yehovha wa boheka ku hi endlela masingita? Hlamusela.

13 Xitshembiso xa nsirhelelo wa Xikwembu a xi vuli swona leswaku Yehovha u bohekile ku hi endlela masingita. Phela, Xikwembu xa hina a xi vuli leswaku a hi nge vi na swiphiqo emafambiselweni lawa ya khale. Malandza ya Yehovha yo tala lama tshembekaka ma langutana ni maxangu lamakulu, ku katsa vusweti, nyimpi, mavabyi ni rifu. Yesu u swi veka erivaleni eka vadyondzisiwa vakwe leswaku va nga ha dlayiwa hikwalaho ka ripfumelo ra vona. Hi yona mhaka leyi Yesu a kandziyiseke xilaveko xa ku tiyisela ku fika emakumu. (Matewu 24:9, 13) Loko Yehovha o tirhisa matimba yakwe ku hi kutsula hi ndlela ya singita exiyin’weni xin’wana ni xin’wana, Sathana a a ta va ni xisekelo xa ku vungunya Yehovha, naswona a vula leswaku a hi tinyiketelanga hi xiviri eka Xikwembu xa hina.—Yobo 1:9,10.

14. Hi swihi swikombiso leswi kombaka leswaku a hi minkarhi hinkwayo Yehovha a sirhelelaka malandza yakwe hinkwawo hi ndlela leyi fanaka?

 14 Hambi ku ri eminkarhini ya Bibele, Yehovha a nga ma tirhisanga matimba yakwe ya ku sirhelela leswaku a sirhelela nandza un’wana ni un’wana wakwe leswaku a nga fi. Hi xikombiso, muapostola Yakobo u dlayiwe hi Heroda kwalomu ka 44 C.E.; kambe endzhakunyana ka kwalaho, Petro u kutsuriwile “evokweni ra Heroda.” (Mintirho 12:1-11) Naswona Yohane, makwavo wa Yakobo, u hanye malembe yo tala ku tlula Petro na Yakobo. Swi le rivaleni leswaku a hi fanelanga hi rindzela Xikwembu xa hina leswaku xi sirhelela malandza ya xona hinkwawo hi tindlela leti fanaka. Hi hala tlhelo, “nkarhi ni xiendlakalo lexi nga languteriwangiki” swa hi wela hinkwerhu. (Eklesiasta 9:11) Kutani, Yehovha u hi sirhelela njhani namuntlha?

Yehovha U Va Sirhelela eMirini

15, 16. (a) Hi byihi vumbhoni lebyi nga kona bya leswaku Yehovha u sirhelele vagandzeri vakwe tanihi nhlengeletano? (b) Ha yini hi nga tiyisekaka leswaku Yehovha u ta sirhelela malandza yakwe “enhlomulweni lowukulu”?

15 Xo sungula, ehleketa hi mhaka ya ku hi sirhelela emirini. Leswi hi nga vagandzeri va Yehovha, hi nga ha rindzela leswaku a hi sirhelela tanihi nhlengeletano. Loko a swi nga ri tano, Sathana a a ta hi hlasela hi ku olova. Ehleketa hi leswi: Sathana, “mufumi wa misava,” u lava ntsena ku heta vugandzeri bya ntiyiso. (Yohane 12:31; Nhlavutelo 12:17) Tihulumendhe tin’wana leti nga ni matimba swinene emisaveni ti yirise ntirho wa hina wa ku chumayela naswona ti ringete ku hi herisa. Kambe, vanhu va Yehovha va tshame va tiyile naswona va ye emahlweni handle ko karhala! Ha yini matiko lama nga ni matimba ma tsandzekile ku herisa ntirho wa ntlawa lowu lowutsongo naswona lowu vonakaka wu nga sirhelelekanga wa Vakreste? Hikuva Yehovha u hi sirhelele hi timpapa takwe leta matimba!—Pisalema 17:7, 8.

16 Ku vuriwa yini hi ku hi sirhelela leswaku hi nga vavisiwi “enhlomulweni lowukulu” lowu taka? A hi fanelanga hi chava loko hi anakanya ndzoviso lowu Xikwembu xi nga ta wu tisa. Phela, “Yehovha wa yi tiva ndlela yo va kutsula endzingweni vanhu lava nga ni ku tinyiketela loku nga ni vukwembu, kambe  u vekela vanhu lava nga lulamangiki siku ra vuavanyisi leswaku va ta lovisiwa.” (Nhlavutelo 7:14; 2 Petro 2:9) Hi nkarhi lowu fanaka, hi nga tiyiseka hi swilo swimbirhi minkarhi hinkwayo. Xo sungula, Yehovha a nge pfumeli leswaku malandza yakwe yo tshembeka ma herisiwa emisaveni. Xa vumbirhi, u ta hakela lava tshembekeke hi ku va nyika vutomi lebyi nga heriki emisaveni yakwe leyintshwa ya ku lulama—lava feke u ta va pfuxa. Malunghana ni lava va faka, a yi kona ndhawu leyi hlayisekeke ku tlula ku va emianakanyweni ya Xikwembu.—Yohane 5:28, 29.

17. Xana Yehovha u hi sirhelela njhani hi Rito rakwe?

17 Ni sweswi, Yehovha wa hi kongomisa hi “rito” rakwe leri hanyaka, leri nga ni nsusumeto lowukulu wa ku tshungula timbilu ni ku kondletela vutomi. (Vaheveru 4:12) Hi ku landzela milawu yakwe, hi nga ha sirheleleka hi ndlela yo karhi leswaku hi nga vaviseki. Esaya 48:17 yi ri: “Mina Yehovha, ndzi . . . ku dyondzisela ku ku pfuna.” Handle ko kanakana, ku hanya hi ku landza Rito ra Xikwembu swi nga antswisa rihanyo ra hina ni ku lehisa vutomi bya hina. Hi xikombiso, leswi hi tirhisaka xitsundzuxo xa Bibele xa ku balekela vumbhisa ni ku tibasisa ethyakeni, hi papalata mikhuva leyi nga basangiki ni swiendlo leswi onhaka vutomi bya vanhu lava nga chaviki Xikwembu. (Mintirho 15:29; 2 Vakorinto 7:1) Mawaku ndlela leyi hi nkhensaka ha yona hikwalaho ka nsirhelelo wa Rito ra Xikwembu!

Yehovha Wa Hi Sirhelela Hi Tlhelo Ra Moya

18. I nsirhelelo wihi wa moya lowu Yehovha a hi sirhelelaka ha wona?

18 Xa nkoka ngopfu, Yehovha wa hi sirhelela hi tlhelo ra moya. Xikwembu xa hina lexi nga ni rirhandzu xa hi sirhelela ekhombyeni ra moya hi ku hi hlomisa hi leswi hi swi lavaka leswaku hi tiyiselela miringo ni ku hlayisa vuxaka bya hina na xona. Hikwalaho, Yehovha u teka goza leswaku a sirhelela vutomi, ku nga ri swa malembenyana ma nga ri mangani, kambe hilaha ku nga heriki. Xiya malunghiselelo man’wana ya Xikwembu lama nga hi sirhelelaka hi tlhelo ra moya.

19. Xana moya wa Yehovha wu nga hi pfuna njhani leswaku hi swi kota ku langutana ni ndzingo wun’wana ni wun’wana?

19 Yehovha i “Mutwi wa xikhongelo.” (Pisalema 65:2) Loko mintshikilelo  ya vutomi yi vonaka yi ri yikulu ngopfu, swi nga hi tisela ntshunxeko lowukulu loko hi phofula leswi nga etimbilwini ta hina. (Vafilipiya 4:6, 7) Swi nga ha endleka a nga yi susi hi ndlela ya singita miringo leyi hi langutaneke na yona, kambe loko a hlamula swikhongelo swa hina leswi humaka embilwini, a nga ha hi nyika vutlhari byo langutana na yona. (Yakobo 1:5, 6) Ku tlula kwalaho, Yehovha u va nyika moya lowo kwetsima lava va wu kombelaka eka yena. (Luka 11:13) Moya wolowo wa matimba wu nga hi pfuna leswaku hi swi kota ku langutana ni ndzingo ni xiphiqo xin’wana ni xin’wana. Wu nga ha hi nyika “matimba lama tlulaka lama tolovelekeke” ya ku tiyisela kukondza Yehovha a susa swiphiqo hinkwaswo leswi vavaka emisaveni leyintshwa leyi nga kwala nyongeni.—2 Vakorinto 4:7.

20. Xana Yehovha a nga ma kombisa njhani matimba ya yena yo sirhelela hi ku tirhisa vagandzeri-kulorhi?

20 Minkarhi yin’wana, hi nga kuma matimba lama sirhelelaka ya Yehovha eka vagandzeri-kulorhi. Yehovha u kokele vanhu vakwe ‘enhlengeletanweni ya vamakwarhu.’ (1 Petro 2:17; Yohane 6:44) Eka rirhandzu rero ra vumakwerhu, hi vona vumbhoni lebyi hanyaka bya matimba ya moya lowo kwetsima wa Xikwembu lowu susumeteleka vanhu ku endla leswinene. Moya wolowo wu endla leswaku hi va ni mihandzu leyinene—timfanelo ta risima to kota rirhandzu, musa ni vunene. (Vagalatiya 5:22, 23)  Hikwalaho, loko hi tshikilelekile naswona makwerhu-kulorhi a susumeteleka ku hi nyika ndzayo leyi pfunaka kumbe ku hi byela marito lama lavekaka ngopfu ya xikhutazo, hi nga ha nkhensa Yehovha hi mpfuno wolowo wa yena.

21. (a) Hi swihi swakudya swa moya leswi fikaka hi nkarhi leswi Yehovha a hi nyikaka swona hi “hlonga ro tshembeka ni ro tlhariha”? (b) Xana nsirhelelo wa Yehovha hi tlhelo ra moya wu ku pfune njhani wena?

21 Yehovha u hi nyika swin’wana leswaku a hi sirhelela: swakudya swa moya leswi fikaka hi nkarhi. Leswaku a hi pfuna hi kuma matimba eRitweni rakwe, Yehovha u lerise “hlonga ro tshembeka ni ro tlhariha” leswaku ri lunghiselela swakudya swa moya. Hlonga ro tshembeka ri tirhisa tibuku, ku katsa ni timagazini ta Xihondzo xo Rindza ni Xalamuka!, swin’we ni minhlangano, tinhlengeletano ni mintsombano ku hi phamela “swakudya . . . hi nkarhi lowu faneleke”—swakudya leswi hi swi lavaka, hi nkarhi lowu hi swi lavaka ha wona. (Matewu 24:45) Xana u tshame u twa swin’wana eminhlanganweni ya Vukreste—eka nhlamulo, nkulumo leyi nyikeriweke hambi ku ri exikhongelweni—leswi ku nyikeke matimba ni xikhutazo lexi a wu xi lava? Xana vutomi bya wena byi tshame byi khumbiwa hi xihloko xo karhi lexi kandziyisiweke eka timagazini leti? Tsundzuka, Yehovha u endla malunghiselelo lawa hinkwawo leswaku a hi sirhelela hi tlhelo ra moya.

22. Minkarhi hinkwayo Yehovha u ma tirhisa njhani matimba yakwe, naswona ha yini ndlela leyi a ma tirhisaka ha yona yi vuyerisa hina?

22 Kunene Yehovha i xitlhangu “xa hinkwavo lava tumbelaka eka [ye]na.” (Pisalema 18:30) Ha swi tiva leswaku matimba yakwe a nga ma tirhiseli ku hi sirhelela eka maxangu man’wana ni man’wana lawa hi langutanaka na wona namuntlha. Kambe, minkarhi hinkwayo wa ma tirhisa matimba yakwe ya ku sirhelela leswaku a hetisisa xikongomelo xakwe. Eku heteleleni, nsirhelelo wo tano wu pfuna vanhu vakwe. Loko hi tshinela eka yena naswona hi tshama erirhandzwini rakwe, Yehovha u ta hi nyika vutomi lebyi hetisekeke lebyi nga riki na makumu. Loko hi ri karhi hi anakanya hi sweswo, hi ta swi kota ku languta ku xaniseka kun’wana ni kun’wana emafambiselweni lawa, ku ri ka ‘nkarhinyana naswona ku ri loku vevukaka.’—2 Vakorinto 4:17.

DYONDZA SWO TALA

Tshama eNkoveni Wa Yehovha Wa Nsirhelelo

I yini nkova wa nsirhelelo naswona vagandzeri va Yehovha va nga kuma nsirhelelo njhani eka wona?