Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 4

“Yehovha U . . . Ni Matimba Lamakulu”

“Yehovha U . . . Ni Matimba Lamakulu”

1, 2. Hi swihi swilo swo hlamarisa leswi Eliya a swi voneke evuton’wini byakwe, kambe hi swihi swiendlakalo swo hlamarisa leswi a swi voneke ebakweni ra Ntshava ya Horebe?

ELIYA u tshame a vona swilo swo hlamarisa. U vone mawukuwuku ma n’wi tisela swakudya kambirhi hi siku loko a ha ri evutumbelweni. U vone swibya swimbirhi leswi a swi tshama swi tele hi fulawa ni mafurha naswona a ma nga heli hambileswi a ku ri ni ndlala leyikulu etikweni. U tlhele a vona ndzilo wu xika hi le tilweni, ku ri ndlela yo hlamula xikhongelo xakwe. (1 Tihosi, tindzima 17, 18) Kambe, Eliya a a nga si tshama a vona nchumu wo fana ni lowu.

2 Loko a ri karhi a khokhovela ekusuhi ni nyangwa lowu nghenaka ebakweni ra Ntshava ya Horebe, u vone swiendlakalo swo hlamarisa swi ta hi ku landzelelana. Xo sungula, a ku ri mheho. Swi vonaka onge mheho ya kona a yi ri ni matimba swinene naswona huwa ra yona a ri pfala ni tindleve, hikuva a yi ri ni matimba lerova a yi pandza tintshava ni ku fayetela maribye. Endzhaku ka sweswo ku landzele ku tsekatseka ka misava, loku a ku humesa swilo swa matimba leswi a swi ri ehansi ka misava. Kutani ku landzele ndzilo. Loko wu ri karhi wu hisa ndhawu yoleyo, swi nga ha endleka Eliya a twe moya wa wona wo hisa swinene.—1 Tihosi 19:8-12.

“Waswivo! Yehovha a a hundza”

3. Xana Eliya u vone vumbhoni bya leswaku Xikwembu xi ni mfanelo yihi, naswona hina hi nga byi vona kwihi vumbhoni bya mfanelo yoleyo?

3 Swiendlakalo leswi swo hambana-hambana leswi Eliya a swi voneke a swi ri ni nchumu lowu fanaka—a swi kombisa matimba lamakulu ya Yehovha Xikwembu. Ina, a swi kali swi lava leswaku hi vona masingita ku ri kona hi lemukaka leswaku Xikwembu xi ni mfanelo leyi. Swi le rivaleni leswaku xi na wona. Bibele yi hi byela leswaku ntumbuluko wu nyikela vumbhoni bya “matimba ya [Yehovha] lama nga riki na makumu ni Vukwembu bya [yena].” (Varhoma 1:20) Ehleketa ntsena hi ku vonakala loku pfalaka ni mahlo swin’we ni pongo ra xidzedze, mpfula leyi halakaka kunene, xibakabaka lexikulu ngopfu lexi nga lo mpha, hi tinyeleti! Xana wa ma vona matimba ya Xikwembu eka swilo leswi? Kambe, a hi vangani  lava ma lemukaka hakunene matimba ya Xikwembu emisaveni ya namuntlha. Kambe vo hlayanyana va ma languta hi ndlela leyi faneleke. Kambe, ku twisisa mfanelo leyi ya Xikwembu, swi hi nyika swivangelo swo tala swo tshinela eka Yehovha. Eka xiyenge lexi, hi ta kambisisa ngopfu matimba ya Yehovha lama nga ringaniki na nchumu.

Mfanelo Ya Nkoka Ya Yehovha

4, 5. (a) Xana vito ra Yehovha ri fambisana njhani ni matimba kumbe ntamu wakwe? (b) Ha yini swi fanela leswaku Yehovha a hlawula nkunzi leswaku yi fanekisela matimba yakwe?

4 Yehovha u ni matimba yo hlawuleka. Yeremiya 10:6 yi ri: “Oho Yehovha, a nga kona nikatsongo la fanaka na wena. U nkulu, naswona vito ra wena ri ni matimba lamakulu.” Xiya leswaku matimba kumbe ntamu, swi fambisana ngopfu ni vito ra Yehovha. Tsundzuka, vito rakwe ri vula leswaku “U Endla Leswaku Swi Va Kona.” I yini leswi endlaka leswaku Yehovha a vumba nchumu wun’wana ni wun’wana lowu a lavaka ku wu vumba ni ku tiendla nchumu lowu a lavaka ku va wona? Handle ko kanakana hileswi a nga ni matimba. Ina, vuswikoti bya Yehovha bya ku teka goza, bya ku endla leswi a swi rhandzaka, a byi na ndzilakana. Yin’wana ya timfanelo takwe ta nkoka i matimba wolawo.

5 Yehovha u tirhisa swifaniso leswaku a hi pfuna, hikuva hi nga ka hi nga swi koti ku tiva leswaku matimba yakwe i makulu ku fikela kwihi. Hilaha hi swi voneke hakona, nkunzi yi fanekisela matimba yakwe. (Ezekiyele 1:4-10) U hlawule kahle, hikuva hambi ku ri nkunzi leyi tirhisiwaka ekaya i xivumbiwa lexikulu, naswona xi ni matimba. Vanhu va le Palestina eminkarhini ya Bibele a va nga tali ku langutana ni nchumu lowu nga ni matimba, kumbe a va nga si tshama va langutana na wona. Kambe a va ti tiva tinkunzi leti nga ni matimba—tinkunzi to leva kumbe tinyarhi leto leva ngopfu, leti sweswi ti nga ha riki kona. (Yobo 39:9-12) Julius Caesar lowa Mufumi wa le rhoma u tshame a vula leswaku tinkunzi leti, a ti ri titsongonyana eka tindlopfu. U tsarile: “A ti ri ni matimba lamakulu, naswona a ti ri ni rivilo lerikulu.” Vona ndlela leyi a wu ta titwa u ri ntsongo ni ku tsana ha yona loko u yime ekusuhi ni xivumbiwa xo tano!

6. Ha yini ku ri Yehovha ntsena la vuriwaka “Lowa Matimba Hinkwawo”?

 6 Hilaha ku fanaka, munhu a hi nchumu naswona a nga na matimba loko a pimanisiwa na Yehovha Xikwembu xa matimba. Eka yena, hambi ku ri matiko lama nga ni matimba ma fana ni ntshurinyana exikalweni. (Esaya 40:15) Yehovha u hambanile ni swivumbiwa swin’wana, u ni matimba lama nga heriki, hikuva hi yena ntsena la vuriwaka “Lowa Matimba Hinkwawo.” * (Nhlavutelo 15:3) Yehovha u ni “ntamu lowukulu” ni “matimba lamakulu.” (Esaya 40:26) U tshama a ri ni matimba, a ma heli. A nga kumi matimba endhawini yo karhi, hikuva “ntamu i wa Xikwembu.” (Pisalema 62:11) Kambe, xana Yehovha u ma tirhisa njhani matimba yakwe?

Ndlela Leyi Yehovha A Tirhisaka Matimba Yakwe Ha Yona

7. Moya lowo kwetsima wa Yehovha i yini, naswona marito ya ririmi ro sungula lama tirhisiweke eBibeleni ma ringanyeta yini?

7 Moya lowo kwetsima wu huma eka Yehovha hi mpimo lowukulu. I matimba ya Xikwembu lama tirhaka. Kahle-kahle, eka Genesa 1:2, Bibele yi vula leswaku i “matimba lama tirhaka” ya Xikwembu. Marito yo sungula ya Xiheveru ni Xigriki lama hundzuluxeriweke ma va “moya,” eka mongo wun’wana ma nga ha hundzuluxeriwa ma va “mheho,” “mahika” ni “ku hunga.” Hi ku ya hi vatsari va tidikixinari, marito yo sungula ya ririmi ma nga ha kombetela eka matimba lama nga vonakiki lama nga eku tirheni. A hi swi koti ku vona moya wa Xikwembu ku fana ni leswi hi nga swi kotiki ku vona mheho, kambe leswi wu swi endlaka i swa xiviri naswona ha swi vona.

8. EBibeleni, xana moya wa Xikwembu wu fanisiwa na yini, naswona ha yini swi fanela leswaku wu fanisiwa ni swilo leswi?

8 Moya lowo kwetsima wa Xikwembu wu pfumelelana ni swiyimo nkarhi hinkwawo. Yehovha a nga wu tirhisa ku endla xin’wana ni xin’wana lexi a lavaka ku xi endla. Kutani, swa fanela leswi eBibeleni moya wa Xikwembu wu vitaniwa “ritiho” ra xona, “voko ra matimba” ra xona kumbe “voko leri tshambulutiweke” ra xona. (Luka 11:20; Deteronoma 5:15; Pisalema 8:3) Tanihi leswi munhu  a nga ha tirhisaka voko rakwe ku endla mintirho yo hambana-hambana, xisweswo Xikwembu xi nga tirhisa moya wa xona ku endla swin’wana ni swin’wana leswi xi lavaka ku swi endla—ku fana ni ku vumba atomo leyitsongo kumbe ku pandza Lwandle ro Tshwuka kumbe ku endla leswaku Vakreste va lembe-xidzana ro sungula va vulavula hi tindzimi timbe.

9. Xana Yehovha u fuma yini?

9 Yehovha na yena u ni matimba ya ku tirhisa vulawuri byakwe tanihi Hosi ya Misava Hinkwayo. Ehleketa u ri ni swivumbiwa swo tlhariha swa timiliyoni ta timiliyoni, leswi tiyimiseleke ku ku yingisa! Yehovha u fuma swivumbiwa swo tarisa xisweswo. U ni vanhu lava nga malandza yakwe, lava eMatsalweni hakanyingi va fanisiwaka ni vuthu. (Pisalema 68:11; 110:3) Kambe, vanhu a va na matimba loko va pimanisiwa ni tintsumi. Phela, loko vuthu ra Vaasiriya ri hlasela vanhu va Xikwembu, ntsumi yin’we yi dlaye masocha lama ringanaka 185 000 hi vusiku byin’we! (2 Tihosi 19:35) Tintsumi ta Xikwembu ti ni “matimba lamakulu.”—Pisalema 103:19, 20.

10. (a) Ha yini Lowa Matimba Hinkwawo a vuriwa Yehovha wa mavuthu? (b) Hi xihi xivumbiwa lexi nga ni matimba ku tlula swivumbiwa hinkwaswo leswi Yehovha a swi tumbuluxeke?

10 I tingani tintsumi leti nga kona? Muprofeta Daniyele u ve ni xivono xa le tilweni lexi eka xona a voneke swivumbiwa swa moya leswi tlulaka 100 wa timiliyoni swi ri emahlweni ka xiluvelo xa Yehovha, kambe a xi kona lexi kombisaka leswaku u vone swivumbiwa hinkwaswo swa moya. (Daniyele 7:10) Kutani, swi nga ha endleka ku ri ni madzana ya timiliyoni ta tintsumi. Hi yona mhaka leyi Xikwembu xi vuriwaka Yehovha wa mavuthu. Xithopo lexi xi hlamusela xikhundla xa yena lexi tlakukeke lexi a nga na xona tanihi Murhangeri wa tintsumi to tala ngopfu, leti hlelekeke. U veke munhu un’we ntsena leswaku a langutela swivumbiwa leswi hinkwaswo swa moya, ku nga N’wana wakwe, “mativula ya ntumbuluko hinkwawo.” (Vakolosa 1:15) Leswi a nga ntsumi leyikulu—ndhuna ya tintsumi hinkwato, tiserafi, makerubu—Yesu u ni matimba ya ku tlula hinkwaswo leswi Yehovha a swi tumbuluxeke.

11, 12. (a) Xana rito ra Xikwembu ri ni matimba hi tindlela tihi? (b) Xana Yesu u swi tiyisekise njhani leswaku matimba ya Yehovha i makulu swinene?

11 Yehovha wa ha ri ni ndlela yin’wana ya ku kombisa matimba  yakwe. Vaheveru 4:12 yi ri: “Rito ra Xikwembu ra hanya naswona ri ni matimba.” Xana u tshame u ma vona matimba lama hlamarisaka ya rito ra Xikwembu kumbe matimba ya marungula lama huhuteriweke hi moya, lawa sweswi ma hlayisiweke eBibeleni? Ma nga hi tiyisa, ma nga aka ripfumelo ra hina ni ku hi pfuna leswaku hi endla ku cinca lokukulu evuton’wini bya hina. Muapostola Pawulo u lemukise vapfumeri-kulobye leswaku va tivonela eka vanhu lava nga ni mahanyelo yo biha. Kutani a engetela a ku: “Hi leswi van’wana va n’wina a mi ri swona.” (1 Vakorinto 6:9-11) Ina, “rito ra Xikwembu” ri tirhe hi matimba eka vona naswona ri va pfune leswaku va cinca.

12 Matimba ya Yehovha i makulu ngopfu ni tindlela leti a ma tirhisaka ha tona ta tirha swinene lerova a ma nge hluriwi hi nchumu. Yesu u te: “Eka Xikwembu swilo hinkwaswo swa koteka.” (Matewu 19:26) Hi swihi swikongomelo leswi Yehovha a swi hetisisaka hi matimba lawa?

Matimba Lama Tirhisiwaka Hi Ndlela Leyi Nga Ni Xikongomelo

13, 14. (a) Ha yini hi nga vulaka leswaku Yehovha a ngo va xihlovo xa matimba lexi nga hanyiki? (b) Xana Yehovha u ma tirhisa hi tindlela tihi matimba yakwe?

13 A ma kona matimba lama nga pimanisiwaka ni moya wa Yehovha; naswona Yehovha a hi matimba lama nga hanyiki, a ngo va xihlovo xa matimba ntsena. I Xikwembu lexi hanyaka lexi swi kotaka ku lawula matimba ya xona hi ku helela. Kambe, i yini lexi n’wi susumetelaka ku tirhisa matimba ya yena?

14 Hilaha hi nga ta swi vona hakona, Xikwembu xi tirhisa matimba ku vumba, ku herisa, ku sirhelela ni ku vuyetela—hi ku komisa, xi ma tirhisela ku endla xin’wana ni xin’wana lexi fambisanaka ni swikongomelo swa xona leswi hetisekeke. (Esaya 46:10) Eswiyin’weni swin’wana, Yehovha u tirhisa matimba yakwe ku paluxa timfanelo ta nkoka ta vumunhu byakwe swin’we ni milawu yakwe. Nchumu wa nkoka ngopfu, u tirhisa matimba yakwe ku hetisisa ku endla ku rhandza kakwe—ku lwela vuhosi byakwe ni ku kwetsimisa vito rakwe lero kwetsima hi ku tirhisa Mfumo wakwe wa Mesiya. A xi kona lexi nga sivelaka xikongomelo xexo.

15. Xana Yehovha u tirhisa matimba yakwe hi xikongomelo xihi malunghana ni malandza yakwe, naswona leswi swi kombisiwe njhani emhakeni ya Eliya?

 15 Yehovha u tlhela a tirhisa matimba yakwe ku pfuna hina vanhu, ha un’we-un’we. Xiya leswi 2 Tikronika 16:9 yi swi vulaka: “Loko ku ri Yehovha, mahlo yakwe ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” Xikombiso xa mhaka leyi, i Eliya la boxiweke eku sunguleni. Ha yini Yehovha a kombise matimba yakwe lamakulu ya Vukwembu eka yena? Phela, Yezabele Hosi ya Xisati leyo homboloka a a hlambanye leswaku Eliya a dlayiwa. Muprofeta loyi a a hanya hi ku tumbela, a balekisa vutomi byakwe. U titwe a ri yexe, a chuhile naswona a hele matimba—a a vona onge ntirho lowu a tikarhateke a wu endla a wu ri wa hava. Leswaku a chavelela wanuna loyi a a karhatekile, Yehovha u tsundzuxe Eliya hi matimba ya le henhla. Xidzedze, ku tsekatseka ka misava ni ndzilo, swi kombise Eliya leswaku Munhu la nga ni matimba lamakulu evuakweni hinkwabyo a a ri na yena kwalaho. Xana Eliya a a ta chava yini eka Yezabele, leswi yena a nga ni Xikwembu xa matimba hinkwawo etlhelo kakwe?—1 Tihosi 19:1-12. *

16. Ha yini hi nga kumaka nchavelelo loko hi anakanyisisa hi matimba lamakulu ya Yehovha?

16 Hambileswi sweswi ku nga riki nkarhi wakwe wa ku endla masingita, Yehovha a nga si cinca ku sukela esikwini ra Eliya. (1 Vakorinto 13:8) Ninamuntlha wa ha hisekela ku tirhisa matimba yakwe ku pfuna lava n’wi rhandzaka. I ntiyiso, u tshama endhawini leyi tlakukeke ya moya, kambe a nga le kule na hina. matimba yakwe a ma tsandziwi hi nchumu, xisweswo mpfhuka a wu n’wi kavanyeti. Ematshan’weni ya sweswo, “Yehovha u le kusuhi ni hinkwavo lava n’wi vitanaka.” (Pisalema 145:18) Siku rin’wana loko muprofeta Daniyele a vitane Yehovha leswaku a n’wi pfuna, ntsumi yi humelele emahlweni ka yena a nga si heta ni ku khongela! (Daniyele 9:20-23) A xi kona lexi nga sivelaka Yehovha ku pfuna ni ku seketela lava a va rhandzaka.—Pisalema 118:6.

 Xana Matimba Ya Xikwembu Ma Endla Leswaku Xi Nga Tshineleleki?

17. Xana matimba ya Yehovha ma endla leswaku hi n’wi chava hi ndlela yihi, kambe i ku chava ka muxaka muni loku ma nga endliki leswaku hi va na kona?

17 Xana matimba ya Xikwembu ma fanele ma endla leswaku hi xi chava? Hi fanele hi ku ina, hi tlhela hi ku e-e. Ina, hikuva mfanelo leyi yakwe yi hi nyika swivangelo swo tala swa ku chava Xikwembu, ku nga xichavo lexikulu lexi hi vulavuleke ha xona exihlokweni lexi hundzuke. Bibele yi hi byela leswaku ku chava koloko, i “masungulo ya vutlhari.” (Pisalema 111:10) Kambe hi tlhela hi ku e-e, hikuva matimba ya Xikwembu a ma endli leswaku hi titwa hi chava onge hi chava xinghunghumana kumbe hi chava ku tshinela eka xona.

18. (a) Ha yini vanhu vo tala va nga va tshembi vanhu lava nga ni matimba? (b) Hi swi tivisa ku yini leswaku Yehovha a nga ka a nga onhiwi hi matimba yakwe?

18 “Matimba ma tala ku onha; matimba lama heleleke ma onha hilaha ku heleleke.” Marito lawa ma tsariwe hi n’wamatimu wa Munghezi la vuriwaka Lord Acton hi 1887. Marito yakwe ma vuriwe hi ku phindha-phindha, kumbexana hileswi vanhu vo tala va vonaka ma ri ntiyiso lowu nga kanetekiki. Hakanyingi vanhu lava nga hetisekangiki va tirhisa matimba hi ndlela yo biha, hilaha matimu ma swi tiyisekisaka hakona ko tala. (Eklesiasta 4:1; 8:9) Hikwalaho ka sweswo, vanhu vo tala a va va tshembi vanhu lava nga ni matimba, kutani va va fularhela. Yehovha yena u ni matimba lama heleleke. Xana ma n’wi onhile hi ndlela yo karhi? Doo! Hilaha hi swi voneke hakona, wa kwetsima, a nga onhakanga nikatsongo. Yehovha a nga fani ni vavanuna ni vavasati lava nga hetisekangiki lava nga ni matimba emisaveni leyi onhakeke. A nga si tshama a tirhisa matimba yakwe hi ndlela yo biha, naswona a nge pfuki a endle tano.

19, 20. (a) Hi tihi timfanelo tin’wana leti Yehovha a ti tirhisaka minkarhi hinkwayo loko a tirhisa matimba yakwe, naswona ha yini leswi swi chavelela? (b) Xana u nga ku hlamusela njhani ku tikhoma ka Yehovha, naswona ha yini ku ku tsakisa?

19 Tsundzuka, matimba a hi yona ntsena mfanelo ya Yehovha. Ha ha ta dyondza hi vululami byakwe, vutlhari byakwe ni rirhandzu rakwe. Kambe a hi fanelanga hi ehleketa leswaku timfanelo ta Yehovha ti vonaka ntsena hi ndlela yin’we, leyi nga cinca-cinciki, onge hiloko a kota ku tirhisa mfanelo yin’we hi nkarhi wun’we. A swi tano, hi ta swi vona eka tindzima leti landzelaka leswaku minkarhi  hinkwayo Yehovha u tirhisa matimba yakwe hi ku landza vululami byakwe, vutlhari byakwe ni rirhandzu rakwe. Ehleketa hi mfanelo yin’wana leyi Xikwembu xi nga na yona, leyi hakanyingi vafumi va misava va nga riki na yona—ku tikhoma.

20 A hi nge u hlangana ni munhu lonkulu swinene naswona a ri ni matimba lerova u twa a ku chavisa. Kambe, hi ku famba ka nkarhi wa swi lemuka leswaku u vonaka a ri ni musa. U tshama a lunghekile naswona a tiyimisele ku tirhisa matimba yakwe ku pfuna ni ku sirhelela vanhu, ngopfu-ngopfu lava nga sirhelelekangiki ni lava hlaselekaka hi ku olova. A nga wu tirhisi hi ndlela yo biha ntamu wakwe. U n’wi vona a ri karhi a lumbetiwa ku nga ri na xivangelo, kambe u n’wi vona a nga cinca-cinci, a rhurile, a ri ni xindzhuti ni ku va ni musa. U nga ha tivutisa leswaku na wena u nga swi kota ku va ni moya wo rhula ni ku tikhoma ku fana na yena, ngopfu-ngopfu loko a wo va ni matimba yo fana ni yakwe! Loko u ya u n’wi tiva munhu yoloye, xana a wu nga ta sungula ku titwa u kokeleka eka yena? Hi ni swivangelo swa ntsandza-vahlayi swo tshinela eka Yehovha wa matimba hinkwawo. Ehleketa hi xiga hinkwaxo lexi nga xisekelo xa xihloko xa ndzima leyi: “Yehovha u hlwela ku hlundzuka naswona u ni matimba lamakulu.” (Nahume 1:3) Yehovha a nga hatliseli ku tirhisa matimba yakwe ku lwa ni vanhu vakwe, hambi ku ri lavo homboloka. U ni moya wo rhula ni musa. U tikombise a “hlwela ku hlundzuka” hambiloko a tshamela ku vungunyiwa.—Pisalema 78:37-41.

21. Ha yini Yehovha a nga sindzisi vanhu leswaku va endla ku rhandza kakwe, naswona leswi swi hi dyondzisa yini ha yena?

 21 Ehleketa hi ku tikhoma ka Yehovha hi langutelo rin’wana. Loko a wu ri ni matimba lama nga heriki, xana u ehleketa leswaku minkarhi yin’wana a wu ta ringeka ku sindzisa vanhu leswaku va endla swilo hi ndlela ya wena? Yehovha, hambileswi a nga ni matimba hinkwawo, a nga sindzisi vanhu leswaku va n’wi tirhela. Hambileswi ku tirhela Xikwembu ku nga yona ntsena ndlela leyi yisaka evuton’wini lebyi nga heriki, Yehovha a nga hi sindzisi leswaku hi n’wi tirhela. Ku ri na sweswo, u tshika munhu un’wana ni un’wana leswaku a tiendlela xiboho xakwe. U nyika swilemukiso malunghana ni minhlawulo yo biha, a tlhela a hi byela mimbuyelo ya swiboho leswinene. Kambe, hi hina hi faneleke hi endla xiboho. (Deteronoma 30:19, 20) Yehovha a nga byi tsakeli vutirheli lebyi endliwaka hi ku sindzisiwa kumbe hi ku chava matimba yakwe lamakulu. U lava lava nga ta n’wi tirhela hi ku swi rhandza.—2 Vakorinto 9:7.

22, 23. (a) I yini lexi kombaka leswaku Yehovha wa swi tsakela ku nyika van’wana matimba? (b) Xana hi ta dyondza yini eka ndzima leyi landzelaka?

22 A hi languteni xivangelo xo hetelela lexi endlaka leswaku hi nga hanyi hi ku chuha loko hi anakanya hi Xikwembu xa Matimba Hinkwawo. Vanhu lava nga ni matimba va chava ku nyika van’wana matimba. Kambe, Yehovha wa swi tsakela ku va nyika matimba vagandzeri vakwe lavo tshembeka. U nyika van’wana matimba ya ku lawula, hilaha a nyikeke N’wana wakwe matimba ha kona. (Matewu 28:18) Yehovha u nyika malandza yakwe matimba hi ndlela yin’wana. Bibele ya hlamusela: “Wena Yehovha, vukulu, matimba, ku saseka, vunene ni xindzhuti i swa wena; hikuva hinkwaswo leswi nga ematilweni ni leswi swi nga emisaveni i swa wena. . . . Evokweni ra wena ku ni matimba ni ntamu, evokweni ra wena ku ni vuswikoti byo endla swilo leswikulu ni ku va nyika ntamu [vanhu] hinkwavo.”—1 Tikronika 29:11, 12.

23 Ina, Yehovha u ta swi tsakela ku ku nyika matimba. U tlhela a va nyika “matimba lama tlulaka lama tolovelekeke” lava lavaka ku n’wi tirhela. (2 Vakorinto 4:7) Xana u titwa u kokeleka eka Xikwembu lexi xa matimba lamakulu, lexi tirhisaka matimba ya xona hi ndlela ya tintswalo ni rirhandzu? Eka ndzima leyi landzelaka, hi ta yisa nyingiso eka ndlela leyi Yehovha a tirhisaka matimba yakwe ha yona eku tumbuluxeni.

^ ndzim. 6 Rito ra Xigriki leri hundzuluxeriweke ri va “Lowa Matimba Hinkwawo,” hi ku kongoma ri vula “Mufumi wa Hinkwavo; Loyi A Nga Ni Matimba Hinkwawo.”

^ ndzim. 15 Bibele yi vula leswaku “Yehovha a a nga ri kona eka mheho yoleyo . . . , eka ku tsekatseka koloko . . . , endzilweni wolowo.” Ku hambana ni vanhu lava gandzelaka swikwembu swa ntumbuluko swa mintsheketo, malandza ya Yehovha a ma n’wi lavi eka swilo swa ntumbuluko. I nkulu swinene lerova a nge tshami eka nchumu hambi wu ri wihi lowu a wu vumbeke.—1 Tihosi 8:27.