Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 8

Matimba Yo Vuyetela—Yehovha U “Endla Swilo Hinkwaswo Swi Va Leswintshwa”

Matimba Yo Vuyetela—Yehovha U “Endla Swilo Hinkwaswo Swi Va Leswintshwa”

1, 2. Xana i ku lahlekeriwa ka muxaka muni loku hlaselaka vanhu namuntlha, naswona ku hi khumba njhani?

LOKO xihlangi xi faya kumbe xi lahlekeriwa hi xitlangiso lexi xi xi rhandzaka ngopfu, xi rila hi xiviti. Xi hlomula ni mbilu! Kambe, xana u tshama u vona ndlela leyi xikandza xa xihlangi xi xalamukaka ha yona loko mutswari a xi kumela xitlangiso lexi a xi lahlekile? Eka mutswari swi nga ha olova ku kuma xitlangiso kumbe ku xi lunghisa. Kambe u kuma xihlangi xi nga ha tikoti hi ntsako. Xitlangiso lexiya a xi vonaka xi pfotlosekile, se xi lunghisiwile!

2 Yehovha Mutswari lonkulu, u ni matimba yo vuyisa leswi vana va yena va laha misaveni va nga ha swi vonaka onge a swi nge he tlheli swi kumeka. Ina, a hi vulavuli hi switlangiso leswi nga vuliki nchumu. Eminkarhini “ya mangava leyi swi nonon’hwaka ku langutana na yona,” hi lahlekeriwa hi swilo swa nkoka. (2 Timotiya 3:1-5) Swilo swo tala leswi vanhu va swi tekaka swi ri swa risima swi vonaka swi ri ekhombyeni minkarhi hinkwayo—yindlu, nhundzu, ntirho, hambi ku ri rihanyo. Hi nga ha titwa hi hele matimba loko hi anakanya hi ku onhiwa ka mbangu loku vangelaka ku herisiwa ka tinxaka ta swiharhi ni swimilana swo tala. Hambiswiritano, a xi kona lexi hi vangelaka gome ku fana ni ku feriwa hi munhu loyi hi n’wi rhandzaka. Ku tiva ntsena leswaku u lahlekeriwile, swi nga ya swi ku heta matimba.—2 Samuwele 18:33.

3. Hi langutele yini leswi chavelelaka hi ku ya hi Mintirho 3:21, naswona Yehovha u ta tirhisa mani ku swi hetisisa?

3 Ha chaveleleka loko hi dyondza hi matimba ya Yehovha yo vuyetela! Hilaha hi nga ta vona hakona, ku ni swilo swinyingi leswi Xikwembu xi nga ta tlhela xi swi nyika vana va xona va laha misaveni. Entiyisweni, Bibele yi kombisa leswaku xikongomelo xa Yehovha i “ku vuyeteriwa ka swilo hinkwaswo.” (Mintirho 3:21) Leswaku a hetisisa sweswo, Yehovha u ta tirhisa Mfumo wa Mesiya, lowu eka wona ku fumaka N’wana wa yena, Yesu Kreste. Swiendlakalo  swi kombisa leswaku Mfumo lowu wu sungule ku fuma etilweni hi 1914. * (Matewu 24:3-14) Ku ta vuyeteriwa yini? A hi kambisiseni yin’wana ya mintirho leyikulu ya ku vuyetela ya Yehovha. Wun’wana wa yona se ha wu vona naswona ha vuyeriwa hi wona. Yin’wana yi ta hlanganisa swilo swo tala enkarhini lowu taka.

Ku Vuyeteriwa Ka Vugandzeri Byo Tenga

4, 5. Xana ku endleke yini eka vanhu va Xikwembu hi 607 B.C.E., naswona Yehovha u va tshembise yini?

4 Leswi ana se Yehovha a swi vuyeteleke i vugandzeri byo tenga. Leswaku hi twisisa leswi sweswo swi vulaka swona, a hi kambisiseni matimu ya mfumo wa Yuda. Loko hi ri karhi hi endla sweswo, hi ta vona ndlela leyi Yehovha a ma tirhisaka ha yona matimba yo vuyetela.—Varhoma 15:4.

5 Wa nga anakanya ndlela leyi Vayuda vo tshembeka va titweke ha yona loko Yerusalema a lovisiwa hi 607 B.C.E. Muti wa vona lowu rhandzekaka wu lovisiwile, naswona makhumbi ya wona ma mbundzumuxiwile. Xo biha ku tlurisa, tempele yo kwetsima leyi akiweke hi Solomoni, ku nga xivindzi xa vugandzeri byo tenga bya Yehovha emisaveni hinkwayo, yi sale yi ri rhumbi. (Pisalema 79:1) Lava poneke va yisiwe evuhlongeni eBabilona, va siya tiko ra rikwavo, ri sala ri ri marhumbi lama ku tshamaka swiharhi swa nhova eka wona. (Yeremiya 9:11) Eka vanhu a swi tikomba ri lovele makumu. (Pisalema 137:1) Kambe Yehovha u vulavule ka ha ri emahlweni hi ta ndzoviso lowu, a tlhela a tshembisa leswaku tiko leri a ri ta tlhela ri pfuxiwa.

6-8. (a) Xana i mhaka yihi leyi humelelaka ngopfu ematsalweni ya vaprofeta va Vaheveru, naswona vuprofeta byebyo byi hetiseke njhani ro sungula? (b) Eminkarhini ya manguva lawa, xana vuprofeta byo tala byo vuyetela byi hetiseke njhani eka vanhu va Xikwembu?

6 Entiyisweni, ku vuyeteriwa a ku ri mhaka leyi humelelaka ngopfu  ematsalweni ya vaprofeta va Vaheveru. * Hi ku tirhisa vona, Yehovha u tshembise leswaku tiko leri u ta ri tlherisela exiyin’weni xa rona, ri va ni vaaki, ri va leri noneke, leri sirheleriweke eka swivandzana swa nhova naswona a ri nge he hlaseriwi hi valala. Tiko ra vona leri tlheleleke exiyin’weni xa rona u ri vule paradeyisi ya xiviri! (Esaya 65:25; Ezekiyele 34:25; 36:35) Ku tlula kwalaho, a ku ta pfuxetiwa vugandzeri byo tenga, naswona tempele a yi ta akiwa hi vuntshwa. (Mikiya 4:1-5) Vuprofeta lebyi byi nyike Vayuda ntshembo, byi va pfuna leswaku va tiyisela vuhlonga eBabilona ku ringana malembe ya 70.

7 Nkarhi wa ku vuyeteriwa wu kale wu fika. Loko va ntshunxiwile eBabilona, Vayuda va tlhelele eYerusalema va fika va pfuxeta tempele ya Yehovha. (Ezra 1:1, 2) Ntsendze loko va namarhela vugandzeri byo tenga, Yehovha a a ta va katekisa a tlhela a endla tiko ra vona ri nona ri tlhela ri tsaka. A a va sirhelela eka valala ni le ka swiharhi swa nhova leswi nga ni makume ya malembe swi ri karhi swi tshama etikweni ra vona. Wa nga vona ndlela leyi va faneleke va tsake ha yona hikwalaho ka matimba ya Yehovha yo vuyetela! Kambe, swiendlakalo sweswo a swo va masungulo ya ku hetiseka kutsongo ka vuprofeta bya ku vuyeteriwa. Ku hetiseka lokukulu a ka ha ri endleleni “exiphen’wini xo hetelela xa masiku,” ku nga nkarhi lowu hi hanyaka eka wona, lowu eka wona Mudyandzhaka wa Hosi Davhida, loyi ku nga khale a tshembisiwile, a nga ta vekiwa exiluvelweni.—Esaya 2:2-4; 9:6, 7.

8 Endzhakunyana ka loko Yesu a vekiwe exiluvelweni eMfun’weni wa le tilweni hi 1914, u khathalele swilaveko swa moya swa vanhu va Xikwembu lavo tshembeka emisaveni. Hilaha Korexe nhenha ya Muperesiya yi ntshunxeke masalela ya Vayuda hakona eBabilona hi 537 B.C.E., Yesu u ntshunxe masalela ya Vayuda va moya—valandzeri vakwe—eka nkucetelo wa Babilona wa manguva lawa, mfumo wa misava wa vukhongeri bya mavunwa. (Varhoma 2:29; Nhlavutelo 18:1-5) Ku sukela hi 1919 ku ya emahlweni, vugandzeri byo tenga byi tlheriseriwe endhawini ya byona leyi faneleke, evuton’wini bya Vakreste va xiviri. (Malakiya 3:1-5) Ku sukela kwalaho, vanhu va Yehovha va n’wi gandzele etempeleni ya yena ya moya leyi basisiweke—ku nga lunghiselelo ra Xikwembu ra vugandzeri byo tenga. Ha yini leswi swi ri swa nkoka eka hina namuntlha?

 Ku Vuyeteriwa Hi Tlhelo Ra Moya—Ha Yini Ku Ri Ka Nkoka

9. Endzhaku ka loko vaapostola va file, xana tikereke ta Vujagana ti byi endle yini vugandzeri bya Xikwembu, kambe Yehovha u endle yini esikwini ra hina?

9 Anakanya hi langutelo leri a ri ri kona khale. Vakreste va le ka lembe xidzana ro sungula va tiphine hi mikateko yo tala ya moya. Kambe Yesu ni vaapostola va vule ka ha ri emahlweni leswaku vugandzeri bya ntiyiso a byi ta thyakisiwa ni ku nyamalala. (Matewu 13:24-30; Mintirho 20:29, 30) Loko nkarhi wa vaprofeta wu herile, ku pfumbuke Vujagana. Vafundhisi va byona va teke tidyondzo ta vuhedeni ni swiendlo swa byona. Va tlhele va endla leswaku swi nga koteki ku tshinela eka Xikwembu, va xi hlamusela tanihi Vunharhu-un’we lebyi nga hlamuselekiki ni ku dyondzisa vanhu ku kombela ndzivalelo eka vaprista ni ku khongela eka Mariya ni le ka “vakwetsimi” vo hambana-hambana ematshan’weni yo khongela eka Yehovha. Sweswi, endzhaku ka madzana ya malembe ya vukanganyisi byebyo, xana Yehovha u endle yini? Exikarhi ka misava leyi ya namuntlha—leyi taleriweke hi vuxisi lebyi nga eka vukhongeri naswona yi thyakisiweke hi swiendlo leswi nga fambisaniki ni Xikwembu—u nghenelerile kutani a pfuxeta vugandzeri byo tenga! Handle ko hundzeleta hi nga vula leswaku ku vuyeteriwa loku i xin’wana xa swiendlakalo swa nkoka swa manguva lawa.

10, 11. (a) Xana i swilo swihi swimbirhi leswi paradeyisi ya moya yi katsaka swona, naswona wena u khumbeka njhani? (b) Xana i vanhu va njhani lava Yehovha a va hlengeleteke eparadeyisini ya moya, naswona va ta va ni lunghelo ro vona yini?

10 Hikwalaho, Vakreste va ntiyiso namuntlha va tsakela paradeyisi ya moya. Xana paradeyisi leyi yi katsa yini? Ngopfu-ngopfu yi katsa swilo swimbirhi. Xo sungula i vugandzeri byo tenga bya Xikwembu xa ntiyiso, Yehovha. U hi katekise hi vugandzeri lebyi nga riki na mavunwa naswona byi nga soholotiwangiki. U hi katekise hi swakudya swa moya. Leswi swi endla hi kota ku dyondza hi Tatana wa hina wa le tilweni, hi n’wi tsakisa ni ku tshinela eka yena. (Yohane 4:24) Mhaka ya vumbirhi ya paradeyisi ya moya yi katsa vanhu. Hilaha Esaya a profeteke hakona, “exiphen’wini xo hetelela xa masiku,” Yehovha u dyondzise vagandzeri va yena tindlela ta ku hanya hi ku rhula. U herise tinyimpi exikarhi ka hina. Hambileswi hi nga hetisekangiki, u hi pfuna ku ambala “vumunhu lebyintshwa.” U katekisa  matshalatshala ya hina hi moya wa yena wo kwetsima, lowu humesaka mihandzu leyinene eka hina. (Vaefesa 4:22-24; Vagalatiya 5:22, 23) Loko u hanya hi ku pfumelelana ni moya wa Xikwembu, kunene u xiphemu xa paradeyisi ya moya.

11 Yehovha u tise vanhu lava a va rhandzaka eka paradeyisi leyi ya moya—lava n’wi rhandzaka, lava rhandzaka ku rhula ni lava “khathalaka hi xilaveko xa vona xa moya.” (Matewu 5:3) Volavo i vanhu lava nga ta va ni lunghelo ro vona ku vuyeteriwa lokukulu—ka vanhu ni ka misava hinkwayo.

“Waswivo, Ndzi Endla Swilo Hinkwaswo Swi Va Leswintshwa.”

12, 13. (a) Ha yini vuprofeta bya ku vuyeteriwa bya ha fanele byi hetiseka hi ndlela yin’wana? (b) Hi xihi xikongomelo xa Yehovha hi misava hilaha a vuleke ha kona aEdeni, naswona ha yini leswi swi hi nyika ntshembo mayelana ni nkarhi lowu taka?

12 Vuprofeta byo tala lebyi vulavulaka hi ku vuyeteriwa, a byi vulavuli hi ku vuyeteriwa hi tlhelo ra swa moya ntsena. Hi xikombiso, Esaya u tsale hi nkarhi lowu vavabyi, lava khwitaka, lavo-fe-mahlo ni lava nga twiki va nga ta hanyisiwa ha wona, naswona rifu ri ta mitiwa hilaha ku nga heriki. (Esaya 25:8; 35:1-7) Switshembiso sweswo a swi hetisekanga hi xiviri eIsrayele wa khale. Hambileswi se hi voneke ku hetiseka ka switshembiso leswi hi tlhelo ra moya esikwini ra hina, ha tiyiseka leswaku enkarhini lowu taka, swi ta hetiseka hi xiviri, naswona hi ndlela leyi hlamarisaka. Hi swi tivisa ku yini?

13 Le ndzhaku aEdeni Yehovha u xi veke erivaleni xikongomelo xa yena mayelana ni misava leyi: A yi fanele yi akiwa hi ndyangu wa vanhu lava tsakeke, lava nga ni rihanyo lerinene ni vun’we. Vavanuna ni vavasati a va fanele va khathalela misava ni swivumbiwa hinkwaswo leswi nga le ka yona, leswaku va endla pulanete hinkwayo yi va paradeyisi. (Genesa 1:28) Sweswo swi hambane ekule ni leswi timhaka ti yimiseke xiswona sweswi. Hambiswiritano, hi nga tiyiseka leswaku swikongomelo swa Yehovha a swi nge siveriwi. (Esaya 55:10, 11) Yesu, Mesiya la nga Hosi leyi vekiweke hi Yehovha, u ta tisa Paradeyisi ya misava hinkwayo.—Luka 23:43.

14, 15. (a) Yehovha u ta swi endla njhani “swilo hinkwaswo swi va leswintshwa”? (b) Xana vutomi byi ta va njhani eParadeyisini, naswona i yini lexi ku tsakisaka ngopfu hi yona?

14 Wa nga anakanya se u vona misava hinkwayo yi hundzuriwe  Paradeyisi! Mayelana ni nkarhi wolowo, Yehovha u te: “Waswivo, ndzi endla swilo hinkwaswo swi va leswintshwa.” (Nhlavutelo 21:5) Vona leswi sweswo swi nga ta vula swona. Loko Yehovha a hetile ku tirhisa matimba ya yena yo lovisa mafambiselo lawa yo biha ya khale, ku ta sala “matilo lamantshwa ni misava leyintshwa.” Leswi swi vula leswaku hulumendhe leyintshwa yi ta fuma yi ri etilweni ehenhla ka misava leyintshwa leyi nga ni vanhu lava rhandzaka Yehovha ni lava endlaka ku rhandza ka yena. (2 Petro 3:13) Sathana swin’we ni madimona yakwe, va ta pfaleriwa. (Nhlavutelo 20:3) Ku ta va ro sungula endzhaku ka magidi ya malembe, leswaku vanhu va ntshunxiwa eka nkucetelo wolowo wo homboloka, wa rivengo ni lowu onhaka. A swi kanakanisi leswaku a hi nge tikoti hi ntsako hikwalaho ka ntshunxeko lowu hi nga ta va hi ri na wona.

15 Eku heteleleni, hi ta kota ku khathalela pulanete leyi yo xonga hilaha a swi fanele swi ve hakona eku sunguleni. Misava yi ni matimba ya ku tipfuxeta hi yoxe. Mativa lama thyakisiweke ni milambu yi nga tibasisa hi yoxe loko leswi swi yi thyakisaka swi susiwile; tindhawu leti onhiweke hi nyimpi ti nga hlakarhela loko ko herisiwa nyimpi. Mawaku ntsako lowu nga ta va kona loko hi tirha hi ku pfumelelana ni milawu ya ntumbuluko ya misava, hi pfuneta ku yi hundzula yi fana ni ntanga, pulanete hinkwayo yi va Edeni leyi nga ni tinxaka-xaka ta leswi hanyaka! Ematshan’weni yo kukula tinxaka-xaka ta swiharhi ni swimilana, munhu u ta va ni ku rhula ni ntumbuluko hinkwawo lowu nga emisaveni. Hambi ku ri vana, a xi kona xiharhi lexi va nga ta xi chava.—Esaya 9:6, 7; 11:1-9.

16. EParadeyisini, i ku vuyeteriwa kwihi loku nga ta khumba un’wana ni un’wana wa vanhu lavo tshembeka?

16 Na hina vini hi ta tsakela ku hlakarhela. Endzhaku ka Armagedoni, lava poneke va ta vona vanhu lava hanyisiwaka hi singita emisaveni hinkwayo. Hilaha a endleke hakona loko a ri emisaveni, Yesu u ta tirhisa matimba ya yena lawa Xikwembu xi n’wi nyikeke wona leswaku a hanyisa lavo-fe-mahlo, lava nga twiki, lava lamaleke ni lava vabyaka. (Matewu 15:30) Lava dyuhaleke va ta tlhela va kuma matimba ni rihanyo lerinene. (Yobo 33:25) Ku khwanyala ku ta nyamalala, swirho swi ta oloriwa ni misiha yi ta tiyelela. Vanhu hinkwavo lavo tshembeka va ta swi twa leswaku xidyoho ni  ku nga hetiseki swi ya swi nyamalala hakatsongo-tsongo. Mawaku ndlela leyi hi nga ta nkhensa Yehovha Xikwembu ha yona, hikwalaho ka matimba ya yena lama hlamarisaka yo vuyetela! Sweswi a hi xiyeni mhaka leyi ngopfu-ngopfu yi khutazaka mayelana ni karhi wa ku vuyeteriwa loku tsakisaka.

Ku Tlherisela Vutomi Eka Lava Feke

17, 18. (a) Hikwalaho ka yini Yesu a tshinye Vasaduki? (b) I yini leswi vangeleke leswaku Eliya a kombela Yehovha leswaku a pfuxa xifanyetana?

17 Eka lembe-xidzana ro sungula C.E., varhangeri van’wana va vukhongeri lava vuriwaka Vasaduki, a va nga pfumeli eka ku pfuxiwa ka vafi. Yesu u va tshinye hi marito lawa: “Mi hoxisile, hikuva a mi ma tivi Matsalwa hambi ku ri matimba ya Xikwembu.” (Matewu 22:29) Ina, Matsalwa ma paluxa leswaku Yehovha u ni matimba yo vuyetela. U ta swi endlisa ku yini sweswo?

18 Wa nga anakanya hi leswi endlekeke esikwini ra Eliya. Noni a a yi tlakule ntsumbu wa n’wana wa yona wo sungula ni wo hetelela. Xifanyetana xa yona a a xi file. Muprofeta Eliya loyi a a endzele noni swa nkarhinyana, swi nga ha endleka leswaku a a chuhile. Eku sunguleni u pfune n’wana loyi leswaku a nga fi hi ndlala. Swi nga ha endleka leswaku Eliya a tolovelane ngopfu ni xifanyetana lexi. Mana wa xona a a tshoveke mbilu. Xifanyetana lexi a xi n’wi sula mihloti yo feriwa hi nuna. Swi nga ha endleka leswaku a a ri ni ntshembo wa leswaku xi ta n’wi wundla loko se a dyuhele. Hikwalaho ka gome, noni a yi ehleketa leswaku yi le ku xupuriweni hikwalaho ka swidyoho swa yona swa nkarhi lowu hundzeke. Eliya a nga swi kotanga ku tiyiselela nhlomulo lowu. U teke ntsumbu emavokweni ya noni, a wu yisa kamareni ra yena, kutani a kombela Yehovha Xikwembu leswaku a tlherisela moya-xiviri kumbe vutomi bya n’wana loyi.—1 Tihosi 17:8-21.

19, 20. (a) Abrahama u swi kombise njhani leswaku u ni ripfumelo eka matimba ya Yehovha yo vuyetela, naswona ripfumelo ro tano a ri sekeriwe eka yini? (b) Xana Yehovha u n’wi vuyerise njhani Eliya hikwalaho ka ripfumelo rakwe?

19 Eliya a nga ri wo sungula ku tshemba leswaku vafi va ta pfuxiwa. Eka malembe-xidzana lama hundzeke, Abrahama a a tshemba leswaku Yehovha u na wona matimba yo tlherisela vutomi—naswona a a ri ni xivangelo lexi twalaka xo tshemba sweswo. Loko  Abrahama a ri ni malembe ya 100 naswona Sara a ri na 90, Yehovha u hlakarherise swirho swa vona swo veleka, hi singita u endle leswaku Sara a veleka n’wana wa mufana. (Genesa 17:17; 21:2, 3) Endzhakunyana loko n’wana se a kurile, Yehovha u kombele Abrahama leswaku a endla gandzelo hi n’wana wa yena. Abrahama u kombise ripfumelo, a a ri ni ntshembo wa leswaku Yehovha u ta byi vuyisa vutomi bya n’wana wa yena Isaka la rhandzekaka. (Vaheveru 11:17-19) Ripfumelo ro tano, ro enta ri swi kombisa kahle leswaku hikwalaho ka yini Abrahama, loko a nga si tlhandlukela entshaveni ku ya endla gandzelo hi n’wana wa yena, a tiyisekiseke malandza ya yena leswaku yena na Isaka va ta vuya swin’we.—Genesa 22:5.

“Waswivo, n’wana wa wena wa hanya”!

20 Yehovha u tshike Isaka a hanya, kutani a ku nga ri na xilaveko xa leswaku a pfuxiwa enkarhini wolowo. Hambiswiritano, emhakeni ya Eliya n’wana wa noni ana se a file—kambe a ku nga ri khale a file. Yehovha u vuyerise ripfumelo ra muprofeta hi ku pfuxa n’wana! Hiloko Eliya a teka n’wana a n’wi yisa eka mana wakwe, a vula marito lawa lama nga rivalekiki, a ku: “Waswivo, n’wana wa wena wa hanya.”—1 Tihosi 17:22-24.

21, 22. (a) A ku ri xihi xikongomelo xa ku tsariwa ka timhaka ta ku pfuxiwa ka vafi eMatsalweni? (b) Xana ntirho wa ku pfuxiwa ka vafi eParadeyisini wu ta va wukulu ku fikela kwihi, naswona va ta pfuxiwa hi mani?

21 Xisweswo i ro sungula eBibeleni, hi vona Yehovha a tirhisa matimba ya yena yo pfuxa vanhu. Endzhakunyana Yehovha u nyike Eliya, Yesu, Pawulo na Petro matimba yo pfuxa lava feke. Ina, lava va pfuxiweke va hetelele va file. Hambiswiritano, timhaka teto ta le Bibeleni ti hi kombisa swilo swo hlamarisa leswi swi nga ta endleka enkarhini lowu taka.

22 EParadeyisini, Yesu u ta hetisisa ntirho wa yena tanihi leswi a nga “ku pfuka ni vutomi.” (Yohane 11:25) U ta pfuxa vanhu va ntsandza-vahlayi, a va nyika lunghelo ro hanya hilaha ku nga heriki emisaveni ya Paradeyisi. (Yohane 5:28, 29) Wa nga anakanya hi ku hlangana ka vanghana lava rhandzanaka, ni maxaka, lava ku nga khale va hambanisiwe hi rifu, va ri karhi va vukarhana, ku twala swikhiyana swa ntsako! Vanhu hinkwavo va ta dzunisa Yehovha hikwalaho ka matimba ya yena yo vuyetela.

23. Hi xihi xikombiso lexikulu swinene xa matimba ya Yehovha, naswona xi wu tiyisa njhani ntshembo wa hina mayelana ni nkarhi lowu taka?

 23 Yehovha u nyikele xitiyisekiso xa leswaku ntshembo wolowo wu tiyile. U nyikele xikombiso lexikulu swinene xa matimba ya yena, hi ku pfuxa N’wana wakwe Yesu, a va xivumbiwa xa moya lexi nga ni matimba, a va ni xikhundla lexi landzelaka xa Yehovha. Yesu la pfuxiweke u voniwe hi madzana-dzana ya vanhu. (1 Vakorinto 15:5, 6) Hambi ku ri lava a va kanakana, vumbhoni byebyo byi fanele byi va enerisile. Yehovha u ni matimba yo vuyetela vutomi.

24. Hikwalaho ka yini hi nga tiyisekaka leswaku Yehovha u ta va pfuxa lava feke, naswona i ntshembo wihi lowu un’wana ni un’wana wa hina a faneleke a anakanya ha wona?

24 Yehovha a ngo va na matimba yo pfuxa vafi ntsena, kambe wa swi tsakela ku va pfuxa. Yobo, wanuna wo tshembeka u huhuteriwe ku vula leswaku kahle-kahle, Yehovha u navela ku pfuxa vafi. (Yobo 14:15) Xana sweswo a swi ku endli u rhandza Xikwembu, lexi xi hisekelaka ku tirhisa matimba ya xona yo vuyetela hi ndlela yoleyo ya rirhandzu? Nakambe tsundzuka leswaku ku pfuxiwa ka vafi hi wun’wana wa mintirho leyikulu leyi Yehovha a nga ta yi endla enkarhini lowu taka. Loko u ri karhi u tshinela eka yena, minkarhi hinkwayo anakanya hi ntshembo wa risima, wa leswaku na wena siku rin’wana u ta swi vona loko Yehovha a “endla swilo hinkwaswo swi va leswintshwa.”—Nhlavutelo 21:5.

^ ndzim. 3 ‘Minkarhi ya ku vuyeteriwa ka swilo hinkwaswo’ yi sungule loko ku simekiwa Mfumo wa Mesiya, loko mudyandzhaka wo tshembeka wa Hosi Davhida a vekiwe exiluvelweni. Yehovha u tshembise Davhida leswaku mudyandzhaka wa yena a a ta fuma hilaha ku nga heriki. (Pisalema 89:35-37) Kambe endzhaku ka loko Babilona wu lovise Yerusalema hi 607 B.C.E., a ku na vatukulu va Davhida va xiviri lava vekiweke exiluvelweni xa vuhosi xa Xikwembu. Loko a vekiwa exiluvelweni xa vuhosi etilweni, Yesu loyi a velekiweke emisaveni tanihi mudyandzhaka wa Davhida, u ve Hosi leyi a ku ri khale yi tshembisiwile.

^ ndzim. 6 Hi xikombiso, Muxe, Esaya, Yeremiya, Ezekiyele, Hosiya, Yuwele, Amosi, Obadiya, Mikiya na Sofaniya, hinkwavo va vulavule hi mhaka leyi.

DYONDZA SWO TALA

Hi Xihi Xikongomelo Xa Xikwembu Hi Misava?

Xana xikongomelo xa Xikwembu xa ku endla misava leyi yi va paradeyisi xi ta kala xi hetiseka? Loko swi ri tano, xi ta hetiseka rini?