Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Tshinela Eka Yehovha

 NDZIMA 10

“Vanani Vatekeleri Va Xikwembu” Eka Ndlela Leyi Mi Tirhisaka Matimba Ha Yona

“Vanani Vatekeleri Va Xikwembu” Eka Ndlela Leyi Mi Tirhisaka Matimba Ha Yona

1. I ntlhamu wihi lowu vanhu lava nga hetisekangiki va talaka ku wela eka wona?

“LAHA ku nga ni matimba, ku ni ntlhamu.” Marito lawa ma vuriweke hi mutlhokovetseri wa lembe-xidzana ra vu-19 ma boxa khombo rin’wana: ku nga ku tirhisa matimba hi ndlela yo biha. Lexi vavisaka, swa olova swinene leswaku vanhu lava nga hetisekangiki va phasiwa hi ntlhamu lowu. Ina, ematin’wini hinkwawo “munhu a fum[a] munhu ku n’wi endla swo biha.” (Eklesiasta 8:9) Ku tirhisa matimba ku nga ri na rirhandzu swi endle leswaku vanhu va xaniseka swinene.

2, 3. (a) I yini lexi hlamarisaka malunghana ni ndlela leyi Yehovha a tirhisaka matimba ha yona? (b) Xana matimba ya hina ma nga katsa yini naswona hi nga ma tirhisa njhani?

2 Xana a swi hlamarisi leswi Yehovha Xikwembu, hambileswi a nga ni matimba lamakulu, a nga ma tirhisiki hi ndlela yo biha matimba wolawo? Hilaha hi swi voneke ha kona eka tindzima leti hundzeke, minkarhi hinkwayo u tirhisa matimba yakwe—hambi i ya ku tumbuluxa, i ya ku lovisa, i ya ku sirhelela kumbe i ya ku pfuxeta—hi ku pfumelelana ni swikongomelo swakwe swo lulama. Loko hi anakanyisisa hi ndlela leyi a ma tirhisaka ha yona matimba yakwe, hi titwa hi navela ku tshinela eka yena. Swi nga tlhela swi hi endla hi va “vatekeleri va Xikwembu” eka ndlela leyi hi tirhisaka matimba ya hina ha yona. (Vaefesa 5:1) Kambe hina vanhu vo tsana hi ni matimba yo tanihi kwihi?

3 Tsundzuka leswaku munhu u vumbiwe hi “xifaniso xa Xikwembu” naswona u fana na xona. (Genesa 1:26, 27) Hikwalaho, na hina hi ni matimba—hambiloko ma nga nyawuli. Matimba ya hina ma nga ha katsa vuswikoti byo hetisisa swilo, ku tirha; ku lawula kumbe ku langutela van’wana; vuswikoti byo kucetela van’wana, ngopfu-ngopfu lava va hi rhandzaka; matimba ya miri; kumbe swilo leswi vonakaka. Mupisalema u vule leswi  malunghana na Yehovha: “Hikuva hi wena u nga ni xihlovo xa vutomi.” (Pisalema 36:9) Kutani ke, matimba wahi ni wahi lawa hi nga na wona, ma huma eka Xikwembu. Hikwalaho, hi fanele hi ma tirhisa hi ndlela leyi yi xi tsakisaka. Hi nga swi endlisa ku yini sweswo?

Rirhandzu I Xilotlelo

4, 5. (a) Hi xihi xilotlelo xo tirhisa matimba kahle naswona xikombiso xa Xikwembu xi swi kombisa njhani leswi? (b) Xana rirhandzu ri nga hi pfuna hi ndlela yihi leswaku hi tirhisa matimba ya hina kahle?

4 Xilotlelo xo tirhisa matimba kahle i rirhandzu. Xana xikombiso xa Xikwembu a xi swi kombisi leswi? Tsundzuka nhlamuselo ya timfanelo letikulu ta Xikwembu ta mune—matimba, vululami, vutlhari, ni rirhandzu—eka Ndzima 1. Eka timfanelo leti ta mune, hi yihi leyi tlulaka hinkwato? I rirhandzu. Yohane wo Sungula 4:8 yi ri: “Xikwembu i rirhandzu.” Ina, Yehovha hi yexe i rirhandzu; ri lawula hinkwaswo leswi a swi endlaka. Kutani minkarhi hinkwayo loko a tirhisa matimba u ma tirhisa hi rirhandzu naswona u ma tirhisela ku pfuna lava n’wi rhandzaka.

5 Rirhandzu ri ta tlhela ri hi pfuna leswaku hi tirhisa matimba ya hina kahle. Phela Bibele yi hi byela leswaku rirhandzu ri ni “musa” naswona “a ri lavi leswi vuyerisaka rona ntsena.” (1 Vakorinto 13:4, 5) Hikwalaho rirhandzu a ri nge hi pfumeleli leswaku hi va ni vukarhi kumbe ku khoma vanhu lava nga ehansi ka hina hi ndlela ya tihanyi. Ematshan’wini ya sweswo hi ta khoma van’wana hi ndlela leyi xiximekaka ni ku rhangisa swilaveko ni mintlhaveko ya vona emahlweni ka ya hina.—Vafilipiya 2:3, 4.

6, 7. (a) Xana swi vula yini ku chava Xikwembu, naswona hikokwalaho ka yini mfanelo leyi yi ta hi pfuna ku papalata ku tirhisa matimba hi ndlela yo biha? (b) Kombisa ku yelana exikarhi ka ku chava ku hlundzukisa Xikwembu ni ku rhandza Xikwembu.

6 Rirhandzu ri fambisana ni mfanelo yin’wana leyi nga hi pfunaka leswaku hi papalata ku tirhisa matimba hi ndlela yo biha: ku nga ku chava Xikwembu. Hi wihi nkoka wa mfanelo leyi? Swivuriso 16:6 yi ri: “Munhu u fularhela swo biha hikwalaho ka ku chava Yehovha.” Ku tirhisa matimba hi ndlela yo biha i yin’wana ya tindlela to biha leti hi faneleke hi ti fularhela. Ku chava Xikwembu swi ta hi sivela ku kandziyela vanhu lava nga ehansi ka  hina. Ha yini? Hikuva ha swi tiva leswaku hi ta tihlamulela eka Xikwembu hi ndlela leyi vanhu volavo hi va khomaka ha yona. (Nehemiya 5:1-7, 15) Kambe ku chava Xikwembu a swi vuli sweswo ntsena. Hakanyingi rito leri nge “ku chava” ri kombetela eka xichavo lexi enteke eka Xikwembu. Hikwalaho hi ku ya hi Bibele ku chava Xikwembu ni ku xi rhandza swa fambelana. (Deteronoma 10:12, 13) Ku chava loku, loku enteke ku katsa ku chava ku hlundzukisa Xikwembu—ku nga ri hi ku chava vuyelo bya kona kambe hikwalaho ka ku xi rhandza.

7 Hi xikombiso: Ehleketa hi vuxaka lebyinene lebyi nga kona exikarhi ka xifanyetana ni tatana wa xona. Xifanyetana xa ri vona rirhandzu leri tatana wa xona a xi rhandzaka ha rona. Nakambe xifanyetana xa swi tiva leswi tatana wa xona a swi languteleke eka xona naswona xa swi tiva leswaku tatana wa xona u ta xi xupula loko xi huhwa. Xifanyetana a xi tshami xi ri karhi xi chava tatana wa xona. Ku ri na sweswo, xi n’wi rhandza swinene tatana wa xona. Xifanyetana lexi xi tsakela ku endla swilo leswi nga ta tsakisa tatana wa xona. Swi tano ni hi ku chava Xikwembu. Leswi hi rhandzaka Yehovha Tatana wa hina wa le matilweni, hi chava ku endla nchumu wihi ni wihi lowu nga ta n’wi endla “a vaviseka embilwini yakwe.” (Genesa 6:6) Ematshan’weni ya sweswo hi navela ku endla leswaku mbilu ya yena yi tsaka. (Swivuriso 27:11) Hi yona mhaka leyi hi faneleke ku tirhisa matimba ya hina kahle. A hi kambisiseni leswaku leswi hi nga swi endlisa ku yini.

ENdyangwini

8. (a) Hi byihi vulawuri lebyi wanuna a nga na byona endyangwini, naswona u fanele a byi tirhisa njhani? (b) Xana wanuna a nga swi kombisa njhani leswaku u xixima nsati wakwe?

8 Xo sungula xiya ndyangu. Vaefesa 5:23 yi ri: “Wanuna i nhloko ya nsati wakwe.” Xana wanuna a nga byi tirhisa njhani vulawuri lebyi Xikwembu xi n’wi nyikeke byona? Bibele yi byela vavanuna ku tshama ni vavasati va vona “hi ku ya hi vutivi, [va] va xixima leswi va nga xibya xo tsana swinene.” (1 Petro 3:7) Riviti ra Xigriki leri hundzuluxeriwaka va ku, ku “xixima” ri vula “ku teka nchumu wu ri wa risima, wu ri wa ntikelo, . . . ni ku kombisa xichavo.” Marito lama fanaka ni leri ma hundzuluxeriwa va ku “tinyiko” kumbe “nkoka.” (Mintirho 28:10; 1 Petro 2:7)  Wanuna loyi a xiximaka nsati wa yena a nge n’wi bi; naswona a nge n’wi khomisi tingana kumbe ku n’wi hlekula, a n’wi endla a titwa a nga ri nchumu. Ematshan’weni ya sweswo, u n’wi teka a ri wa nkoka naswona wa n’wi xixima. U kombisa hi marito ni swiendlo swakwe—exihundleni ni le rivaleni—leswaku i wa risima eka yena. (Swivuriso 31:28) Wanuna loyi u rhandziwa hi nsati wakwe a tlhela a n’wi xixima naswona xa nkoka swinene u tlhela a amukeleka eka Xikwembu.

Vavanuna ni vavasati va tirhisa matimba ya vona hi ndlela leyinene hi ku kombisana rirhandzu ni xichavo

9. (a) Xana vavasati va ni matimba wahi endyangwini? (b) I yini lexi nga pfunaka wansati ku tirhisa vuswikoti bya yena ku seketela nuna wakwe, naswona vuyelo byi ta va byihi?

9 Vavasati na vona va ni matimba yo karhi endyangwini. Bibele yi vulavula hi vavasati lava chavaka Xikwembu, lava ehansi ka vunhloko lebyi faneleke va khomisaneke ni vavanuna va vona kumbe va va pfuneke leswaku va papalata ku endla swihoxo. (Genesa 21:9-12; 27:46–28:2) Wansati a nga ha va ni byongo lebyi hatlaka byi khoma swilo ku tlula nuna wakwe, kumbe a nga ha va ni timfanelo tin’wana leti nuna wakwe a nga riki na tona. Kambe u fanele a va ni “xichavo xo enta” eka nuna wakwe naswona a a “tiveke ehansi” ka yena “hilaha a endlaka hakona eHosini.” (Vaefesa 5:22, 33) Ku lava ku tsakisa Xikwembu swi nga pfuna wansati ku tirhisa vuswikoti bya yena ku seketela nuna wakwe, ematshan’weni yo n’wi delela kumbe ku ringeta ku n’wi lawula. “Wansati la tlhariheke hakunene” u tirhisana kahle ni nuna wakwe ku aka ndyangu. Xisweswo u va ni ku rhula ni Xikwembu.—Swivuriso 14:1.

10. (a) Xana Xikwembu xi nyike vatswari vulawuri byihi? (b) Xana rito leri nge ku “tshinya” ri vula yini, naswona xana ku fanele ku endliwa njhani? (Vona nhlamuselo ya le hansi.)

10 Vatswari na vona va ni vulawuri lebyi va nga byi nyikiwa hi Xikwembu. Bibele yi tsundzuxa leswaku: “Vatatana, mi nga karhati vana va n’wina, kambe hambetani mi va kurisa hi ku tshinya ni nkongomiso wa mianakanyo wa Yehovha.” (Vaefesa 6:4) Rito leri nge ku “tshinya” eBibeleni ri nga vula “ku kurisa, ku dyondzisa ni ku letela.” Vana va lava ku tshinyiwa; va lava minkongomiso ni swipimelo leswi vuriwaka hi ndlela leyi twisisekaka. Hi ku ya hi Bibele ku tshinya loku kumbe ndzetelo lowu wu fambisana ni rirhandzu. (Swivuriso 13:24) Hikokwalaho “nhonga  ya ndzayo” a yi fanelanga yi tirhisiwa hi ndlela yo biha. * (Swivuriso 22:15; 29:15) Ku tshinya hi ndlela ya nsele leyi nga kombisiki rirhandzu, i ku tirhisiwa ka vulawuri bya vutswari hi ndlela yo biha naswona ku nga dyisa n’wana mbitsi. (Vakolosa 3:21) Hi hala tlhelo, ku tshinya vana hi ndlela leyi faneleke ku va kombisa leswaku vatswari va vona va va rhandza naswona va navela ku va vona va kula va ri vanhu va kahle.

11. Xana vana va nga ma tirhisa njhani matimba ya vona hi ndlela leyinene?

11 Ku vuriwa yini hi vana? Xana va nga ma tirhisa njhani matimba ya vona hi ndlela leyinene? Swivuriso 20:29 yi ri: “Ku saseka ka majaha i matimba ya wona.” Ina, a wu kona nchumu lowu tlulaka leswaku vantshwa va tirhisa matimba ya vona ku tirhela “Mutumbuluxi wa [hina] Lonkulu.” (Eklesiasta 12:1) Vantshwa va fanele va tsundzuka leswaku swiendlo swa vona swi nga ha tsakisa kumbe ku hlundzukisa vatswari va vona. (Swivuriso 23:24, 25) Loko vana va yingisela vatswari va vona lava chavaka Xikwembu naswona va tshama endleleni leyinene, va tisa ntsako etimbilwini ta vatswari va vona. (Vaefesa 6:1) Mahanyelo yo tano ya “tsakisa swinene eHosini.”—Vakolosa 3:20.

EVandlheni

12, 13. (a) Xana vakulu va fanele va byi languta njhani vulawuri lebyi va nga na byona evandlheni? (b) Nyikela xifaniso lexi kombisaka leswaku vakulu va fanele va wu khoma kahle ntlhambi.

12 Evandlheni ra Vukreste, Yehovha u veke valanguteri leswaku va rhangela. (Vaheveru 13:17) Vavanuna lava, lava fanelekaka va tirhisa vulawuri lebyi Xikwembu xi va nyikeke byona ku pfuna ni ku khathalela ntlhambi. Xana xiyimo xa vona xi nyika vakulu mpfumelelo wo kandziyela vapfumeri-kulobye? Doo! Vakulu va fanele va ringanisela, va nga titlakusi hikokwalaho ka vutihlamuleri lebyi va nga na byona evandlheni. (1 Petro 5:2, 3) Bibele yi byela valanguteri yi ku: “Risa[ni] vandlha ra Xikwembu, leri xi ri  xaveke hi ngati ya N’wana wa xona.” (Mintirho 20:28) Lexi i xivangelo lexikulu lexi faneleke xi va endla va khoma xirho xin’wana ni xin’wana xa ntlhambi hi ndlela leyinene.

13 Leswi hi nga swi fanisa hi ndlela leyi. Munghana wa wena lonkulu u ku kombela leswaku u n’wi hlayisela nchumu wa risima. Wena wa swi tiva leswaku munghana wa wena u xave nchumu wolowo hi mali ya le henhla. Xana a wu nga ta wu khathalela swinene? Hilaha ku fanaka, Xikwembu xi nyike vakulu vutihlamuleri byo khathalela nchumu wa nkoka swinene: ku nga vandlha, leri swirho swa rona swi fanisiwaka ni tinyimpfu. (Yohane 21:16, 17) Yehovha wa ti rhandza tinyimpfu takwe—u ti rhandza lerova, u kale a ti xava hi ngati ya risima ya n’wana wakwe loyi a tswariweke a ri swakwe, ku nga Yesu Kreste. Yehovha u humese nxavo wa le henhla ku tlula hinkwayo eka tinyimpfu ta yena. Minkarhi hinkwayo vakulu lava titsongahataka va swi tsundzuka leswi, naswona va khoma tinyimpfu ta Yehovha hi ndlela leyi faneleke.

‘Matimba Ya Ririmi’

14. Hi wahi matimba lawa ririmi ri nga na wona?

14 Bibele yi ri: “Rifu ni vutomi swi le matimbeni ya ririmi.” (Swivuriso 18:21) Ina, ririmi ri nga onha swinene. I mani eka hina la nga si tshamaka a vavisiwa hi marito lama tlhavaka kumbe ku hlekuriwa? Kambe ririmi ri tlhela ri va ni matimba ya ku lunghisa. Swivuriso 12:18 yi ri: “Ririmi ra lavo tlhariha ra horisa.” Ina, marito lama akaka ma nga fana ni murhi lowu hanyisaka embilwini. Xiya swikombiso leswi landzelaka.

15, 16. Ririmi ra hina hi nga ri tirhisa hi ndlela yihi leswaku hi khutaza van’wana?

15 Vatesalonika vo Sungula 5:14 ya tsundzuxa: “Vulavulani hi ku chavelela eka mimoya-xiviri leyi karhatekeke.” Ina, hambi ku ri malandza ya Yehovha yo tshembeka minkarhi yin’wana ma nga ha khomiwa hi ntshikilelo wa mianakanyo. Xana hi nga va pfuna njhani vanhu vo tano? Nyikela xibumabumelo lexi kongomeke, lexi humaka embilwini lexi nga ta va endla va vona leswaku va ni ntikelo ematihlweni ya Yehovha. Va hlayele marito ya Bibele lama nga ni matimba, u va kombisa leswaku Yehovha wa va khathalela naswona wa va rhandza swinene vanhu lava  “tshovekeke mbilu” ni lava “pfotlokeke emoyeni.” (Pisalema 34:18) Loko hi tirhisa matimba ya ririmi ra hina leswaku hi chavelela van’wana, hi kombisa leswaku hi tekelela Xikwembu xa hina lexi nga ni ntwela-vusiwana, “lexi chavelelaka lava nga ni ntshikilelo wa mianakanyo.”—2 Vakorinto 7:6, New American Standard Bible.

16 Hi nga tlhela hi tirhisa matimba ya ririmi ra hina leswaku hi khutaza van’wana. Xana mupfumeri-kuloni u feriwe hi un’wana loyi a n’wi rhandzaka? Marito ya ntwela-vusiwana lama kombisaka leswaku ha n’wi khathalela, ma nga chavelela mbilu leyi nga ni gome. Xana ku ni makwerhu wa xinuna kumbe wa xisati loyi a vonaka onge a nga ha rhandziwi? Ririmi ra vutlhari ri nga tiyisekisa vadyuhari leswaku i va nkoka naswona va rhandziwa. Xana ku na un’wana la karhatiwaka hi mavabyi lama nga tshungulekiki? Ku vula marito lamanene hi riqingho kumbe hi ku kongoma, swi nga n’wi tsakisa swinene loyi a vabyaka. Muvumbi wa hina u fanele a tsaka swinene loko a hi vona hi tirhisa matimba ya hina ya ku vulavula leswaku hi vula marito ‘lamanene lama akaka’!—Vaefesa 4:29.

Ku chumayela mahungu lamanene i ndlela leyinene yo tirhisa matimba ya hina

17. Hi yihi ndlela ya nkoka leyi hi nga tirhisaka ririmi ra hina ha yona ku pfuna van’wana, naswona ha yini hi fanele hi endla leswi?

17 Ku hava ndlela yin’wana ya nkoka yo tirhisa matimba ya  ririmi ku tlula ku byela van’wana mahungu lamanene ya Mfumo wa Xikwembu. Swivuriso 3:27 yi ri: “U nga tshuki u ala ku va endlela leswinene lava swi va lulameleke, loko swi ri ematimbeni ya voko ra wena ku swi endla.” Hi kolota vanhu ku va byela mahungu lamanene yo ponisa vutomi. A swi nge vi swinene loko ho tshama ni rungula ra xihatla leri Yehovha a hi nyikeke rona, hi nga ri byeli van’wana. (1 Vakorinto 9:16, 22) Kambe xana Yehovha u langutele leswaku hi tikarhata ku fikela kwihi loko hi endla ntirho lowu?

Ku Tirhela Yehovha Hi ‘Ntamu Wa Hina Hinkwawo’

18. I yini leswi Yehovha a swi languteleke eka hina?

18 Ku rhandza ka hina Yehovha, ku hi endla leswaku hi hisekela  vutirheli bya Vukreste. Xana Yehovha u langutele leswaku hi endla yini emhakeni leyi? Hi leswi, leswi un’wana ni un’wana wa hina a nga swi kotaka ku swi endla, ku nga khathariseki leswaku xiyimo xa hina xi njhani: “Xin’wana ni xin’wana lexi mi xi endlaka, xi endleni hi moya-xiviri hinkwawo kukota loko mi xi endlela Yehovha, ku nga ri vanhu.” (Vakolosa 3:23) Loko a vula nawu lowukulu ku tlula hinkwayo, Yesu u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:30) Ina, Yehovha u langutele leswaku un’wana ni un’wana wa hina a n’wi rhandza ni ku n’wi tirhela hi moya-xiviri wa yena hinkwawo.

19, 20. (a) Leswi moya-xiviri wu katsaka mbilu, mianakanyo ni matimba, hikwalaho ka yini swilo leswin’wana swi boxiwile eka Marka 12:30? (b) Ku tirhela Yehovha hi moya-xiviri hinkwawo swi vula yini?

19 Xana swi vula yini ku tirhela Xikwembu hi moya-xiviri hinkwawo? Moya-xiviri wu vula munhu a helerile, ku hlanganisa ni vuswikoti bya yena hinkwabyo. Tanihi leswi moya-xiviri wu hlanganisaka mbilu, miehleketo ni matimba, xana hikwalaho ka yini swilo leswin’wana swi boxiwile eka Marka 12:30? Xiya xifaniso lexi. Eminkarhini ya Bibele, munhu a a swi kota ku tixavisa (moya-xiviri wakwe) a va hlonga. Kambe, hlonga swi nga ha endleka ri nga tirheli n’wini wa rona hi mbilu hinkwayo; ri nga tirhisi matimba ya rona hinkwawo kumbe mianakanyo ya rona hinkwayo leswaku ri endla mintirho ya n’wini wa rona. (Vakolosa 3:22) Hikwalaho, swi le rivaleni leswaku Yesu u boxe swilo leswin’wana, ku kandziyisa leswaku hi endla hinkwaswo leswi nga ematimbeni ya hina entirhweni wa Xikwembu. Ku tirhela Xikwembu hi moya-xiviri hinkwawo swi vula ku tikarhata, hi ku tirhisa matimba ni ntamu wa hina hilaha hi nga kotaka ha kona entirhweni wa xona.

20 Xana ku tirha hi moya-xiviri wa hina hinkwawo swi vula leswaku hinkwerhu hi fanele hi heta nkarhi ni matimba lama fanaka evutirhelini? Sweswo a swi nge koteki, hikuva swiyimo ni vuswikoti bya vanhu swa hambana. Hi xikombiso, muntshwa la nga ni rihanyo lerinene ni matimba a nga ha swi kota ku heta nkarhi wo tala a ri eku chumayeleni, ku tlula munhu loyi matimba  yakwe ma hungutiweke hi vudyuhari. Muntshwa la nga siki nghenelaka vukati naswona a nga riki na vutihlamuleri bya ndyangu, a nga ha kota ku endla ntirho wo tala ku tlula loyi a faneleke a khathalela ndyangu. Hi fanele hi tsaka swinene loko ha ha ri ni matimba swin’we ni swiyimo leswi hi pfumelelaka leswaku hi endla leswi engetelekeke evutirhelini! Ina, a hi fanelanga hi va ni moya wa vuxopaxopi, hi tipimanisa ni van’wana emhakeni leyi. (Varhoma 14:10-12) Ku ri na sweswo, matimba ya hina hi fanele hi ma tirhisela ku khutaza van’wana.

21. Hi yihi ndlela yo antswa ni ya nkoka swinene yo tirhisa matimba ya hina?

21 Yehovha u veke xikombiso lexinene hi ku tirhisa matimba ya yena hi ndlela leyinene. Hi fanele hi n’wi tekelela hilaha hi nga kotaka ha kona tanihi vanhu lava nga hetisekangiki. Hi nga tirhisa matimba ya hina kahle hi ku xixima vanhu lava nga ehansi ka hina. Ku engetela kwalaho, hi fanele hi wu endla hi moya-xiviri hinkwawo, ntirho wo chumayela lowu ponisaka, lowu Yehovha a hi nyikeke wona leswaku hi wu endla. (Varhoma 10:13, 14) Tsundzuka, Yehovha wa tsaka loko wena—tanihi moya-xiviri—u endla leswi nga ematimbeni ya wena. Xana mbilu ya wena a yi ku susumeteli leswaku u lava ku endla leswi nga ematimbeni ya wena, ku tirhela Xikwembu lexi, lexi twisisaka naswona xi nga ni rirhandzu? A ku na ndlela yin’wana yo antswa yo tirhisa matimba ya wena ku tlula leyi.

^ ndzim. 10 Hi minkarhi ya ku tsariwa ka Bibele, rito ra Xiheveru leri nge “nhonga” a ri vula nkhavi kumbe ximoko, xo fana ni lexi murisi a xi tirhisaka ku kongomisa tinyimpfu ta yena. (Pisalema 23:4) Hilaha ku fanaka, “nhonga” leyi vatswari va yi tirhisaka, yi vula nkongomiso wa rirhandzu, ku nga ri ku xupula hi ndlela ya tihanyi.

DYONDZA SWO TALA

Xana U Ta Titsona Swo Karhi Hikwalaho Ka Mfumo?

Twana ndlela leyi hi nga tirhisaka nkarhi, mali, matimba ni vuswikoti bya hina ha yona leswaku hi seketela Mfumo wa Xikwembu.